HighLight News

     စားသုံးသူရေးရာဦးစီးဌာန၊ မြောက်ပိုင်းခရိုင်ဦးစီးမှူးရုံးမှ ဒေါ်တင်တင်ဌေး (ရုံးအုပ်)၊ ဒေါ်ဖြူဖြူမြင့် (ဒုကြီးကြပ်ရေးမှူး)၊ ကျန်းမာရေးဦးစီးဌာနမှ ကျန်းမာရေးမှူး ဦးမြင့်ထွေး၊ ရန်ကုန်မြို့ တော်စည်ပင်သာယာရေးကော်မတီမှ ဈေးတာဝန်ခံ ဦးဝေဝင်းအောင်တို့သည် ၂၀၂၄ခုနှစ်၊ ဖေဖေါ်ဝါရီလ (၁၃)ရက်နေ့တွင် တိုက်ကြီးနှင့်မှော်ဘီမြို့နယ်ရှိဈေးများသို့ ကွင်းဆင်းစစ်ဆေးခဲ့ကြပါသည်။

    ထိုသို့စစ်ဆေးခဲ့ရာတွင် တိုက်ကြီးနှင့်မှော်ဘီမြို့နယ်မှ ကျန်းမာရေးဦးစီးဌာန၊ ဈေးတာဝန်ခံများနှင့်  တိုက်ကြီးမြို့နယ်နှင့် မှော်ဘီမြို့နယ်များရှိ မြို့မဈေးအတွင်းရှိ ကုန်စုံဆိုင်များတွင်ရောင်းချနေသော ကလေးအာဟာရဖြည့်စွက်စာအမျိုးမျိုးဖြစ်သည့် Similac, Gold Power, Pediasure, Dupro (1),DG-2  နှင့် စားသုံးဆီအမျိုးမျိုးဖြစ်သော ရွှေနန်းထိုက်၊ အမေထွား၊ ရန်ကုန်၊ ရွှေအုံ၊ Cook၊ Goody၊ Lotus၊ Sunar၊ Meizan၊ Yarthetpan အစရှိသော စားသုံးဆီအမျိုးမျိုးတို့တွင် ကုန်စည်အမျိုးအစားအလိုက် သတ်မှတ်ချက်များနှင့်အညီ သိသာထင်ရှားစွာဖော်ပြပါရှိ ရရမည့်အချက်များနှင့် ကုန်အညွှန်းအမှတ်အသားဖော်ပြခြင်းနှင့်ကိုက်ညီသည့် ကုန်စည်များကိုသာဝယ်ယူရောင်းချရန်လိုအပ်ကြောင်းအသိပညာပေးပြောကြားခဲ့ပြီးနောက် ကုန်အညွှန်းအမှတ်အသားတွင် ဖော်ပြရမည့်အချက်များပြည့်စုံစွာပါဝင်ခြင်းရှိ/မရှိကိုစစ်ဆေးခဲ့ရာ ပြည့်စုံမှုရှိကြောင်း စစ်ဆေးတွေ့ရှိခဲ့ပါသည်။

DOCA(ရန်ကုန်)

     ရန်ကုန်တိုင်းဒေသကြီး၊ စားသုံးသူရေးရာဦးစီးဌာန၊ တောင်ပိုင်းခရိုင်ဦးစီးမှူးရုံးလက်အောက်ရှိ စားသုံးသူရေးရာဦးစီးဌာန၊ ပြန်ကြားရေးနှင့်ပြည်သူ့ဆက်ဆံရေးဦးစီးဌာနနှင့် မြန်မာတိုင်းရင်ဆေးဦးစီးဌာနတို့ပူးပေါင်း၍ ၂၀၂၄ခုနှစ်၊ ဖေဖော်ဝါရီလ (၉)ရက်နေ့၊ နံနက်(၁၀:၀၀)နာရီအချိန်တွင် စားသုံးသူပြည်သူများအား စားသုံးသူကာကွယ်ရေးအသိပညာပေးရေးလုပ်ငန်းနှင့် စာဖတ်ရှိန်မြှင့်တင်ရေးလုပ်ငန်းများကို စဉ်ဆက်မပြတ်ဆောင်ရွက်လျက်ရှိရာ ရန်ကုန်တိုင်းဒေသကြီး၊ ခရမ်းမြို့နယ်၊ တမံကြီးကျေးရွာရှိ အ.ထ.က (ခွဲ) စာသင်ကျောင်း၌လည်း အသိပညာပေး ဟောပြောပွဲကျင်းပခဲ့ကြောင်းသိရပါသည်။

     အဆိုပါဟောပြောပွဲတွင် စားသုံးသူရေးရာဦးစီးဌာနမှ မြို့နယ်တာဝန်ခံက စားသုံးသူများဘေးအန္တရာယ်ကင်းရှင်းစေရေးနှင့် ထုတ်ကုန်များလုံခြုံစိတ်ချရမှုရှိစေရေးအတွက် စားသုံးသူ၏ အခွင့်အရေးနှင့်တာဝန်များ၊ ကုန်စည်တွင်ဖော်ပြပါရှိရမည့် ကုန်အညွှန်းအမှတ်အသားဖော်ပြရာတွင် မြန်မာဘာသာဖြင့် မဖြစ်မနေဖော်ပြပါရှိရမည့်အချက်များ၊ စားသုံးသူများအမှန်တကယ် နစ်နာဆုံးရှုံးမှုများရှိလာပါက တိုင်ကြားနိုင်သည့်နည်းလမ်းများ၊ ကျောင်းသား/ ကျောင်းသူများအနေဖြင့် မြန်မာဘာသာဖြင့် ကုန်အညွှန်းအမှတ်အသားဖော်ပြပါရှိသည့် စားသောက်ကုန်များ ကိုသာ ကြည့်ရှုစစ်ဆေးပြီးမှ ဝယ်ယူသုံးစွဲကြရန်၊ ဆိုးဆေးအများအပြားသုံးစွဲထားသော အစားအသောက်များကို အားပေးဝယ်ယူသုံးစွဲခြင်းများမပြုလုပ်ကြရန်၊ ဈေးကွက်အတွင်း တရားမဝင်ကုန်စည်များအား ဈေးကွက်စောင့်ကြည့်ကွင်းဆင်းစစ်ဆေးခြင်းများကို မိမိတို့၏ဌာနအနေဖြင့် စဉ်ဆက်မပြတ်ဆောင်ရွက်လျက်ရှိကြောင်း စသည်တို့ကို အသိပညာပေးဆွေးနွေးဟောပြောခဲ့ပြီး ဆက်လက်၍ မြန်မာတိုင်းရင်းဆေးဦးစီးဌာန၊ မြို့နယ်ဦးစီးမှူးက နိုင်ငံတော်အနေဖြင့် တိုင်းရင်းဆေးများကို အဆင့်မြှင့်တင်နိုင်ရေးအတွက် လမ်းညွှန်မှာကြားထားကြောင်း၊ ယခုအချိန်တွင်မိမိတို့ဌာနအနေဖြင့် အရည်အသွေးမြင့်တိုင်းရင်းဆေးများကိုထုတ်လုပ်ဖြန့်ဖြူးရောင်းချပေးလျက်ရှိကြောင်းတို့ကိုအသိပညာပေးဟောပြောခဲ့ပြီး ပြန်ကြားရေးနှင့်ပြည်သူ့ဆက်ဆံရေးဦးစီးဌာန၊ ဦးစီးမှူးကလည်း ပြည်သူများအနေဖြင့် အသိပညာဗဟုသုတတိုးပွားစေရန်ရည်ရွယ်၍ ပြည်သူ့စာကြည့်တိုက် Online page မှတစ်ဆင့် စာအုပ်မိတ်ဆက်ပုံပြောခြင်း၊ ကဗျာရွတ်ခြင်း၊ အပြင်စာအုပ်များငှားရမ်းပေးခြင်း၊ စာအုပ်ပြပွဲ၊ ပြိုင်ပွဲများပြုလုပ်ပေးခြင်းနှင့် စာပေများကို အဆက်မပြတ်လေ့လာဖတ်ရှုကြရန်နှင့် စာအုပ်၊ စာစောင်များလေ့လာဖတ်ရှုခြင်းကြောင့် ကိုယ်တိုင်စဉ်းစားတွေးခေါ်တတ်သော အတွေးအခေါ်အမြော်အမြင်များရရှိလာပြီး ဘေးကင်းလုံခြုံစိတ်ချရသော အစားအသောက်များကို ရွေးချယ်ဝယ်ယူစားသောက်နိုင်မည်ဖြစ်သောကြောင့် မိမိတို့ဌာနအနေဖြင့် စာဖတ်ရှိန်မြှင့်တင်ရေးအသိပညာပေးခြင်းလုပ်ငန်းအစီအစဉ်ကိုလည်း စားသုံးသူရေးရာဦးစီးဌာနနှင့်ပူးပေါင်း၍ စဉ်ဆက်မပြတ်ဆက်လက်ဆောင်ရွက်သွားမည်ဟုပြောကြားခဲ့ကြောင်း သိရှိရပါသည်။

DOCA(ရန်ကုန်)

    ဧရာဝတီတိုင်းဒေသကြီး၊ ဘိုကလေးမြို့နယ်၊ စားသုံးသူရေးရာဦးစီးဌာန၊ မြို့နယ်တာဝန်နှင့်ဝန်ထမ်းများသည် ပြန်ကြားရေးနှင့်ပြည်သူ့ဆက်ဦးစီးဌာနနှင့်ပူးပေါင်း၍ ၂၀၂၄ခုနှစ်၊ ဖေဖော်ဝါရီလ (၉)ရက်နေ့၊ နံနက်(၁၁:၀၀) နာရီအချိန်တွင် ဘိုကလေးမြို့၊ ပြန်ကြားရေးနှင့်ပြည်သူဆက်ဆံရေးဦးစီးဌာနတွင် Talk Show ပြုလုပ်ဆောင်ရွက်ခဲ့ပါသည်။

      အဆိုပါဟောပြောပွဲတွင် ဘိုကလေးမြို့နယ်တာဝန်ခံက စားသုံးသူကာကွယ်ရေးနှင့်ပတ်သက်၍ စားသုံးသူ၏အခွင့်အရေးနှင့်တာဝန်များ၊ စားသုံးသူများလုံခြုံစိတ်ချရမှုရှိစေရေးအတွက် မိမိတို့အနေဖြင့် ကုန်စည်နှင့်ဝန်ဆောင်မှုများကိုဝယ်ယူခြင်းမပြုမီ သတိပြုဆောင်ရွက်ရမည့်အချက်များ၊ စားသုံးသူကာကွယ်ရေးဥပဒေ အခန်း(၁၈)ပါ ကုန်အညွှန်းအမှတ်အသားဖော်ပြခြင်းနှင့်စပ်လျဉ်း၍ စားသုံးသူများအနေဖြင့် ရွေးချယ်ဝယ်ယူခွင့်ရှိကြောင်းနှင့် နစ်နာဆုံးရှုံးမှုများဖြစ်ပေါ်လာပါက သက်ဆိုင်ရာတိုင်း/ခရိုင်/မြို့နယ်များရှိ စားသုံးသူရေးရာဦးစီးဌာနများနှင့် စားသုံးသူရေးရာဦးစီးဌာန၏ website ဖြစ်သော www. doca. gov. mm တွင်လည်းတိုင်ကြားနိုင်ကြောင်း  အသိပညာပေးဟောပြောခဲ့သည်ဟု သတင်းရရှိပါသည်။

DOCA(ဧရာဝတီ)

     ဧရာဝတီတိုင်းဒေသကြီး၊ ဖျာပုံခရိုင်၊ ကျိုက်လတ်မြို့နယ်၊ စားသုံးသူရေးရာဦးစီးဌာနမြို့နယ်တာဝန်ခံနှင့် ဝန်ထမ်းများသည် ၂၀၂၄ခုနှစ်၊ ဖေဖော်ဝါရီလ (၁၃) ရက်နေ့၊ နံနက် (၁၀:၀၀) နာရီ အချိန်တွင် ကျိုက်လတ်မြို့နယ်၊ အမှတ်(၅) ရပ်ကွက်ရှိ ဦးဇော်မင်းနိုင်၏ “ဖြိုး” ငါးရံ့ခြောက်ဖုတ်လုပ်ငန်းသို့သွားရောက်၍ MSMEs ဖွံ့ဖြိုးတိုးတက်ရေး ကွင်းဆင်းစိစစ်ခဲ့ကြပါသည်။

    အဆိုပါကွင်းဆင်းစိစစ်ရာတွင် လိုအပ်သောကုန်ကြမ်းများကို ရန်ကုန်နှင့်မအူပင်မှ အဓိကဝယ်ယူရရှိကြောင်း၊ ရရှိလာသောကုန်ကြမ်းများကို အသင့်စားသောက်နိုင်သည်အထိ အဆင့်ဆင့် ထုတ်လုပ်ရကြောင်း၊ လုပ်သားအင်အား (၆) ဦးဖြင့် လည်ပတ်လုပ်ကိုင်လျက်ရှိပြီး တစ်ဦးလျှင် လုပ်ခလစာ တစ်သိန်းခွဲခန့်ပေးရပြီး ငါးရံ့ခြောက်ဖုတ်များကို ရန်ကုန်၊ နေပြည်တော်၊ မအူပင်၊ ဖျာပုံ၊ ကျိုက်လတ်၊ ဘိုကလေးနှင့် ကျန်ဒေသများသို့လည်းဖြန့်ဖြူးရောင်းချလျက်ရှိကြောင်း၊ ခေတ်မှီစက်ကိရိယာများအပြင် မီးသွေးမီးဖိုကိုအဓိကထား၍ ထုတ်လုပ်ရကြောင်းနှင့် ပလတ်စတစ်အထုပ်သေး၊ အထုပ်ကြီးနှင့် ဘူးများဖြင့် ထုတ်လုပ်ဖြန့်ဖြူးရောင်းချလျက်ရှိပြီး မြို့နယ်တာဝန်ခံက  စားသုံးသူများဘေးအန္တရာယ်ကင်းရှင်းစွာစားသုံးနိုင်ရေးနှင့် ဈေးကွက်အတွင်း SMEs လုပ်ငန်းများတစ်နိုင်တစ်ပိုင်ထုတ်လုပ်ဖြန့်ဖြူးရောင်းချနိုင်ရေးအတွက် မိမိတို့ဌာနအနေဖြင့် လုပ်ငန်းရှင်များ၏ လိုအပ်ချက်များကို ကူညီဆောင်ရွက်ပေးသွားမည်ဖြစ်ကြောင်း ကွင်းဆင်းစိစစ်ခဲ့မှုကိုသတင်းရရှိပါသည်။

DOCA(ဧရာဝတီ)

    (၇၇) နှစ်မြောက် ပြည်ထောင်စုနေ့အထိမ်းအမှတ် MSME ထုတ်ကုန်ပြပွဲကို နေပြည်တော်၊ တပေါင်းကွင်း၌ ဖေဖော်ဝါရီလ(၁၀)ရက်နေ့မှ (၁၄) ရက်နေ့ထိ (၅) ရက်တိုင်တိုင်ပြသခဲ့ရာ မွန်ပြည်နယ်စားသုံးသူရေးရာဦးစီးဌာနမှ ဒုတိယပြည်နယ်ဦးစီးမှူးသည် မွန်ပြည်နယ်အစိုးရအဖွဲ့နှင့်ပူးပေါင်းပါဝင်ဆောင်ရွက်ခဲ့သည်။

   အဆိုပါပြခန်းပြသရာတွင် မွန်ပြည်နယ်စားသုံးသူရေးရာဦးစီးဌာနမှ မွန်ပြည်နယ်ဒေသထွက် ဝဥနှင့်ကွမ်းသီးပြခန်းများကို ကြီးကြပ်ကွပ်ကဲပြသခဲ့ကြောင်းသိရှိရသည်။ အဆိုပါဝဥနှင့်ကွမ်းသီးမှာ ပြည်ပပို့ကုန်အလားအလာရှိသော ကုန်ပစ္စည်းများဖြစ်ပြီး ဝဥမှတစ်ဆင့် ဝဥခြောက်၊ ဝဥမှုန့်များထုတ်လုပ်ပြီး တရုတ်နှင့် ဂျပန်နိုင်ငံများသို့တင်ပို့ကြောင်း၊ ဝဥစိုမှထုတ်လုပ်သော ဝဥတုံးများကို ခေတ်မီဆန်းသစ်သော ထုပ်ပိုးမှုများဖြင့် ဈေးကွက်အတွင်းဖြန့်ချိလျက်ရှိကြောင်း၊ ဝဥမှ ဝဥခေါက်ဆွဲနှင့် ဝဥကြာဆံများကိုလည်း ထုတ်လုပ်နိုင်ကြောင်းသိရှိရသည်။

      ထို့ပြင် မွန်ပြည်နယ်၊ မော်လမြိုင်နှင့် ရေးမြို့နယ်များမှထွက်ရှိသော ကွမ်းသီးခြောက်များကို အိန္ဒိယနိုင်ငံသို့တင်ပို့ရန် ကြိုးစားလျက်ရှိပြီး ကွမ်းသီးနုပေါင်းကုန်ကြမ်းများကို တရုတ်နိုင်ငံသို့တင်ပို့ခဲ့ရှိကြောင်းသိရှိရပါသည်။

DOCA(မွန်)