သတင်းနှင့် လှုပ်ရှားမှုများ

       “အမျိုးသားစားသုံးသူအကာအကွယ်ပေးရေးအစီအစဉ်” အပြီးသတ်ဆွေးနွေးရေး အလုပ်ရုံ ဆွေးနွေးပွဲဖွင့်ပွဲအခမ်းအနားကို ၂၀၂၀ ပြည့်နှစ် ဖေဖော်ဝါရီလ ၂၅ ရက်နေ့၊ နံနက်ပိုင်းတွင် နေပြည်တော်ရှိ HILTON HOTEL ကျင်းပပြုလုပ်ခဲ့ရာ မြန်မာနိုင်ငံစားသုံးသူကာကွယ်ရေး ကော်မရှင်၏ ဒုတိယဥက္ကဋ္ဌ ဖြစ်သူ စီးပွားရေးနှင့်ကူးသန်းရောင်းဝယ်ရေးဝန်ကြီးဌာန ဒုတိယဝန်ကြီး ဦးအောင်ထူး၊ မြန်မာနိုင်ငံစားသုံးသူကာကွယ်ရေးကော်မရှင်အဖွဲ့ဝင်များ၊ ညွှန်ကြားရေးမှူးချုပ်များ၊ ဒုတိယအမြဲတမ်းအတွင်းဝန်၊ ဒုတိယညွှန်ကြားရေးမှူးချုပ်များနှင့် သက်ဆိုင်ရာဌာနများမှ တာဝန်ရှိသူများ၊ စားသုံးသူရေးရာဦးစီးဌာန ရုံးချုပ်နှင့် ပြည်ထောင်စု နယ်မြေ/ တိုင်းဒေသကြီးနှင့် ပြည်နယ်များမှ တိုင်းဒေသကြီး/ပြည်နယ် ဦးစီးမှူးများ၊ GIZ မှ Regional Economic Integration ၏ Head of Components ဖြစ်သူ  Dr. Astrid Faust နှင့် တာဝန်ရှိသူများ တက်ရောက်ခဲ့ကြပါသည်။

         အဆိုပါ အခမ်းအနားတွင် စီးပွားရေးနှင့်ကူးသန်းရောင်းဝယ်ရေးဝန်ကြီးဌာန ဒုတိယဝန်ကြီး က အဖွင့်အမှာစကားပြောကြားရာတွင် စားသုံးသူရေးရာဦးစီးဌာနအနေဖြင့် စားသုံးသူကာကွယ်ပေးရေးလုပ်ငန်းများကို အာဆီယံနိုင်ငံများနှင့်တပြေးညီ လိုက်ပါဆောင်ရွက်နိုင်ရေး၊ တစ်နိုင်ငံလုံး ပိုမိုကျယ်ပြန့်စွာဆောင်ရွက်နိုင်ရေးနှင့် ဦးစားပေး ဆောင်ရွက်ရမည့် နယ်ပယ်ကဏ္ဍများ ချမှတ်ရာတွင် သက်ဆိုင်ရာဝန်ကြီးဌာနများ အစိုးရမဟုတ်သော စားသုံးသူကာကွယ်ရေးဆိုင်ရာအသင်းအဖွဲ့များ ပုဂ္ဂလိကကဏ္ဍမှ အသင်းအဖွဲ့များနှင့် စဉ်ဆက်မပြတ် ပူးပေါင်းဆောင်ရွက်နိုင်ရေးတို့အတွက် အမျိုးသား စားသုံးသူအကာအကွယ်ပေးရေးအစီအစဉ်ကို EU-GIZ (Trade Development Programme) အကူအညီဖြင့် ရေးဆွဲခဲ့ရာ မူကြမ်းအဆင့်ရရှိခဲ့ပြီးဖြစ်ကြောင်းနှင့် ယခုအလုပ်ရုံဆွေးနွေးပွဲသည်  အမျိုးသားစားသုံးသူအကာအကွယ်ပေးရေးအစီအစဉ်(မူကြမ်း)အား အပြီးသတ်ရေးဆွဲရန်အတွက် GIZ မှ ကျွမ်းကျင်ပညာနှင့် စားသုံးသူရေးရာဦးစီးဌာန တာဝန်ရှိသူများ သက်ဆိုင်ရာ ဌာန အဖွဲ့အစည်းများမှ တာဝန်ရှိသူများက ဆွေးနွေးအပြီးသတ်ဆောင်ရွက်သွားမည်ဖြစ်ကြောင်း ပြောကြားခဲ့ပါသည်။

         ဆက်လက်၍ စားသုံးသူရေးရာဦးစီးဌာန၊ ညွှန်ကြားရေးမှူးချုပ်က အမျိုးသား စားသုံးသူအကာအကွယ်ပေးရေးအစီအစဉ် ကို EU- GIZ အကူအညီဖြင့် စတင်ရေးဆွဲခဲ့ပြီး အလုပ်ရုံဆွေးနွေးပွဲ (၂)ကြိမ် ကျင်းပခဲ့ရာ ဦးစားပေးကဏ္ဍကြီး (၅) ရပ်ကို ဖော်ထုတ်နိုင်ခဲ့ ပါကြောင်း၊ စားသုံးသူရေးရာဦးစီးဌာနအနေဖြင့် ပြည်ထောင်စုနယ်မြေအပါအဝင် တိုင်းဒေသကြီး နှင့်ပြည်နယ်အသီးသီးတွင် သက်ဆိုင်ရာဝန်ကြီးဌာနများနှင့်ပူးပေါင်း၍ စျေးကွက်အတွင်း ကွင်းဆင်းစစ်ဆေးခြင်း၊ စစ်ဆေးရေးအရာရှိများ ခန့်အပ်တာဝန်ပေးအပ်ခြင်း၊ စားသုံးသူ ကာကွယ်ရေးဥပဒေအပြင် တည်ဆဲဥပဒေများနှင့်အညီ အရေးယူဆောင်ရွက်ခြင်း၊ စားသုံးသူများ၏ တိုင်ကြားမှုများကို လက်ခံဖြေရှင်းအရေးယူဆောင်ရွက်ခြင်း၊ စားသုံးသူများနှင့် လုပ်ငန်းရှင်များကို အသိပညာပေးခြင်းများဆောင်ရွက်လျှက်ရှိသကဲ့သို့ အာဆီယံစားသုံးသူကာကွယ်ရေးကော်မတီနှင့် ပူးပေါင်း၍ အာဆီယံစားသုံးသူကာကွယ်ရေးမဟာဗျူဟာ လုပ်ငန်းစီမံချက် (၂၀၁၆-၂၀၂၅) ကို လိုက်ပါအကောင်အထည်ဖော်ဆောင်ရွက်လျှက်ရှိပါကြောင်း၊ ယနေ့ကျင်းပသော အလုပ်ရုံဆွေးနွေးပွဲသည် အမျိုးသားစားသုံးသူအကာအကွယ် ပေးရေးအစီအစဉ်အား အပြီးသတ်ရေးဆွဲနိုင်ရေး ကျင်းပခြင်းဖြစ်သောကြောင့် စားသုံးသူရေးရာဦးစီးဌာနက ပြုစုထားသော မူကြမ်းအား တက်ရောက်လာသူများက မိမိတို့၏ အတွေ့အကြုံဗဟုသုတများအပေါ် အခြေခံပြီး ပါဝင်ဆွေးနွေးပေးစေလိုပါကြောင်း ပြောကြားခဲ့ပါသည်။

     အမျိုးသားစားသုံးသူကာကွယ်ပေးရေးအစီအစဉ်အား အပြီးသတ်ရေးဆွဲရေး အလုပ်ရုံဆွေးနွေးပွဲ ကို ၂၅.၂.၂၀၂၀ မှ ၂၆.၂.၂၀၂၀ ရက်နေ့ထိ GIZ အဖွဲ့အစည်း၏ ASEAN Protect Project ၏ အကူအညီဖြင့်ကျင်းပခဲ့ပြီး အမျိုးသားစားသုံးသူကာကွယ်ပေးရေးအစီအစဉ်(မူကြမ်း)ပါ မူဝါဒများနှင့် လုပ်ငန်းစဉ်များအပေါ် ဖြည့်စွက်ပြင်ဆင်ခြင်းများ ဆောင်ရွက်နိုင်ခဲ့ကြောင်း သတင်းရရှိပါသည်။    

စားသုံးသူရေးရာဌာနခွဲ

    စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ စားသုံးသူရေးရာဦးစီးဌာန၊ ရှမ်းပြည်နယ်ဦးစီးမှူးရုံးမှ ပြည်နယ်ဦးစီးမှူးဦးတင့်လွင်ဦး ဦးဆောင်သောဝန်ထမ်းများသည် ၁၈.၂.၂ဝ၂ဝ ရက်နေ့တွင် လွိုင်လင်ခရိုင်၊ လဲချားမြို့၊ သီရိဟံသာခန်းမ၌လည်းကောင်း၊  အ.ထ.က(လဲချား) ကျောင်း၌လည်းကောင်း စားသုံးသူကာကွယ်ရေးဆိုင်ရာ အသိပညာပေးဆွေးနွေးဟောပြောပွဲများကို ဆောင်ရွက်ခဲ့ကြပါသည်။

         လဲချားမြို့၊သီရီဟံသာခန်းမတွင်ပြုလုပ်သောဆွေးနွေးပွဲတွင် ပြည်နယ်ဦးစီးမှူး ဦးတင့်လွင်ဦး က စားသုံးသူရေးရာဦးစီးဌာနပေါ်ပေါက်လာခဲ့သည့်သမိုင်းကြောင်းနှင့် ဌာနမှ လုပ်ဆောင်နေသည့် လုပ်ငန်းများအကြောင်း၊ ကုန်စည်/ဝန်ဆောင်မှုများကြောင့် စားသုံးသူများအနေဖြင့်နစ်နာမှုဆိုင်ရာ ကိစ္စရပ်များရှိလာပါက စားသုံးသူသတင်းပြန်ကြားရေးနှင့် တိုင်ကြားမှုစင်တာ (CICC) များသို့ တိုင်ကြားနိုင်ပါကြောင်း၊ တိုင်ကြားမှုများနှင့်ပတ်သက်၍လည်း ဖြေရှင်းဆောင်ရွက်ပေးခဲ့သည့် အကြောင်းအရာများကို ရှင်းလင်းဆွေးနွေးခဲ့ပါသည်။ ဆက်လက်၍ တာဝန်ရှိသူတစ်ဦး က ၂ဝ၁၉ ခုနှစ်၊ စားသုံးသူကာကွယ်ရေး ပြဌာန်းချက်တွင်ပါဝင်သော စားသုံးသူများ၏ အခွင့်အရေးနှင့် တာဝန်များအကြောင်း၊ စီးပွားရေးလုပ်ငန်းရှင်များ၏ တာဝန်နှင့်တားမြစ်ချက်များ အကြောင်း၊ ကုန်အညွှန်းအမှတ်အသားဆိုင်ရာအချက်အလက်များ အကြောင်းနှင့် ပြစ်မှုပြစ်ဒဏ် များအကြောင်းကို အသေးစိတ်ရှင်းလင်းဆွေးနွေးခဲ့ပြီး တက်ရောက်လာသူများ၏ မေးမြန်းဆွေးနွေးမှုများကို ပြည်နယ်ဦးစီးမှူးက ပြန်လည်ရှင်းလင်းဆွေးနွေးခဲ့ပါသည်။ အဆိုပါ ဆွေးနွေးပွဲသို့  ဌာနဆိုင်ရာများ၊ ရပ်ကွက်နေပြည်သူ/သားများ၊ လက်လီ/လက်က္ကား ရောင်းချသူများစုစုပေါင်း(၁၆၆) ဦး တက်ရောက်ခဲ့ကြပါသည်။

      အလားတူ အ-ထ-က(လဲချား) ကျောင်းတွင် တာဝန်ရှိသူများက ၂ဝ၁၉ စားသုံးသူဥပဒေ ပေါ်ပေါက်လာပုံများအကြောင်း၊ စားသုံးသူအခွင့်အရေးနှင့်တာဝန်များအကြောင်း၊ ကုန်အညွှန်းအမှတ်အသားဆိုင်ရာအချက်အလက်များအကြောင်း၊ ကုန်စည်/ဝန်ဆောင်မှုများကြောင့် စားသုံးသူများအနေဖြင့်နစ်နာမှုဆိုင်ရာ ကိစ္စရပ်များ ရှိလာပါက စားသုံးသူသတင်းပြန်ကြားရေးနှင့် တိုင်ကြားမှု လက်ခံဆောင်ရွက်ရေးစင်တာ(CICC)များတွင် တိုင်ကြားနိုင်ပါကြောင်းနှင့် တိုင်ကြားမှုများနှင့်ပတ်သက်၍ ဖြေရှင်းဆောင်ရွက်ပေးခဲ့သည့်အကြောင်းအရာများကို ရှင်းလင်းဆွေးနွေးခဲ့ပြီး ဆရာ/ဆရာမများနှင့် ကျောင်းသား/သူ စုစုပေါင်း(၂၁၂)ဦး တက်ရောက်ခဲ့ကြပါသည်။ ထို့နောက် ကျောင်းမုန့်စျေးတန်းရောင်းချသူများ ကိုလည်း ကုန်အညွှန်းအမှတ်အသားပြည့်စုံသည့်ကုန်စည်များကိုသာ ရောင်းချရန်အတွက်လည်း အသိပညာပေးခဲ့ကြောင်း သတင်းရရှိပါတယ်။

တောင်ကြီးခရိုင်

စားသုံးသူရေးရာဦးစီးဌာန

       ၂၀၂၀ ပြည့်နှစ်၊ ဖေဖော်ဝါရီလ (၂၀) ရက်နေ့တွင် ကယားပြည်နယ်၊ စားသုံးသူရေးရာဉီးစီးဌာန၊ ပြည်နယ်ဉီးစီးမှူးရုံး အစည်းအဝေးခန်းမ၌ ကုန်အညွှန်းအမှတ်အသားဖော်ပြခြင်းနှင်စပ်လျဉ်း၍ မြန်မာနိုင်ငံစားသုံးသူရေးရာကော်မရှင်၏ ၂/၂၀၁၉ ညွှန်ကြားချက်အား ကယားပြည်နယ်အတွင်းရှိ ကုန်စည်များ ထုတ်လုပ်၊ တင်သွင်း၊ ဖြန့်ဖြူး ရောင်းချနေသော လုပ်ငန်းရှင်များသိရှိလိုက်နာနိုင်ရေး အသိပေးရှင်းလင်းဆွေးနွေးပွဲ ကျင်းပခဲ့ရာ သက်ဆိုင်ရာဌာနများ၊ သတင်းမီဒီယာများနှင့် လုပ်ငန်းရှင် စုစုပေါင်း (၄၀) ဉီးတက်ရောက်ခဲ့ပါသည်။

      ဆွေးနွေးပွဲတွင် စားသုံးသူရေးရာဉီးစီးဌာန၊ ပြည်နယ်ဉီးစီးမှူး ဉီးကျော်ဝင်းက မြန်မာနိုင်ငံစားသုံးသူရေးရာကော်မရှင်၊ စားသုံးသူကာကွယ်ရေးဉပဒေထုတ်ပြန်ချက်အရ ကုန်အညွှန်းအမှတ်အသားဆိုင်ရာ ပြဌာန်းချက်များသည် ဉပဒေပြဌာန်းပြီး တစ်နှစ်ပြည့်မြောက် သည့်နေ့ဖြစ်သော ၂၀၂၀ပြည့်နှစ် မတ်လ ၁၆ ရက်နေ့မှစ၍ အာဏာတည်မည်ဖြစ်ကြောင်း၊ စီးပွားရေးလုပ်ငန်းရှင်များအနေဖြင့် ကုန်အညွှန်းအမှတ်အသားဖော်ပြခြင်းနှင့်စပ်လျဉ်း၍ ကုန်ပစ္စည်းများတွင် မြန်မာဘာသာဖြစ်စေ၊ မြန်မာဘာသာနှင့်အခြားဘာသာ (သို့) တစ်ခုထက်ပို၍တွဲလျက်ဖြစ်စေ ဖော်ပြရာတွင် သတ်မှတ်ချက်များနှင့်အညီ ဆောင်ရွက်ရမည်ဖြစ်ကြောင်း၊ လိုက်နာမှုမရှိပါက စားသုံးသူကာကွယ်ရေးဥပဒေ အရ အရေးယူခြင်းခံရမည်ဖြစ်ကြောင်း၊ စီးပွားရေးလုပ်ငန်းရှင်များအနေဖြင့် ဥပဒေကို လိုက်နာရာတွင် အခက်အခဲမရှိစေရေးအတွက် ကုန်စည်အုပ်စုအလိုက် မြန်မာဘာသာဖြင့် ဖော်ပြရမည့် ကုန်အညွှန်းအမှတ်အသား အသေးစိတ်ဇယားများကို ရှင်းလင်းပြောကြားခဲ့ပါသည်။ ဆက်လက်၍ တာဝန်ရှိသူတစ်ဦးက ၂/၂၀၁၉ ညွှန်ကြားချက်အား အကျယ်တဝင့် ရှင်းလင်းဆွေးနွေးခဲ့ကြပြီး တက်ရောက်လာကြသော ဌာနဆိုင်ရာမှ တာဝန်ရှိသူများ၊ လုပ်ငန်းရှင်များက သိရှိလိုသည်များကို မေးမြန်းဆွေးနွေးရာ ပြည်နယ်ဉီးစီးမှူးနှင့် တာဝန်ရှိသူတို့က ပြန်လည်ရှင်းလင်းဖြေကြားခဲ့ကြောင်း သတင်းရရှိပါသည်။

ကယားပြည်နယ်

စားသုံးသူရေးရာဦးစီးဌာန

        မုဒုံမြို့နယ်၊ ကမာဝက်မြို့ (ရွာလယ်ဓမ္မာရုံ) ၌ မုဒုံမြို့နယ် ပြန်ကြားရေးနှင့်ပြည်သူ့ဆက်ဆံရေး ဦးစီးဌာနနှင့် စားသုံးသူရေးရာဦးစီးဌာနတို့ပူးပေါင်း၍ စားသုံးသူရေးရာအသိပညာပေးပြည်သူ့စကားဝိုင်းကို ၁၈.၂.၂၀၂၀ ရက်နေ့တွင် ကျင်းပပြုလုပ်ခဲ့ရာ ကမာဝက် မြို့သူ/မြို့သား၊ ဆရာ/ဆရာမ၊ ကျောင်းသူ/ကျောင်းသားများ စုစုပေါင်း (၂၅၀) ခန့် တက်ရောက်ဆွေးနွေးခဲ့ကြသည်။

         အဆိုပါဆွေးနွေးပွဲတွင် မုဒုံမြို့နယ်အုပ်ချုပ်ရေးမှူး ဦးသက်ဇော်ဦး က အဖွင့်အမှာစကားပြောကြားခဲ့ပြီး သက်ဆိုင်ရာဌာနများဖြစ်သော မြို့နယ်စည်ပင်သာယာရေးအဖွဲ့မှ ဦးစီးအရာရှိ ဒေါ်မြင့်မြင့်အေး၊ မြို့နယ် ကျန်းမာရေးဦးစီးဌာနမှူး ဒေါက်တာ ဦးမြင့်သိန်းဦး ၊ မြို့နယ်ပညာရေးမှူး၊ မွေးမြူရေးနှင့်ကုသရေး ဦးစီးဌာနမှ ဒေါ်နန်းကြူကြူအောင် တို့က မိမိတို့ဌာနနှင့်ပတ်သက်၍ စားသုံးသူများသိသင့်သော အကြောင်းအရာများအား အသီးသီးဆွေးနွေးခဲ့ကြသည်။

          ထို့နောက် မွန်ပြည်နယ်စားသုံးသူရေးရာဦးစီးဌာန၊ ပြည်နယ်ဦးစီးမှူး ဦးခင်အောင်သွင် က စားသုံးသူကာကွယ်ရေးဥပဒေ ၂၀၁၉ ပြဌာန်းချက်ပါ စားသုံးသူအခွင့်အရေးနှင့်တာဝန်များ၊ ကုန်စည်နှင့် ဝန်ဆောင်မှုများအပေါ်တွင် အာမခံအတိုင်း တောင်းဆိုပိုင်ခွင့်များ၊ ကုန်အညွှန်းအမှတ်အသားဆိုင်ရာ အချက်အလက်များ၊ စားသုံးသူများ နစ်နာဆုံးရှုံးမှုဖြစ်လာလျှင် အရေးဆိုတိုင်ကြားနိုင်သည့် နည်းလမ်းများ အား အကျယ်တဝင့် ရှင်းလင်းဆွေးနွေးခဲ့ကြောင်း သတင်းရရှိပါသည်။

မွန်ပြည်နယ်

စားသုံးသူရေးရာဦးစီးဌာန

     တနင်္သာရီတိုင်းဒေသကြီး စားသုံးသူရေးရာဦးစီးဌာန၊ တိုင်းဒေသကြီးဦးစီးမှူးရုံးမှဝန်ထမ်းများနှင့် တိုင်းဒေသကြီးအစားအသောက်နှင့်ဆေးဝါးကွပ်ကဲရေးဦးစီးဌာနတို့သည် ၂၀၂၀ ပြည့်နှစ် ဖေဖော်ဝါရီလ ၁၈ ရက်နေ့တွင် ထားဝယ်မြို့၊ ရွှေဝယ်သီရိ ကလေးကစားကွင်းညစျေးတန်း၌ မိတ်ဖက်ဌာနများဖြစ်သည့် မြို့နယ်စည်ပင်သာယာရေးအဖွဲ့၊ ပြည်သူ့ကျန်းမာရေးဦးစီးဌာန၊ ညစျေးတန်းတာဝန်ခံ တို့နှင့်ပူးပေါင်း၍ စျေးအတွင်းအများပြည်သူ စားသုံး/သုံးစွဲရန် မသင့်သော အစားအသောက်များ ရောင်းချနေမှု ရှိ/မရှိ ကွင်းဆင်းစစ်ဆေးခြင်းများ ဆောင်ရွက်ခဲ့ပါသည်။

   ကွင်းဆင်းစစ်ဆေးရာတွင် ညစျေးတန်းရောင်းချသည့် စျေးဆိုင်များမှ အများပြည်သူများ ဘေးကင်းလုံခြုံစွာ ဝယ်ယူစားသောက်နိုင်ရေးအတွက် ကောင်းမွန်သော သန့်ရှင်းမှုကျင့်စဉ်နှင့် အညီရောင်းချရန်နှင့် တရားမဝင်တင်သွင်းလာသောအေးခဲအသားများ၊ အသားချောင်းများ ရောင်းချ မှုရှိ/မရှိစစ်ဆေးခဲ့ပါသည်။ ထိုနောက် ညစျေးတန်းအသုပ်ရောင်းချသည့်ဆိုင်များမှ အစားအသောက် နမူနာပစ္စည်းများ ကောက်ယူ၍ရွေ့လျားမော်တော်ယာဉ်တွင်ပါရှိသော Rapid Test Kit များဖြင့် ဓါတ်ခွဲစစ်ဆေးဆောင်ရွက်ခဲ့ကြောင်းသတင်းရရှိပါသည်။

တနင်္သာရီတိုင်းဒေသကြီး
စားသုံးသူရေးရာဦးစီးဌာန