ပဲခူးတိုင်းဒေသကြီး၊ သာယာဝတီခရိုင်၊ အုတ်ဖိုမြို့နယ်တွင် စားအုန်းဆီ လက်လီ/လက်ကား ဖြန့်ဖြူးရောင်းချလျက်ရှိသော အရောင်းဆိုင်များကို မြို့နယ်စီမံအုပ်ချုပ်ရေးအဖွဲ့၊ဥက္ကဌ၏ ကြီးကြပ် ဦးဆောင်မှုဖြင့် မြို့နယ်စားအုန်းဆီဖြန့်ဖြူးရောင်းချမှု ကြီးကြပ်ရေးအဖွဲ့သည် ၂၀၂၆ခုနှစ် ဧပြီလ ၆ ရက်နေ့ နံနက် (၁၁:၀၀) နာရီအချိန်တွင် ကွင်းဆင်းစစ်ဆေးခဲ့ပါသည်။
ထိုစစ်ဆေးမှုတွင် စားအုန်းဆီဖြန့်ဖြူး ရောင်းချသူများအနေဖြင့် သတ်မှတ်ရည်ညွှန်း ဈေး အတိုင်းရောင်းချမှုရှိ/မရှိ၊အလေးချိန်မှန်ကန်မှုရှိ/မရှိ ဆီစာအုပ်များကို စနစ်တကျထုတ်ပေးရေးနှင့် ရရှိသောဆီပိဿာချိန်များကို ပြည်သူများထံ အမှန်တကယ်ရောင်းချမှုရှိ/မရှိကို စစ်ဆေးဆောင်ရွက် ခဲ့သည်။အုတ်ဖိုမြို့နယ်အနေဖြင့် မြို့ပေါ်(၁၀)ရပ်ကွက်၊ကျေးရွာအုပ်စု(၄၆)အုပ်စု၊အိမ်ထောင်စု တစ်စုလျှင် ဆီစာအုပ်တစ်အုပ်နှုန်းဖြင့် လက်ကားကိုယ်စားလှယ်(၁)ဦး၊လက်လှကိုယ်စားလှယ် (၄၁) ဦးမှ တစ်လလျှင်ဆီပေပါပေါင်း (၄၁၂)ပေပါဖြန့်ဖြူးရောင်းချလျက်ရှိပြီး ဌာနဆိုင်ရာများ၊အသင်းအဖွဲ့ များ၊ပင်စင်စားများနှင့် သာရေး၊နာရေးဆိုင်ရာကိစ္စများအတွက်ကိုလည်း တစ်လလျှင်တစ်ကြိမ် ရည်ညွှန်းဈေးနှုန်းဖြင့် ဖြန့်ဖြူးရောင်းချပေးလျက် ရှိကြောင်းသိရှိရပါသည်။
DOCA(ပဲခူး)