HighLight News

            ဧရာဝတီတိုင်းဒေသကြီး၊ စားသုံးသူရေးရာဦးစီးဌာန၊ ဟင်္သာတခရိုင်တာဝန်ခံသည် မြန်အောင်မြို့နယ်၊ အမှတ်(၃)ရပ်ကွက်၊ နေခြည်ဈေးအတွင်းရှိ ဆေးဆိုင်များတွင် (၁၂.၅.၂၀၂၂) ရက်နေ့ နံနက်(၉:၀၀) နာရီအချိန်တွင် မြို့နယ်တိုင်းရင်းဆေးဦးစီးဌာန၊ မြို့နယ်စည်ပင်ဦးစီးဌာနတို့နှင့် ပူးပေါင်း၍  မြို့ပေါ်ဆေးဆိုင်များအား ဈေးကွက်စောင့်ကြည့်စစ်ဆေးခြင်းကို ကွင်းဆင်းဆောင်ရွက်ခဲ့ပါသည်။

           Online ပေါ်တွင် အကိုက်အခဲရောဂါပေါင်းစုံ ပျောက်သည်ဟုဆိုကာ ရောင်းချနေသောဆေးများရှိသဖြင့် စားသုံးသူပြည်သူများ ဘေးဥပါဒ်အန္တရာယ်ကင်းရှင်းစေရေးတို့အတွက် မြန်မာနိုင်ငံတွင်လည်း တရားဝင်ဆေးဝါးမှတ်ပုံတင်ထားခြင်းမရှိသော ဆေးပစ္စည်းများ တင်သွင်းရောင်းချနေခြင်း ရှိ/မရှိ စစ်ဆေးခဲ့ကြပြီး တင်းသွင်းခြင်း၊ ဖြန့်ဖြူးခြင်း၊ ရောင်းချခြင်းမပြုရန် အသိပညာပေး ဆွေးနွေးမှုများ ပြုလုပ်ခဲ့ကြောင်း သိရှိရပါသည်။

DOCA(ဧရာဝတီ)

           ပဲခူးတိုင်းဒေသကြီး၊စားသုံးသူရေးရာဦးစီးဌာန၊ ပြည်ခရိုင်ဦးစီးမှူးရုံးအနေဖြင့် ပြည်ခရိုင်အတွင်းရှိ အများပြည်သူတို့ စားသုံးသူရေးရာကိစ္စရပ်များအား ကျယ်ကျယ်ပြန့်ပြန့်သိရှိနားလည်နိုင်စေရေး ရည်ရွယ်၍ ပန်းတောင်းမြို့နယ်အတွင်း မေ (၁၁)ရက်၊ နံနက်ပိုင်း၌ ဆင်တဲအုပ်စု၊ တမာကုန်းရွာ၊ နေ့လည်ပိုင်း၌ ဆင်တဲအုပ်စု၊ စွယ်တော်ရွာ၊ ပေါက်ခေါင်းမြို့နယ်အတွင်း မေ (၅)ရက်၌ သဖန်းချို အုပ်စု၊ သဖန်းချိုရွာ၊ မေ (၉)ရက်၌ ဘန့်ပြင်အုပ်စု၊ ကြို့ကြာရွာစသည်တို့တွင် သက်ဆိုင်ရာမြို့နယ်တာဝန်ခံတို့မှ မြို့နယ်ဌာနဆိုင်ရာ အဖွဲ့အစည်းများနှင့် ပူးပေါင်းကာ စားသုံးသူအသိပညာပေး ဟောပြောဆွေးနွေးခြင်း ဆောင်ရွက်ခဲ့ကြပါသည်။

          အဆိုပါ ဟောပြောပွဲတွင် သက်ဆိုင်ရာမြို့နယ်တာဝန်ခံမှ စားသုံးသူကာကွယ်ရေး ဉပဒေပါ စားသုံးသူတို့၏ အခွင့်အရေးများ၊ လိုက်နာရမည့် တာဝန်များနှင့် ကုန်အညွှန်းအမှတ်အသား ရေးသားဖေါ်ပြခြင်းဆိုင်ရာ အကြောင်းအရာများ၊ နစ်နာဆုံးရှုံးမှုများ ဖြစ်ပေါ်လာပါက တိုင်ကြားနိုင်မည့် ဖုန်းနံပါတ်နှင့် လိပ်စာများအား အသိပညာပေး ပြောကြားခဲ့ပြီး စားသုံးသူကာကွယ်ရေး အသိပညာပေးလက်ကမ်းစာစောင်များ ဖြန့်ဝေပေးခဲ့ကြောင်း သတင်းရရှိပါသည်။

DOCA(ပဲခူး)

          စားသုံးသူရေးရာဦးစီးဌာန၊ ပဲခူးတိုင်းဒေသကြီး၊ ပြည်ခရိုင်ဦးစီးမှူးရုံးအနေဖြင့် စားသုံးသူပြည်သူများမှ ကုန်အညွှန်းအမှတ်အသားများ ပြည့်စုံမှန်ကန်စွာ ဖေါ်ပြမှုရှိသည့် ကုန်စည်များကို ရွေးချယ်ဝယ်ယူသုံးစွဲနိုင်ရေး၊ ကုန်စည်/ဝန်ဆောင်မှုနှင့်စပ်လျဉ်း၍ အခြေခံလိုအပ်ချက်များပေါ်တွင် စိတ်ကျေနပ်မှုရရှိစေရေးတို့အတွက် စားသုံးသူကာကွယ်ရေးဆိုင်ရာ အသိပညာဗဟုသုတများ ကျယ်ကျယ်ပြန့်ပြန့် သိရှိနိုင်စေရန်ရည်ရွယ်၍ ပြည်ခရိုင်၊ ရွှေတောင်မြို့နယ်တွင် မေ (၆)ရက်နေ့၌ သာစည်ကုန်းအုပ်စု၊ ဖုန်းဆိုးရွာ၊ မေ (၉)ရက်နေ့၌ ဝါးတောအုပ်စု၊ ဖါးအိုင့်ရွာ၊ ပေါင်းတည်မြို့နယ် အတွင်း မေ (၆)ရက်နေ့၌ ရွာသစ်ကြီးအုပ်စု၊ ရှမ်းစပ်ရွာ၊ မေ (၉)ရက်နေ့၌ မန်ကျီးကုန်းအုပ်စု၊ မန်ကျီးကုန်းရွာ၊ မေ (၁၁)ရက်နေ့၌ ညောင်ဖြူအုပ်စု၊ ညောင်ဖြူရွာစသည်တို့တွင် သက်ဆိုင်ရာ မြို့နယ်တာဝန်ခံတို့မှ မြို့နယ်ဌာနဆိုင်ရာ အဖွဲ့အစည်းများနှင့် ပူးပေါင်းကာ စားသုံးသူကာကွယ်ရေး အသိပညာပေးဟောပြောဆွေးနွေးခြင်းများ ဆောင်ရွက်ခဲ့ပါသည်။

          အဆိုပါ ဟောပြောပွဲတွင် သက်ဆိုင်ရာမြို့နယ်တာဝန်ခံမှ စားသုံးသူကာကွယ်ရေးဉပဒေပါ စားသုံးသူများ၏ အခွင့်အရေးနှင့်တာဝန်များ၊ စီးပွားရေးလုပ်ငန်းရှင်များ လိုက်နာရမည့် တာဝန်နှင့် တားမြစ်ချက်များ၊ ကုန်စည်ထုတ်လုပ်ရာတွင် သိသာထင်ရှားစွာဖေါ်ပြရမည့် ကုန်အညွှန်း အမှတ်အသားဖေါ်ပြခြင်းဆိုင်ရာအချက်များ၊ စားသုံးသူများ နစ်နာဆုံးရှုံးမှုရှိပါက တိုင်ကြားနိုင်သည့် ပုဂ္ဂိုလ်များ၊ နည်းလမ်းများ၊ ဖုန်းနံပါတ်နှင့်လိပ်စာ၊ ဉပဒေအရချမှတ်နိုင်သည့် ပြစ်မှုပြစ်ဒဏ်များ စသည့်အကြောင်းအရာတို့အား အသိပညာပေးပြောကြားခဲ့ပြီး စားသုံးသူကာကွယ်ရေး အသိပညာပေး လက်ကမ်းစာစောင်များလည်း ဖြန့်ဝေပေးခဲ့ကြောင်း သတင်းရရှိပါသည်။

DOCA(ပဲခူး)

           ရွှေဘိုပေါ်ဆန်းစိုက်ပျိုးထုတ်လုပ်တင်ပို့ရောင်းချသူများအသင်း(SPFMTA)အနေဖြင့်ရွှေဘိုပေါ်ဆန်း  G.I ရရှိ‌ရေးအတွက် ပြင်သစ်နိုင်ငံ၏ထောက်ပံ့မှု GREAT Myanmar ၏ ကူညီပံ့ပိုးမှုနှင့်ဆောင်ရွက်နေသည်မှာ အားလုံးသိရှိပြီးဖြစ်သည်။

          ယခုအခါ ရွှေဘိုပေါ်ဆန်း GI ရရှိရေးတွင် အဓိကအရေးပါသည့် “ရွှေဘိုပေါ်ဆန်း အရည်အသွေး မှတ်တမ်းစာအုပ် (BOS)” ကိုရေးဆွဲလျှက်ရှိရာ Version.0 မှ Version.1 သို့ နောက်ဆုံး အတည်ပြု တိုးမြှင့်သတ်မှတ်ခြင်း အလုပ်ရုံဆွေးနွေးပွဲကို ၁5.၅.၂၀၂၂ ရက် တနင်္ဂနွေနေ့၌ရွှေဘိုမြို့ ၊ ရွှေဘို ဟော်တယ်တွင်ကျင်းပရာ ရွှေဘိုပေါ်ဆန်းအသင်းမှတောင်သူများ၊ ဆန်စက်ပိုင်များ၊ ဆန်ကုန်သည်များ နှင့် ရွှေဘိုပေါ်ဆန်း GI  စီမံကိန်းမှ National Project Coordinator ၊Technical Assistant ၊Regional Project Coordinator ၊ Admin Officer ၊Extension Officer စုစုပေါင်း(43)ဦးဖြင့် တက်ရောက် ခဲ့ကြသည်။

           ရွှေဘိုပေါ်ဆန်း GI ရရှိရေးအတွက် မဖြစ်မနေလိုအပ်သည့် “ရွှေဘိုပေါ်ဆန်း၏ အရည်အသွေး မှတ်တမ်းစာအုပ် (Book Of Specification)” ကို Version.1 သို့ တိုးမြှင့်သတ်မှတ်ခဲ့နိုင်ပြီဖြစ်ကြောင်းနှင့် နောင်တွင် ဆက်လက်ပြုလုပ်မည့် Version.1 မှ Version.2သို့   တိုးမြှင့်သတ်မှတ်နိုင်ရေး အလုပ်ရုံ ဆွေးနွေးပွဲများတွင်လည်း  ပူးပေါင်းပါဝင်ဆောင်ရွက်ပေးပါရန် လေးစားစွာဖြင့်ဖိတ်ခေါ်ခဲ့ကြောင်း ရွှေဘို ပေါ်ဆန်းစိုက်ပျိုး ထုတ်လုပ်တင်ပို့ ရောင်းချသူများအသင်းမှ သိရသည်။

DOCA(စစ်ကိုင်း)

             မြန်မာနိုင်ငံ၏ဆီအိုးကြီးဟု ပြောစမှတ်ပြုကြသော မြန်မာပြည်အလယ်ပိုင်း အညာဒေသတွင် ယခင်နှစ်များထက်စောလျှင်စွာ မိုးရွာသွန်းလျှက်ရှိသည်။ တောင်သူဦးကြီးများမှာလည်း မိုးကျသည်နှင့်တစ်ပြိုင်နက်ထွန်ယက်စိုက်ပျိုးကြသည်။အဓိကဆီထွက်သီးနှံများဖြစ်သော မြေပဲနှင့်နှမ်းမျိုးစုံကိုသာ အများဆုံးစိုက်ပျိုးလျှက်ရှိပါသည်။

            ဆီထွက်သီးနှံသည် ဈေးကွက်သီးနှံဖြစ်လာသည်နှင့်အညီ စိုက်ပျိုးတောင်သူများ သီးနှံ အထွက်နှုန်းကောင်းရရှိရန်နှင့် ဈေးကွက်ကောင်းရရှိရန် မျှော်မှန်းလျှက်ရှိကြပါသည်။ယခုအခါ ကမ္ဘာ့ စားအုန်းဆီဈေးနှုန်း စံချိန်တင်မြင့်မားလျှက်ရှိသောကြောင့် ပြည်တွင်းစားအုန်းဆီဈေးကွက်လဲ မြင့် တက်နေပါသည်။စားသုံးသူများမှလည်း ဈေးနှုန်းသက်သာ၍ ကျန်းမာရေးနှင့်ညီညွှတ်သော မြေပဲဆီ၊ နှမ်းဆီများကိုသာ ပြန်လည်စားသောက်သုံးစွဲမှု များရှိလာကြပါသည်။ ဆီထွက်သီးနှံ တိုးချဲ့စိုက်ပျိုး ရာတွင် အရည်အသွေးကောင်းမွန်စေရန် သဘာဝဓာတ်မြေဩစာများကိုသာ အဓိကထားအသုံးပြုပြီး အချိုးကျကျပေါင်းစပ်အသုံးပြုရန် လိုအပ်သည်။ သို့မှသာ သီးနှံအရည်အသွေးမြင့်မားပြီး ဈေးကွက် ကောင်းရရှိမည်ဖြစ်သည်။ စားသုံးဆီများအား ဈေးကွက်အတွင်းသို့ တင်သွင်း/ရောင်းချရာတွင် အရောအနှောများဖြင့် မမှန်မကန် လိမ်လည်ရောင်းချသူများကို မျက်ခြေမပြတ်စောင့်ကြည့်စစ်ဆေးပြီး ထိရောက်စွာ အရေးယူနိုင်ရေးအတွက် စားသုံးသူရေးရာဦးစီးဌာန၊ မကွေးတိုင်းဒေသကြီးရှိ တိုင်း/ခရိုင်/ မြို့နယ်ဝန်ထမ်းများမှ  ဆောင်ရွက်လျှက်ရှိသည့်အပြင် စားသုံးသူ/ပြည်သူများအနေဖြင့် ပြည်ပမှတင်သွင်းသည့် စားအုန်းဆီများထက် အရည်အသွေးကောင်းမွန်ပြီး ကျန်းမာရေးနှင့်ညီညွတ်သည့်ဒေသထွက် ပဲဆီ၊ နှမ်းဆီများကို ဦးစားပေးရွေးချယ်သုံးစွဲသင့်ပါကြောင်းနှင့် ဆီစားသုံးမှုလျော့ချရေးအသိပညာပေး ဆောင်ရွက်လျက်ရှိကြောင်း သိရှိရပါသည်။

DOCA(မကွေး)