HighLight News

       စားသုံးသူရေးရာဦးစီးဌာန၊ ပြည်နယ်ဦးစီးမှူးရုံးမှ  ဝန်ထမ်းများသည် ၂၀၂၂ ခုနှစ်၊ ဒီဇင်ဘာလ ( ၆ )ရက်နေ့၊ နံနက် ( ၁၀:၀၀ )နာရီအချိန်တွင် လွိုင်ကော်မြို့ပေါ်ရှိ ရွှေတောင်ရပ်ကွက်၊ မင်္ဂလာရပ်ကွက်နှင့် ဈေးပိုင်းရပ်ကွက်ရှိ စက်ဆီ၊ ချောဆီနှင့် ဆက်စပ်ပစ္စည်းအရောင်းဆိုင်များသို့ အရည်အသွေးပြည့်မီမှန်ကန်မှုမရှိသည့် စက်ဆီ၊ ချောဆီများ ဈေးကွက်အတွင်း ရောင်းချမှုရှိ/မရှိ မိတ်ဖက်ဌာနများဖြစ်သော မြို့နယ်စည်ပင်သာယာရေးအဖွဲ့၊ မြို့နယ်အထွေထွေအုပ်ချုပ်ရေးဦးစီးဌာနတို့နှင့်ပူးပေါင်း၍ ဈေးကွက်စောင့်ကြည့်စစ်ဆေး ဆောင်ရွက်ခဲ့ပါသည်။

      ထိုသို့ဈေးကွက်စောင့်ကြည့်စစ်ဆေးရာတွင် လွိုင်ကော်မြို့ပေါ်ရှိ ရွှေတောင်ရပ်ကွက်နှင့် မင်္ဂလာရပ်ကွက်၊ ဈေးပိုင်းရပ်ကွက်ရှိ စက်ဆီ၊ ချောဆီအရောင်းဆိုင်များ၌ ရေနံထွက်ပစ္စည်းကြီးကြပ်စစ်ဆေးရေးဦးစီးဌာနမှ မှတ်ပုံတင်ထားသော ( PPRD )ကုဒ်ပါ စက်ဆီ၊ ချောဆီများအား အများဆုံးတင်သွင်းရောင်းချနေသည်ကို စစ်ဆေးတွေ့ရှိရပြီး စက်ဆီ၊ ချောဆီရောင်းချသည့် အရောင်းဆိုင်ပိုင်ရှင်များအနေဖြင့် ရေနံထွက်ပစ္စည်းကြီးကြပ်စစ်ဆေးရေးဦးစီးဌာန( PPRD )၌ မှတ်ပုံတင်ထားခြင်းမရှိဘဲ အရည်အသွေးမမှန်ကန်သော အာမခံချက်မရှိသည့် စက်ဆီ၊ ချောဆီများအား ရေသန့်ဘူးများ၊ ပြည်တွင်းထုတ်ဘူးများတွင် ထည့်သွင်း၍သော်လည်းကောင်း၊ တရားဝင်တင်သွင်းသည့် ကုန်အမှတ်တံဆိပ်များနှင့် ဆင်တူယိုးမှားကပ်နှိပ်၍သော်လည်းကောင်း ရောင်းချခြင်းမပြုကြရန်နှင့် သတ်မှတ်ချက်များနှင့်ကိုက်ညီမှုမရှိသော စက်ဆီ၊ ချောဆီများ ဈေးကွက်အတွင်း ရောင်းချခြင်းတွေ့ရှိပါက ရေနံနှင့်ရေနံထွက်ပစ္စည်းဆိုင်ရာဥပဒေအရသော်လည်းကောင်း၊ စားသုံးသူကာကွယ်ရေးဥပဒေအရသော်လည်းကောင်း အရေးယူခံရမည်ဖြစ်ကြောင်း အသိပေးဆောင်ရွက်ခဲ့ကြောင်း သတင်းရရှိပါသည်။

DOCA(ကယား)

စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ စားသုံးသူရေးရာဦးစီးဌာန၊ မကွေးတိုင်းဒေသကြီး၊ ပခုက္ကူခရိုင်ဦးစီးမှူးရုံးအနေဖြင့် " ပြည်တွင်းကုန်သွယ်မှုဖွံ့ဖြိုးရေးနှင့် စားသုံးသူကာကွယ်ရေးလုပ်ငန်းများဖြင့် နိုင်ငံစီးပွားရေးဖွံ့ဖြိုးတိုးတက်စေရန်" ဟူသော ဌာန၏မျှော်မှန်းချက်ကို လိုက်ပါအကောင်အထည်ဖော်ဆောင်ရွက်လျက်ရှိရာ လုပ်ငန်းဆောင်ရွက်မှုများအပေါ် ဝန်ကြီးဌာနနှင့်ဦးစီးဌာနတို့၏ မူဝါဒလမ်းညွှန်ချက်များ၊ တိုင်းဒေသကြီးဦးစီးမှူးရုံး၏ မူဝါဒလမ်းညွှန်ချက်များနှင့်အညီ လိုက်နာဆောင်ရွက်လျက်ရှိပါသည်။
ထိုသို့ဆောင်ရွက်ရာတွင် စားသုံးသူရေးရာဦးစီးဌာန၊ ပခုက္ကူခရိုင်ဦးစီးမှူးရုံးတွင် တာဝန်ထမ်းဆောင်လျက်ရှိသော ဝန်ထမ်းများအားလုံး အထက်ဌာနမှ ချမှတ်ပေးသောမူဝါဒများ၊ လမ်းညွှန်ချက်များ၊ လုပ်ထုံးလုပ်နည်းများနှင့် ဌာနမှဆောင်ရွက်လျက်ရှိသောလုပ်ငန်းများအပေါ် သိရှိနားလည်နိုင်ရန်နှင့် လုပ်ငန်းများဆောင်ရွက်ရာတွင် ကျွမ်းကျင်မှုရှိစေရန်ရည်ရွယ်၍ ဝန်ထမ်းစွမ်းဆောင်ရည်မြှင့်တင်ရေးသင်တန်းကို စားသုံးသူရေးရာဦးစီးဌာန၊ ပခုက္ကူခရိုင်ဦးစီးမှူးရုံးတွင် နိုဝင်ဘာလ (၂၈) ရက် နေ့မှ (၂၉) ရက်နေ့ထိ နေ့စဉ်နံနက် (ဝ၉:၃၀) နာရီမှ (၁၆:၀၀) နာရီအထိ ကျင်းပခဲ့ပါသည်။
သင်တန်းဖွင့်ပွဲအခမ်းအနားကို (၂၈.၁၁.၂၀၂၂) ရက်နေ့ နံနက် (ဝ၉:၃၀) နာရီအချိန်တွင် ကျင်းပခဲ့ရာ စားသုံးသူရေးရာဦးစီးဌာန၊ ပခုက္ကူခရိုင်ဦးစီးမှူး ဦးဝေဠုအောင်က အဖွင့်အမှာစကားပြောကြားခဲ့ပြီး နိုင်ငံ့ဝန်ထမ်းဥပဒေနှင့် နည်းဥပဒေအကြောင်းအရာတို့ကို အသေးစိတ်ရှင်းလင်းဆွေးနွေးခဲ့ပါသည်။ ဆက်လက်ပြီး ပခုက္ကူခရိုင်ဦးစီးမှူးရုံးတွင် (တွဲဘက်)တာဝန်ထမ်းဆောင်လျက်ရှိသော ဂန့်ဂေါခရိုင် ဦးစီးမှူး ဒေါ်မွန်မွန်စိုးက (CICC) တိုင်ကြားမှုနှင့် လက်ခံဖြေရှင်းဆောင်ရွက်မှုများအကြောင်းတို့ကိုလည်းကောင်း၊ ဒု-ခရိုင်ဦးစီးမှူး ဦးဇော်ထွန်းဦးက အာဆီယံစာသုံးသူအကာအကွယ်ပေးရေးဆိုင်ရာကော်မတီ(ACCP) အကြောင်းအရာများကိုလည်းကောင်း၊ စီမံရေးရာဌာနခွဲ (ထွေစီမံ) တာဝန်ခံက ဆောင်ရွက်ရသောလုပ်ငန်းများအကြောင်းတို့ကိုလည်းကောင်း၊ မူဝါဒလေ့လာရေးနှင့်စီမံကိန်းစာရင်းအင်းဌာနခွဲတာဝန်ခံက ပြည်တွင်းစိုက်ပျိုးထုတ်လုပ်သည့်သီးနှံများ၏ ထုတ်လုပ်ကုန်ကျမှုနှင့် အကျိုးအမြတ်၊ အသင်းအဖွဲ့၊ ကုန်စည်ဒိုင်များ၏အချက်အလက်များကိုလည်းကောင်း၊ သတင်းအချက်အလက်နည်းပညာနှင့်အရည်အသွေးစီမံခန့်ခွဲရေးတာဝန်ခံက သတင်းရေးသားနည်းအကြောင်းတို့ကိုလည်းကောင်း၊ ငွေစာရင်းဌာနခွဲတာဝန်ခံက ငွေစာရင်းဆိုင်ရာကိစ္စရပ်များအကြောင်းကိုလည်းကောင်း၊ စီမံရေးရာဌာနခွဲ (ဝန်ထမ်းစီမံ) တာဝန်ခံက ပျမ်းမျှလစာတွက်ချက်နည်းနှင့် လုပ်ငန်းနှင့်ပတ်သက်၍ သိရှိရမည့်အချက်များအကြောင်းကိုလည်းကောင်း၊ စားသုံးသူရေးရာဌာနခွဲ တာဝန်ခံက အမျိုးသားစားသုံးသူကာကွယ်ရေးအစီအစဉ် (NCPP) အကြောင်းအရာများကိုလည်းကောင်း၊ ထုတ်ကုန်လုံခြုံစိတ်ချရမှုဌာနခွဲတာဝန်ခံမှ ဈေးကွက်စောင့်ကြည့်စစ်ဆေးခြင်းအကြောင်းအရာများကိုလည်းကောင်း အကျယ်တဝင့် ရှင်းလင်းဆွေးနွေးခဲ့ကြပါသည်။
ဝန်ထမ်းစွမ်းဆောင်ရည်မြှင့်တင်ရေး (၁/၂၀၂၂) သင်တန်းသို့ ပခုက္ကူခရိုင်ဦးစီးမှူးရုံးမှ ဝန်ထမ်း (၁၉) ဦး တက်ရောက်ခဲ့ပြီး သင်တန်းဖွင့်လှစ်ပို့ချခြင်းအားဖြင့် ပခုက္ကူခရိုင်ဦးစီးမှူးရုံးရှိ ဝန်ထမ်းများအနေဖြင့် ဌာန၏လုပ်ငန်းများကို လက်တွေ့ဆောင်ရွက်ရာတွင် အသိပညာဗဟုသုတများပိုမိုရရှိလာခြင်း၊ မိမိတာဝန်ယူဆောင်ရွက်နေရသောလုပ်ငန်းများအပြင် အခြားဌာနခွဲမှ ဆောင်ရွက်နေသောလုပ်ငန်းများကို သိရှိနားလည်ခြင်း စသည့်အကျိုးကျေးဇူးများရရှိသဖြင့် ဝန်ထမ်းစွမ်းဆောင်ရည်မြှင့်တင်ရေးသင်တန်းများကို မကြာခဏဖွင့်လှစ်ဆောင်ရွက်သွားသင့်ပါကြောင်း ရေးသားတင်ပြလိုက်ရပါသည်။
DOCA(မကွေး)

          စားသုံးသူရေးရာဦးစီးဌာန၊ မိတ္ထီလာခရိုင်၊ ခရိုင်ဦးစီးမှူး၏ လမ်းညွှန်ချက်ဖြင့် စစ်ဆေးရေးအရာရှိ ဦးဆောင်သော ဈေးကွက်စောင့်ကြည့်စစ်ဆေးရေးအဖွဲ့သည် ၂၀၂၂ ခုနှစ် ဒီဇင်ဘာလ (၁) ရက်နေ့ ၊ နံနက် (၁၀း၀၀) အချိန်တွင် မိတ္ထီလာမြို့ပေါ်ရှိ ဆေးဆိုင်များတွင် ရောင်းချနေသော ဆေးဝါးများကို စျေးနှုန်းမြှင့်တင်ရောင်းချခြင်း၊ စျေးနှုန်းမြှင့်တင်ဖြန့်ဖြူးခြင်း၊ စျေးကစားရန်ရည်ရွယ်၍ သိုလှောင်ခြင်းမပြုရန်ကိုလည်းကောင်း၊ စားသုံးသူကာကွယ်ရေးဥပဒေအရ တရားမဝင်ဆေးဝါးများ၊ အတုအပနှင့် အရည်အသွေးနိမ့်ဆေးဝါးများ ရောင်းချခြင်းမပြုရန်ကိုလည်းကောင်း၊ ဆေးပစ္စည်းများနှင့် အထောက်အကူပြုပစ္စည်းများ ပြတ်လပ်မှုမရှိစေရေး၊ သတ်မှတ်အရည်အသွေးနှင့် စျေးနှုန်းမှန်ကန်မှုရှိစေ‌ရေး ဈေးကွက်စောင့်ကြည့်စစ်ဆေးခြင်းများ ဆောင်ရွက်ခဲ့ပါသည်။

          ထိုသို့ စျေးကွက်စောင့်ကြည့်စစ်ဆေးရာတွင် ဆေးဆိုင်များတွင် ဆေးဝါးပြတ်လပ်မှုမရှိခြင်း၊ ဆေးစျေးနှုန်းမှာ အခြားကုန်စည်များနည်းတူ အတိုင်းအတာတစ်ခုထိ မြင့်တတ်လာသော်လည်း စျေးကစားရန်ရည်ရွယ်ချက်ဖြင့် သိုလှောင်ခြင်း၊ တရားမဝင်ဆေးဝါးများ ရောင်းချမှုမရှိကြောင်း တွေ့ရှိရပြီး အရောင်းဆိုင်လုပ်ငန်းရှင်များအား ကုန်စည်များကို စျေးကွက်အတွင်း စျေးနှုန့်မြှင့်တင်ရောင်းချခြင်း၊ စျေးနှုန်းမြှင့်တင်ဖြန့်ဖြူးခြင်း (သို့မဟုတ်) စျေးကစားရန်ရည်ရွယ်ချက်ဖြင့်  သိုလှောင်ခြင်းများဆောင်ရွက်နေသည်ကို စိစစ်တွေ့ရှိပါက စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၏ အမိန့်ကြော်ငြာစာ အမှတ် ၂၁/၂၀၂၀ အရ ဆေးဝါးများကို အ‌ရေးကြီးကုန်စည်အဖြစ်သတ်မှတ်လိုက်သဖြင့် အ‌ရေးကြီးကုန်စည်နှင့်ဝန်ဆောင်မှုဥပဒေ ပုဒ်မ ၅ အရ အ‌ရေးယူခြင်းခံရမည်ဖြစ်ကြောင်း ရှင်းလင်းပြောကြားခဲ့ပါသည်။

DOCA(မန္တလေး)

           စားသုံးသူရေးရာဦးစီးဌာန၊ မန္တလေးတိုင်းဒေသကြီး၊ မိတ္ထီလာခရိုင်၊ ခရိုင်ဦးစီးမှူး ဦးဇော်မင်းနှင့် ဝန်ထမ်းများ၊ စစ်ဆေးရေးအရာရှိတို့သည် မြန်မာနိုင်ငံစားသုံးသူကာကွယ်‌ရေးကော်မရှင်၏ ညွှန်ကြားချက်နှင့်အညီ စားသုံးသူကာကွယ်ရေး ဥပဒေ ၄၃ ပါ ပြဌာန်းချက်အား လိုက်နာမှုမရှိဘဲ မြန်မာဘာသာဖြင့် ဖော်ပြထားခြင်းမရှိသော  မြေသြဇာများကို စျေးကွက်အတွင်းတွင် လက်လီ/လက်ကားဖြန့်ဖြူးရောင်းချနေခြင်း ရှိ/မရှိကို မိတ္ထီလာခရိုင်အတွင်းရှိ မိတ္ထီလာ၊ ဝမ်းတွင်း၊ မလှိုင်၊ သာစည်မြို့နယ်များရှိ မြေသြဇာဆိုင် (၅၃) ဆိုင်အား (၁၇-၁၁-၂၀၂၂) ရက်နေ့မှ (၁၈-၁၁-၂၀၂၂) ရက်နေ့ထိ စျေးကွက်စောင့်ကြည့်စစ်‌ဆေးခြင်း ဆောင်ရွက်ခဲ့ပါသည်။

          ထိုသို့ စစ်ဆေးရာတွင် မြေသြဇာဆိုင်ပိုင်ရှင်များမှ မိမိတို့၏မြေသြဇာဆိုင်၌ သြဘာ၊ အာမို၊ ပုလဲသာ၊ တက်တိုး၊ ပန်းဖူး၊ စုစံ၊ ဝိစာရ (ပုလဲ) နှင့် ရွှေတောင် စသည့် မြန်မာစာအညွှန်းပါသော မြေသြဇာအိတ်အမျိုးအစား (၁၀) မျိုးခန့်အား ရောင်းချကြောင်း၊ ခရိုင်ဦးစီးမှူးဦးဆောင်သော စစ်ဆေးရေးအရာရှိများက မြေသြဇာအရောင်းဆိုင်များအတွင်း စစ်ဆေးရာတွင် မြန်မာစာအညွှန်းပါဝင်သော မြေသြဇာအိတ်များသာ ရောင်းချနေသည်ကို စစ်ဆေးတွေ့ရှိရပြီး ခရိုင်ဦးစီးမှူးမှ မြေသြဇာအရောင်းဆိုင်များအား စားသုံးသူကာကွယ်ရေးဥပဒေပါ ကုန်အညွှန်းအမှတ်အသားဖော်ပြခြင်းနှင့်စပ်လျဉ်း၍ ပုဒ်မ ၄၃ ပါ ပြဌာန်းချက်များအား အသေးစိတ်ရှင်းလင်းပြောကြားခဲ့ပါသည်၊၊

DOCA(မန္တလေး)

         စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ စားသုံးသူရေးရာဦးစီးဌာန၊ ရွှေဘိုခရိုင် ဦးစီးမှူးရုံးအနေဖြင့် စားသုံးသူများအား စားသုံးသူကာကွယ်ရေးနှင့်စပ်လျဉ်း၍ အသိပညာပေးဗဟုသုတများးရရှိစေရန်ရည်ရွယ်ချက်ဖြင့် စားသုံးသူကာကွယ်ရေးအသိပညာပေးဟောပြောပွဲများ ဆောင်ရွက်လျက်ရှိရာ ၂၀၂၂ ခုနှစ်၊ နိုဝင်ဘာလ (၂၃) ရက်နေ့၊ နံနက် (၁၀:၃၀) နာရီအချိန်တွင် ရွှေဘိုမြို့၊ အမှတ် (၄)၊ အခြေခံပညာအထက်တန်းကျောင်းရှိ ကျောင်းသား/ကျောင်းသူများအား  စားသုံးသူကာကွယ်ရေးအသိပညာပေးဟောပြောပွဲ ဆောင်ရွက်ခဲ့ပါသည်။

        အဆိုပါ ဟောပြောပွဲတွင် ရွှေဘိုမြို့နယ်တာဝန်ခံ ဦးသန့်ဇော်လင်းမှ စားသုံးသူရေးရာဦးစီးဌာနပေါ်ပေါက်လာပုံ၊ စားသုံးသူရေးရာဦးစီးဌာန၏ Vision၊ Mission များ၊ စားသုံးသူရေးရာဦးစီးဌာန (DOCA) နှင့် အစားအသောက်နှင့်ဆေးဝါးကွပ်ကဲရေးဦးစီးဌာန (FDA) ဌာနကို ကွဲကွဲပြားပြားသိရှိနိုင်စေရန် ဌာန (၂) ခု၏လုပ်ငန်းဆောင်ရွက်ခြင်းအကြောင်းများ၊ ဒု-ခရိုင်ဦးစီးမှူး ဒေါ်နှင်းနှင်းခိုင်မှ စားသုံးသူအခွင့်အရေးများကို အပြည့်အဝကာကွယ်နိုင်ရန်အတွက် စားသုံးသူကာကွယ်ရေးဥပဒေကို ပြဋ္ဌာန်းထားကြောင်း၊ စားသုံးသူနှင့် စီးပွားရေးလုပ်ငန်းရှင်၏အဓိပ္ပါယ်ဖွင့်ဆိုချက်များ၊ စားသုံးသူအခွင့်အရေး (၈) ချက်နှင့် လိုက်နာရမည့်တာဝန်များအကြောင်း၊ စီးပွားရေးလုပ်ငန်းရှင်၏တာဝန်များအကြောင်း၊ ဥပဒေအခန်း (၁၈) ပါ ကုန်အညွှန်းအမှတ်အသားဖော်ပြခြင်းနှင့်စပ်လျဉ်း၍ မြန်မာနိုင်ငံစားသုံးသူကာကွယ်ရေးကော်မရှင်၏ ညွှန်ကြားချက်အမှတ် (၂/၂၀၁၉) ပါအကြောင်းများ၊ စားသုံးသူအခွင့်အရေးနှင့် အကျိုးစီးပွားနစ်နာဆုံးရှုံးမှုဖြစ်ပါက ဝယ်ယူသည့်သက်သေအထောက်အထားနှင့်တကွ အရေးဆိုတိုင်ကြားရမည်ဖြစ်ကြောင်း၊ စားသုံးသူများနစ်နာဆုံးရှုံးမှုများဖြစ်ပါက Online ဖြင့်သော်လည်းကောင်း၊ ဖုန်းဖြင့်သော်လည်းကောင်း၊ လူကိုယ်တိုင်သော်လည်းကောင်း တိုင်ကြားနိုင်ကြောင်း၊ Consumer Call Center နံပါတ် 1535 သို့ ရုံးဖွင့်ရက် ရုံးချိန်အတွင်းမည်သည့် Operator Ph No.က ဖြစ်စေခေါ်ဆို၍ သိရှိလိုသည်များကို စုံစမ်းမေးမြန်းနိုင်ကြောင်း ရှင်းလင်းဆွေးနွေးခဲ့ပြီး ဆရာ/ ဆရာမ (၁၀) ဦးနှင့် ကျောင်းသား/ကျောင်းသူ (၉၀) ဦးတို့အား လက်ကမ်းစာစောင်များဖြန့်ဝေခဲ့ကြောင်း သတင်းရရှိပါသည်။

DOCA(စစ်ကိုင်း)