“အဆွေတော်” လ္ဘက်လုပ်ငန်းရှင်နှင့် တွေ့ဆုံဆွေးနွေး

       စားသုံးသူရေးရာဦးစီးဌာန၊ မုံရွာခရိုင်ဦးစီးမှူးရုံးမှ ခရိုင်ဦးစီးမှူးနှင့် ဝန်ထမ်း(၃)ဦးတို့သည် နိုဝင်ဘာလ  ၁၅  ရက်နေ့ နံနက် ၁၀နာရီအချိန်တွင် မုံရွာမြို့၊ စက်မှုဇုံရပ်ကွက်ရှိ “အဆွေတော်” လ္ဘက်လုပ်ငန်းရှင်နှင့်တွေ့ဆုံ၍ စားသုံးသူကာကွယ်ရေး ဥပဒေ(၂၀၁၉)၊ အခန်း(၁၈)အရ ကုန်အညွှန်း အမှတ်အသားဆိုင်ရာပြဋ္ဌာန်းချက်များနှင့်ပတ်သက်၍ စီးပွားရေးလုပ်ငန်းရှင်များ သိရှိလိုက်နာဆောင်ရွက်နိုင်စေရန်အတွက် အသိပညာပေးဆွေးနွေးခဲ့ပါသည်။

     ထိုသို့တွေ့ဆုံဆွေးနွေးရာတွင် စားသုံးသူကာကွယ်ရေးဥပဒေပါ စားသုံးသူအခွင့်အရေးနှင့် တာဝန်များ၊ စီးပွားရေးလုပ်ငန်းရှင်၏ တာဝန်များ၊ ကုန်အညွှန်းအမှတ်အသားဖော်ပြခြင်း၊ ပြစ်မှု ပြစ်ဒဏ်များ၊ စားသုံးသူကာကွယ်ရေးဥပဒေ အခန်း(၁၈)ပါ ကုန်အညွှန်းအမှတ်အသားဖော်ပြခြင်းနှင့် ပတ်သက်၍ ပုဒ်မ ၄၁။ (ခ) နှင့်(ဆ) တို့တွင်ဖော်ပြထားသည့် ကုန်စည်၏ အမျိုးအမည်၊ အရွယ် အစား၊ အရေအတွက်နှင့် အသားတင်ပမာဏ၊ ထားသိုသိမ်းဆည်းမှုအညွှန်း၊ သုံးစွဲပုံနည်းလမ်း၊ ကျန်းမာ‌ ရေးဆိုင်ရာ ဘေးထွက်ဆိုးကျိုး သို့မဟုတ် ဓာတ်မတည့်ကြောင်းဖော်ပြချက်နှင့် ကြိုတင်သတိပေး ချက်တို့ကို မြန်မာဘာသာဖြင့်ဖြစ်စေ၊ မြန်မာဘာသာနှင့် အခြားဘာသာတစ်ခု သို့မဟုတ် တစ်ခု ထက်ပို၍ တွဲလျက်ဖြစ်စေ ရေးသားဖော်ပြရမည်ဖြစ်ကြောင်း အသိပညာပေးဆွေးနွေးခဲ့ပါသည်။

      “အဆွေ‌တော်” လ္ဘက်လုပ်ငန်းကို ယခင်ကမကွေးတိုင်းဒေသကြီး၊ ပခုက္ကူမြို့တွင် လုပ်ငန်းလုပ်ကိုင်ကြပြီး ၂၀၀၄ ခုနှစ်မှစ၍ မုံရွာမြို့သို့ပြောင်းရွှေ့လုပ်ကိုင်ကြကြောင်း၊ ပခုက္ကူဈေးကွက်နှင့် မုံရွာ ဈေးကွက်နှိုင်းယှဉ်ကပါက မုံရွာတွင်ဈေးကွက်ကောင်း၍ အလုပ်အကိုင်ပိုဖြစ်ကြောင်း၊လ္ဘက်ကုန်ကြမ်းကို ရှမ်းပြည်နယ် တောင်ပိုင်းပင်းတယမြို့မှ(၃၀) ပိဿာ တစ်အိတ်လျှင် အနိမ့်ဈေး(၂၀၀၀၀)မှ အမြင့်ဆုံးဈေး (၆၀၀၀၀)ဖြင့်ဝယ်ယူရကြောင်း၊နှစ်ပြန်ကြော်အတွက် ပဲကြီးဆန်ကို မုံရွာမြို့ပေါ်ရှိ ပွဲရုံများမှ တစ်တင်းလျှင် (၈၀၀၀၀)ကျပ်ဖြင့်ဝယ်ယူရကြောင်း၊ လ္ဘက်ကုန်ချောတစ်ပိဿာလျှင် (၃၀၀၀-၃၅၀၀) ကျပ်၊ နှစ်ပြန်ကြော်တစ်ပိဿာလျှင် (၇၅၀၀-၈၀၀၀)ကျပ်ဖြင့် မြို့တွင်းဆိုင်များ၊ စစ်ကိုင်းတိုင်းအထက်ပိုင်း ဆယ်စင်း၊ ရွှေတွင်းလမ်းဆုံ၊ က‌လေးဝ၊ ကလေးမြို့များနှင့် အရာတော်၊ ရွှေဘိုမြို့များသို့ ဖြန့်ဖြူးရောင်းချကြောင်း ဆွေးနွေးသိရှိရပြီး စားသုံးသူကာကွယ်ရေးဥပဒေပါ ကုန်အညွှန်းအမှတ်အသား လက်ကမ်းစာစောင်များ ဖြန့်ဝေပေးခဲ့ကြောင်း သတင်းရရှိပါသည်။

DOCA(စစ်ကိုင်း)