စစ်ကိုင်းခရိုင်၊ စားသုံးသူရေးရာဦးစီးဌာန၊ ခရိုင်ဦးစီးမှူး ဦးတင်အောင်ကျော် ဦးဆောင်၍ ခရိုင်စစ်ဆေးအရာရှိ၊ ဌာနခွဲတာဝန်ခံ၊ စစ်ကိုင်းခရိုင် ဦးစီးမှူးရုံးရှိ ဝန်ထမ်းများ၊ မြင်းမူ၊ မြောင်မြို့နယ်တာဝန်ခံများနှင့် မိတ်ဖက်ဌာနဆိုင်ရာများနှင့်အတူ (၁၄.၇.၂၀၂၀)ရက်နေ့၊ နံနက်(၁၀းဝ၀) နာရီအချိန်တွင် မြင်းမူမြို့နယ်၊ မြောက်ပိုင်းရပ်ကွက်ရှိ ကုန်စုံဆိုင်(၅)ဆိုင်နှင့် (၁၆.၇.၂၀၂၀) ရက်နေ့၊ နံနက်(၁၀:ဝ၀) နာရီအချိန်တွင် မြောင်မြို့နယ် တောင်ပိုင်းရပ်ကွက်၊ မြောက်ပိုင်းရပ်ကွက် ကုန်စုံဆိုင်(၄)ဆိုင် တွင် ထုတ်ကုန်လုံခြုံစိတ်ချရမှုရှိစေရန်၊ စားသုံးသူပြည်သူများအတွက် ဘေးဥပါဒ် အန္တရာယ်ကင်းရှင်းမှု ရှိ/မရှိ၊ ရောင်းချသော ကုန်စည်များတွင် မြန်မာဘာသာဖြင့် ကုန်အညွှန်း အမှတ်အသား ဖော်ပြရာ၌ ပြည့်စုံစွာ ဖော်ပြထားခြင်း ရှိ/မရှိ၊ သက်ဆိုင်ရာဌာနများမှ တားမြစ်ထားသည့် ကုန်ပစ္စည်းများ ရောင်းချခြင်း ရှိ/မရှိ ဈေးကွက်စောင့်ကြည့် စစ်ဆေးခဲ့ပါသည်။
ထိုသို့ ကွင်းဆင်းစစ်ဆေးရာတွင် ကုန်အညွှန်းအမှတ်အသားဖော်ပြထားခြင်း မရှိသော ကုန်စည်အချို့ စစ်ဆေးတွေ့ရှိရ၍ ပြည့်စုံမှန်ကန်မှုရှိသော ကုန်စည်များကို ရွေးချယ်ဝယ်ယူရောင်းချရန်နှင့် ဆိုင်သို့ ပို့ဆောင်ပေးသော လုပ်ငန်းရှင်များကိုလည်း ကုန်အညွှန်းအမှတ်အသား ပြည့်စုံစွာ ဖော်ပြပေးရန်နှင့် ဆက်လက်ရောင်းချခြင်းမပြုရန် သတိပေးတားမြစ်ခဲ့ပြီး ဝန်ခံချက်တွင် လက်မှတ်ရေးထိုးစေ၍ အသိပေးခြင်းများ ဆောင်ရွက်ခဲ့ပါသည်။ ဝယ်ယူခဲ့သည့်ဆိုင်များကိုလည်း ကုန်အညွှန်းအမှတ်အသားပါ သတ်မှတ်ချက်များနှင့်အညီ ကိုက်ညီအောင်ဖော်ပြပေးရေး တဆင့်ပြောကြားပေးရန် ဆွေးနွေးပြောကြားခဲ့ကြောင်း သတင်းရရှိခဲ့ပါသည်။
စစ်ကိုင်းတိုင်းဒေသကြီး
စားသုံးသူရေးရာဦးစီးဌာန