စားသုံးသူရေးရာဦးစီးဌာန၊ မွန်ပြည်နယ်ဦးစီးမှူးရုံးမှ ဦးစီအရာရှိဦးမျိုးလွင်နှင့် မုဒုံမြို့နယ် တာဝန်ခံဦးစည်သူသည် (၁၇.၅.၂၀၂၃)ရက်နေ့တွင် မုဒုံမြို့နယ်၊ မြို့မ(၄)ရပ်ကွက်ရှိ စိန်လူထုမေတ္တာဆန်စက်သို့သွားရောက်၍ ဆန်စက်ပိုင်ရှင်ဦးမြင့်သိန်းအား တွေ့ဆုံဆွေးနွေးခဲ့သည်။
ထိုသို့ တွေ့ဆုံဆွေးနွေးရာတွင် ဆန်စက်လည်ပတ်နိုင်မှုအခြေအနေ၊ ကြိတ်ခွဲအင်အားနှင့် ဆန်စျေး၊ စပါးစျေး၊ သိုလှောင်ထားရှိမှုအခြေအနေ၊ ရောင်းဝယ်မှုအခြေအနေများနှင့် ကြုံတွေ့ရသော အခက်အခဲများအား တွေ့ဆုံမေးမြန်းခဲ့ရာ စိန်လူထုမေတ္တာဆန်စက်မှာ ၂၄ နာရီလျှင် တန် (၄၀) ကျဆန်စက်ဖြစ်ပြီး တစ်နေ့လျှင် (၆) နာရီလည်ပတ်ရသဖြင့် စပါးတင်း (၁၅၀၀) ကျော် ကြိတ်ခွဲရကြောင်း၊ ကုန်ကြမ်းများကို မုဒုံမြို့နယ်နှင့် သံဖြူဇရပ်မြို့နယ်တို့မှ ဝယ်ယူစုဆောင်ပြီး ကုန်ချောများကို မုဒုံမြို့နယ်၊ ရေးနှင့် ထားဝယ်မြို့များသို့ တင်ပို့ရောင်းချကြောင်း သိရှိရပါသည်။ အခက်အခဲများအနေဖြင့် ယခုအချိန်တွင် လျှပ်စစ်မီးပြတ်တောက်မှုရှိသဖြင့် စက်လည်ပတ်ချိန် နည်းကြောင်း၊ လျှပ်စစ်မီးလာသည့်အချိန်တွင် စက်လည်ပတ်ရသဖြင့် ဆန်စက်လုပ်သားများ အချိန်ပိုဆင်းရသည့်အတွက် ကုန်ကျစရိတ်ပိုမိုများပြားကြောင်း သိရှိရပါသည်။
ထို့နောက် စားသုံးသူကာကွယ်ရေးဥပဒေပါ စီးပွားရေးလုပ်ငန်းရှင်များ လိုက်နာရမည့် တာဝန်များ၊ အလေးချိန်ပြည့်မီရေးနှင့် အရည်အသွေးကောင်းမွန်သော ဆန်များအား စားသုံးသူ စိတ်ကြိုက်ရွေးချယ်ဝယ်ယူနိုင်ရေး ထုတ်လုပ်ကြရန် တွေ့ဆုံဆွေးနွေးခဲ့ကြောင်း သိရှိရပါသည်။
DOCA(မွန်)