စားသုံးသူရေးရာဦးစီးဌာန၊ မန္တလေးတိုင်းဒေသကြီး၊ မြင်းခြံခရိုင်ဦးစီးမှူးရုံးမှ ဝန်ထမ်းများသည် မြင်းခြံခရိုင်၊ အသေးစားစက်မှုလက်မှုလုပ်ငန်းဦးစီးဌာနမှ သင်ကြားပို့ချပေးသော လူသုံးကုန်ထုတ်လုပ်မှု သင်တန်းသို့ သင်တန်းတက်ရောက်နေသော သင်တန်းသူ/သင်တန်းသားများအား (၂.၁၁.၂၀၂၂)ရက်နေ့ နံနက် ၁၀:၀၀ နာရီအချိန်တွင် စားသုံးသူကာကွယ်ရေးအသိပညာပေးဟောပြောဆွေးနွေးခဲ့ပါသည်။
အဆိုပါဟောပြောဆွေးနွေးပွဲသို့တက်ရောက်လာသော ဌာနဆိုင်ရာတာဝန်ရှိသူ(၃)ဦးနှင့်သင်တန်း သား/သင်တန်းသူ(၂၀)ဦး စုစုပေါင်း(၂၅)ဦးတို့အား စားသုံးသူရေးရာဦးစီးဌာန၊ မြင်းခြံခရိုင်ဦးစီးမှူးရုံးရှိ ဦးစီးမှူး ဦးဝင်းထွန်းဦးမှ စားသုံးသူကာကွယ်ရေး ဥပဒေအခန်း(၁)ပါ အဓိပ္ပာယ်ဖော်ပြချက်များကို လည်းကောင်း၊ စားသုံးသူများ၏ အခွင့်အရေးနှင့် တာဝန်များအား တစ်ချက်ချင်း ဥပမာပေး၍လည်းကောင်း၊ စီးပွားရေးလုပ်ငန်းရှင်များ၏ တာဝန်နှင့် တားမြစ်ချက်များကိုလည်းကောင်း၊ ပြစ်မှုနှင့်ပြစ်ဒဏ်များကို လည်းကောင်း၊ ကုန်စည်နှင့် ဝန်ဆောင်မှု များသုံးစွဲဝယ်ယူသုံးစွဲရာတွင် နစ်နာဆုံးရှုံးမှုများရှိလာ၍ မြင်းခြံ ခရိုင်နှင့် တိုင်းဒေသကြီးအတွင်းရှိ စားသုံးသူများမှ တိုင်ကြားလာသည့် တိုင်ကြားမှုဖြစ်စဉ်များနှင့် တိုင်ကြားမှုဖြစ်စဉ်များအပေါ် မိမိတို့ ဌာနမှ ဖြေရှင်းဆောင်ရွက်ပေးမှုများအားလည်းကောင်း၊ ယခု သင်တန်းတက်ရောက်နေသူများသည် နောင်တွင် ကုန်ပစ္စည်းထုတ်လုပ်မည့်သူများဖြစ်၍ ဥပဒေအရ စီးပွားရေးလုပ်ငန်းရှင်များဖြစ်ပါကြောင်း၊ သို့ဖြစ်၍ စားသုံးသူကာကွယ်ရေးဥပဒေပါ စီးပွားရေးလုပ်ငန်း ရှင်များ၏ တာဝန်နှင့် တားမြစ်ချက်များ၊ ပြစ်မှု ပြစ်ဒဏ်များနှင့် အခန်း(၁၈)ပါ ကုန်အညွှန်းအမှတ် အသားဖော်ပြချက်များကိုလည်း သိရှိလိုက်နာ ရန် လိုအပ်ပါကြောင်း၊ စားသုံးသူများမှ ကုန်စည်နှင့် ဝန်ဆောင်မှုများသုံးစွဲခြင်းကြောင့် နစ်နာဆုံးရှုံးမှု များရှိလာလျှင် ဆက်သွယ်လာရောက်တိုင်ကြားနိုင်သလို၊ လုပ်ငန်းရှင်များအနေဖြင့်လည်း မိမိတို့ ထုတ်လုပ်မည့် ကုန်စည်အပေါ် ကုန်အညွှန်းအမှတ်အသား ထည့်သွင်းဖော်ပြခြင်းနှင့် ပတ်သက်၍ လည်းလာရောက်ဆွေးနွေးနိုင်ပါကြောင်း စသည်ဖြင့်အကျယ် တဝင့်ဟောပြောဆွေးနွေးကာ စားသုံးသူကာကွယ်ရေးဆိုင်ရာ အသိပညာပေး လက်ကမ်းစာစောင်များနှင့် ကုန်ပစ္စည်းအမျိုးအစားအလိုက် ထည့်သွင်းဖော်ပြရမည့် ကုန်အညွှန်းအမှတ်အသားအချက်အလက်များပါသော လက်ကမ်းစာစောင်များ ဖြန့်ဝေပေးခဲ့ကြောင်း သိရပါသည်။
DOCA(မန္တလေး)