သတင်းနှင့် လှုပ်ရှားမှုများ

          စားသုံးသူရေးရာဦးစီးဌာန၊ မကွေးတိုင်းဒေသကြီး၊ ပခုက္ကူခရိုင်ဦးစီးမှူးရုံးမှ ခရိုင်ဦးစီးမှူး ဦးဝေဠုအောင် ဦးဆောင်၍ ဒု-ခရိုင်ဦးစီးမှူးနှင့် ဝန်ထမ်းများသည် ၂၀၂၁ခုနှစ်၊ ဒီဇင်ဘာလ(၁၂) ရက်နေ့၊ နံနက်(၁၁:၀၀)နာရီအချိန်တွင် ပခုက္ကူမြို့နယ်၊ ကိုင်းကျေးရွာအုပ်စု၊ အင်ပင်ကျေးရွာ ရှိ မြေပဲ၊ နှမ်း စိုက်တောင်သူနှင့် တွေ့ဆုံဆွေးနွေးခဲ့ပါသည်။

          အဆိုပါ စိုက်ပျိုးတောင်သူနှင့် တွေ့ဆုံဆွေးနွေးရာတွင်  ခရိုင်ဦးစီးမှူးမှ  စားသုံးသူရေးရာဦးစီးဌာနသည် စားသုံးသူကာကွယ်ပေးရေးလုပ်ငန်းများကိုသာမက ပြည်တွင်းကုန်သွယ်မှုဖွံ့ဖြိုးရေးကဏ္ဍများကိုလည်း တစ်ဖက်တစ်လမ်းမှ ဖွံ့ဖြိုးတိုးတက်အောင် ဆောင်ရွက်နေကြောင်း၊ ဒေသထွက်ကုန်များကိုလည်း တန်ဘိုးမြှင့်ထုတ်ကုန်များအဖြစ် ထုတ်လုပ်ခြင်းကိုအား ပေးကူညီကြောင်း၊ တောင်သူများထံမှ စိုက်ပျိုးသီးနှံများ၏ အမှန်တကယ် စိုက်ဧက၊ ကုန်ကျ စရိတ်၊ ဝင်ငွေ၊ အကျိုးအမြတ်နှင့် ဓာတ်မြေဩဇာ/ ပိုးသတ်ဆေးဈေးနှုန်းတို့ကိုလည်း ကွင်းဆင်းမေးမြန်းပြီး အထက်ဌာနအဆင့်ဆင့်သို့ တင်ပြပေးလျက်ရှိကြောင်း ရှင်းလင်းပြောကြားပါသည်။

         ထို့နောက် မြေပဲစိုက်တောင်သူများမှ ယခုနှစ် မြေပဲစိုက်ရသည်မှာ အထွက်နှုန်းတိုးကြောင်း၊ မြေပဲနှင့်အတူ ပဲစဉ်းငုံကို သီးညှပ်အဖြစ် စိုက်ပျိုးကြကြောင်း၊ မြေပဲစိုက်ဧက (၅)ဧက စိုက်ရာတွင် မြေပဲ အထွက် တင်း(၁၀၀)ကျော်  ရရှိကြောင်း၊ ထွက်ရှိသည့်မြေပဲများကို ပခုက္ကူမြို့ပေါ်ရှိ ပဲပွဲရုံများထံသို့ရောင်းချကြောင်း၊ မြေပဲဆံ (၁)ပိဿာ ကို (၂၇၀၀)ကျပ် ရရှိပြီး မြေပဲတောင့် (၁)ပိဿာကို (၁၆၂၅)ကျပ် ရရှိကြောင်း၊ ယခုနှစ်မှာ မိုးရွာနှုန်းများ၍ မြေပဲ အထွက်နှုန်းတိုးရခြင်း ဖြစ်ကြောင်း၊ ယခင်နှစ်က မိုးရွာနှုန်းနည်းသောကြောင့်  မြေပဲအထွက် နှုန်းလျော့ကျပြီး အရှုံးပေါ် ခဲ့ကြောင်း၊ ယခုနှစ်မှာမူ မြေပဲတစ်ဧကကုန်ကျစရိတ်ငွေ (၃၅၀,၀၀၀) ကျပ်ခန့် ကုန်ကျပြီး အကျိုးအမြတ်မှာ တစ်ဧကကို(၃၀၀,၀၀၀)ကျပ်ခန့်ရရှိသည်ဟု ခန့်မှန်းရပါကြောင်း၊  ဓါတ်မြေဩဇာ/ ပိုးသတ် ဆေးဈေးနှုန်းများ ထက်ဝက်ခန့်ဈေးတက်နေခြင်း ကိုလည်းထိန်းချုပ်ပေးစေလိုကြောင်း၊ ၎င်းဈေးနှုန်းများ ပုံမှန်ဈေးဖြစ်လျှင် တောင်သူများ ပို၍ အကျိုးအမြတ်ရရှိမည် ဖြစ်ကြောင်း တောင်သူများထံမှ သိရှိခဲ့ရပါသည်။

        ဆက်လက်၍ နှမ်းစိုက်တောင်သူမှ ယခုအချိန်သည် နှမ်းရိတ်သိမ်းပြီး နှမ်းထောင်နေလှန်း သည့် အချိန်ဖြစ်ကြောင်း၊ နှမ်းကို တလင်းပြင်တွင် တစ်ခါလှန်းလျှင် (၄/၅) ရက်ခန့် လှန်းရကြောင်း၊ ပြီးလျှင် နှမ်းခါသည့်အဆင့်ကို လုပ်ဆောင်ရကြောင်း၊ တောင်သူအငှားအလုပ်သမားများမှာ ကျေးရွာ အတွင်း ရှားပါးသောကြောင့် အခြား နှောကုန်း၊ ဒေါင်းစားရွာများမှ ခေါ်ယူရပါကြောင်း၊ လုပ်အားခအနေဖြင့် (၁)ဦးလျှင် (၁)ရက်ကို ၆၀၀၀/- ကျပ်ပေးရပါကြောင်း၊ ယခုအချိန် (တောင်သူလက်ဝယ် ရှိသောအချိန်) နှမ်းနက်(၁)တင်းကို (၇၀၀၀၀)ကျပ်ဈေးရရှိ သည်ဟုကြားသိရကြောင်း၊ တောင်သူ များနှမ်းရောင်းချမည့်အချိန်ရောက်လျှင်  ဈေးမည်မျှပေါက် သည်ကို မသိရသေးကြောင်း၊ ယခင်နှစ်က နှမ်းစိုက်တောင်သူများ ရောင်းသည့်အချိန် တွင် နှမ်း(၁) တင်းကို (၅၀,၀၀၀)ကျပ်ရရှိခဲ့ပါကြောင်း၊ သီးနှံဈေးကွက်များမှာ တောင်သူပေါ်ချိန်တွင် ဈေးရရှိမှု နည်းပြီး တောင်သူတွင် မရှိတော့ဘဲ ကုန်သည်လက်ဝယ်ရောက်မှ ဈေးကောင်းရခြင်းကို ကြုံနေရကြောင်း၊ ထို့ကြောင့်တောင်သူပေါ်ချိန် တွင် သီးနှံများဈေးကောင်းရရှိပြီး ဓာတ်မြေဩဇာဈေးနှုန်းများ ပုံမှန်ဖြစ်လျှင် စိုက်ပျိုးတောင်သူများ မှာ အမှန်တကယ်အကျိုးအမြတ်ရရှိနိုင်မည်ဟု အကြံပြုလိုပါကြောင်း  လေ့လာသိရှိခဲ့ရပါသည်။

စားသုံးသူရေးရာဦးစီးဌာန(မကွေးတိုင်းဒေသကြီး)

ရန်ကုန်၊ ၁၁ - ၁၂ - ၂၀၂၁

          ကုန်သွယ်မှုနှင့် ကုန်စည်စီးဆင်းမှုများမှန်ကန် မြန်ဆန်စေရေးလုပ်ငန်းကော်မတီမှ ဦးဆောင်၍ COVID-19 ရောဂါ စတုတ္ထလှိုင်း ကြိုတင်ကာကွယ်နိုင်ရေး အစီအမံများ ပြုလုပ်ရန် ညှိနှိုင်းအစည်းအဝေးအား (၁၁.၁၂.၂၀၂၁) ရက်နေ့၊ စနေနေ့ (၁၃:၀၀)နာရီအချိန်တွင် Virtual  Meeting စနစ်ဖြင့် ကျင်းပ ပြုလုပ်ခဲ့ရာ သက်ဆိုင်ရာဌာနဆိုင်ရာမှ တာဝန်ရှိသူများ၊ Task Force လုပ်ငန်းအဖွဲ့မှ တာဝန်ရှိသူများ၊ အဖွဲ့ဝင်များ တက်ရောက်ကြပါသည်.

        ညှိနှိုင်းဆွေးနွေးပွဲတွင် ကုန်သွယ်မှုနှင့် ကုန်စည်စီးဆင်းမှုများ မှန်ကန်မြန်ဆန်စေရေးလုပ်ငန်း ကော်မတီ ဥက္ကဌ၊ စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ ဒုတိယဝန်ကြီး ဦးညွန့်အောင်မှ အဖွင့်အမှာစကားပြောကြားခြင်း၊ဗဟိုကော်မတီ တွဲဘက်အတွင်းရေးမှူး ဗိုလ်မှူးချုပ် ရန်နောင်စိုးမှလည်း လိုအပ်သည်များ ဖြည့်စွက်ရှင်းလင်းအကြံပြုပြောကြားခြင်းနှင့် (Task Force) လုပ်ငန်းအဖွဲ့၊ ဥက္ကဌမှ လုပ်ငန်းဆောင်ရွက်ခဲ့မှုအခြေအနေများ ရှင်းလင်းဆွေးနွေးပြီး အဖွဲ့ဝင်များနှင့် တက်ရောက်လာသော ဌာနဆိုင်ရာများမှ တာဝန်ရှိသူများမှ ကြိုတင်ကာကွယ်ရေး အစီအမံနှင့် ပတ်သက်၍ အကြံပြုဆွေးနွေးခဲ့ကြောင်း သိရှိရပါသည်။

စားသုံးသူရေးရာဦးစီးဌာန(ရန်ကုန်တိုင်းဒေသကြီး)

မြင်းခြံခရိုင်တွင် မိုးနှမ်း၊ ဆောင်းနှမ်းနှင့် နွေနှမ်းဟူ၍ ရာသီအလိုက်စိုက်ပျိုးလျက်ရှိပြီး မိုးနှမ်းများကို မေလနှင့်ဇွန်လတို့တွင် စတင်စိုက်ပျိုးကြပြီး ဇူလိုင်လ၊ ဩဂုတ်လနှင့် စက်တင်ဘာလတို့တွင် ရိတ်သိမ်းလေ့ရှိပါသည်။
မြင်းခြံခရိုင်အတွင်းရှိ မြို့နယ်များ၏ စိုက်ပျိုးထုတ်လုပ်မှုအခြေအနေများမှာ မြင်းခြံမြို့နယ်တွင် စိုက်ဧက ၅၅၁၅ ဧက ၊ ရိတ်ဧက ၅၅၁၅ ဧက ၊ အထွက်နှုန်း ၅.၁၀ တင်း ၊ အထွက်တင်း ၂၈၁၂၆ တင်း ၊ တောင်သာမြို့နယ်တွင် စိုက်ဧက ၄၄၅၅၃ ဧက ၊ ရိတ်ဧက ၄၄၅၅၃ ဧက ၊ အထွက်နှုန်း ၃.၅၇ တင်း ၊ အထွက်တင်းပေါင်း ၁၆၇၀၇၃ တင်း ၊ နွားထိုးကြီးမြို့နယ်တွင် စိုက်ဧက ၁၇၃၆၀၉ ဧက ၊ ရိတ်သိမ်းဧက ၁၇၃၆၀၉ ဧက ၊ အထွက်နှုန်း ၁.၆၃ တင်း ၊ အထွက်တင်းပေါင်း ၂၈၂၉၈၂ တင်း ၊ ငါန်းဇွန်မြို့နယ်တွင် စိုက်ဧက ၆၄၀၁၀ ဧက ၊ ရိတ်ဧက ၆၄၀၁၀ ဧက ၊ အထွက်နှုန်း ၂.၀၁ တင်း ၊ အထွက်တင်းပေါင်း ၁၂၈၆၆၀ တင်း ထွက်ရှိခဲ့ပါသည်။ စားသုံးမှုအနေဖြင့် နှမ်းကိုကြိတ်ခွဲ၍ နှမ်းဆီအဖြစ် အဓိကစားသုံးကြပြီး နှမ်းစေ့ကို စားသောက်ကုန်များ ထုတ်လုပ်ရာတွင် လည်းကောင်း၊ ဆေးဖော်စပ်ရာတွင်လည်းကောင်း အသုံးပြု ကြပါသည်။ နှမ်းဆီကြိတ်ရာမှ ထွက်ရှိသော နှမ်းဖတ်များကိုလည်း တိရိစ္ဆာန်အစာ အဖြစ် အသုံးပြုကြပါသည်။
မြင်းခြံကုန်စည်ဒိုင်တွင် လက်ရှိရောင်းဝယ်လျက်ရှိသော နှမ်းဖြူတစ်ပိဿာ ဈေးနှုန်းမှာ ၃၂၈၀ ကျပ်မှ ၃၃၇၅ ကျပ်ထိဖြစ်ပြီး နှမ်းညိုတစ်ပိဿာဈေးနှုန်းမှာ ၂၈၄၀ ကျပ်မှ ၂၈၈၀ ကျပ်ထိရှိကြောင်း သိရှိရပါသည်။ ယခင်နှစ်ကာလတူ ဈေးနှုန်းမှာ နှမ်းဖြူတစ်ပိဿာလျှင် ၂၇၇၀ ကျပ်မှ ၂၈၈၀ ကျပ်ထိရှိပြီး နှမ်းညိုတစ်ပိဿာလျှင် ၂၃၂၀ ကျပ်မှ ၂၃၇၀ ကျပ်ဖြင့် ရောင်းဝယ်လျက်ရှိကြောင်း သိရှိရပါသည်။
မြင်းခြံခရိုင်အနေဖြင့် ယခုလက်ရှိကာလတွင် နှမ်းဆီတစ်ပိဿာလျှင် ၈၀၀၀ ကျပ်ဖြင့် ရောင်းဝယ လျက်ရှိပြီး ယခင်နှစ်ကာလတူဈေးနှုန်းမှာ နှမ်းဆီတစ်ပိဿာလျှင် ၇၅၀၀ ကျပ်ဖြစ်သဖြင့် နှမ်းဆီတစ်ပိဿာ ဈေးနှုန်းမှာ ယခင်နှစ်ထက် ယခုနှစ်တွင် ၅၀၀ ကျပ် ပိုမိုမြင့်တက်ခဲ့ကြောင်း သိရှိရပါသည်။
စားသုံးသူရေးရာဦးစီးဌာန(မန္တလေးတိုင်းဒေသကြီး)

         ဝါသီးနှံကို မိုးကြိုရာသီ၊ မိုးရာသီနှင့် မိုးနှောင်းရာသီများတွင် စိုက်ပျိုးနိုင်ပြီး မိုးကြိုရာသီတွင် ဖေဖေါ်ဝါရီလလယ်မှ မတ်လအတွင်း၊ မိုးရာသီတွင် မေလလယ်မှ ဇွန်လကုန်အတွင်း မိုးနှောင်းရာသီတွင် ဇူလိုင်လလယ်မှ ဩဂုတ်လအတွင်း စိုက်ပျိုးလေ့ရှိပါသည်။ ဝါစိုက်ပျိုးရာတွင် အထွက်နှုန်းနှင့် ဝါဂွမ်းမွှေး အရည်အသွေးကောင်းသည့် ငွေချည်-၆၊ ရွှေတောင်-၈ နှင့် ငွေချည်-၉ ဝါမျိုးစေ့များကို စိုက်ပျိုးသင့်ပါ သည်။ ငွေချည်-၆၊ ရွှေတောင်-၈ ဝါမျိုးစေ့များသည် သီးကိုင်းရှည်သည့်အတွက် တန်းကြား (၃)ပေ၊ ပင်ကြား(၃)ပေထား၍ စိုက်ပျိုးနိုင်ပြီး ငွေချည်-၉ ဝါမျိုးများကို သီးကိုင်းတိုသည့်အတွက် တန်းကြား(၂) ပေခွဲ၊ ပင်ကြား(၂)ပေခွဲထား၍ စိုက်ပျိုးနိုင်ပါသည်။

       ဝါအထွက်ကောင်းရရှိစေရန် သဘာဝဓါတ်မြေဩဇာ၊ နွားချေး၊ မြေဆွေးနှင့် ဓါတ်မြေဩဇာများကို တွဲဖက်အသုံးပြုနိုင်ပြီး သဘာဝမြေဩဇာနွားချေးသည် ဝါပင်အကြီးမြန်စေခြင်း၊ ရေအစိုဓါတ်ပိုမိုထိန်းသိမ်းနိုင်စေခြင်း၊ မြေတွင်းရှိ အာဟာရဓါတ်များကို စုပ်ယူလွယ်ခြင်းများကြောင့် နွားချေးနှင့်မြေဆွေးကို ဓါတ်မြေဩဇာအဖြစ် တွဲဖက်အသုံးပြုရန် အလွန် အရေးကြီးပါသည်။ဝါသီးနှံသည် ရေလုံလောက်မှုရရှိမှသာ အထွက်ကောင်းရရှိနိုင်မှာဖြစ်ပြီး ပန်းစပွင့်ချိန်၊ ပန်းပွင့် ဖြိုင်ချိန်နှင့် ဝါသီးကြီးထွားချိန်များတွင် အစိုဓါတ်မလုံလောက်ပါက ရေသွင်းပေးရန် လိုအပ်ပါသည်။ ဝါသီးနှံများတွင် ရောဂါကျရောက်မှုနည်းပါးစေရန်နှင့် ပိုးမွှားများဒဏ်မှကာကွယ်နိုင်ရန် သက်ဆိုင်ရာ ပိုးသတ်ဆေးများကိုလည်း ရွေးချယ်ပတ်ဖြန်းပေးရပါသည်။

      မကွေးတိုင်းဒေသကြီးတွင် မိုးကြိုးဝါကို ဖေဖေါ်ဝါရီနှင့် မတ်လအတွင်း၊ မိုးဝါကို မေလလယ်မှ ဇွန်လအတွင်း ချည်မျှင်ရှည်ဝါကို ဩဂုတ်လမှ စက်တင်ဘာလအတွင်း စိုက်ပျိုးကြပြီး ၂၀၂၀-၂၀၂၁ ဘဏ္ဍာနှစ် ဝါသီးနှံစိုက်ပျိုးထုတ်လုပ်မှုဧကမှာ (၁၄၁၁၇၇ဧက)စိုက်ပျိုးပြီး (၁၄၁၁၄၂ဧက)ခူးဆွတ် ရိတ်သိမ်းရာ (၁ ဧက) ပျမ်းမျှအထွက်နှုန်းအနေဖြင့် (၄၆၆.၅၇ပိဿာ)ထွက်ရှိပြီး စုစုပေါင်းပိဿာချိန် အားဖြင့် (၆၅၈၅၂၅၉၆ ပိဿာ)ထွက်ရှိကြောင်း သိရှိရပါသည်။ ဝါတန်ဖိုးမြှင့် ထုတ်ကုန်များအနေဖြင့် စီးပွားဖြစ်ထုတ်လုပ်နိုင်မှုမရှိသော်လည်း ဝါသီးနှံမှ ဝါဂွမ်းဖတ်အဖြစ် ထုတ်လုပ်ပြီး ထွက်ရှိသည့် ဝါဂွမ်းဖတ်များကို မန္တလေးချည်မျှင်စက်ရုံ၊ ပလိပ်ချည်မျှင်စက်ရုံ၊ မိတ္ထီလာချည်မျှင်နှင့် အထည်စက်ရုံများသို့ ရောင်းချလျက်ရှိပြီး အောင်လံ၊ တောင်တွင်းကြီး၊ မြို့သစ်၊ နတ်မောက်နှင့် ပခုက္ကူမြို့နယ်များရှိ ဝါကြိတ်စက်ရုံများမှ စက်ရုံတစ်ရုံလျှင် တစ်နှစ်ပျမ်းမျှ ဝါပိဿာချိန် (၈)သိန်းမှ (၁၀)သိန်းအထိ ကြိတ်ခွဲနိုင်ပြီး ဝါ(၃)ပိဿာ ကြိတ်လျှင် ဝါဂွမ်းဖတ်(၁)ပိဿာ ထွက်ရှိကြောင်းလည်း သိရှိရပါသည်။

         မကွေးတိုင်းဒေသကြီးအတွင်း မြို့နယ်များတွင် ဝါအသင်းအဖွဲ့/အစုအဖွဲ့များ ဖွဲ့စည်းထားရှိမှုအနေဖြင့် ဝါသီးနှံစိုက်ပျိုးထုတ်လုပ်သူ အစုအဖွဲ့(၂၉)ဖွဲ့ ဖွဲ့စည်းထားပြီးဖြစ်ပြီး ပုဂ္ဂလိက ကဏ္ဍဖွံ့ဖြိုးတိုးတက်ရေးလုပ်ငန်းများ ဆောင်ရွက်ရာတွင် အသေးစား၊ အလတ်စား စက်မှုလက်မှု လုပ်ငန်းရှင်များ ဖွံ့ဖြိုးတိုးတက်ရေးအတွက် ရက်ကန်းလုပ်ငန်းရှင်အစုအဖွဲ့များလည်း ဖွဲ့စည်းပေးထားပြီး ရက်ကန်းလုပ်ငန်း အဓိကလုပ်ကိုင်နေသော မြို့နယ်(၆)မြို့နယ်တွင် လက်ရက်ကန်းအစုအဖွဲ့(၁၆)ဖွဲ့၊ စက်ရက်ကန်း အစုအဖွဲ့(၄)ဖွဲ့ ဖွဲ့စည်းပေးထားခဲ့ပြီးဖြစ်ပါသည်။ မကွေးတိုင်းဒေသကြီးတွင် ဝါများစိုက်ပျိုး၍ ဝါကြိတ်စက်များရှိသော်လည်း ဝါဂွမ်းဖတ်အထိသာ ထုတ်လုပ်နိုင်၍ အဆင့်အတန်းမီ ဝါချည်ထုတ်လုပ်သည့် စက်များမရှိသည့်အတွက် အထည်ချုပ်လုပ်ငန်းရှင်များအသင်း ဖွဲ့စည်းထားခြင်းမရှိပါသေးပါကြောင်း သိရှိရပါသည်။

        ဝါနှင့် ဝါထွက်ပစ္စည်းလုပ်ငန်းရှင်များ၏ အတွေ့အကြုံများအရ မကွေးတိုင်းဒေသကြီးတွင် ဝါကုန် ကြမ်းများထွက်ရှိပြီး နည်းပညာအခက်အခဲများရှိ၍ ကုန်ချောအထိ မထုတ်လုပ်နိုင်ပါကြောင်း၊ ဝါနှင့် ဝါထွက်ပစ္စည်းကဏ္ဍဖွံ့ဖြိုးတိုးတက်ပါက ဝါဂွမ်းမှသည် ကုန်ချောအထိထုတ်လုပ်၍ ပြည်ပဝင်ငွေ ရရှိနိုင်ပါကြောင်း၊ နိုင်ငံတော်မှ စီမံချက်ချစိုက်ပျိုးသည့် ငွေချည်-၆ဝါသည် စိုက်ပျိုးပြီး (၄)နှစ်သက်တမ်း ကျော်လာသည့်အချိန်တွင် အထွက်နှုန်းနှင့် အရည်အသွေးကျဆင်းလာ၍ Raka (6661-6662)(B-31) ဝါများစိုက်ပျိုးလာသည့်အတွက် အထွက်နှုန်းနှင့် အရည်အသွေးကောင်းသော်လည်း ဝယ်ယူရောင်းချရာတွင် ဘဏ်ငွေကြေး အခက်အခဲများလည်းရှိပါကြောင်း သိရှိရပါသည်။

          မိမိတို့ရေမြေဒေသနှင့်ကိုက်ညီသော အထွက်နှုန်းကောင်း မျိုးကောင်း/ မျိုးသန့်များကို စိုက်ပျိုးထုတ်လုပ်သူ တောင်သူများသို့ ဖြန့်ဖြူးပေးနိုင်ပါက အထွက်နှုန်းလည်း ကောင်းမွန်လာပြီး ဝင်ငွေများလည်း ပိုမိုရရှိကာ ဝါလုပ်ငန်းကဏ္ဍဖွံ့ဖြိုးတိုးတက်၍ လူနေမှုအဆင့်အတန်းများလည်း မြင့်မားလာမည်ဖြစ်ပါသည်။

          နိုင်ငံတော်အစိုးရမှလည်း ပြည်ပသွင်းကုန်များ လျော့ချနိုင်ရေးအတွက် စီမံဆောင်ရွက်လျက်ရှိရာ ပြည်တွင်းလယ်ယာထွက်ကုန်သီးနှံများ ပိုမိုထုတ်လုပ်မှုမြင့်မားလာရေးအတွက် ဝါသီးနှံမှာလည်း အဓိက ပါဝင်ခဲ့ရာ သက်ဆိုင်ရာဌာနများမှ ဝါစိုက်ပျိုးထုတ်လုပ်မှု တိုးတက်မြင့်မားရေးအတွက် မျိုးကောင်း၊ မျိုးသန့်များနှင့် သွင်းအားစုများအတွက် ကွင်းဆင်းဆောင်ရွက်ပံ့ပိုးပေးသည့်အပြင် ထွက်ရှိသောဝါသီးနှံ များကို ထုတ်လုပ်သူ၊ ဝါလုပ်ငန်းရှင် (ဝါကြိတ်စက်ပိုင်ရှင်) အားအရည်သွေးမီ ဝါဂွမ်းဖတ်ထုတ်လုပ်နိုင် ရေး အားပေးကူညီဆောင်ရွက်လျှက်ရှိသည့်အတွက် ၂၀၁၉-၂၀၂၀ခုနှစ်တွင်  ဝါဂွမ်းပေါ်စအချိန်၌ (၁ပိဿာ ၁၁၅၀ကျပ်နှင့် ၁၃၅၀ကျပ်)တို့ဖြင့် အရောင်းအဝယ်ဖြစ်ခဲ့ပြီး ၂၀၂၀-၂၀၂၁ခုနှစ်တွင် (၁ပိဿာ ၁၃၀၀ကျပ်)နှင့် အရည်အသွေးကောင်းဝါများကို (၁၃၅၀ကျပ်)အထိ ဈေးပေးဝယ်ယူနေသဖြင့် ဝါ ဈေးနှုန်းကျဆင်းမှု မရှိနိုင်ကြောင်းနှင့် ဝါသီးနှံများစိုက်ပျိုးခြင်းအားဖြင့် တောင်သူများအတွက် ဝင်ငွေ အခွင့်အလမ်းများ ရရှိနိုင်မည်ဖြစ်ပါသည်။

စားသုံးသူရေးရာဦးစီးဌာန(မကွေးတိုင်းဒေသကြီး)

             ပဲခူးမြို့တွင် ဒေသထွက်ကုန်အနေဖြင့် ငါးချဉ်လုပ်ငန်းအား တနိုင်တပိုင်လုပ်ငန်းအဖြစ် လုပ်ကိုင်လျက်ရှိကြပြီးပဲခူးမြို့အခြေပြု ထုတ်လုပ် ရောင်းချသော ငါးချဉ်အမှတ်တံဆိပ်များတွင် ပဲခူး(မနီ)၊ အေးမိစံ၊ ကမ္ဘာကျော်၊ ကောင်းထက်စံ၊ ပဲခူးအောင်၊ မမွန်လေး၊ မနိုင်၊ ကျော်ကြား၊ ရွှေဟင်္သာစသည့် တံဆိပ်အသီးသီးဖြင့် ထုတ်လုပ်လုပ်ကိုင်လျက်ရှိကြရာ လုပ်ငန်းရှင်(၂၀)ဦးကျော် လုပ်ကိုင်လျက်ရှိကြောင်း သိရှိရပါသည်။

             ငါးချဉ်ပြုလုပ်ရာတွင် အဓိကအသုံးပြုသည့်ငါးမှာ ငါးဖယ်ငါးဖြစ်ပြီး ငါးဖယ်ရှားပါးသော အချိန်ကာလများတွင် ငါးမြစ်ချင်းငါးကို အစားထိုး၍ ထုတ်လုပ်ပြီး၊ ကုန်ကြမ်း အဖြစ် အသုံးပြုသည့် ငါးများကိုပဲခူးမြို့ရှိငါးဒိုင်များမှ ဝယ်ယူအသုံးပြုလျက်ရှိပါသည်။ ငါးချဉ်ထုပ်ပိုးရာတွင် အသုံးပြုသည့် တောင်စွန်းဖက်ရွက်များကို ပွဲစားများထံမှ အရွက်ကြီးလျှင် ငါးကျပ်၊ အရွက်သေးလျှင် သုံးကျပ်ခန့် ဝယ်ယူရပြီး ငါးချဉ်တစ်ထုပ်လျှင် ငါးချဉ်၈ကျပ်သားခန့် ပါရှိကာ တောင်စွန်းဖက် သုံးရွက်ခန့် အသုံးပြု၍ ထုပ်ပိုးရောင်းချကြောင်း သိရှိရသည်။         

             ငါးချဉ်ထုတ်လုပ်သည့်လုပ်ငန်းငယ်တစ်ခုတွင် ၁ရက် ငါးပိဿာချိန် (၁၀)မှ (၉၀)အထိ လုပ်ကိုင်နိုင်ပြီး အချိန်(၁၀)လျှင် အထုပ်အရေအတွက်(၂၀၀)ခန့် ထွက်ရှိကြောင်း၊ ငါးအချိန်(၁၀) အတွက် ထုတ်လုပ်မှု ကုန်ကျစရိတ် (၁)သိန်းခွဲဝန်းကျင်ခန့် ရှိကြောင်းသိရပါသည်။ စျေးနှုန်း အနေဖြင့် ငါးချဉ်(၁၀)သား တစ်ဘူးလျှင် (၁၅၀၀) ကျပ်၊ ပုဇွန်ချဉ်(၁၀)သားတစ်ဘူးလျှင် (၂၀၀၀)ကျပ်နှုန်းဖြင့် ရောင်းချလျှက်ရှိကြောင်း ၊စျေးကွက်အနေအားဖြင့် ပဲခူးမြို့တွင် ဘုရားကြီး၊ မဒေါက်၊ ရွှေကျင်၊ ဒိုက်ဦး၊ ဝေါ၊ ပြွန်တန်ဆာ စသည့်မြို့နယ်များ၌လည်း ထုတ်လုပ်ရောင်းချ နေကြောင်း သိရှိရပါသည်။

             ငါးချဉ်သည် ငါးနှင့်ပြုလုပ်ထားသည့်အတွက် ဗီတာမင်D နှင့်Omega3 ကြွယ်ဝစေခြင်း၊ နှလုံးရောဂါနှင့် ကင်ဆာရောဂါအချို့ကို ကာကွယ်စေနိုင်ခြင်း၊ ငါးစားသုံးခြင်းသည် ကျန်းမာရေး နှင့် ညီညွတ်ခြင်း၊  ဗီတာမင်D နှင့်ပရိုတိန်းဓာတ်သည် အရိုးဆစ်ကြီးထွားရန်အတွက် အားပေးပြီး ကိုယ်ခံအားကို ကောင်းစေနိုင်ခြင်းစသည်တို့ကြောင့် ဝယ်ယူသုံးစွဲမူ မြင့်တက်လျက်ရှိကြောင်း သတင်းရရှိပါသည်။

စားသုံးသူရေးရာဦးစီးဌာန(ပဲခူးတိုင်းဒေသကြီး)