စားသုံးသူရေးရာဦးစီးဌာန၊ လွိုင်ကော်ခရိုင်ဦးစီးမှူးရုံးမှ ဝန်ထမ်းများသည် ၂၀၂၂ ခုနှစ်၊ ဒီဇင်ဘာလ (၂၇)ရက် နေ့၊ နံနက်(၁၀:၀၀)နာရီအချိန်တွင် လွိုင်ကော်မြို့ ဈေးပိုင်းရပ်ကွက်၊ မင်္ဂလာရပ်ကွက်နှင့်ရွှေတောင်ရပ်ကွက်ရှိစိုက်ပျိုးရေးသုံးပစ္စည်းဓာတ်မြေဩဇာနှင့် ပိုးသတ်ဆေးဆိုင်များသို့ အရည်အသွေးနိမ့်မြေဩဇာများအား ထိုင်းနိုင်ငံပြည်တွင်းသုံးမြင်းပျံအိတ်ခွံများဖြင့် ပြန်လည်ထုပ်ပိုးပြီး အိုင်စီပီမြင်းပျံမြေဩဇာအိတ်အတုများပြုလုပ်လျက် ဈေးကွက်အတွင်းရောင်းချနေခြင်းရှိ/မရှိ မိတ်ဖက်ဌာနများဖြစ်သော မြို့နယ်ရဲတပ်ဖွဲ့၊ မြို့နယ်အထွေထွေအုပ်ချုပ်ရေးဦးစီးဌာန၊ ပြည်နယ်စိုက်ပျိုးရေးဦးစီးဌာန၊ အစားအသောက်နှင့်ဆေးဝါးကွပ်ကဲရေးဦးစီးဌာန ၊ မြို့နယ်စည်ပင်သာယာရေးအဖွဲ့တို့ နှင့်ပူးပေါင်း၍ ဈေးကွက်စောင့်ကြည့်ကွင်းဆင်းစစ်ဆေးခဲ့ပါသည်။
ထိုသို့ဈေးကွက်စောင့်ကြည့်စစ်ဆေးရာတွင် စိုက်ပျိုးရေးသုံးပစ္စည်းဓာတ်မြေဩဇာနှင့် ပိုးသတ် ဆေးအရောင်းဆိုင်များတွင် အိုင်စီပီမြင်းပျံမြေဩဇာအတုများ ရောင်းချနေမှုမရှိကြောင်း စစ်ဆေးတွေ့ရှိရပြီး စီးပွားရေးလုပ်ငန်းရှင်များအနေဖြင့် ဈေးနှုန်းသက်သာသော အရည်အသွေးနိမ့် မြေဩဇာများကို ထိုင်းနိုင်ငံပြည်တွင်းသုံး မြင်ပျံအိတ်ခွံများဖြင့် ပြန်လည်ထုတ်ပိုးပြီး အိုင်စီပီမြင်းပျံမြေဩဇာ အတုများပြုလုပ်လျက် ဈေးကွက်အတွင်း လိမ်လည်ဖြန့်ဖြူးရောင်းချခြင်း မပြုကြရန်၊ တရားဝင်မှတ်ပုံတင်ထားသော ဓာတ်မြေဩဇာနှင့် ပိုးသတ်ဆေးများ တင်သွင်းရောင်းချရန်၊ စိုက်ပျိုးသူတောင်သူများ ဘေးအန္တရာယ်ကင်းစေရန် သုံးစွဲပုံအညွှန်းကို မြန်မာဘာသာဖြင့် တိကျစွာဖော်ပြထားသော ဓာတ်မြေဩဇာနှင့် ပိုးသတ်ဆေးများကိုသာ တင်သွင်းရောင်းချကြရန်၊ သတ်မှတ်ချက်နှင့် မကိုက်ညီသော ဓာတ်မြေဩဇာနှင့် ပိုးသတ်ဆေးများ ဈေးကွက်အတွင်းတွေ့ရှိပါက စိုက်ပျိုးရေးဦးစီးဌာန၏ ဥပဒေအရသော်လည်းကောင်း၊ စားသုံးသူကာကွယ်ရေး ဥပဒေအရသော်လည်းကောင်း အရေးယူခံရနိုင်ကြောင်း အသိပညာပေးဆောင်ရွက်ခဲ့ကြောင်း သတင်းရရှိပါသည်။
DOCA(ကယား)