HighLight News

“သပေါ့ဖျာလုပ်ငန်းအားကွင်းဆင်းလေ့လာ”

မန္တလေးတိုင်းဒေသကြီး၊ ကျောက်ဆည်ခရိုင်၊ စားသုံးသူရေးရာဦးစီးဌာနမှ ဝန်ထမ်းများသည် အသေးစားအလတ်စားလုပ်ငန်းများဖွံဖြိုးတိုးတက်စေရေးအတွက် ကျောက်ဆည်မြို့နယ်၊ အင်ရောင်းကျေးရွာအုပ်စု၊ ဆင်ဦးကျေးရွာရှိ သပေါ့ဖျာလုပ်ငန်းအား ကွင်းဆင်းလေ့လာခဲ့ပါသည်။ ၄င်းလုပ်ငန်းအား မိသားစုတစ်နိုင်တစ်ပိုင်ဖြင့် အိမ်တိုင်းလိုလိုယက်လုပ်၍ မိသားစုအပိုဝင်ငွေရရှိအောင် ယက်လုပ်ရောင်းချလျက်ရှိပါသည်။ သပေါ့ဖျာ (သို့) ဆက်သွားဖူးဖျာများအား ယက်လုပ်ရာတွင် ပထမဦးစွာ ဆက်သွားပင်မှ ဆက်သွားများကို ခုတ်ယူ၍ ဘေးဆူးများသင်ကာ နေလှန်းရပါကြောင်း၊ ခြောက်လာသော ဆက်သွားပင်များကိုထုံးပြီး အရွယ်တူဆိုက်တူသော ဆက်သွားပင်များကိုရွေးချယ်ပြီး ဖျာတစ်ချပ်စာ (၁) ထုံးအား ရေစိမ်၍ အခွေလေးများခွေရပါကြောင်း၊ ခွေပြီးသားအခွေများကို ဖျာယက်လုပ်ရန်အတွက် သင့်တော်သောဆိုဒ်များရရှိအောင် ခွဲခြမ်းစိပ်ဖြာပေးရပါသည်။ အရောင်လှရန်အတွက် ဆိုးဆေးများအသုံးပြု၍ မိမိလိုချင်သော အရောင်များထည့်ကာ ဆက်သွားပင်များကို ရေနွေးပွတ်ပွတ်ဆူထဲတွင် ထည့်၍ပြုတ်ရပါကြောင်း၊ သို့မှသာ မိမိလိုချင်သော အရောင်အသွေးစုံလင်၍ ဒီဇိုင်းလှသော သပေါ့ဖျာမျာ းရရှိမည်ဖြစ်ပါသည်။ သပေါ့ဖျာတစ်ချပ်လျှင် ဆက်သွားပင် (၁၀၄) ပင်ဖြင့် ယက်လုပ်ရပြီး တစ်ယောက်အိပ်ဖျာတစ်ချပ်လျှင် အလျား ၅ပေ ၊ အနံ ၃ ပေရှိပြီး နှစ်ယောက်အိပ်ဖျာတစ်ချပ်လျှင် အလျား ၆ ပေ၊ အနံ ၄ ပေဖြင့် ဆက်သွားပင်ပေါ်မူတည်၍ ဖျာအတို၊ အရှည်ခွဲ၍ ယက်လုပ်ကြကြောင်း၊ အပင်ပေါ်မူတည်၍ ဖျာအမျိုးမျိုး ယက်လုပ်ရောင်းချကြပြီး အော်ဒါများမှာယူပါကလည်း ယက်လုပ်ပေးလျက်ရှိပါကြောင်း၊ ဖျာစျေးနှုန်းများအနေဖြင့် နှစ်ယောက်အိပ်ဖျာတစ်ချပ် လျှင် (၅၅၀၀/-) ကျပ်၊တစ်ယောက်အိပ်ဖျာတစ်ချပ်လျှင် (၃၅၀၀/-) ကျပ်နှုန်းဖြင့် ရောင်းချပေးကြောင်း၊ ဆက်သွားဖူးဖျာ (သို့) သပေါ့ဖျာများကို နှစ်ယောက်ယက်လုပ်လျှင် တစ်ရက် (၅) ချပ်နှုန်း ယက်လုပ်နိုင်ပြီး မိသားစုတစ်နိုင်တစ်ပိုင် ဆယ့်နှစ်ရာသီယက်လုပ်ရသော လုပ်ငန်းဖြစ်သည့်အတွက် အခြေခံလူတန်းစားများအတွက် အပိုဝင်ငွေရရှိသော လုပ်ငန်းဖြစ်ပါကြောင်း ရေးသားတင်ပြလိုက်ရပါသည်။

DOCA(မန္တလေး)

“စျေးကွက်အတွင်း Mistine အလှကုန်ပစ္စည်းများစျေးကွက်စောင့်ကြည့်စစ်ဆေး”

သတင်းနှင့် လှုပ်ရှားမှုများ

ကျောက်ဆည်ခရိုင် ၊ စားသုံးသူရေးရာဦးစီးဌာနသည် စားသုံးသူများဘေးအန္တရာယ်ကင်းရှင်းစေရေး ၊ ထုတ်ကုန်များလုံခြုံစိတ်ချရမှုရှိစေရေးအတွက် စားသုံးသူကာကွယ်ရေးအသိပညာပေး ဟောပြောဆွေးနွေးပွဲကျင်းပခြင်းနှင့် စျေးကွက်စောင့်ကြည့်စစ်ဆေးခြင်းလုပ်ငန်းများအား စဉ်ဆက်မပြတ်ဆောင်ရွက်လျက်ရှိပါသည်။ ကျောက်ဆည်ခရိုင်၊ စားသုံးသူရေးရာဦးစီးဌာန၊ ခရိုင်ဦးစီးမှူး ဦးဆောင်သော စစ်ဆေးရေးအရာရှိများသည် မြို့နယ်စည်ပင်သာယာရေးအဖွဲ့နှင့်ပူးပေါင်းပြီး (၂၂-၇၂၀၂၂) ရက်နေ့တွင် ကျောက်ဆည်ခရိုင်အတွင်းရှိ ကျောက်ဆည်၊ စဉ့်ကိုင်၊ မြစ်သားနှင့် တံတားဦးမြို့နယ်များရှိ Shopping Mallများ၊ စတိုးဆိုင်များနှင့်အလှကုန်ပစ္စည်းရောင်းချသည့်ဆိုင်များတွင် ရောင်းချနေသည့် Mistine အလှကုန်ပစ္စည်းများအား စျေးကွက်စောင့်ကြည့်စစ်ဆေးခြင်းများ ပြုလုပ်ခဲ့ပါသည်။ ခရိုင်ဦးစီးမှူးနှင့်အဖွဲ့မှ စျေးကွက်အတွင်းရောင်းချနေသော Mistine အလှကုန်ပစ္စည်းများအား Thiri Cosmetic Co,Ltd မှ မြန်မာနိုင်ငံတစ်ဦးတည်းကိုယ်စားလှယ်အဖြစ် FDA ၏ထောက်ခံချက်များဖြင့် စျေးကွက်အတွင်း တရားဝင်ဖြန့်ဖြူးရောင်းချလျက်ရှိကြောင်း၊ကုမ္ပဏီမှထုတ်လုပ်သောပစ္စည်းများမှာ Hologram (ရောင်ပြန်) စတစ်ကာနှင့် မြန်မာစာ Labelling ကပ်၍ ဖြန့်ဖြူးလျက်ရှိကြောင်း၊ ယခုအခါတွင် စျေးကွက်အတွင်း တရားမဝင်ဖြန့်ဖြူးရောင်းချလျက်ရှိသော Mistine အလှကုန်ပစ္စည်းများ၌ Hologram (ရောင်ပြန်) စတစ် ကာနှင့် မြန်မာစာ Labelling ကပ်နှိပ်ထားခြင်းမရှိသည့်အတွက် အရေးယူဆောင်ရွက်ရန် တိုင်ကြားလာမှုအရ စျေးကွက်စောင့်ကြည့်စစ်ဆေးရခြင်းဖြစ်ကြောင်း၊ အလှကုန်ပစ္စည်းများရောင်းချသည့်ဆိုင်များအနေဖြင့် စားသုံးသူကာကွယ်ရေးဥပဒေ၌ပါရှိသည့် ကုန်အညွှန်း အမှတ်အသားဖော်ပြခြင်းဆိုင်ရာအချက်အလက်များ ပြည့်စုံစွာပါရှိသည့်ကုန်ပစ္စည်းများကိုသာ ရောင်းချရန်လိုအပ်ကြောင်းနှင့် Mistine အလှကုန်ပစ္စည်းများအား ရောင်းချရာတွင် ကုမ္ပဏီမှတရားဝင်တင်သွင်းရောင်းချသည့် Hologram (ရောင်ပြန်) စတစ်ကာနှင့် မြန်မာစာ Labelling ပါရှိသောကုန်ပစ္စည်းများကိုသာရောင်းချရန် ညွှန်ကြားခဲ့ပြီး ဆိုင်အတွင်းရှိ ရောင်းချနေသော Mistine အလှကုန်ပစ္စည်းများအား စျေးကွက်စောင့်ကြည့်စစ်ဆေးခြင်းလုပ်ငန်းများ ဆောင်ရွက်ခဲ့ကြောင်း သတင်းရရှိပါသည်။

DOCA(မန္တလေး)

“သဘာဝမလိုင်ဒိန်ချဉ်လုပ်ငန်းရှင်နှင့်တွေ့ဆုံဆွေးနွေး”

သတင်းနှင့် လှုပ်ရှားမှုများ

စားသုံးသူရေးရာဦးစီးဌာန၊ ကျောက်ဆည်ခရိုင်ဦးစီးမှူးရုံး၌ (၂၁-၇-၂၀၂၂) ရက်နေ့တွင် တံတားဦးမြို့နယ်၊ ခေါင်းကွဲကျေးရွာရှိ “သန်းထွန်းငြိမ်း” သဘာဝမလိုင်ဒိန်ချဉ်လုပ်ငန်းရှင်အား ခေါ်ယူတွေ့ဆုံပြီး စားသုံးသူကာကွယ်ရေးဥပဒေပါအချက်အလက်များအား ရှင်းလင်းဆွေးနွေး အသိပညာပေးခဲ့ပါသည်။ကျောက်ဆည်ခရိုင်၊ စားသုံးသူရေးရာဦးစီးဌာန၊ ခရိုင်ဦးစီးမှူးက စားသုံးသူကာကွယ်ရေးဥပဒေအား ၂၀၁၉ ခုနှစ်တွင် အသစ်ပြန်လည်ပြဌာန်းခဲ့ပါကြောင်း၊ ၄င်းဥပဒေတွင် စားသုံးသူအခွင့်အရေး၊ စီးပွားရေးလုပ်ငန်းရှင်များ၏တာဝန်များနှင့် အခန်း (၁၈) တွင် ပြဌာန်းထားသော ကုန်အညွှန်းအမှတ်အသားဖော်ပြခြင်းဆိုင်ရာ၌ စီးပွားရေးလုပ်ငန်းရှင်များအနေဖြင့် ကုန်စည်တစ်ခုကိုထုတ်လုပ်ရာတွင် ကုန်စည်၏တံဆိပ်အမှတ်အသား၊ အမျိုးအမည်၊ အရွယ်အစား၊ အရေအတွက်နှင့်အသားတင်ပမာဏ၊ ထားသိုသိမ်းဆည်းမှုအညွှန်း၊ သုံးစွဲပုံနည်းလမ်း၊ ထုတ်လုပ်သည့်ရက်စွဲနှင့် သက်တမ်းကုန်ဆုံးသည့်ရက်စွဲ၊ ထုတ်လုပ်မှုအမှတ်စဉ်၊ ထုတ်လုပ်သည့်လုပ်ငန်းအမည်နှင့်လိပ်စာ၊ထုတ်လုပ်သည့်နေရာ၊ ပါဝင်သောကုန်ကြမ်းပစ္စည်းများ၏ အမျိုးအမည်နှင့် ပမာဏ၊ ပါဝင်မှုအချိုးအစား၊ကျန်းမာရေးဆိုင်ရာဘေးထွက်ဆိုးကျိုး သို့မဟုတ် ဓါတ်မတည့်ကြောင်းဖော်ပြချက်နှင့် ကြိုတင်သတိပေးချက်၊ သက်ဆိုင်ရာအစိုးရဌာနများက ဖော်ပြရန်သတ်မှတ်ထားသောအချက်အလက်များအား ထည့်သွင်းဖော်ပြရန် ပြောကြားခဲ့ပြီး စားသုံးသူကာကွယ်ရေးဥပဒေပါအချက်အလက်များအား အသေးစိတ်ရှင်းလင်းပြောကြားခဲ့ကြောင်း သတင်းရရှိပါသည်။

DOCA(မန္တလေး)

“စားအုန်းဆီများလက်လီလက်ကားဖြန့်ဖြူးရောင်းချမှုအားစျေးကွက်စောင့်ကြည့်စစ်ဆေး”

သတင်းနှင့် လှုပ်ရှားမှုများ

ကျောက်ဆည်ခရိုင် ၊ စားသုံးသူရေးရာဦးစီးဌာန ခရိုင်ဦးစီးမှူးဦးဆောင်သောဝန်ထမ်းများသည် (၂၁-၇-၂၀၂၂) ရက်နေ့တွင် ကျောက်ဆည်မြို့၊ အေးမြကြည်လင်စျေးနှင့်မြို့မစျေးတို့တွင် စားအုန်းဆီမျာအား လက်လီ၊လက်ကားဖြန့်ဖြူးရောင်းချသည့်လုပ်ငန်းသို့ စျေးကွက်စောင့်ကြည့်စစ်ဆေးခြင်းလုပ်ငန်းမျာ းဆောင်ရွက်ခဲ့ပါသည်။ထိုသို့စစ်ဆေးဆောင်ရွက်ရာတွင် ကျောက်ဆည်ခရိုင် ၊ စားသုံးသူရေးရာဦးစီးဌာန၊ ခရိုင်ဦးစီးမှူးက မိမိတို့ဝန်ကြီးဌာနမှ စားသုံးဆီတင်သွင်း၊ သိုလှောင်၊ ဖြန့်ဖြူးခြင်းလုပ်ငန်းကြီးကြပ်ရေးကော်မတီကိုဖွဲ့စည်းကာ ပြည်ပမှတင်သွင်းလာသည့် စားသုံးဆီများအား သတ်မှတ်အရည်အသွေးစံချိန်စံညွှန်းများနှင့်ပြည့်မီစေရေး၊ စားသုံးသူပြည်သူများ ကျန်းမာရေးနှင့်ညီညွတ်သောစားသုံးဆီများကိုသုံးစွဲနိုင်ရေး၊စျေးနှုန်းတည်ငြိမ်စွာဖြင့် ဝယ်ယူစားသုံးနိုင်စေရေးတို့အတွက် ကြီးကြပ်ထိန်းကျောင်းလျက်ရှိကြောင်း ၊ ယခုဝယ်ယူခွင့်ရရှိသည့် ကုန်သည်များအနေဖြင့် စားအုန်းဆီများကို ရန်ကုန်အထိုင်စျေး၊ ရည်ညွှန်းလက်ကားစျေးနှုန်းအပေါ် သယ်ယူပို့ဆောင်ခကုန်ကျစရိတ်များ ထပ်ပေါင်း၍ ၂% အမြတ်ထက်မပိုသော စျေးနှုန်းဖြင့်ရောင်းချရ မည်ဖြစ်ပြီး စျေးကွက်အတွင်း ဖြစ်သင့်ဖြစ်ထိုက်သည့်စျေးနှုန်းများဖြင့် ရောင်းချစေရေး ၊ စျေးနှုန်းအဆမတန်မြှင့်တင်ရောင်းချြခင်းများ မပြုလုပ်စေရေးတို့အတွက် မိမိတို့အဖွဲ့မှ ကွင်းဆင်းပြီး စျေးကွက်စောင့်ကြည့်စစ်ဆေးခြင်းလုပ်ငန်းများဆောင်ရွက်ရခြင်းဖြစ်ကြောင်း ရှင်းလင်းပြောကြားခဲ့ပါသည်။ ကျောက်ဆည်မြို့ရှိ စားသုံးဆီဝယ်ယူခွင့်ရရှိသူ ဦးဇော်ဇော်ထွန်းမှ ကျောက်ဆည်မြို့၊ အေးမြကြည်လင်စျေးနှင့်မြို့မစျေးတို့ရှိ နေလသုခဆီဆိုင်များတွင် စားသုံးသူပြည်သူများအား စားအုန်းဆီ (၁) ပိဿာလျှင် (၅၀၀၀/-) ကျပ်နှုန်းဖြင့် ရောင်းချခဲ့ကြောင်း းသတင်းရရှိပါသည်။

DOCA(မန္တလေး)

“မိတ္ထီလာခရိုင် မလှိုင်မြို့နယ်အတွင်းရှိ စားသုံးဆီဆိုင်များသို့ ကွင်းဆင်းစစ်ဆေးခြင်း’’

သတင်းနှင့် လှုပ်ရှားမှုများ

စားသုံးသူရေးရာဦးစီးဌာန၊ မန္တလေးတိုင်း‌‌‌ဒေသကြီး၊ မိတ္ထီလာခရိုင်၊ ခရိုင်ဦးစီးမှူး၏လမ်းညွှန်ချက်ဖြင့် မလှိုင်မြို့နယ်တာဝန်ခံ ဦးရဲမြင့်ဆန်းသည် (၂၀.၇.၂၀၂၂) ရက်နေ့ နံနက် (၁၀း၀၀) နာရီချိန်တွင် မြို့နယ်စည်ပင်သာယာ‌ရေးအဖွဲ့၊ အုပ်ချုပ်ရေးမှူးနှင့်ပူးပေါင်း၍ အမှတ် (၁) ရပ်ကွက် နယ်မြေ(၇)ရှိ စားသုံးဆီရောင်းချနေသောဆိုင်များသို့ ကွင်းဆင်းစစ်ဆေးခဲ့ပါသည်။

စစ်ဆေးရာတွင် စားသုံးဆီ‌ရောင်းချနေသော စီးပွားရေးလုပ်ငန်းရှင်များသို့ ကုန်စည်နှင့်စပ်လျဉ်း၍ အာမခံချက်ပေးရာတွင် ကုန်စည်၏အရည်အသွေး၊ အချိန်အတွယ်ပမာဏနှင့် အလေးချိန်မှန်ကန်မှုရှိစေရန် အရည်အသွေးပြည့်မှီမှန်ကန်သည့် ပစ္စည်းများရောင်းချမှုနှင့်ပတ်သက်၍ ကုန်အညွှန်းအမှတ်သားဖော်ပြရာတွင် ဟင်းသီးဟင်းရွက်ဆီ(စားအုန်းဆီ)၊ ဟင်းသီးဟင်းရွက်ဆီ(အဆင့်မြင့်စားအုန်းဆီ)ဟူ၍ ပါရှိပြီး အလေးချိန်မှာ ပိဿာ၊ ကျပ်သားတို့ကို မြန်မာဘာသာဖြင့် ဖော်ပြပါရှိသော ဆီကိုသာရောင်းချရန် ရှင်းလင်းဆွေးနွေးခဲ့ပါသည်။ ကွင်းဆင်းရာတွင် လက်လီ/လက်ကားဆီဆိုင်ကြီ း(၃) ဆိုင်နှင့် လက်လီဆိုင် (၂) ဆိုင်တို့အား ဆွေးနွေးခဲ့ကြောင်း းသိရပါသည်။

DOCA(မန္တလေး)

“မိတ္ထီလာခရိုင် မလှိုင်မြို့နယ်အတွင်းရှိ စက်သုံးဆီဆိုင်များသို့ ကွင်းဆင်းစစ်ဆေးခြင်း’’

သတင်းနှင့် လှုပ်ရှားမှုများ

စားသုံးသူရေးရာဦးစီးဌာန၊ မန္တလေးတိုင်း‌‌‌ဒေသကြီး၊ မိတ္ထီလာခရိုင်၊ ခရိုင်ဦးစီးမှူး၏လမ်းညွှန်ချက်ဖြင့် မလှိုင်မြို့နယ်တာဝန်ခံ ဦးရဲမြင့်ဆန်းသည် မလှိုင်မြို့နယ်ရှိ စက်သုံးဆီဆိုင်များသို့ (၂၂.၇.၂၀၂၂) ရက်နေ့ နံနက် (၁၀း၀၀) နာရီချိန်၌ ကွင်းဆင်းစစ်ဆေးခဲ့ပါသည်။

စစ်ဆေးရာတွင် စက်သုံးဆီဆိုင်များအား စက်သုံးဆီတင်သွင်းသိုလှောင်ဖြန့်ဖြူးခြင်း၊ လုပ်ငန်းကြီးကြပ်ရေးကော်မတီမှ သတ်မှတ်ထားသော နှုန်းထားများအတိုင်းသာရောင်းချရန် စီးပွားရေးလုပ်ငန်းရှင်များသည် ကုန်စည်နှင့်စပ်လျဉ်း၍ အာမခံချက်ပေးရာတွင် ကုန်စည်၏အရည်အသွေး/အချိန်အတွယ်ပမာဏနှင့်အလေးချိန်မှန်ကန်မှုရှိစေရန် အရည်အသွေးပြည့်မီမှန်ကန်သည့်ပစ္စည်းများ စျေးကွက်းအတွင်း တင်သွင်းဖြန့်ဖြူးရောင်းချရန်နှင့် စက်သုံးဆီရောင်းချရာတွင် သတ်မှတ်ရည်ညွှန်းစျေးနှုန်းများအတိုင်း ရောင်းချစေရေး၊ သတ်မှတ်ချက်နှင့်မကိုက်ညီသည့် စက်သုံးဆီအရောင်းဆိုင်များ စျေးကွက်အတွင်းစစ်ဆေးတွေ့ရှိပါက ရေနံနှင့်ရေနံထွက်ပစ္စည်းဆိုင်ရာဥပဒေအရ အ‌ရေးယူခံရနိုင်ကြောင်း ဆွေးနွေးပြောကြားခဲ့ပြီး စက်သုံးဆီအရောင်းဆိုင်များမှလည်း စက်သုံးဆီရောင်းချမှုအခြေအနေများကို ပြန်လည်တင်ပြဆွေးနွေးခဲ့ကြောင်း သိရပါသည်။

DOCA(မန္တလေး)

“မိတ္ထီလာမြို့ပေါ်ရှိ အထူးစျေးနှုန်းဖြင့် ရောင်းချနေသော စားအုန်းဆီဆိုင်များသို့ ရောင်းချနေမှု ရှိ/မရှိ ကွင်းဆင်းစစ်ဆေးခြင်း’’

သတင်းနှင့် လှုပ်ရှားမှုများ

စားသုံးသူရေးရာဦးစီးဌာန၊ မန္တလေးတိုင်းဒေသကြီး၊ မိတ္ထီလာခရိုင်၊ ခရိုင်ဦးစီးမှူးရုံးမှ ခရိုင်ဦးစီးမှူး၏ ကြီးကြပ်မှုဖြင့် (၂၅.၇.၂၀၂၂) ရက်နေ့ (၉:၃၀) အချိန်တွင် မိတ္ထီလာခရိုင်ဦးစီးမှူးရုံးမှ မြို့နယ်တာဝန်ခံနှင့်အဖွဲ့သည် မိတ္ထီလာခရိုင်ဆီကုန်သည်နှင့် ဆီလုပ်ငန်းရှင်များ အသင်းနှင့်ပူးပေါင်း၍ အိမ်ထောင်စုတစ်စုလျှင် တစ်ပိဿာနှုန်းဖြင့် စားသုံးဆီများအား ရောင်းချပေးခြင်း ဆောင်ရွက်ခဲ့ပါသည်။

ထိုသို့စားသုံဆီများ ရောင်းချပေးခြင်းဆောင်ရွက်ရာတွင် စားသုံးဆီတစ်ပိဿာလျှင် သတ်မှတ်ရည်ညွှန်းစျေးနှုန်းဖြစ်သော (၅၅၀၀) ကျပ်ဖြင့် ပိဿာချိန် (၁၅၄၀) ပိဿာအား မိတ္ထီလာမြို့မစျေးနှင့် ရပ်ကွက်နေပြည်သူများသို့ ရောင်းချပေးခဲ့ပါကြောင်း သိရပါသည်။

DOCA(မန္တလေး)

“ ရမည်းသင်းခရိုင်၊ ရမည်းသင်းမြို့နယ်ရှိ ကုန်စုံဆိုင်များသို့ ကွင်းဆင်းစစ်ဆေးခြင်း’’

သတင်းနှင့် လှုပ်ရှားမှုများ

စားသုံးသူရေးရာဦးစီးဌာန၊မန္တလေးတိုင်းဒေသကြီး၊ (မိတ္ထီလာ/ရမည်းသင်း)ခရိုင်၊ ခရိုင်ဦးစီးမှူး၏ လမ်းညွှန်မှုဖြင့် ရမည်းသင်းမြို့နယ်တာဝန်ခံနှင့်ဝန်ထမ်းများသည် (၂၁-၇-၂၀၂၂) ရက်နေ့ နံနက် (၁၀း၀၀) နာရီအချိန်တွင် ရမည်းသင်းမြို့ပေါ်ရှိ စားသောက်ကုန်နှင့် လူသုံးကုန်ပစ္စည်းရောင်းချနေသောဆိုင်များအား စျေးကွက်စောင့်ကြည့်စစ်ဆေးမှုများ ဆောင်ရွက်ခဲ့ပါသည်။

ထိုသို့ ကွင်းဆင်းဆောင်ရွက်ရာတွင် စျေးကွက်အတွင်းရောင်းချနေသော ကုန်စည်များသည် ဝယ်ယူစားသုံးသူစားသုံးသူများ ဘေးအန္တရာယ်မဖြစ်စေရန်နှင့် ကုန်စည်များပေါ်တွင် ကုန်အညွှန်းအမှတ်အသားများကို မြန်မာဘာသာဖြင့် (သို့) မြန်မာဘာသာနှင့်အခြားဘာသာတွဲလျက် ဖော်ပြထားသော ကုန်စည်များကို ရောင်းချခြင်း ရှိ/မရှိ စစ်ဆေးခဲ့ပြီး၊ ဆိုင်ပိုင်ရှင်များ လိုက်နာရမည့်အချက်များ၊ စားသုံးသူကာကွယ်ရေးဥပဒေပါ စီးပွားရေးလုပ်ငန်းရှင်၏ တာဝန်များကို အသိပညာပေးဆွေးနွေးခဲ့ပြီး ကုန်စုံဆိုင် (၁၀) ဆိုင်အား စစ်‌ဆေးခဲ့ကြောင်း သိရပါသည်။

DOCA(မန္တလေး)

“မိတ္ထီလာမြို့ပေါ်ရှိ ဆေးနှင့် ဆေးပစ္စည်းဆိုင်များသို့ ရှောင်တခင် ဝင်ရောက်စစ်ဆေးခြင်း’’

သတင်းနှင့် လှုပ်ရှားမှုများ

စားသုံးသူရေးရာဦးစီးဌာန၊ မန္တလေးတိုင်းဒေသကြီး၊ မိတ္ထီလာခရိုင်၊ ခရိုင်ဦးစီးမှူးရုံးမှ ခရိုင်ဦးစီးမှူး၏ကြီးကြပ်မှုဖြင့် (၂၂.၇.၂၀၂၂) ရက်နေ့ (၁၀:၀၀) အချိန်တွင် မိတ္ထီလာခရိုင်ဦးစီးမှူးရုံးမှ မြို့နယ်တာဝန်ခံနှင့်အဖွဲ့၊ ခရိုင်အထွေထွေအုပ်ချုပ်ရေးဦးစီးဌာန၊ ကျန်းမာရေးဦးစီးဌာန၊ အစားအသောက်နှင့်ဆေးဝါးကွပ်ကဲရေးဦးစီးဌာန၊ ခရိုင်ရဲတပ်ဖွဲ့၊ မြို့နယ်စည်ပင်နှင့်ပူးပေါင်းအဖွဲ့တို့သည် မိတ္ထီလာမြို့ပေါ်ရှိ ဆေးနှင့်ဆေးပစ္စည်းအရောင်းဆိုင်များသို့ စားသုံးသူပြည်သူများ ဘေးအန္တရာယ်ကင်းရှင်းစေ‌ရေးနှင့် ထုတ်ကုန်များလုံခြုံစိတ်ချရမှုရှိစေ‌‌ရေးအတွက် ရှောင်တခင်စစ်ဆေးခြင်းကို ရွက်ခဲ့ပါသည်။

ဆေးဆိုင်များတွင် ဆေးဝါးလိုင်စင်များရှိ/မရှိနှင့် တရားမဝင်ဆေးဝါးများ၊ သက်တမ်းလွန်ဆေးဝါးများ ရောင်းချမှု ရှိ/မရှိ၊ ကုန်အညွှန်းအမှတ်အသားပြည့်စုံစွာဖော်ပြထားခြင်း ရှိ/မရှိ၊ Bell Plus ပလာစတာမှာ ထုတ်လုပ်သည့်နိုင်ငံ၊ ထုတ်လုပ်တင်သွင်းသည့် ကုမ္ပဏီ၊ ဆေးဝါးမှတ်ပုံတင်အမှတ်နှင့် Import Registeration No (IR) များ ဖော်ပြထားခြင်းမရှိပဲ စျေးကွက်အတွင်း ရောင်းချလျက်ရှိနေခြင်း၊ မြန်မာနိုင်ငံတွင် မှတ်ပုံထားခြင်းမရှိပဲ Online ပေါ်တွင် ရောင်းချနေသည့် ထိုင်းနိုင်ငံမှ သုံးစွဲရန်မသင်းထုတ်ပြန်ထားသော ရသေ့ဆေး (သို့) ထိုင်း တိုင်းရင်းဆေးသည် စားသုံးသူများသုံးစွဲမိပါက ဘေးအန္တရာယ်ဖြစ်စေနိုင်သည့်အတွက် ရောင်းချခြင်းမရှိစေရေး ယခုလို စစ်ဆေးရခြင်းဖြစ်ကြောင်း အသိပေးရှင်းလင်းပြောကြားခဲ့ပြီး ဆေးအရောင်းဆိုင်ပိုင်ရှင်များအနေဖြင့် Up Date ဖြစ်သောဆေးများ ၊ ကုန်အညွှန်းအမှတ်အသားနှင့်ပြည့်စုံသောကုန်ပစ္စည်းများနှင့် တရားဝင်မှတ်ပုံတင်ထားသော ဆေးဝါးများကိုသာ ဆိုင်တင်ရောင်းချရန် အသိပညာပေးခဲ့ပါသည်။

DOCA(မန္တလေး)

သာစည်မြို့မဈေးအတွင်း ဈေးကွက်စောင့်ကြည့်စစ်ဆေးခြင်း

သတင်းနှင့် လှုပ်ရှားမှုများ

စားသုံးသူရေးရာဦးစီးဌာန၊ မန္တလေးတိုင်းဒေသကြီး၊ မိတ္ထီလာခရိုင်ဦးစီးမှူးရုံးမှ ခရိုင်ဦးစီးမှူး၏လမ်းညွှန်မှုဖြင့် ဈေးကွက်စောင့်ကြည့်စစ်ဆေးရေးအဖွဲ့သည် ၂၀၂၂ ခုနှစ် ဇူလိုင်လ ( ၂၀ ) ရက်နေ့ နံနက် (၁၀း၃၀) အချိန်တွင် သာစည်မြို့နယ်၊ မြို့မဈေးသို့သွားရောက်လေ့လာ၍ ဈေးဆိုင်များအတွင်း ရောင်းချလျက်ရှိသောကုန်စည်များအား ဈေးကွက်စောင့်ကြည့်စစ်ဆေးခြင်းကို ဆောင်ရွက်ခဲ့ကြပါသည်။

သာစည်မြို့နယ်၊ မြို့မဈေးအတွင်း သွားရောက်စစ်ဆေးရာတွင် သာစည်မြို့နယ်တာဝန်ခံ ဦးသက်ချိုဦး (ဒု-ကြီးကြပ်ရေးမှူး)ဦးဆောင်သောအဖွဲ့သည် အထွေထွေအုပ်ချုပ်ရေးဦးစီးဌာန၊ မြို့နယ်စည်ပင်သာယာရေးအဖွဲ့တို့နှင့်ပူးပေါင်း၍ မြို့မဈေးအတွင်းရှိဈေးဆိုင်များအား မြန်မာဘာသာဖြင့်ဖော်ပြထားသည့် ကုန်စည်များကို ရောင်းချခြင်းရှိ/မရှိ ကြည့်ရှုစစ်ဆေးခဲ့ပြီး စားသုံးသူကာကွယ်ရေးဥပဒေအခန်း (၁၈) ပါကုန်အညွှန်းအမှတ်အသားဖော်ပြခြင်းနှင့်ပတ်သက်၍ ရှင်းလင်းပြောကြားခဲ့ပြီး စားသုံးသူကာကွယ်ရေးဥပဒေနှင့်အညီ ကုန်စည်များကို ထုတ်လုပ်ဖြန့်ဖြူးရောင်းချပေးရန် အသိပေး‌ဆောင်ရွက်ခဲ့ကြောင်း သိရှိရပါသည်။

DOCA(မန္တလေး)

Languages

Main menu

“သပေါ့ဖျာလုပ်ငန်းအားကွင်းဆင်းလေ့လာ”

“စျေးကွက်အတွင်း Mistine အလှကုန်ပစ္စည်းများစျေးကွက်စောင့်ကြည့်စစ်ဆေး”

“သဘာဝမလိုင်ဒိန်ချဉ်လုပ်ငန်းရှင်နှင့်တွေ့ဆုံဆွေးနွေး”

“စားအုန်းဆီများလက်လီလက်ကားဖြန့်ဖြူးရောင်းချမှုအားစျေးကွက်စောင့်ကြည့်စစ်ဆေး”

“မိတ္ထီလာခရိုင် မလှိုင်မြို့နယ်အတွင်းရှိ စားသုံးဆီဆိုင်များသို့ ကွင်းဆင်းစစ်ဆေးခြင်း’’

“မိတ္ထီလာခရိုင် မလှိုင်မြို့နယ်အတွင်းရှိ စက်သုံးဆီဆိုင်များသို့ ကွင်းဆင်းစစ်ဆေးခြင်း’’

“ ရမည်းသင်းခရိုင်၊ ရမည်းသင်းမြို့နယ်ရှိ ကုန်စုံဆိုင်များသို့ ကွင်းဆင်းစစ်ဆေးခြင်း’’

“မိတ္ထီလာမြို့ပေါ်ရှိ ဆေးနှင့် ဆေးပစ္စည်းဆိုင်များသို့ ရှောင်တခင် ဝင်ရောက်စစ်ဆေးခြင်း’’

သာစည်မြို့မဈေးအတွင်း ဈေးကွက်စောင့်ကြည့်စစ်ဆေးခြင်း

Pages

You are here

HighLight News

Pages