သတင်းနှင့် လှုပ်ရှားမှုများ

    နိုင်ငံခြားဝင်ငွေပိုမိုရရှိစေရေးနှင့် ကုန်သွယ်မှု တိုးမြှင့်လာစေရေးတို့အတွက် မြိတ်ခရိုင်ကုန် သွယ်ရေး စခန်းတာဝန်းရှိသူများနှင့် စားသုံးသူရေးရာဦးစီးဌာနမှ ခရိုင်ဦးစီးမှူးနှင့် ဝန်ထမ်းများသည် ၂၀၂၆ခုနှစ်၊ ဧပြီလ(၂၈)ရက်နေ့၊ နံနက်(၁၀း၀၀)နာရီအချိန်တွင် မြိတ်မြို့၊ ဆိပ်ငယ်ရပ်ရှိ ကုန်သွယ်‌ ရေးဦးစီးဌာနရုံးတွင် မြိတ်မြို့ရှိ ဝဥ၊ ကွမ်းသီး၊ သီဟိုဠ်လုပ်ငန်းရှင်များနှင့် တွေ့ဆုံပြီး ပို့ကုန် တင်ပို့နိုင်မှု တိုးမြှင့်စေရေး တွေ့ဆုံဆွေးနွေးခဲ့ကြပါသည်။

   တွေ့ဆုံဆွေးနွေးရာတွင် မြိတ်ခရိုင်ရှိ ကွမ်းသီးလုပ်ငန်းရှင်များအသင်းမှ တာဝန်ရှိသူမှ တွေ့ဆုံ ဆွေးနွေးခဲ့ရာတွင် မြိတ်ခရိုင်အတွင်းမှ ထွက်ရှ်ိသော ကွမ်းသီးခြောက်၊ ကွမ်းသီးစိမ်းများအား (၁.၁.၂၀၂၅)မှ (၃၁.၁၂.၂၀၂၆)ရက်နေ့ထိ မြိတ်မြို့မှ ပြည်တွင်း(ရန်ကုန်တိုင်း၊ မန္တလေးတိုင်းနှင့် ဧရာဝတီတိုင်းဒေသကြီး) များသို့ ကွမ်းသီးခြောက်၊ ကွမ်းသီးစိမ်း (၃၃၈၇၁.၅၉)တန်တင်ပို့နိုင်ခဲ့ကြောင်းနှင့် စျေးနှုန်းကွဲပြားခြင်းတို့ ကြောင့် ထိုင်းနိုင်ငံသို့တင်ပို့နိုင်ခြင်းမရှိကြောင်း၊ သီဟိုဠ်လုပ်ငန်းရှင်များအသင်းမှ တာဝန်ရှိသူမှ ၂၀၂၆ ခုနှစ်တွင် သီဟိုဠ်အထွက်နှုန်းနည်းပါးခြင်းကြောင့် စျေးအနည်းငယ်မြှင့်မားလျက်ရှိကြောင်း၊ ဒေသတွင်း စိုက်ပျိုးထုတ်လုပ်မှုနှင့် ရာသီအခြေအနေများအားရှင်းလင်းခဲ့ပြီး ဝဥလုပ်ငန်းရှင်များအသင်းမှ တွေ့ဆုံဆွေး နွေးရာတွင် ယခင်က အခြောက်လုပ်ပြီးတင်ပို့ရောင်းချခဲ့သော်လည်း အမြတ်နည်းပါခြင်းကြောင့် တင်ပို့ခြင်း မရှိဘဲ အလုံးအတိုင်း(အကြမ်း)ကိုသာတင်ပို့ရောင်းချခဲ့ကြောင်းဆွေးနွေးခဲ့ပြီး ကုန်သွယ်ရေးဦးစီးဌာနမှ တာ ဝန်ခံမှ    ၂၀၂၆-၂၀၂၇ ဘဏ္ဍာနှစ်၌ပိုမိုစိုက်ပျိုးပြီး ပိုမိုတင်ပို့နိုင်ရေး တွန်းအားပေးဆောင်ရွက်လျက်ရှိကြောင်း သိရှိရပါသည်။

DOCA(တနင်္သာရီ)

    တနင်္သာရီတိုင်းဒေသကြီး၊ မြိတ်ခရိုင်စားသုံးသူရေးရာဦးစီးဌာနနှင့် ကုန်သွယ်ရေးဦးစီးဌာန တို့သည် ၂၀၂၆ခုနှစ်၊ ဧပြီလ(၂၇)ရက်နေ့တွင် မြိတ်ခရိုင်စားဖိုဆောင်လုပ်ငန်းရှင်များအသင်မှ တာဝန်ရှိသူများအား မြိတ်မြို့၊ ကမ်းနားလမ်းရှိ ကုန်သွယ်ရေးဦးစီးဌာနရုံး၌ ခေါ်ယူ၍ ပို့ကုန်တိုးမြှင့် နိုင်ရေးတွေ့ဆုံ ဆွေးနွေးခဲ့ကြကြောင်းသိရှိရပါ သည်။

    တွေ့ဆုံဆွေးနွေးရာတွင် မြိတ်ခရိုင်စားသုံးသူရေးရာဦးစီးဌာနမှ ခရိုင်ဦးစီးမှူး၊ ဦးမျိုးဝင်းမှ ပြည်တွင်း၌ စိုက်ပျိုးထွက်ရှိသော စားဖိုဆောာင်သီးနှံများဖြစ်သည့် ကြက်သွန်နီ၊ ငရုတ်နှင့် ပဲမျိုးစုံတို့ အား နိုင်ငံခြားငွေရရှိစေရေးအတွက် ယိုးဒယား(ထိုင်း)နိုင်ငံသို့ တင်ပို့ရောင်းချနိုင်ရေးဆွေးနွေးခဲ့ကြ ကြောင်းသိရှိရပါသည်။ ထိုကဲ့သို့ ပြည်ပတင်ပို့နိုင်ရေးအတွက် စားဖိုဆောင်သီးနှံလုပ်ငန်းရှင်များ အသင်းမှလည်း အသင်း၏ရည်မှန်းချက်ဖြစ်ကြောင်းနှင့်  စိတ်ပါဝင်စားပါကြောင်း၊ တစ်ဘက်နိုင်ငံမှ ဝယ်လက်အားချိတ်ဆက်ပေနိုင်ပါက ပိုမိုအောင်မြင်မည်ဖြစ်ပြီး ဒေသတွင် ဝယ်ယူသိုလှောင်၍ လာရောက်ဆောင်ရွက်မည်ဆိုပါက ပိုမိုအောင်မြင်မည်ဖြစ်ကြောင်းဆွေးနွေးခဲ့ရာ မြိတ်ကုန်သွယ်ရေး စခန်းတာဝန်ခံမှ ယိုးဒယား (ထိုင်း) နိုင်ငံရှိ စီးပွားရေးသံမှူးနှင့် ချိတ် ဆက်ကူညီဆောင်ရွက်ပေး သွားမည်ဖြစ်ပြီး၊ ပြည်ပတင်ပို့နိုင်ရေးလိုအပ်သောအချက်များအား ကူညီဆောင်ရွက်ပေးသွားမည် ဖြစ်ကြောင်း ဆွေးနွေးခဲ့ကြပါသည်။

DOCA(တနင်္သာရီ)

         စားသုံးသူရေးရာဦးစီးဌာန၊ စစ်ကိုင်းတိုင်းဒေသကြီး၊ ကန့်ဘလူမြို့နယ်တာဝန်ခံရုံးသည် အသိပညာပေးဟောပြောပွဲများ၊ လုပ်ငန်းရှင်တွေ့ဆုံပွဲများဆောင်ရွက်ရာတွင် တာဝန်ခံ ဦးမျိုးဝင်းသန်းသည် ကန့်ဘလူမြို့နယ်အတွင်းရှိ စားသုံးသူများအနေဖြင့် မိမိတို့၏ အခွင့်အရေးများကို ကာကွယ်နိုင်ရန်နှင့် တရားမဝင်ကုန်ပစ္စည်းများ၊ ဝန်ဆောင်မှုများနှင့် ပတ်သက်၍ တိုင်ကြားနိုင်ရန်အတွက် Consumer Call Center (1535) သို့ ဖုန်းခေါ်ဆို၍ မေးမြန်းခြင်း၊ တိုင်ကြားခြင်းများ ဆောင်ရွက်နိုင်ကြောင်း အသိပညာပေးဆောင်ရွက်လျက်ရှိကြောင်း သိရသည်။

      ၂၀၂၆ ခုနှစ်၊ ဧပြီလ ၂၈ ရက်နေ့တွင် ကန့်ဘလူမြို့၊ အမှတ်(၃)ရပ်ကွက်ရှိ စားသုံးသူတစ်ဦးက Consumer Call Center (၁၅၃၅) လိုင်းခွဲ(၁)အား ဖုန်းခေါ်ဆိုမေးမြန်းခဲ့ရာ  တာဝန်ရှိသူများက ယဉ်ကျေးပျူငှာစွာဖြင့် ပြန်လည်ဖြေကြားပေးခဲ့ကြောင်း သိရသည်။ အဆိုပါ Consumer Call Center (1535) သည် စားသုံးသူများအတွက် အလွယ်တကူ ဆက်သွယ်နိုင်သော တိုင်ကြားမှုလက်ခံ စင်တာတစ်ခုဖြစ်ပြီး ကုန်ပစ္စည်းအရည်အသွေးမမှန်ခြင်း၊ ဈေးနှုန်းမမှန်ကန်ခြင်း၊ လိမ်လည်ရောင်းချမှုများနှင့် ပတ်သက်၍ အကြောင်းကြားတိုင်ကြားနိုင်ပြီး စားသုံးသူအခွင့်အရေးနှင့် ပတ်သက်သော မေးခွန်းများကိုလည်း မေးမြန်းနိုင်ကြောင်း  အသိပညာပေးဆွေးနွေးခဲ့ကြောင်း သိရှိရပါသည်။

DOCA(စစ်ကိုင်း)

        (၄.၅.၂၀၂၆) ရက်နေ့ နံနက်(၀၉း၀၀)နာရီအချိန်တွင်  စစ်ကိုင်းတိုင်းဒေသကြီး၊ စားသုံးသူရေးရာဦးစီးဌာန၊ တိုင်းဒေသကြီးဦးစီးမှူးရုံး၊ အစည်းအဝေးခန်းမ၌  စားသုံးဆီဖြန့်ဖြူးရောင်းချမှု ကြီးကြပ်ရေးကော်မတီနှင့် စက်မှုလုပ်ငန်းသုံး စားအုန်းဆီထုတ်ယူဖြန့်ဖြူးမှု ကြီးကြပ်ရေးအဖွဲ့ လုပ်ငန်းညှိနှိုင်း အစည်းအဝေးကျင်းပဆောင်ရွက်ခဲ့ရာ စားသုံးဆီဖြန့်ဖြူးရောင်းချမှု ကြီးကြပ်ရေးကော်မတီ ဥက္ကဌ၊ တိုင်းဒေသကြီး အစိုးရအဖွဲ့ စီမံကိန်း၊ စီးပွားရေးနှင့် ဘဏ္ဍာရေးဝန်ကြီး ဦးအောင်ဇော်ဦးနှင့် ဌာနဆိုင်ရာများ၊ လုပ်ငန်းရှင်များ စုစုပေါင်း (၅၀) ဦးတက်ရောက်ခဲ့ကြောင်း သိရပါသည်။

        ရှေးဦးစွာ စားသုံးဆီဖြန့်ဖြူးရောင်းချမှု ကြီးကြပ်ရေးကော်မတီ ဥက္ကဌ၊ တိုင်းဒေသကြီး အစိုးရအဖွဲ့စီမံကိန်း၊ စီးပွားရေးနှင့် ဘဏ္ဍာရေးဝန်ကြီး ဦးအောင်ဇော်ဦးက အဖွင့်အမှာစကားပြောကြားခဲ့ပြီး  စားသုံးဆီဖြန့်ဖြူးရောင်းချမှုကြီးကြပ်ရေးကော်မတီ အတွင်းရေးမှူး ဦးမင်းမင်းက ကော်မတီ၏ လုပ်ငန်းဆောင်ရွက်မှုအခြေအနေများနှင့် ပတ်သက်၍ စားအုန်းဆီဖြန့်ဖြူးရောင်းချသည့် ကုမ္ပဏီများ၊ လက်ကား/ လက်လီကိုယ်စားလှယ်များအနေဖြင့် အရေအတွက်မှန်၊ ဈေးနှုန်းမှန်၊ အချိန်အတွယ်မှန်၊ အရည်အသွေးမှန် စသည့် မှန် (၄) မှန်ဖြင့် ပြည်သူများထံသို့ စားအုန်းဆီများ ပျံ့ပျံ့နှံ့နှံ့ရောက်ရှိစေရေးမှန်မှန် ကန်ကန်ဖြန့်ဖြူး ရောင်းချပေးရန်လိုအပ်ကြောင်း၊  စားအုန်းဆီ ဖြန့်ဖြူးရောင်းချရာတွင် သတ်မှတ်ဈေးနှုန်းထက် ပိုမိုမရောင်းချရန်လိုအပ်ကြောင်း၊ ဆန်၊ စားအုန်းဆီ၊ ဆေးဝါးတို့သည် အ‌ရေးကြီးကုန်စည်အဖြစ် သတ်မှတ်ထားသည့်အတွက် ဈေးနှုန်းမြှင့်တင်ရောင်းချခြင်း၊ ‌ဈေးကစားရန်ရည်ရွယ်ချက်ဖြင့်သိုလှောင်ခြင်း၊ မသမာသောလုပ်ဆောင်မှုများပြုလုပ်ခြင်းကို တွေ့ရှိရပါက အရေးကြီးကုန်စည်နှင့် ဝန်ဆောင်မှု ဥပဒေအရ အရေးယူဆောင်ရွက်သွားမည်ဖြစ်ပါကြောင်းနှင့် စစ်ကိုင်းတိုင်းဒေသကြီးအတွင်း မြို့နယ်အလိုက် သတ်မှတ်နေရာများသို့ သတ်မှတ်အရေအတွက် အတိုင်းရောက်ရှိမှုရှိ/ မရှိ၊ စားသုံးသူပြည်သူများထံသို့ သတ်မှတ်ရည်ညွှန်းဈေး အတိုင်းရောင်းချမှုရှိ/ မရှိကို ဆက်စပ်ဌာနများ၊ အသင်းအဖွဲ့များ၊ စားအုန်းဆီတင်သွင်းသည့်ကုမ္ပဏီများနှင့် ပူးပေါင်း၍ စိစစ်ကြပ်မတ် စစ်ဆေး ဆောင်ရွက်သွားမည်ဖြစ်ကြောင်း၊   ဆီလျှောက်လွှာများတင်ရာတွင် အထောက်အထားသတ်မှတ်ချက်များ ပြည့်စုံစွာပါရှိရန်နှင့် ကော်မတီအဖွဲ့ဝင်များ၏ စည်းကမ်သတ်မှတ်ချက်များအတိုင်း ဆောင်ရွက်သွားမည်ဖြစ်ကြောင်း အသေးစိတ်ရှင်းလင်းဆွေးနွေး ပြောကြားခဲ့ကြောင်း သိရသည်။

         ဆက်လက်၍ စက်မှုလုပ်ငန်းသုံး စားအုန်းဆီ ထုတ်ယူဖြန့်ဖြူးမှုကြီးကြပ်ရေးအဖွဲ့၊ အဖွဲ့ခေါင်းဆောင်၊ တိုင်းဒေသကြီး ကုန်သည်များနှင့် စက်မှုလက်မှုလုပ်ငန်းရှင်များအသင်း ဥက္ကဌ ဦးကြည်လှိုင်က စက်မှုလုပ်ငန်းသုံး စားအုန်းဆီထုတ်ယူဖြန့်ဖြူး မှုကြီးကြပ်ရေးအဖွဲ့၏ လုပ်ငန်းဆောင်ရွက်ချက်များအား ရှင်းလင်းဆွေးနွေးခဲ့ကြပြီး တက်ရောက်လာသူများက အပြန်အလှန်ဆွေးနွေးခဲ့ကြပြီး စားသုံးဆီဖြန့်ဖြူးရောင်းချမှုကြီးကြပ်ရေးကော်မတီ ဥက္ကဌ၊ တိုင်းဒေသကြီးအစိုးရအဖွဲ့စီမံကိန်း၊ စီးပွားရေးနှင့် ဘဏ္ဍာရေးဝန်ကြီး ဦးအောင်ဇော်ဦးက နိဂုံးချုပ် လမ်းညွှန်အမှာစကားပြောကြား၍ အစည်းအဝေးကို  မွှန်းလွှဲ( ၁၂း၀၀)နာရီအချိန်တွင် အောင်မြင်စွာရုတ်သိမ်းခဲ့ကြောင်း သိရှိရပါသည်။

DOCA(စစ်ကိုင်း)

         စီးပွားရေးနှင့် ကူးသန်းရောင်းဝယ်ရေးဝန်ကြီးဌာန၊ စားသုံးသူရေးရာဦးစီးဌာန၏ မျှော်မှန်းချက်ဖြစ်သည့် “ပြည်တွင်းကုန်သွယ်မှုဖွံ့ဖြိုးရေးနှင့် စားသုံးသူကာကွယ်ရေးလုပ်ငန်းများဖြင့် နိုင်ငံ့စီးပွားရေး ဖွံ့ဖြိုးတိုးတက်စေရန်” ဆိုသည့် ဆောင်ပုဒ်နှင့်အညီ ပြည်တွင်းကုန်သွယ်မှုဖွံ့ဖြိုးရေးလုပ်ငန်းများအပြင် စားသုံးသူကာကွယ်ရေးအသိပညာပေးလုပ်ငန်းများကို ဆောင်ရွက်လျက်ရှိရာ ရွှေဘိုခရိုင်ဦးစီးမှူးရုံးမှ ခရိုင်ဦးစီးမှူး ဦးဆောင်၍ ၂၀၂၆ခုနှစ်၊ ဧပြီလအတွင်း စီးပွားရေးလုပ်ငန်းရှင်များနှင့် တွေ့ဆုံခြင်းအား (၅)  ကြိမ် ဆောင်ရွက်ခဲ့ကြောင်း သိရသည်။

        ရွှေဘိုခရိုင်အနေဖြင့် ၂၀၂၆ခုနှစ် ဧပြီလအတွင်း စီးပွားရေးလုပ်ငန်းရှင်အား တွေ့ဆုံခြင်း (၅) ကြိမ် ဆောင်ရွက်ခဲ့ရာ ခရိုင်ဦးစီးမှူးဦးဆောင်သော ဝန်ထမ်းများအဖွဲ့သည် (၂.၄.၂၀၂၆) ရက်နေ့တွင် ကုန်မျိုးစုံရောင်းဝယ်ရေးလုပ်ငန်းရှင်၊ (၆.၄.၂၀၂၆) ရက်နေ့တွင် စားသုံးဆီရောင်းဝယ်ရေးလုပ်ငန်းရှင်နှင့် တောကုန်း (စားသုံးဆီရောင်းဝယ်ရေးလုပ်ငန်းရှင်)၊ (၉.၄.၂၀၂၅)ရက်နေ့တွင် စက်သုံးဆီရောင်းဝယ်ရေးလုပ်ငန်းရှင်၊ (၂၀.၄.၂၀၂၆)ရက်နေ့တွင် စက်သုံးဆီရောင်းဝယ်ရေး လုပ်ငန်းရှင်တို့ဖြင့် တွေ့ဆုံဆွေးနွေးပြီး စားသုံးသူကာကွယ်ရေးဥပဒေ၊ အမိန့်၊  ညွှန်ကြားချက်များကို  ဌာနမှဆောင်ရွက်လျက်ရှိသော လုပ်ငန်းများအား အသိပညာပေး ဆွေးနွေးခဲ့ကြောင်း သတင်းရရှိပါသည်။

DOCA(စစ်ကိုင်း)