ရှမ်းပြည်နယ်(အရှေ့ပိုင်း)၊ ကျိုင်းတုံမြို့၊ စားသုံးသူရေးရာဦးစီးဌာန၊ ဒုတိယပြည်နယ် ဦးစီးမှူးရုံးမှ တာဝန်ရှိသူများသည် ၂၀၂၂ခုနှစ် ဒီဇင်ဘာလ (၂)ရက်နေ့ နံနက်(၀၉:၃၀)နာရီ အချိန်တွင် ကျိုင်းတုံမြို့၊ ရပ်ကွက်(၄)ရှိ အမျိုးသမီးအိမ်တွင်းမှုသက်မွေးလုပ်ငန်းပညာသင်တန်းကျောင်း၌ စားသုံးသူကာကွယ်ရေးအသိပညာပေးဟောပြောပွဲကို ကျင်းပပြုလုပ်ခဲ့ပါသည်။ ဟောပြောပွဲ မကျင်းပမီ အဆိုပါ ဟောပြောပွဲသို့ တက်ရောက်သည့် ဆရာမများနှင့် သင်တန်းသူစုစုပေါင်း (၃၈)ဦးကို လက်ကမ်းစာစောင်များ ဖြန့်ဝေပေးအပ်ခဲ့ပါသည်။
ယင်းဟောပြောပွဲတွင် ရှမ်းပြည်နယ်(အရှေ့ပိုင်း)၊ စားသုံးသူရေးရာဦးစီးဌာန၊ ဒုတိယ ပြည်နယ်ဦးစီးမှူးရုံးမှ ဒုတိယဦးစီးမှူး ဦးအောင်လင်းဦးက စားသုံးသူကာကွယ်ရေးဆိုင်ရာ လုပ်ငန်းနှင့် ပတ်သက်၍ ဆရာမများနှင့် သင်တန်းသူများအား အသိပညာပေးဟောပြောခဲ့ပါသည်။ စားသုံးသူကာကွယ်ရေးနှင့်ပတ်သက်၍ စားသုံးသူကာကွယ်ရေးဥပဒေ ပြဌာန်းချက်ပါ စားသုံးသူ၏ အဓိပ္ပါယ်ဖွင့်ဆိုချက်များ၊ စားသုံးသူအခွင့်အရေးနှင့်တာဝန်များ၊ စီးပွားရေးလုပ်ငန်းရှင်များ၏ တာဝန်နှင့်ဝတ္တရားများ၊ ကုန်စည်တစ်ခုကို ဝယ်ယူမည်ဆိုပါက စစ်ဆေးကြည့်ရှု့ရမည့် သိသင့်သိထိုက်သည့် အချက်များ၊ ဘေးဥပါဒ်အန္တရာယ်ဖြစ်စေနိုင်သည့် အစားအစာများနှင့် စားသုံးရန်သင့်မသင့် သိရှိသင့်သည့် ကုန်အညွှန်းအမှတ်အသားပါအချက်များအား ရှင်းလင်းပြောကြားခဲ့ပါသည်။
ယင်းနောက်တွင် စားသုံးသူအခွင့်အရေးနှင့်တာဝန်များ၊ စီးပွားရေးလုပ်ငန်းရှင်များအနေဖြင့် ကုန်စည်နှင့်စပ်လျဉ်း၍ အာမခံချက်ပေးခြင်း အချက်အလက်များအပါအဝင် လိုက်နာရမည့် တာဝန်များအား ဆရာမများနှင့် သင်တန်းသူများအား အပြန်အလှန်ဆွေးနွေးမှုများပြုလုပ်ခဲ့ပြီး အိမ်တွင်းမှု ကျောင်းစာကြည့်တိုက်အတွက် သက်ဆိုင်ရာ ကျောင်းအုပ်ဆရာမကြီးထံသို့ ဆိုးဆေးအကြောင်းနှင့် ဟင်းချိုမှုန့်၏ ကျန်းမာရေးအန္တရာယ် ဗဟုသုတလက်ကမ်းစာစောင်များ ပေးအပ်ခဲ့ပါသည်။
DOCA(ရှမ်း)