HighLight News

           ရန်ကုန်တိုင်းဒေသကြီး၊ သန်လျင်ခရိုင်၊ သုံးခွမြို့နယ်အတွင်းရှိ စည်ပင်သာယာမြို့မဈေး အတွင်း/ အပြင်နှင့် ရပ်ကွက်များအတွင်း ဆန်လက်လီလက်ကား ရောင်းချသောဆိုင်များသို့ ဌာနဆိုင်ရာ ပူးပေါင်းအဖွဲ့ဖြင့် မေလ(၂၂)ရက်နေ့၊ နေ့လယ် (၁၃:၃၀) နာရီအချိန်တွင် ကွင်းဆင်းစစ်ဆေးခဲ့ကြောင်း သိရပါသည်။

             အဆိုပါ ကွင်းဆင်းစစ်ဆေးခြင်းတွင် မြို့နယ်အထွေထွေ အုပ်ချုပ်ရေးဦးစီးဌာနမှ ဝန်ထမ်းများ၊ မြို့နယ်စိုက်ပျိုးရေးဦးစီးဌာန၊ မြို့နယ်ရဲတပ်ဖွဲ့၊ မြို့နယ်စည်ပင်သာယာရေးအဖွဲ့နှင့် စားသုံးသူရေးရာဦးစီးဌာနတို့ ပူးပေါင်း၍ ဆန်လက်လီလက်ကား ရောင်းချသောဆိုင်များဖြစ်သည့်  ဧရာမင်းဆန်ဆိုင်၊ ကျော်ဆန်ဆိုင်၊ ငြိမ်းချမ်းဆန်ဆိုင်၊ မွှေးဆန်ဆိုင်နှင့် ကိုမျိုး ဧရာဝတီဆန်ဆိုင်များသို့ ဆန်ကြမ်း၊ ဆန်ချော ဈေးနှုန်းများ တည်ငြိမ်စေရေး၊ ဈေးနှုန်းမြှင့်တင် ရောင်းချမှုမရှိစေရေး အသိပညာပေးခြင်းများ ဆောင်ရွက်ခဲ့ပါသည်။ ထို့ပြင် မြို့နယ်အတွင်း ဆန်များ ပြတ်လပ်မှုမရှိစေရေး၊ ဈေးကစားရန်ရည်ရွယ်ချက်ဖြင့် ဆန်များအား သိုလှောင်ထားပြီး ဈေးနှုန်းမြှင့်တင်ရောင်းချခြင်းများ မပြုလုပ်ကြရန်၊ ထိုသို့ ပြုလုပ်ပါက အရေးကြီးကုန်စည်နှင့် ဝန်ဆောင်မှုဥပဒေအရ အရေးယူဆောင်ရွက်သွားမည်ဖြစ်ကြောင်း အသိပညာပေး ဆွေးနွေးခဲ့ကြောင်း သိရှိရပါသည်။

DOCA(ရန်ကုန်)

            စားသုံးသူရေးရာဦးစီးဌာန၊ ရန်ကုန်တိုင်းဒေသကြီး၊ မှော်ဘီခရိုင်၊ မှော်ဘီမြို့နယ်အတွင်း ဖြန့်ဖြူးရောင်းချရန်အတွက် ၂၀၂၅ ခုနှစ်၊ မေလ ၂၂ ရက် နေ့လယ်(၀၃:၅၀) နာရီအချိန်တွင် ဇမ္ဗူကံထွန်းကုမ္ပဏီမှ ခွဲတမ်းရစားသုံးဆီ (၉)လုံး ရောက်ရှိမှုအား ကွင်းဆင်းစစ်ဆေးခဲ့ကြောင်း သိရှိရပါသည်။

            ထိုသို့ကွင်းဆင်းစစ်ဆေးခဲ့ရာတွင် မှော်ဘီမြို့နယ် ဆီကိုယ်စားလှယ်က ခွဲတမ်းရရှိလာသော စားအုန်းဆီများကို ရည်ညွှန်းဈေး၊ သယ်ယူပို့ဆောင်ခကုန်ကျစရိတ်နှင့် ၂% အမြတ်တို့ဖြင့် လက်လီ/ လက်ကားဆိုင်များသို့ ခွဲဝေရောင်းချပေးသွားမည်ဖြစ်ကြောင်း၊ လက်လီ/လက်ကားဆိုင်များမှ စားသုံးသူပြည်သူများသို့ ၂% အမြတ်ဖြင့် ပြန်လည်ရောင်းချပေးသွားမည်ဖြစ်ကြောင်း စားအုန်းဆီခွဲတမ်းရရှိသော လက်လီ/လက်ကားကိုယ်စားလှယ်ထံမှ သိရရှိပါသည်။

DOCA (ရန်ကုန်)

              (၂၁.၅.၂၀၂၅)ရက်နေ့ နံနက်(၁၁:၅၅) နာရီအချိန်တွင် မင်္ဂလာဒုံခရိုင်၊ အထွေထွေအုပ်ချုပ်ရေး ဦးစီးဌာန၊ အစည်းအဝေးခန်းမ၌ ကွင်းဆင်းခဲ့သော ဥစားကြက်ခြံလုပ်ငန်းနှင့်ပတ်သက်၍ သက်ဆိုင်ရာဌာန အဖွဲ့အစည်းများနှင့်တွေ့ဆုံဆွေးနွေးခြင်း ကျင်းပပြုလုပ်ခဲ့ပါသည်။

            ခရိုင်အထွေထွေအုပ်ချုပ်ရေးဦးစီးဌာနမှ ခရိုင်စီမံအုပ်ချုပ်ရေးအဖွဲ့မှ ဦးဆောင်ကျင်းပခဲ့ရာ မြို့နယ်စီမံအုပ်ချုပ်ရေးအဖွဲ့၊ ခရိုင်မွေးမြူရေးနှင့်ကုသရေးဦးစီးဌာန၊ ခရိုင်စိုက်ပျိုးရေးဦးစီးဌာန၊ စားသုံးသူရေးရာဉီးစီးဌာန၊ မင်္ဂလာဒုံမြို့နယ်စည်ပင်သာယာအုပ်ချုပ်ရေးအဖွဲ့၊ ရန်ကုန်လျှပ်စစ် ဓါတ်အားပေးရေးအဖွဲ့တို့မှ အစည်းအဝးသို့ တက်ရောက်ခဲ့ပြီး အစည်းအဝေးတွင် ခရိုင်စီမံ အုပ်ချုပ်ရေးအဖွဲ့ ဥက္ကဌ ဦးကောင်းညွန့်မှ မင်္ဂလာဒုံမြို့နယ်အတွင်းရှိ ဥစားကြက်ခြံလုပ်ငန်းနှင့် ပတ်သက်၍ ဆွေးနွေး ပြောကြားရာတွင် ကြက်ဥတစ်လုံးကုန်ကျစရိတ်၊ ကြက်စာ၊ ကြက်ဥတစ်လုံးလျှင် ကျသင့်သည့် ဆေးဝါးကုန်ကျစရိတ်အစရှိသည့် ထုတ်လုပ်မှုကုန်ကျစရိတ် (ပျမ်းမျှ)အား တွက်ချက်၍ ဈေးကွက်အတွင်း စားသုံးသူပြည်သူများအလွယ်တကူဈေးနှုန်း သက်သာစွာဝယ်ယူစားသုံးနိုင်ရန် သက်ဆိုင်ရာဌာနများမှ ဈေးကွက်အတွင်း ကွင်းဆင်းအသိပညာပေးပါရန် ဆွေးနွေးပြောကြားခဲ့ပြီး အစည်းအဝေးကို နေ့လယ် (၁၂:၃၀) နာရီအချိန်တွင် ရုပ်သိမ်းခဲ့ကြောင်း သိရှိရပါသည်။

DOCA(ရန်ကုန်)

          ရန်ကုန်တိုင်းဒေသကြီး၊ တွံတေးခရိုင်၊ ကွမ်းခြံကုန်းမြို့နယ် စားသုံးသူရေးရာ ဦးစီးဌာနမှ ဝန်ထမ်းများသည် အခြေခံစားသောက်ကုန် ရောင်းချသည့် ဆိုင်များသို့ အပတ်စဉ် ကွင်းဆင်း စိစစ်လျက်ရှိရာ ရန်ကုန်တောင်ပိုင်းခရိုင် ဦးစီးမှူးရုံး၏ ညွှန်ကြားချက်နှင့်အညီ မေလ(၂၂) ရက် နေ့၊ နံနက် (၀၉:၃၀) နာရီအချိန်တွင် ဈေးကွက်အတွင်း ရောင်းချပေးသည့် ဆိုင်များသို့  ပူးပေါင်းအဖွဲ့ဖြင့် ကွင်းဆင်းစစ်ဆေးခဲ့ကြောင်း သိရသည်။

          ထိုသို့ ကွင်းဆင်းစစ်ဆေးရာတွင် ကွမ်းခြံကုန်းမြို့နယ် စည်ပင်သာယာရေးအဖွဲ့မှ ဈေးတာဝန်ခံ ဦဇော်အေးမင်း၊ ကွမ်းခြံကုန်းမြို့နယ် စားသုံးသူရေးရာဦးစီးဌာနမှ မြို့နယ်တာဝန်ခံ ဒေါ်နွယ်နွယ်အေးနှင့် ဌာနခွဲစာရေး ဦးတင်ထွန်းဦးတို့ ပူးပေါင်းဆောင်ရွက်ခဲ့ကြပြီး ကွမ်းခြံကုန်း မြို့နယ် မြို့မဈေးအတွင်း ရောင်းချသော ဦးတင်ရှိန်+ ဒေါ်ခမ်း (ဆန်ရောင်းဝယ်ရေး)၊ ကိုမျိုးသွင် (ဆန်နှင့် ဆန်ထွက်ပစ္စည်းရောင်းဝယ်ရေး)၊ ကိုနိုင်ထွန်း+ မရီမြင့် (ကျော့) ဆန်ရောင်းဝယ်ရေး၊ ကိုရန်ကုန်သား (ဆန်နှင့် ဆန်ထွက်ရောင်းဝယ်ရေး) ဆိုင်များ၏ ဆန်ဈေးနှုန်းများအား စာရင်း ကောက်ယူခဲ့ကြကြောင်း သိရသည်။

            ထို့နောက် စားသုံးသူရေးရာဦးစီးဌာနမှ မြို့နယ်တာဝန်ခံ ဒေါ်နွယ်နွယ်အေးက မြန်မာ နိုင်ငံဆန်စပါး အသင်းချုပ်မှ ဆန်အမျိုးအစားအလိုက် သတ်မှတ်ရည်ညွှန်းဈေးများကို လစဉ် ထုတ်ပြန်လျက်ရှိရာ ယခုလအတွင်း သတ်မှတ်ရည်ညွှန်းဈေးဖြင့် ရောင်းချသွားရန်၊ ဈေးနှုန်း မြှင့်တင်ရောင်းချခြင်း မပြုရန်၊ ဈေးကစားရန် ရည်ရွယ်ချက်၍ သိုလှောင်ခြင်းများ မပြုလုပ် ကြရန် စီးပွားရေးလုပ်ငန်းရှင်များသို့ ကွင်းဆင်းစိစစ် အသိပညာပေးတွေ့ဆုံ ဆွေးနွေးခဲ့ကြောင်း သိရှိရပါသည်။

DOCA(ရန်ကုန်)

          ရန်ကုန်တိုင်းဒေသကြီး၊ တွံတေးခရိုင်၊ ကွမ်းခြံကုန်းမြို့နယ်၊ စားသုံးသူရေးရာဦးစီးဌာနမှ မြို့နယ်တာဝန်ခံနှင့် ဝန်ထမ်းများသည် ဈေးကွက်စောင့်ကြည့် စစ်ဆေးခြင်းများကို လစဉ် ဆောင်ရွက်လျက်ရှိရာ စားသုံးသူရေးရာဦးစီးဌာန ရန်ကုန်တောင်ပိုင်းခရိုင် ဦးစီးမှူးရုံး၏ ညွှန်ကြားချက်နှင့်အညီ အစားအသောက်ရောင်းချသည့် စားသောက်ဆိုင်များကို ကွင်းဆင်း စစ်ဆေးရန်   မေလ(၂၁)ရက်နေ့၊ နံနက်(၁၁:၀၀)နာရီအချိန်တွင် သက်ဆိုင်ရာဌာနများနှင့် ပူးပေါင်းကွင်းဆင်း စစ်ဆေးခဲ့ကြောင်း သိရသည်။

           ထိုသို့ ကွင်းဆင်းစစ်ဆေးရာတွင် ကွမ်းခြံကုန်းမြို့နယ် ပြည်သူ့ဆက်ဆံရေး ဦးစီးဌာနမှ အမျိုးသမီးကျန်းမာရေး ဆရာမ (HIV) ဒေါ်သန်းသန်းစိုး၊ မြို့နယ်စည်ပင်သာယာရေးအဖွဲ့မှ အခွန်ကောက်ဈေးတာဝန်ခံ ဦးချစ်ထွေး၊ မြို့နယ်စားသုံးသူရေးရာဦးစီးဌာနမှ မြို့နယ်တာဝန်ခံ ဒေါ်နွယ်နွယ်အေးနှင့် ဌာနခွဲစာရေး ဦးတင်ထွန်းဦးတို့ ပါဝင်သော ပူးပေါင်းအဖွဲ့မှ ကွမ်းခြံကုန်း မြို့နယ် တောင်ဘက်ပိုင်းရပ်ကွက် မင်းသုဝဏ်လမ်းရှိ “99 စားတော်ဆက်” စားသောက်ဆိုင် သို့အစားအသောက် ရောင်းချသည့်ကဏ္ဍ (၃)ရပ်တွင် ပါဝင်သောအချက်အလက်များ ဦးစားပေး စစ်ဆေးရသည့် အကြောင်းအရင်းများအား စာရင်းကောက်ယူ စစ်ဆေးမေးမြန်းခဲ့ကြောင်း သိရသည်။

          ထို့နောက် စားသုံးသူရေးရာဦးစီးဌာနမှ မြို့နယ်တာဝန်ခံ ဒေါ်နွယ်နွယ်အေးက အစားအသောက်များ ပြုပြင်ရောင်းချမှုတွင် အစားအသောက်များ သန့်ရှင်းလတ်ဆတ်မှုရှိစေရေး၊ အစားအသောက်များ ဆေးကြောသန့်စင်သည့် ရေများသန့်ရှင်းမှုရှိစေရေး၊ အစားအသောက် ချက်ပြုတ်သူများနှင့် ဝန်ဆောင်မှုပေးသူများ သန့်ရှင်းသပ်ရပ်မှုရှိစေရေး၊ အစားအသောက်များ၏ ဝန်ဆောင်မှုပေးအပ်သည့် အဖိုးအခကောက်ခံမှုကို ကြိုတင်အသိပေးခြင်း၊ အစားအသောက်များ၏ အမျိုးအစား၊ အရွယ်အစား၊ ပမာဏအလိုက် ဈေးနှုန်းများအား ပွင့်လင်းမြင်သာစွာဖြင့် ဖော်ပြစေခြင်းတို့အား စားသောက်ဆိုင် ဆိုင်ပိုင်ရှင်လုပ်ငန်းရှင်များကို အသိပညာပေး တွေ့ဆုံဆွေးနွေးကွင်းဆင်း စစ်ဆေးခဲ့ကြောင်း သိရှိရပါသည်။

DOCA(ရန်ကုန်)