ပြည်ပကုန်သွယ်မှုသတင်းများ
အိန္ဒိယနိုင်ငံ၌ ၁၅-၁၀-၂၀၂၃ နေ့တွင် သက်တမ်းကုန်ဆုံးမည့် ပေါင်းဆန်အပေါ် ပို့ကုန်ခွန် ၂ဝ ရာခိုင်နှုန်းကောက်ခံရန် ချမှတ်ထားရှိမှုကို ၂ဝ၂၄ ခုနှစ်၊ မတ်လ ၃၁ ရက်နေ့အထိ ထပ်မံ သက်တမ်းတိုးမြှင့်လိုက်ကြောင်း အိန္ဒိယဘဏ္ဍာရေးဝန်ကြီးဌာနက ၁၃-၁၀-၂၀၂၃ နေ့၌ အမိန့် ကြော်ငြာစာ ထုတ်ပြန်ခဲ့ပါသည်။
ကုန်သည်များ၏ပြောကြားချက်အရ ပို့ကုန်ခွန်ကောက်ခံမှု သက်တမ်းတိုးမြှင့်လိုက်ခြင်းမှာ ၂ဝ၂၃ ခုနှစ် နိုဝင်ဘာလတွင် အိန္ဒိယနိုင်ငံရှိ အချို့ပြည်နယ်များ၌ ပြည်နယ်ရွေးကောက်ပွဲများ ပြုလုပ်သွားမည်ဖြစ်ရာ ရွေးကောက်ပွဲကျင်းပစဉ် ကာလအတွင်း ပြည်တွင်းဆန်ဈေးနှုန်းများကို စစ်ဆေးစောင့်ကြည့်သွားရန်အတွက်ဖြစ်ကြောင်း သိရှိရပါသည်။
အိန္ဒိယနိုင်ငံ၌ ဘာစမာတီဆန် တင်ပို့မှုအပေါ် အနိမ့်ဆုံးပို့ကုန်ဈေးနှုန်းကို တစ်တန်လျှင် ဒေါ်လာ ၁၂၀၀ ချမှတ်ထားရာမှ ဒေါ်လာ ၉ဝဝ သို့ လျှော့ချပေးရန် ပို့ကုန်လုပ်ငန်းရှင်များ၏ တောင်းဆိုမှုအား ပြည်ထဲရေးဝန်ကြီး Amit Shah ဦးဆောင်သော ဝန်ကြီးများပါဝင်သည့် ကော်မတီက ပယ်ချခဲ့သော်လည်း ဆက်လက်စဉ်းစားဆောင်ရွက်ရမည့် ကိစ္စရပ်အဖြစ် ထားရှိ ကြောင်း အိန္ဒိယစားနပ်ရိက္ခာဝန်ကြီးဌာနက ပြောကြားခဲ့ပါသည်။
ဂျပန်နိုင်ငံ၌ ရောင်းလိုအားနှင့် ဝယ်လိုအားတို့အပေါ် အခြေခံ၍ ဆန်ဈေးနှုန်းများကို ပိုမိုပွင့်လင်းစွာ သတ်မှတ်နိုင်ရန် ရည်ရွယ်လျက် အင်တာနက်စင်္ကြန်မှတစ်ဆင့် ဆန်လက်ငင်းရောင်းဝယ်မှု ဈေးကွက်တစ်ရပ်ကိုဖွင့်လှစ်ခဲ့ရာ နိုင်ငံ၏အဓိကစားနပ်ရိက္ခာဖြစ်သည့် ဆန်များ ဝယ်ယူရောင်းချခြင်းကို ပိုမိုချောမွေ့လာစေမည်ဖြစ်ကြောင်း သိရှိရသည်။
အယ်လ်နီညို၏ သက်ရောက်မှုကြောင့် ရာသီဥတုခြောက်သွေ့ကာ စပါးအထွက်နှုန်းအပေါ် ထိခိုက်စေခဲ့ရာ ၂၀၂၃ ခုနှစ်တွင် အင်ဒိုနီးရှား၏ ဆန်ထွက်ရှိမှုမှာ ၂ ရာခိုင်နှုန်း လျော့နည်းလျက် မက်ထရစ်တန်ချိန် ၃၀.၉၀ သန်းသို့ ကျဆင်းနိုင်ဖွယ်ရှိကြောင်း အင်ဒိုနီးရှား စာရင်းအင်းဗျူရိုမှ ခေတ္တအကြီးအကဲဖြစ်သူ Amalia Adininggar Widyasanti က ၁၆-၁၀-၂၀၂၃ ရက်နေ့တွင် ပြောကြားခဲ့သည်။
၂၀၂၄ ခုနှစ်တွင် ဆန်တန်ချိန် ၃၅ သန်း ထုတ်လုပ်ရန် ရည်မှန်းချက်ကို အကောင်အထည် ဖော်ရေး ကြိုးပမ်းမှု၏ တစ်စိတ်တစ်ပိုင်းအနေဖြင့် အင်ဒိုနီးရှားနိုင်ငံတစ်ဝန်းတွင် ဆန်စပါး စံချိန်တင်ထွက်ရှိအောင် စိုက်ပျိုးထုတ်လုပ်နိုင်သည့် ဒေသဆိုင်ရာ စိုက်ပျိုးရေးရုံးများကို အထူးဆုများ ချီးမြှင့်သွားမည်ဖြစ်ကြောင်း သိရှိရသည်။
အစိုးရချင်း ညှိနှိုင်းဆောင်ရွက်မှုများအရ အိန္ဒိယအစိုးရသည် ဘာစမာတီမဟုတ်သောဆန် တန်ချိန် ၁၀.၃၄ သိန်းကို နိုင်ငံပေါင်း ၇ နိုင်ငံသို့ အမျိုးသားသမဝါယမပို့ကုန်လီမိတက်မှတစ်ဆင့် တင်ပို့ခွင့်ပြုလိုက်ကြောင်း အိန္ဒိယ ပြည်ပကုန်သွယ်ရေးညွှန်ကြားမှုဦးစီးဌာနက ၁၈-၁၀-၂၀၂၃ နေ့တွင် အမိန့်ကြော်ငြာစာ ထုတ်ပြန်ခဲ့ပါသည်။
အိန္ဒိယနိုင်ငံတွင် အာဖရိကအရှေ့ပိုင်းဒေသရှိ မိုဇမ်ဘစ်နိုင်ငံထံမှ ပဲစင်းငုံများ တင်သွင်းမှုမှာ သိသာစွာ နှေးကွေးကျဆင်းလျက်ရှိရာ ပြည်တွင်း၌ ပဲစင်းငုံဈေးနှုန်းများ ကျဆင်းစေရေးမှာ နှောင့်နှေးမှု ဖြစ်ပေါ်လျက်ရှိကြောင်း၊ မိုဇမ်ဘစ်ပို့ကုန်လုပ်ငန်းရှင်များသည် ၎င်းတို့၏ ဆိပ်ကမ်းသို့ ရောက် ရှိနေပြီးဖြစ်သော ပဲစင်းငုံတန်ချိန် ၁.၅ သိန်းကျော်ကို တင်ပို့ခြင်းမပြုပဲ ထိန်းသိမ်းထားရှိ လျက် ငွေကြေးပိုမိုရရှိအောင် လုပ်ဆောင်နေကြသည်ဟု အိန္ဒိယသွင်းကုန်လုပ်ငန်းရှင်များက စွပ်စွဲ ပြောဆိုလျက်ရှိကြောင်း Economic Times သတင်းဌာနက အောက်တိုဘာလ ၁၈ ရက်နေ့တွင် ဖော်ပြထားပါသည်။
အင်ဒိုနီးရှားနိုင်ငံ၊ အမျိုးသားသုတေသနနှင့် တီထွင်ဆန်းသစ်မှုအေဂျင်စီ (BRIN) သည် အယ်လ်နီညိုဖြစ်စဉ်၏ ပူပြင်းခြောက်သွေ့မှုကြောင့် သီးနှံများ ထိခိုက်ပျက်စီးနိုင်မည့် အန္တရာယ်ကို အဆင့်သုံးဆင့်ဖြင့် ကျော်လွှားရန် လယ်သမားများအား ဖိတ်ခေါ်အသိပေးခဲ့ပါသည်။
မျက်မှောက်ကာလ သဘာဝရော်ဘာ စိုက်ပျိုးထုတ်လုပ်နေသည့်နိုင်ငံများတွင် ကြုံတွေ့နေရသည့် စိန်ခေါ်မှုများမှာ ရော်ဘာဈေးနှုန်းကျဆင်းမှု၊ လုပ်သားစရိတ်တိုးမြှင့်မှု၊ လုပ်သားရှားပါးမှု၊ ရောဂါများ၊ ရာသီဥတုဖောက်ပြန်မှုနှင့် သဘာဝပတ်ဝန်းကျင်ဆိုင်ရာ ပြဿနာများဖြစ်ကြောင်း အိန္ဒိယရော်ဘာဘုတ်အဖွဲ့၏ အမှုဆောင်ဒါရိုက်တာ M. Vasanthagesan က ပြောဆိုပါသည်။
မလေးရှားနိုင်ငံ၌ စားအုန်းဆီသိုလှောင်မှုသည် စက်တင်ဘာလကုန်တွင် ၁၁ လအတွင်း အမြင့်ဆုံးသို့ ရောက်ရှိခဲ့ကြောင်း မလေးရှားစားအုန်းဆီဘုတ်အဖွဲ့ (MPOB) ၏ ၁၀-၁၀-၂၀၂၃ နေ့တွင် စာရင်းထုတ်ပြန်ခဲ့မှုနှင့်အတူ ဝယ်လိုအားနည်းပါးနေခြင်းအပေါ် စိုးရိမ်မှုများ ဖြစ်ပေါ်လျက်ရှိကြောင်း သိရပါသည်။
စပါးဈေး မြင့်တက်မှုနှင့် စားသုံးကုန်ဈေးနှုန်းများ မြင့်တက်မှုကို လျော့ချရန်အတွက် အစိုးရအနေဖြင့် ပြည်တွင်းဈေးကွက်တွင် ဆန်ရောင်းလိုအားအပိုင်းကို မြှင့်တင်ရန် လုပ်ဆောင်နေကြောင်း အင်ဒိုနီးရှားသမ္မတဂျိုကိုဝီဒိုဒိုက ၈-၁၀-၂၀၂၃ ရက်နေ့တွင် ပြောကြားခဲ့ပါသည်။
စပါးဈေးနှုန်းများ မြင့်တက်လာမှုအပေါ် လယ်သမားများက ပျော်ရွှင်ကျေနပ်မှုရှိနေသော်လည်း စားသုံးသူများအတွက်မှာမူ မပြေလည်မှုများ ဖြစ်ပေါ်နေသည်ဟု အနောက်ဂျာဗားပြည်နယ်ရှိ ဆူဘန်ဒေသတွင် စပါးရိတ်သိမ်းမှုအား စစ်ဆေးစဉ် သမ္မတ ဂျိုကိုဝီက ပြောကြားခဲ့ခြင်းဖြစ်ကြောင်း သမ္မတရုံး၏ ထုတ်ပြန်ချက်အရ သိရသည်။
ကမ္ဘောဒီးယားနိုင်ငံသည် ၂၀၂၃ ခုနှစ် ပထမ ၉ လအတွင်း နိုင်ငံပေါင်း ၅၇ နိုင်ငံသို့ ဆန် ၄၅၆၅၈၁ တန် တင်ပို့ခဲ့ပြီး စုစုပေါင်း၀င်ငွေ အမေရိကန်ဒေါ်လာ ၃၂၇.၄ သန်း ရရှိခဲ့ကြောင်း၊ တရုတ်နိုင်ငံသည် ဆန်ဝယ်ယူသည့် ထိပ်တန်းနိုင်ငံအဖြစ် ဆက်လက်ရပ်တည်လျက်ရှိကြောင်း ကမ္ဘောဒီးယား ဆန်စပါးအသင်းချုပ် (CRF) ၏ သတင်းထုတ်ပြန်ချက်တွင် ဖော်ပြထားသည်။
