HighLight News

        ပဲခူးတိုင်းဒေသကြီး၊ ပြည်ခရိုင်တွင် ၂၀၂၂-၂၀၂၃ ခုနှစ်တွင် မိုးစပါးစိုက်ဧက (၂၂၆၄၉၆) ဧက စိုက်ပျိုးပြီး ၃၈၇၁၆ ဧက ရိတ်သိမ်းပြီးဖြစ်ပါသည်။ မိုးစပါးအထွက်နှုန်းအနေဖြင့် (၈၀.၇၃) တင်းထွက်ရှိပြီး အထွက်တင်းမှာ ၃၁၂၅၆၃၅ တင်းထွက်ရှိပြီးဖြစ်ပါသည်။ ပြည်မြို့နယ်တွင် မိုးစပါးစိုက်ဧက ၇၄၆၄၂ ဧကတွင် ၄၇၀၅ ဧက ရိတ်သိမ်းပြီး တစ်ဧကအထွက်နှုန်းအနေဖြင့် ၈၃ တင်းကျော်ထွက်ရှိပါသည်။ ပေါက်ခေါင်းမြို့နယ်တွင် ၄၆၇၅၇ ဧက စိုက်ပျိုးထားရှိပြီး ယခုအချိန်အထိ ၂၄၁၄ ဧက ရိတ်သိမ်း၍ တစ်ဧကအထွက်နှုန်းအနေဖြင့် ၈၂ တင်းကျော်ထွက်ရှိပါသည်။ ရွှေတောင်မြို့နယ်တွင် မိုးစပါးစိုက်ဧက ၅၈၁၆၃ ဧကတွင် ၂၁၄၁၇ ဧက ရိတ်သိမ်းပြီး၍ တစ်ဧကလျှင် တင်း ၈၀ ခန့်ထွက်ရှိပါသည်။ ပန်းတောင်းမြို့နယ်တွင် ၄၆၉၃၄ ဧက စိုက်ပျိုး၍ ၁၀၁၈၀ ဧက ရိတ်သိမ်းပြီး တစ်ဧကအထွက်နှုန်းမှာ တင်း ၈၀ ကျော်ထွက်ရှိကြောင်း သိရှိရပါသည်။

       စားသုံးသူရေးရာဦးစီးဌာန၊ ပန်းတောင်းမြို့နယ် တာဝန်ခံနှင့်ဝန်ထမ်းများသည် (၂၂.၁၁.၂၀၂၂) ရက်နေ့ နံနက်ပိုင်းတွင် မိုးစပါးရိတ်သိမ်းနေသော နေရာသို့သွားရောက်၍ ကွင်းဆင်းလေ့လာခဲ့ရာ ပန်းတောင်းမြို့နယ်၊ ဝန်လိုရပ်ကွက်၊ စည်သာကွင်းတွင် မိုးစပါးစိုက်ပျိုးရိတ်သိမ်းသူ ဦးတင့်လွင်မှ မိုးစပါးစိုက်ဧက ၁၂ ဧကရှိပြီး ယခုအချိန်တွင်ရိတ်သိမ်းပြီးဖြစ်ပါသည်။ စိုက်ပျိုးသောစပါးမျိုးများမှာ မှော်ဘီစပါးမျိုးဖြစ်ပြီး တစ်ဧကလျှင် တင်း (၆၀) ခန့်ထွက်ရှိသည်ဟု သိရှိရပါသည်။ တစ်ဧကရိတ်သိမ်းခြွေလှေ့ခအနေဖြင့် (၈) သောင်းကျပ် ပေးချေရသည်ဟု သိရှိရပါသည်။ မိုးစပါးတစ်ဧကလျှင် စိုက်ပျိုးထုတ်လုပ်ကုန်ကျစရိတ်အနေဖြင့် ၂၈၀၀၀၀၀ ကျပ်ကျော်ကုန်ကျ၍ စပါးတင်း (၁၀၀) လျှင် ယခုပေါက်ဈေးမှာ ၁၂၅၀၀၀၀ ကျပ်ရရှိသည်ဟု သိရှိရပါသည်။ ထို့ကြောင့် တစ်ဧကဝင်ငွေမှာ ၇၅၀၀၀၀ ကျပ်ရရှိ၍ တစ်ဧကအကျိုးအမြတ်အနေဖြင့် ၄၇၀၀၀၀ ကျပ်ခန့်ရရှိသည်ဟု သိရှိရပါသည်။

        မိုးစပါးစိုက်ပျိုးသူတောင်သူများအနေဖြင့် စိုက်ပျိုးစရိတ်နှင့်သွင်းအားစုများ ဈေးမြင့်လာသော်လည်း စပါးဈေးများမြင့်တက်လာသဖြင့် တောင်သူများအဖို့ အကျိုးအမြတ်ရရှိသော်လည်း မိုးစပါးမှာ နွေစပါးလောက် အထွက်နှုန်းမများသဖြင့် အကျိုးအမြတ် ရသင့်သလောက် မရသော်ငြားလည်း တောင်သူများအတွက် တွက်ခြေကိုက်သည်ဟု သိရှိရပါသည်။

DOCA(ပဲခူး)

        မန္တလေးတိုင်းဒေသကြီး စားသုံးသူရေးရာဦးစီးဌာန ကျောက်ဆည်ခရိုင်ဦးစီးမှူးဦးဆောင်သော ဝန်ထမ်းများသည် (၂၂-၁၁-၂၀၂၂) ရက်နေ့တွင် ကျောက်ဆည်မြို့နယ်နှင့် စဉ့်ကိုင်မြို့နယ်ရှိ ပို့ကုန်သွင်းကုန်လုပ်ငန်းရှင် မှတ်ပုံတင်အသစ်ပြုလုပ်သောကုမ္ပဏီများဖြစ်သည့်  စဉ့်ကိုင်မြို့နယ်၊ ရွာဟောင်းကုန်းကျေးရွာရှိ  ရေထွက်ကုန်ပစ္စည်းများ တင်ပို့ရောင်းချနေသည့် Hay Zar Lay Co.,Ltd နှင့် ကျောက်ဆည်မြို့နယ်၊ ရှမ်းရွာကြီးကျေးရွာရှိ Lecheng Co.,Ltd ၏ ကျောက်မီးသွေးရောင်းဝယ်ရေးလုပ်ငန်းသို့ သွားရောက်စစ်ဆေးခဲ့ပါသည်။ ထိုသို့စစ်ဆေးရာတွင် ကုမ္ပဏီများမှ ၄င်းတို့လိပ်စာတွင် အမှန်တကယ်ဖွင့်လှစ်ထားခြင်းရှိ/မရှိ ဒါရိုက်တာအဖွဲ့ဝင်များသည်နေရပ်လိပ်စာများတွင် အမှန်တကယ်နေထိုင်ခြင်းရှိ/မရှိ နေထိုင်သည့်အဆောက်အဦအမျိုးအစား၊ ပိုင်ဆိုင်မှုအခြေအနေ၊ ယခင်က ကုမ္ပဏီတည်ထောင်ခဲ့ခြင်း ရှိ/မရှိ၊ ကုမ္ပဏီမှလျှောက်ထားမှုလုပ်ငန်းနှင့် လက်ရှိမြေပြင်တွင် ဆောင်ရွက်နေသည့်လုပ်ငန်းအခြေအနေ ကိုက်ညီမှုရှိ/မရှိနှင့် ဆောင်ရွက်သည့်လုပ်ငန်း၏ ဆောင်ရွက်ပြီးစီးမှုပမာဏအား စစ်ဆေးခဲ့ကြောင်းသတင်းရရှိပါသည်။

DOCA(မန္တလေး)

           ၂၃.၁၁.၂၀၂၂ ရက်နေ့တွင် မွန်ပြည်နယ်၊ ဘီးလင်းမြို့နယ် စားသုံးသူရေးရာဦးစီးဌာနမှ မြို့နယ်တာဝန်ခံနှင့်ဝန်ထမ်းများသည် စားသုံးသူများ ကုန်စည်နှင့်ဝန်ဆောင်မှုများဝယ်ယူသုံးစွဲရာတွင် ဘေးအန္တရာယ်ကင်းရှင်းရေး၊ စားသုံးသူအကျိုးစီးပွား ထိခိုက်နစ်နာမှုမရှိစေရေး၊ ဘေးအန္တရာယ်ရှိနိုင်သည့် ကုန်စည်နှင့်ဝန်ဆောင်မှုများကို စောင့်ကြည့်စစ်ဆေးနိုင်ရန်နှင့် ကုန်အညွှန်းအမှတ်အသားဖော်ပြခြင်းနှင့်စပ်လျဉ်း၍ ဥပဒေပြဌာန်းချက်များ၊ ညွှန်ကြားချက်များကို လိုက်နာမှုရှိ/မရှိနှင့် စီးပွားရေးလုပ်ငန်းရှင်များအတွက် စားသုံးသူကာကွယ်ရေးဥပဒေပါ လိုက်နာရမည့်အချက်များ သိရှိစေနိုင်ရန်အတွက် ဘီးလင်းမြို့နယ်၊ နှင်းပုလဲကျေးရွာရှိ “ဒီလှိုင်း မုန့်တိုက်” အားသွားရောက်၍ စီးပွားရေးလုပ်ငန်းရှင်နှင့် တွေ့ဆုံဆွေးနွေးခဲ့ကြောင်း သိရှိရသည်။

        အဆိုပါ “ဒီလှိုင်း မုန့်တိုက်” ရှိထုတ်လုပ်ဖြန့်ဖြူးရောင်းချနေသော ပေါင်မုန့်၊ ကိတ်မုန့်၊ မွေးနေ့ကိတ် အစရှိသောထုတ်ကုန်များသည် စားသုံးသူကာကွယ်ရေးဥပဒေပါပြဌာန်းချက်များ၊ ညွှန်ကြားချက်များနှင့်ကိုက်ညီမှုရှိပြီး မြို့နယ်အတွင်းသာ ထုတ်လုပ်ဖြန့်ဖြူးရောင်းချနေကြောင်း သိရှိရသည်။

DOCA(မွန်)

          မွန်ပြည်နယ်၊ စားသုံးသူရေးရာဦးစီးဌာန၊ ပြည်နယ်ဦးစီးမှူးရုံးမှဝန်ထမ်းများသည် ၂၂-၁၁-၂၀၂၂ ရက်နေ့တွင် အ.ထ.က (ချောင်းဆုံ) ကျောင်း၌ စားသုံးသူကာကွယ်ရေးအသိပညာပေးဟောပြောပွဲ ကျင်းပကြောင်း သိရပါသည်။

         အဆိုပါဟောပြောပွဲတွင် အ.ထ.က(ချောင်းဆုံ) ကျောင်းမှ ကျောင်းအုပ်ဆရာမကြီး ဒေါ်ချိုချိုသီတာမှ အဖွင့်အမှာစကားပြောကြားခဲ့ပြီး စားသုံးသူရေးရာဦးစီးဌာနမှ အကြီးတန်းစာရေး ဦးနိုင်လင်းထက်က စားသုံးသူရေးရာဦးစီးဌာန၏ မျှော်မှန်းချက်၊ ရည်မှန်းချက်များ၊ မိမိတို့ဌာနအနေဖြင့် လက်ရှိဆောင်ရွက်လျက်ရှိသော လုပ်ငန်းတာဝန်များ၊ ရှေ့ဆက်လက်ဆောင်ရွက်ရမည့်လုပ်ငန်းတာဝန်များအား ဦးစွာရှင်းလင်းပြောကြားခဲ့ပြီး၊ စီးပွားရေးနှင့်ကူးသန်းရောင်းဝယ်ရေးဝန်ကြီးဌာနမှထုတ်ပြန်ထားသော စားသုံးသူကာကွယ်ရေးဥပဒေ ၂၀၁၉ ပါပြဌာန်းချက်များမှ စားသုံးသူအခွင့်အရေးနှင့်တာဝန်များ၊ စီးပွားရေးလုပ်ငန်းရှင်၏တာဝန်များ၊ တားမြစ်ချက်များ၊ ပြစ်မှုပြစ်ဒဏ်များ၊ ကုန်အညွှန်းအမှတ်အသားဖော်ပြချက်များကို စားသုံးသူကသေချာစွာဖတ်ရှုပြီးမှ ရွေးချယ်ဝယ်ယူစားသောက်သင့်ကြောင်း၊ စားသုံးသူထိခိုက်နစ်နာမှုပေါ်လာပါက စားသုံးသူရေးရာဦးစီးဌာနသို့ တိုင်ကြားနိုင်သည့်အကြောင်းအရာများ၊ Consumer Call Center သို့ဖုန်းခေါ်ဆို၍လည်း တိုင်ကြားနိုင်ကြောင်း ဟောပြောဆွေးနွေးခဲ့ပါသည်။

          အဆိုပါဟောပြောဆွေးနွေးပွဲသို့ ဆရာ/ဆရာမ၊ ကျောင်းသား/ကျောင်းသူ စုစုပေါင်း (၁၈၁) ဦး တက်ရောက်ခဲ့ပြီး ကျောင်းအုပ်ဆရာမကြီးထံသို့ စားသုံးသူအသိပညာပေးလက်ကမ်းစာစောင်များ ပေးအပ်ခဲ့ကြောင်း သိရှိရပါသည်။

DOCA(မွန်)

         စီးပွားရေးနှင့်ကူးသန်းရောင်းဝယ်ရေးဝန်ကြီးဌာနလက်အောက်ရှိ စားသုံးသူရေးရာဦးစီးဌာနသည်  စားသုံးသူကာကွယ်ရေးနှင့်စပ်လျဉ်းသည့် အသိပညာဗဟုသုတများကို ပြည်သူအများသိရှိနားလည်စေရန် ကဏ္ဍပေါင်းစုံ၊ နည်းလမ်းပေါင်းစုံ၊ ထောင့်ပေါင်းစုံဖြင့် ဆောင်ရွက်လျက်ရှိပါသည်။
          ၂၀၂၂ ခုနှစ် နိုဝင်ဘာလ ၁၆ ရက်နေ့  (နံနက် ၁၃:၀၀) နာရီအချိန်တွင် စားသုံးသူရေးရာဦးစီးဌာန၊ ချောင်းဦးမြို့နယ်တာဝန်ခံ ဒေါ်ဇင်မာနွယ်သည် ချောင်းဦးမြို့နယ် ပြန်ကြားရေးနှင့်ပြည်သူ့ဆက်ဆံရေး ၏ဦးစီးဌာနနှင့်ပူးပေါင်း၍ ချောင်းဦးမြို့ လူထုအ‌ခြေပြုဗဟိုဌာန (Community Centre ) ခန်းမတွင် စားသုံးသူများ အသိပညာဗဟုသုတများ တိုးပွားစေရန်ရည်ရွယ်၍ စားသုံးသူကာကွယ်ရေးဆိုင်ရာ အသိပညာပေးဆွေးနွေးပွဲကို ကျင်းပခဲ့ကြောင်း သိရသည်။
      ချောင်းဦးမြို့နယ် ပြန်ကြားရေးနှင့်ပြည်သူ့ဆက်ဆံရေးဦးစီးဌာနမြို့နယ် ဦးစီးမှူးဦးထိန်လင်းက သိရှိလိုသည်များကိုမေးမြန်းရာ စားသုံးသူရေးရာဦးစီးဌာန မြို့နယ်တာ၀န်ခံ ဒေါ်ဇင်မာနွယ်က စားသုံးသူရေးရာဆိုင်ရာကိစ္စရပ်များနှင့်ပတ်သက်၍ အကျယ်တ၀င့် ရှင်းလင်းဖြေကြား ဆွေးနွေးခဲ့ကြောင်းသိရသည်။ ရှင်းလင်းဆွေးနွေး‌ရာတွင် စားသုံးသူအဓိပ္ပာယ်နှင့် စားသုံးသူကာကွယ်ရေးအဓိပ္ပာယ်၊မြန်မာနိုင်ငံစားသုံးသူကာကွယ်ရေးဥပဒေရေးဆွဲပြဋ္ဌာန်းပြီး အကောင်အထည်ဖော်ဆောင်ရွက်ရသည့် ရည်ရွယ်ချက်များအကြောင်း မိတ်ဆက်ပြောကြားပြီး "ထုတ်ကုန်လုံခြုံစိတ်ချရမှုအစ ကုန်အညွှန်းအမှတ်အသားက"ဆောင်ပုဒ်အတိုင်း ကုန်အညွှန်းအမှတ်အသားအကြောင်း၊ ကုန်စည်ထုတ်လုပ်ရာတွင် ပါဝင်ရမည့်အချက်အလက်များအကြောင်း၊ စီးပွားရေးလုပ်ငန်းရှင်များဘက်မှလည်း မိမိတို့ထုတ်ကုန်များကို လုံခြုံစိတ်ချရမှုရှိစေရန် ဥပဒေပါအတိုင်း ကုန်အညွှန်းအမှတ်အသားပြည့်စုံအောင်ထုတ်လုပ်ကြရန်လိုအပ်ကြောင်း၊ ကုန်အညွှန်းအမှတ်အသားပြည့်စုံစေရန်အတွက်  ဆောင်ရွက်ကြရာတွင်လိုအပ်ပါက  ဌာန၏အကူအညီကို ရယူနိုင်ပါကြောင်း၊ ကုန်စည်များကို ကုန်အညွှန်းအမှတ်အသား ပြည့်စုံစွာဖော်ပြစေခြင်းသည် လုပ်ငန်းရှင်များဘက်မှ မိမိကုန်စည်ကို အာမခံပေးထားခြင်းဖြစ်သလို စားသုံးသူများဘက်မှလည်း ကုန်စည်၏ကုန်အညွှန်းအမှတ်အသားကို ဖတ်ရှုရုံဖြင့် မိမိတို့နှင့်သင့်တော်သည့်ကုန်စည်ကို ရွေးချယ်ဝယ်ယူတတ်ကြမည်ဖြစ်ကြောင်း၊ ကုန်စည် (သို့) ၀န်ဆောင်မှုနှင့်ပတ်သက်၍ နစ်နာဆုံးရှုံးမှုဖြစ်ပေါ်လာပါက တိုင်ကြားနိုင်သည့်နည်းလမ်းများနှင့် ဆက်သွယ်တိုင်ကြားနိုင်သည့်လိပ်စာများနှင့် စားသုံးသူရေးရာဦးစီးဌာနမှ ပြည်တွင်းကုန်သွယ်မှုဖွံ့ဖြိုးတိုးတက်ရေးအတွက် ဆောင်ရွက်နေသည့်အခြားလုပ်ငန်းများအကြောင်းကို ပြည့်ပြည့်စုံစုံရှင်းလင်း ဆွေးနွေးခဲ့ကြောင်းသိရသည်။

DOCA(စစ်ကိုင်း)