HighLight News

        ဧရာဝတီတိုင်းဒေသကြီး၊ စားသုံးသူရေးရာဦးစီးဌာန၊ မြောင်းမြခခရိုင်ဦးစီးမှူးရုံး၊ မြောင်းမြမြို့နယ်တာဝန်ခံ ဦးလှထွဠ်ဦးနှင့်ဝန်ထမ်းများသည် တာဝန်ရှိသူများနှင့် ပူးပေါင်း၍ မြောင်းမြမြို့နယ်၊ မြို့ပေါ်ရှိဆန်စက်များသို့ (၂၂.၆.၂၀၂၆)ရက်နေ့၊ နေ့လယ် (၁၄:၃၀)  နာရီအချိန်တွင် ကွင်းဆင်းစစ်ဆေးခြင်း ဆောင်ရွက်ခဲ့ကြောင်း သိရသည်။   

              ထိုသို့ကွင်းဆင်းဆောင်ရွက်ရာတွင် မြောင်းမြမြို့နယ်တာဝန်ခံမှ ဆန်စက်လုပ်ငန်းရှင်များအား ဆန်စက်၏ ကြိတ်ခွဲထုတ်လုပ်မှုနှင့် ပြည်ပတင်ပို့နိုင်ရေး၊ အဆင့်အတန်းမီဆန်နှင့်ဆန်ထွက်ပစ္စည်းများ ကြိတ်ခွဲထုတ်လုပ်နိုင်ရေး၊ သတ်မှတ်အရည်အသွေး၊ စံချိန်စံညွှန်းများအတိုင်းတင်ပို့ရောင်ချနိုင်ရေး ကြိုးပမ်းဆောင်ရွက်သွားမည်ဖြစ်ပါသဖြင့်  ပိုးသတ်ဆေး၊ ဓါတ်ကြွင်းဓါတ်ကျန်များမပါရှိစေရန်နှင့်  စက်ရုံအတွင်း သန့်ရှင်းမှုရှိစေရေး ဆောင်ရွက်ထားကြရန်နှင့် MyRo တွင် မှတ်ပုံတင်ထား သည့်သတ်မှတ်ပမာဏ ထက်ပိုမိုသိုလှောင်ခွင့်မရှိကြောင်း၊ မှတ်ပုံတင်ထားပြီးသည့် ဆန်စပါးသိုလှောင်ရုံများအနေဖြင့် ကုန်ရ၊ ကုန်ထုတ်၊ ကုန်လက်ကျန်စာရင်းများအား အချိန်မီ Update ဖြည့်သွင်းနိုင်ရေးနှင့် မှတ်ပုံတင်သက်တမ်း တစ်နှစ်ပြည့်မြောက်ပြီး သက်တမ်းတိုးနိုင်ရေးနှင့် ဆန်စပါးလက်ကျန်အခြေအနေများအား ကွင်းဆင်းစစ်ဆေးခြင်းများ ဆောင်ရွက်ခဲ့ကြောင်း သိရှိ ရပါသည်။

DOCA(ဧရာဝတီ)

          ဖျာပုံခရိုင်၊ ဖျာပုံမြို့နယ်ရှိ ပြန်ကြားရေးနှင့် ပြည်သူ့ဆက်ဆံရေးဦးစီးဌာနတွင် ၂၀၂၆ခုနှစ်၊ ဇွန်လ(၁၉)ရက်နေ့၊ နံနက် (၁၀:၀၀)နာရီအချိန်တွင် သမဝါဝယမနှင့် ကျေးလက်ဖွံ့ဖြိုးရေး ဝန်ကြီးဌာန၊ အသေးစားစက်မှုလက်မှုလုပ်ငန်းဦးစီးဌာန၊ သီးနှံအခြေခံယို၊ ဖျော်ရည်အမျိုးမျိုးနှင့် တန်ဖိုးမြှင့်စားသောက်ကုန် ထုတ်လုပ်မှုနည်းပညာသင်တန်းဆင်းပွဲ အခမ်းအနားတွင် ဒုခရိုင်ဦးစီးမှူး ဦးစိုးမင်းထိုက်မှ စားသုံးသူကာကွယ်ပေးခြင်းဆိုင်ရာ အသိပညာပေး ဟောပြောခဲ့ပါသည်။ အဆိုပါဟောပြောရာတွင်  စားသုံးသူကာကွယ်ပေးခြင်းဆိုင်ရာများ ဟောပြောခြင်း၊ တိုင်ကြား နိုင်ခြင်းနှင့်ပတ်သက်၍ စားသုံးသူများအနေဖြင့် နစ်နာဆုံးရှုံးမှုတစ်စုံတစ်ရာ ဖြစ်ပေါ်လာပါက မည်သို့သောပုဂ္ဂိုလ်တွေက်တိုင်ကြားခွင့်နှင့် မည်သို့မည်ပုံ တိုင်ကြားနိုင်ကြောင်း ရှင်းလင်းဆွေးပြောကြားခြင်း၊ စားသုံးသူရေးရာဦးစီးဌာနအနေဖြင့် ညှိနှိုင်းဖြေရှင်းပေးတဲ့နေရာမှာ အဓိကအားဖြင့် အချက်(၇)ချက်ဖြင့် ဆောင်ရွက်လျက်ရှိကြောင်း၊ စုံစမ်းစစ်ဆေးခဲ့မှုနှင့် စပ်လျဉ်း၍ လိုအပ်သော စာရွက်စာတမ်းများနှင့် အခြားသက်သေခံပစ္စည်းများကိုစစ်ဆေးခြင်း၊ တိုင်ကြားခံရသည့် စီးပွားရေးလုပ်ငန်းရှင် သို့မဟုတ် ယင်း၏ တရားဝင်ကိုယ်စားလှယ်ကို ညှိနှိုင်းဖြေရှင်းနိုင်ရန်ခေါ်ယူခြင်း၊ တိုင်ကြားခံရသော စီးပွားရေးလုပ်ငန်းရှင် (သို့မဟုတ်) ယင်း၏ တရားဝင်ကိုယ်စားလှယ်သည် ဆင့်ခေါ်ရာသို့ လာရောက်ခြင်းမရှိပါက တစ်ဖက်သက်စစ်ဆေးဆုံးဖြတ် ခွင့်ရှိခြင်းတို့အား စုံလင်စွာ ရှင်းလင်းပြောကြားခဲ့ကြောင်း သိရှိရပါသည်။

DOCA(စစ်ကိုင်း)

         စားသုံးသူရေးရာဦးစီးဌာန၊ ဘိုကလေးမြို့နယ်တာဝန်ခံနှင့် ဝန်ထမ်းတို့သည့် အထွေထွေအုပ် ချုပ်ရေးဦးစီးဌာန၊ မိခင်နှင့်ကလေးစောင့်ရှောက်ရေးအသင်းဥက္ကဌနှင့် မြို့နယ်အမျိုးသမီးရေးရာအဖွဲ့၊ ကျန်းမာရေးဦးစီးဌာန၊ စည်ပင်သာယာရေးအဖွဲ့တို့နှင့် ပူးပေါင်း၍ ၂၀၂၆ခုနှစ်၊ဇွန်လ (၂၃)ရက်နေ့၊ နံနက်(၀၉:၀၀)နာရီအချိန်တွင် မြို့မ(၅)ရပ်ကွက်ရှိ အခြေခံပညာအထက်တန်းကျောင်းရှိ ကျောင်းမုန့်ဈေးတန်းများသို့ ကွင်းဆင်းစိစစ်ခဲ့ကြောင်း သိရသည်။

       အဆိုပါကွင်းဆင်းစစ်ဆေးရေးအဖွဲ့မှ ကျောင်းမုန့်ဈေးတန်းတွင် မြန်မာမုန့်မျိုးစုံ၊ မုန့်ဟင်းခါး၊ ခေါက်ဆွဲ၊ အသုတ်စုံ၊ ထမင်းကြော် ရောင်းချနေသော ဈေးသည်များအား သန့်ရှင်းလတ်ဆက်သော အစားအစာများကိုရောင်းချရန်နှင့် ငရုတ်ဆီအစားထိုး၊ မန်ကျည်းအနစ်ကိုသာဖျော်၍ ရောင်းချရန်နှင့် အစားအသောက်များကို ယင်မနားအောင် ဖုံးအုပ်ထားရန်နှင့် အစားအသောက် အသုံးအဆောင်ပစ္စည်းများကို သန့်ရှင်းစွာ ဆေးကြောရန်နှင့် အစားအသောက်များကို လက်အိတ်စွပ်၍ ကိုင်တွယ်ရန် အသိပညာပေး၍ ကွင်းဆင်းဆောင်ရွက်ခဲ့ကြောင်း သတင်းရရှိပါသည်။

DOCA(ဧရာဝတီ)

        ၂၀၂၆ ခုနှစ်၊ ဇွန်လ (၂၂) ရက်နေ့‌ နေ့လယ်(၁၂:၀၀)နာရီအချိန်တွင် စားသုံးသူရေးရာဦးစီးဌာနမှ တာဝန်ရှိသူများနှင့် စည်ပင်သာယာ‌‌ရေးအဖွဲ့တို့ပူး‌ပေါင်း၍ ဈေးကွက်အတွင်း ရောင်းချလျက်ရှိသေ ာစားသုံးဆီ(ဘူးဆီ)များအား စားသုံးသူအကျိုးစီးပွား ကာကွယ်ရေးလုပ်ငန်းများ ထိရောက်စွာဆောင်ရွက်နိုင်ရေးအတွက် ကွင်းဆင်းစစ်ဆေးခြင်း ဆောင်ရွက်ခဲ့ကြောင်း သိရသည်။
     ထိုသို့ကွင်းဆင်းစစ်ဆေးရာတွင် Duck၊ Lotus၊ Mezenအမှတ်တံဆိပ် စားသုံးဆီ(ဘူးဆီ)များ၏ထုတ်ကုန်အမည်၊ အမျိုးအစား၊ မှတ်ပုံတင်အမှတ်၊ ထုတ်လုပ်/တင်သွင်းခွင့်ဆိုင်ရာ အချက်အလက်များနှင့် သတ်မှတ်ချက်များနှင့် ကိုက်ညီမှုရှိ/ မရှိတို့အား စိစစ်ဆောင်ရွက်ခဲ့ပြီး စစ်ဆေးတွေ့ရှိချက်များကို စစ်ဆေးမှတ်တမ်းတွင်စနစ်တကျ မှတ်တမ်းတင်ထားရှိခဲ့ပါသည်။ စားသုံးသူများအနေဖြင့် အရည်အသွေးပြည့်မီပြီးဘေးအန္တရာယ်ကင်းရှင်းသော စားသောက်ကုန်များကို ရွေးချယ်ဝယ်ယူသုံးစွဲနိုင်စေရေးနှင့် ဈေးကွက်အတွင်း စံချိန်စံညွှန်းနှင့် ကိုက်ညီသော ကုန်ပစ္စည်းများသာ ဖြန့်ဖြူးရောင်းချနိုင်စေရေးအတွက် စားသုံးသူရေးရာဦးစီးဌာနမှ ဆက်လက်ကွင်းဆင်း စစ်ဆေးခြင်းများ ဆောင်ရွက်လျက်ရှိကြောင်း အသိပညာပေးပြောကြားခဲ့ကြောင်း သတင်းရရှိပါသည်။ 

DOCA(ဧရာဝတီ)

     ၂၀၂၆ ခုနှစ်၊ ဇွန်လ (၁၉) ရက်နေ့၊ နံနက် (၁၀:၃၀) နာရီအချိန်တွင် ဒေးဒရဲမြို့နယ်၊ မှော်အိုင်ကျေးရွာ အခြေခံပညာအထက်တန်းကျောင်း(ခွဲ)၌ စားသုံးသူရေးရာဦးစီးဌာနမှ စားသုံးသူကာကွယ်ရေးဆိုင်ရာ အသိပညာပေးဟောပြောပွဲကို ကျင်းပပြုလုပ်ခဲ့ကြောင်း သိရသည်။
            အဆိုပါဟောပြောပွဲတွင် စားသုံးသူများ၏ အခွင့်အရေး (၈) ရပ်၊ စားသုံးသူများ၏ တာဝန် (၄)ရပ်၊ကုန်ပစ္စည်းများ ဝယ်ယူသုံးစွဲရာတွင် ကုန်အညွှန်းအမှတ်အသားများကို စနစ်တကျဖတ်ရှုစစ်ဆေး၍ သက်တမ်းလွန်ပစ္စည်းများ၊ အရည်အသွေးမပြည့်မီသော ကုန်ပစ္စည်းများကို ရှောင်ရှားဝယ်ယူသုံးစွဲရန်၊ ဘေးအန္တရာယ်ကင်းရှင်း၍ အရည်အသွေးပြည့်မီသော ကုန်ပစ္စည်းများကို ရွေးချယ်သုံးစွဲရန်နှင့် စားသုံးသူများ၏ နစ်နာဆုံးရှုံးမှုများဖြစ်ပေါ်ပါက တိုင်ကြားနိုင်သည့် နည်းလမ်းများကို ရှင်းလင်းဆွေးနွေး ဟောပြောခဲ့သည်။ အဆိုပါ အသိပညာပေးဟောပြောပွဲသို့ မှော်အိုင်ကျေးရွာ အခြေခံပညာအထက်တန်း ကျောင်း(ခွဲ)မှ ကျောင်းသား/ ကျောင်းသူ (၉၀) ဦး တက်ရောက်ခဲ့ကြပြီး သိရှိလိုသည်များကို မေးမြန်းဆွေးနွေးခဲ့ကြကြောင်း သိရှိရပါသည်။

DOCA(ဧရာဝတီ)