စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ စားသုံးသူရေးရာဦးစီးဌာန၊ စစ်ကိုင်းတိုင်းဒေသကြီး၊ ရွှေဘိုခရိုင်အနေဖြင့် ပြည်တွင်းကုန်သွယ်ရေးဖွံ့ဖြိုးမှုအတွက် နိုင်ငံတော်၏ သီးနှံကဏ္ဍစိုက်ပျိုး ထုတ်လုပ်တင်ပို့မှုတိုးတက်ရေး၊ သီးနှံထွက်ကုန်များ ပြည်ပပို့ကုန် မြှင့်တင်၍ နိုင်ငံခြားဝင်ငွေတိုးတက် ရှာဖွေနိုင်ရေးတို့အတွက် ပြည်ပပို့ကုန်အလားအလာရှိသောသီးနှံများအပြင် ပြည်တွင်းစားသုံးမှုဖူလုံရေးအတွက်စိုက်ပျိုးထွက်ရှိမှု၊ ဈေးနှုန်းဈေးကွက်အခြေအနေများ၊ တစ်ဧကစိုက်ပျိုး ထုတ်လုပ်မှုကုန်ကျစရိတ်နှင့် အကျိုးအမြတ်အခြေအနေတို့ကို ပြုစုတင်ပြလျက်ရှိပါသည်။
အောက်တိုဘာလ(၂၆)ရက်၊ နံနက်(၁၀:၃၀)နာရီအချိန်တွင် ရွှေဘိုခရိုင်၊ စားသုံးသူရေးရာဦးစီးဌာနမှ ခရိုင်ဦးစီးမှူးနှင့် ရွှေဘိုမြို့နယ်တာဝန်ခံတို့သည် ဂျုံသီးနှံဆိုင်ရာ အချက်အလက်များ သိရှိတင်ပြနိုင်ရန် အမှတ်(၆)ရပ်ကွက်၊ ဆုံကုန်းရပ်၊ ရွှေဘိုမြို့ရှိ ရွှေဥဒေါင်းဂျုံစက်လုပ်ငန်းရှင်နှင့် တွေ့ဆုံဆွေးနွေးခဲ့ပါသည်။ စစ်ကိုင်းတိုင်းဒေသကြီး၊ ရွှေဘိုခရိုင်သည် နှစ်စဉ်စပါးကိုသာအဓိကစိုက်ပျိုး၍ ဂျုံသီးနှံကို ဆောင်းသီးနှံ အဖြစ်ရွှေဘိုမြို့နယ်၊ ခင်ဦးမြို့နယ်၊ ရေဦးမြို့နယ်နှင့် ဒီပဲယင်းမြို့နယ်များတွင် အနည်းငယ်စိုက်ပျိုးပြီး ဝက်လက်မြို့နယ်တွင် အဓိကစိုက်ပျိုးပါသည်။ စိုက်ဧကအနေဖြင့် ၂၀၁၇-၂၀၁၈ခုနှစ်မှစတင်၍ နှစ်စဉ်ဧက သုံးသောင်းဝန်းကျင်ခန့် စိုက်ပျိုးလျက်ရှိပြီး တစ်ဧကလျှင်တင်းနှစ်ဆယ်ခန့်ထွက်ရှိသဖြင့် တစ်ခရိုင်လုံး အထွက်တင်းအနေဖြင့် ခြောက်သိန်းဝန်းကျင်ရှိကြောင်း သက်ဆိုင်ရာဌာန၏ စာရင်းများအရ သိရှိရပါ သည်။
ကုန်ကြမ်းရရှိမှုအခြေအနေနှင့် ဂျုံစက်များ၏ ကြိတ်ခွဲနိုင်မှု ရွှေဘိုခရိုင်တွင် ဂျုံသီးနှံကို ဝက်လက်မြို့နယ်နှင့် ဝက်လက်မြို့နယ်အဆုံး စစ်ကိုင်းမြို့နယ်နှင့် နယ်နိမိတ်အစပ်ရှိ ဆားတောင်မြို့တွင် အများဆုံးစိုက်ပျိုးပြီး ထွက်ရှိသော ကုန်ကြမ်းဂျုံသီးနှံများကို ဆားတောင်မြို့မှတစ်ဆင့် မန္တလေးဈေးကွက်သို့ တင်ပို့ရောင်းချကြသဖြင့် ရွှေဘိုမြို့တွင်ရှိသော ဂျုံစက် များမှလိုအပ်သော ဂျုံသီးနှံကုန်ကြမ်းကို ဆားတောင်မြို့နှင့် မန္တလေးမြို့တို့မှဝယ်ယူရကြောင်း၊ လက်ရှိ အခြေအနေများအရ ရွှေဘိုမြို့၊ စက်မှုဇုန်တွင် ရွှေဥဒေါင်းဂျုံစက်နှင့် ရွှေစင်မြင့်ဂျုံစက်တို့ရှိပြီး စက်ကြီး အမျိုးအစားမဟုတ်ဘဲ မိသားစုတစ်နိုင်တစ်ပိုင် စက်များသာဖြစ်ကြောင်း၊ အဆိုပါဂျုံစက်နှစ်လုံးမှ တစ်ရက်လျှင်(၈)နာရီကြာကြိတ်ခွဲ၍ ဂျုံ(၃၁)တင်းကြိတ်ခွဲနိုင်ပြီး ဂျုံမှုန့်ကုန်ချော(၆၂၀)ပိဿာထွက်ရှိ ကြောင်းသိရှိရပါသည်။
ဈေးနှုန်းနှင့် ဈေးကွက်အခြေအနေ ထွက်ရှိသော ဂျုံမှုန့်ကုန်ချောကို ဒေသတွင်းရောင်းချကြကြောင်း၊ ယခုအချိန်တွင် ယခင်ကထက် ကုန်ချောရောင်းချမှုဈေးကွက် ကျဆင်းလာပြီး ဒုံးပျံတံဆိပ်ဂျုံမှုန့်ကို လူသုံးများလာကြောင်း၊ စက်ရုံများ အနေဖြင့် တစ်လလျှင်(၁၀)ရက်ခန့် အလုပ်သများ ထိန်းရုံသာလည်ပတ်ရကြောင်း၊ လက်ရှိအချိန်တွင် ဂျုံတစ်တင်းလျှင် (၆၀၀၀ဝိ/-)ဖြင့် မန္တလေးမြို့မှဝယ်ယူပြီး ဂျုံတစ်တင်းကြိတ်ခွဲပါက ဂျုံမှုန့်(၂၀)ပိဿာ ထွက်ရှိကြောင်း၊ ဂျုံမှုန့်တစ်ပိဿာလျှင် (၃၅၀ဝိ/-)ဖြင့် ရောင်းချလျက်ရှိရာ စက်ရုံလုပ်ငန်းရှင်များအနေဖြင့် အကျိုးအမြတ်နည်းပါးကြောင်း၊ မိဘအမွေလုပ်ငန်းဖြစ်၍သာ ဆက်လက်လုပ်ကိုင်နေကြောင်း သတင်းရရှိ ပါသည်။
DOCA(စစ်ကိုင်း)