ရခိုင်ပြည်နယ်၊စားသုံးသူရေးရာဦးစီးဌာန၊ တောင်ကုတ်ခရိုင်ဦးစီးမှူးသည် တောင်ကုတ်မြို့ပေါ်ရှိ စားသောက်ကုန်ထုတ်လုပ်ဖြန့်ဖြူးရောင်းချသည့် လုပ်ငန်းရှင်(၇)ဦးအား ကုန်စည်များထုတ်လုပ်ရာတွင် စားသုံးသူများဘေးအန္တရာယ်ကင်းရှင်း စေရေးနှင့် ထုတ်ကုန်လုံခြုံစိတ်ချရမှုရှိစေရန် ရည်ရွယ်၍မြန်မာနိုင်ငံရဲတပ်ဖွဲ့နှင့် ပူးပေါင်း၍ (၁-၁၁-၂၀၂၂)နေ့ နံနက်(၁၀:၀၀)နာရီခန့် အချိန်တွင် ခရိုင်ဦးစီးမှူးရုံးတွင် တွေ့ဆုံဆွေးနွေးခြင်းဆောင်ရွက်ခဲ့ပါသည်။
အဆိုပါဆွေးနွေးပွဲတွင် ခရိုင်ဦးစီးမှူး ဦးမောင်ကျော်မြင့်မှ စားသုံးသူရေးရာဦးစီးဌာန၏ ၂၀၁၉ စားသုံးသူကာကွယ်ရေးဥပဒေပြဌာန်းထားရှိမှု၊ လုပ်ငန်းရှင်များ ထုတ်လုပ်သည့်ကုန်စည်နှင့်ပတ်သက်၍ အာမခံပေးရမည့် အရည်အသွေး၊ အချိန်အတွယ်ပမာဏနှင့် အလေးချိန်မှန်ကန်စေရေး၊ ဘေးအန္တရာယ် ကင်းရှင်းစေရေးတို့အား ဆွေးနွေးခြင်း၊ စားသုံးသူကာကွယ်ရေးဥပဒေ အခန်း (၁၈)ပါ ပြဌာန်းချက်အရ ကုန်စည်များ ထုတ်လုပ်ဖြန့်ဖြူး ရောင်းချရာတွင် စီးပွားရေးလုပ်ငန်းရှင်များ လိုက်နာဆောင်ရွက်ရမည့် ကုန်အညွှန်းအမှတ် အသားဖော်ပြချက်များ၊ မြန်မာနိုင်ငံစားသုံးသူရေးရာကော်မရှင်၏ ၂/၂၀၁၉ ပါ ညွှန်ကြားချက်အရ ကုန်စည်များ ထုတ်လုပ်ဖြန့်ဖြူးရောင်းချရာတွင် ကုန်စည်များပေါ်တွင် ဖော်ပြရမည့် ကုန်စည်အမျိုးအစားအလိုက် ကုန်အညွှန်းအမှတ်အသားများအား မြန်မာဘာသာဖြင့် ဖော်ပြရမည့် အချက်များအား ရှင်းလင်းဆွေးနွေးခြင်း၊ အကယ်၍လိုက်နာဆောင်ရွက်ခြင်းမရှိပါက စားသုံးသူကာကွယ်ရေးဥပဒေအရ အရေးယူဆောင်ရွက်နိုင်သည့် ပြစ်မှုနှင့်ပြစ်ဒဏ်များအား ဆွေးနွေးခဲ့ပါသည်။
DOCA(ရခိုင်)