စားသုံးသူကာကွယ်ရေးလုပ်ငန်းများကို အများပြည်သူသိရှိစေရန်နှင့် ပိုမိုထိရောက်သော အသိပညာပေးလုပ်ငန်းများ ဆက်လက်ဆောင်ရွက်နိုင်ရန် ရည်ရွယ်၍ ကမ္ဘာ့စားသုံးသူအခွင့်အရေးများနေ့ကို ၂၀၂၃ခုနှစ်၊ မတ်လ ၁၅ ရက်နေ့၊ နံနက်(၁၀:၀၀)နာရီအချိန်တွင် ချင်းပြည်နယ်အစိုးရအဖွဲ့ရုံးခန်းမ၌ ကျင်းပပြုလုပ်ခဲ့ပါသည်။
အခမ်းအနားတွင် ချင်းပြည်နယ်ဝန်ကြီးချုပ် ဒေါက်တာဝုန်ဆွန်းထန်က အဖွင့်အမှာစကားပြောကြားရာတွင် စားသုံးသူကာကွယ်ရေးလုပ်ငန်းများ စဉ်ဆက်မပြတ် အကောင်အထည်ဖော်ဆောင်ရွက်နိုင်ရန်အတွက် အခုလို ကမ္ဘာ့စားသုံးသူအခွင့်အရေးများနေ့ အခမ်း အနားတွင် တက်ရောက်အဖွင့်အမှာစကား ပြောကြားသည့်အတွက် ဂုဏ်ယူဝမ်းမြောက်မိပါကြောင်း၊ စားသုံးသူပြည်သူများ၏ အခွင့်အရေးကိုကာကွယ်ခြင်းနှင့် အကျိုးစီးပွားကို မြှင့်တင်ပေးခြင်း လုပ်ငန်းများကို တစိုက်မတ်မတ် လုပ်ဆောင်ပေးရမည်ဖြစ်ကြောင်း၊ မိမိ တို့နိုင်ငံဟာ ဖွံ့ဖြိုးဆဲနိုင်ငံဖြစ်သည့်အလျာက် စီးပွားရေးလုပ်ငန်းရှင်များက စီးပွားကျင့်ဝတ်နှင့်မညီဘဲ မသမာသောနည်းလမ်းများဖြင့် အများပြည်သူအပေါ် ဘေးအန္တရာယ်ဖြစ်စေနိုင်သော စားသုံးကုန်ပစ္စည်းများသော်လည်းကောင်း၊ လူသုံးကုန်ပစ္စည်းများသော်လည်း ကောင်း ဝယ်ယူထုတ်လုပ်တင်သွင်းရောင်းချလျက်ရှိသဖြင့် မိမိတို့ မိသားစုတစ်ခုတည်း သာမက တိုင်းပြည်၏ လုံခြုံရေးနှင့်ကာကွယ်ရေးကိုပါ ရိုက်ချိုးလာနိုင်သည့် မဟာဗျူဟာမြောက် လုံခြုံရေးတိုက်ကွက်လည်း ဖြစ်လာနိုင်သည့်အတွက် ကျွန်ုပ်တို့အားလုံး သတိပြုဖို့ လိုအပ်မည်ဖြစ်ကြောင်း၊ စားသုံးသူကာကွယ်ရေးလုပ်လုပ်ငန်းများ လုပ်ဆောင်နေသည့် ပြည်နယ် စားသုံးသူရေးရာကော်မတီအဖွဲ့ကိုလည်း ကျွန်ုပ် ဝန်ကြီးချုပ်ကိုယ်တိုင် အားပေးကူညီ ဆောင်ရွက်သွားမည်ဖြစ်ကြောင်း ပြောကြားခဲ့ပါသည်။ ထို့နောက် ပြည်နယ်စားသုံးသူရေးရာကော်မတီဥက္ကဌ၊ စီးပွားရေးရာဝန်ကြီး ဦးဟန်ကျင့်ဇမ်းက ပြည်နယ်စားသုံးသူရေးရာ ကော်မတီအနေဖြင့် ကုန်စည်၊ ဝန်ဆောင်မှုနှင့်ပတ်သက်၍ ဈေးကွက်စောင့်ကြည့်စစ်ဆေးခြင်း၊ အသိပညာပေးခြင်းလုပ်ငန်းများကို လက်တွေ့ကျကျ ဆောင်ရွက်သွားရန်နှင့် ပြည်သူများ အားကိုးထိုက်သည့် ကော်မတီဖြစ်လာစေရန် ဝိုင်းဝန်းပူးပေါင်းဆောင်ရွက်သွားကြဖို့ အလေးအနက် တိုက်တွန်းကြောင်း ပြောကြားခဲ့ပါသည်။ နိဂုံးချုပ်အနေဖြင့် ချင်းပြည်နယ် ဝန်ကြီးချုပ်က ယနေ့ကျင်းပတဲ့ ကမ္ဘာ့စားသုံးသူအခွင့်အရေးများနေ့ အခမ်းအနားသို့ တက်ရောက်လာကြသော ဝန်ကြီးများ၊ ဌာနဆိုင်ရာလူကြီးများ၊ ဆရာ/မများနှင့် ကျောင်းသား/သူများအနေဖြင့် စားသုံးသူပြည်သူများ၏ အခွင့်အရေးနှင့်အကျိုးပွားကို အကာအကွယ် ပေးခြင်း၊ မြှင့်တင်ပေးခြင်း လုပ်ငန်းများ ဆက်လက်လှုပ်ရှား ဆောင်ရွက်သွားကြရန် တိုက်တွန်းမှာကြားလိုကြောင်း ပြောကြားခဲ့ပြီးနောက် စားသုံးသူကာကွယ်ရေးဆိုင်ရာ ဉာဏ်စမ်းပဟေဠိပြိုင်ပွဲတွင် ဆုရသည့် ကျောင်းသား/သူများအား ဆုငွေများအသီးသီး ချီးမြှင့်ပေးခဲ့ပါသည်။ အဆိုပါအခမ်းအနားတွင် လူဦးရေ စုစုပေါင်း (၁၀၀)ကျော် တက်ရောက် ခဲ့ပါသည်။
DOCA(ချင်း)