သတင်းနှင့် လှုပ်ရှားမှုများ

    စားသုံးသူရေးရာဦးစီးဌာန၊ ကရင်ပြည်နယ်ဦးစီးမှူးရုံးမှ ဦးစီးအရာရှိ ဒေါ်စမ်းစမ်းမြင့်နှင့် ဝန်ထမ်းများသည် (၁၉-၅-၂၀၂၅) ရက် ၊ နံနက် (၀၉:၀၀) နာရီအချိန်တွင် ဘားအံမြို့ရှိ  ဖုန်းဆိုင်(၅)ဆိုင်နှင့် ကွန်ပျူတာ (၁)ဆိုင်အား ကုန်အညွှန်းအမှတ်အသားစစ်ဆေးခြင်းနှင့် အသိပညာပေးခြင်းလုပ်ငန်းများ ဆောင်ရွက်ရန်အတွက် ကွင်းဆင်းစစ်ဆေးခဲ့ကြောင်း သိရှိရသည်။

    ထိုသို့ဈေးကွက်စောင့်ကြည့်စစ်ဆေးခဲ့ရာတွင်ကုန်အညွှန်းအမှတ်အသား ဖော်ပြခြင်းနှင့် စပ်လျဉ်း၍ မြန်မာနိုင်ငံစားသုံးသူကာကွယ်ရေး ကော်မရှင် ညွှန်ကြားချက်အမှတ်၊ ၂/၂၀၁၉ နှင့်အညီ ကိုက်ညီမှု ရှိ / မရှိ ‌စစ်ဆေးခဲ့ပါသည်။ ဆက်လက်၍ စားသုံးသူရေးရာဦးစီးဌာန၊ ကရင်ပြည်နယ်ဦးစီးမှူးရုံးမှ ဦးစီးအရာရှိ ဒေါ်စမ်းစမ်းမြင့်က စီးပွားရေးလုပ်ငန်းရှင်များအား ကုန်အညွှန်းအမှတ်အသား ပြည့်စုံစွာဖော်ပြထားသော ကုန်ပစ္စည်များအား ရောင်းချကြရန်နှင့် ကုန်ပစ္စည်များပေါ်တွင် မြန်မာဘာသာဖြင့် ကုန်အညွှန်းအမှတ်အသားများအား ပြည့်စုံစွာထည့်သွင်းထားကြရန် အသိပညာပေး ဆောင်ရွက်ခဲ့ကြောင်း သိရသည်။

DOCA(ကရင်)

   မွန်ပြည်နယ်၊ မုဒုံမြို့နယ်တွင် ရဟန်းရှင်လူ ပြည်သူအများ သဘာဝဘေးအန္တရာယ်များမှ ကင်းဝေးစေရန်ရည်ရွယ်၍ သံဃာတော်အရှင်သူမြတ်များက အန္တရာယ်ကင်း ပရိတ်တရားတော် များ ရွတ်ဖတ်ပူဇော်ခြင်းကို ၉.၄.၂၀၂၅ ရက်နေ့ နံနက် ၈ နာရီက မြို့မ (၄) ရပ်ကွက် ကန်ကြီး စေတီတော်အတွင်းရှိ မြတ်မုနိဓမ္မာရုံ၌ ပြုလုပ်သည်။

  အဆိုပါ အန္တရာယ်ကင်း ပရိတ်တရားတော်များ ရွတ်ဆိုပူဇော်ခြင်းကို ဆရာတော်၊ သံဃာတော်များက နမောတဿသုံးကြိမ်ရွတ်ဆို ဘုရားကန်တော့ကြပြီး နိုင်ငံတစ်ဝန်းရှိ ရဟန်းရှင်လူပြည်သူအများ မီးဘေး၊ လေဘေး၊ ရေဘေး နှင့် ငလျင်ဘေးစသည့် သဘာဝဘေး အန္တရာယ်များမှ ကင်းဝေးစေရန်အတွက် အန္တရာယ်ကင်း ပရိတ်တရားတော်များကို ရွတ်ဖတ် ပူဇော်၍ မေတ္တာပို့ အမျှအတန်းပေးဝေကြသည်။ ထို့နောက် ဆရာတော်သံဃာတော်ကြီးများအား မြို့နယ်စီမံအုပ်ချုပ်ရေးအဖွဲ့ ဥက္ကဋ္ဌ ဦးပြည်သိမ်းနှင့်အဖွဲ့ဝင်များ၊ မြို့နယ်အဆင့်ဌာနဆိုင်ရာ များက လှူဖွယ်ဝတ္ထုပစ္စည်းများ ဆက်ကပ်လှူဒါန်းခဲ့သည်။

  ထို့ပြင် မုဒုံမြို့ပေါ်ရှိ မြို့နယ်အဆင့်ဌာနဆိုင်ရာရုံးများ၊ သင်တန်းကျောင်းများတွင်လည်း သက်ဆိုင်ရာ ဝတ်ရွတ်အသင်းများက သဘာဝဘေးအန္တရာယ်ကင်းဝေးစေရေး အန္တရာယ်ကင်း ရတနသုတ် ပရိတ်တရားတော်များ ရွတ်ဖတ်ပူဇော်ခဲ့ကြကြောင်း သိရသည်။

DOCA(မွန်)

  ၁၀.၄.၂၀၂၄ ရက်နေ့တွင် စားသုံးသူရေးရာဦးစီးဌာန၊ မွန်ပြည်နယ်၏ လုပ်ငန်းညှိနှိုင်း အစည်းအဝေးနှင့် ဝန်ထမ်းထုဆန္ဒဖော်ထုတ်ပွဲကို မွန်ပြည်နယ်ဦးစီးမှူးရုံးအစည်းအဝေးခန်းမ၌ ကျင်းပပြုလုပ်ခဲ့ရာ ပြည်နယ်ရုံးနှင့် မော်လမြိုင်ခရိုင်မှ ဝန်ထမ်းများ အရာထမ်း (၈) ဦး၊ အမှုထမ်း (၂၄) ဦးတက်ရောက်ခဲ့ပြီး သထုံခရိုင်နှင့် မြို့နယ်များမှ ဝန်ထမ်းများမှ Zoom ဖြင့် တက်ရောက်ခဲ့ကြောင်း သိရှိရပါသည်။

  ပထမဦးစွာ ပြည်နယ်ဦးစီးမှူးက သင်္ကြန်ရုံးပိတ်ရက်ပြီးလျှင် ရုံးစဖွင့်သည့်ရက်၌ ဝန်ထမ်း များစုံစုံညီညီ ရုံးတက်ကြရန်၊ လုပ်ငန်းများကို လျာထားချက်ပြည့်မီအောင် တက်ညီလက်ညီ ဆောင်ရွက်ကြရန်၊ ဝန်ထမ်းများသို့ သင်္ကြန်ထောက်ပံ့ကြေးပေးရန်၊ ‌ကော်မတီအစည်းအဝေး ဆုံးဖြတ်ချက်များအပေါ် ဆောင်ရွက်ပြီးစီးမှုကို ပြန်လည်တင်ပြရန်၊ အသစ်ခန့်အပ်သည့် ဝန်ထမ်းများအား Mobile Training ပေးရန်ဆွေးနွေးခဲ့ပါသည်။ ဆက်လက်၍ ဒုတိယပြည်နယ် ဦးစီးမှူးက လျာထားချက်များကို ပြည့်မီအောင်ဆောင်ရွက်ကြရန် ဆွေးနွေးခဲ့ပါသည်။

  ဆက်လက်၍ တက်ရောက်လာသော ဝန်ထမ်းများမှ လုပ်ငန်းဆောင်ရွက်ချက်များနှင့် အခက်အခဲများကို တင်ပြကြပြီး ပြည်နယ်ဦးစီးမှူးက ဖြေရှင်းဆောင်ရွက်ပေးခဲ့သည်။ ထို့နောက် Commerce Journal တွင် သတင်း/ဆောင်းပါး ရေးသားဖော်ပြခြင်းခံရသည့်ဝန်ထမ်းများအား ဆုချီးမြှင့်ခဲ့ပြီး ဒါဘာအခမ်းအနားအား နေ့လည် (၁၂:၀၀) နာရီအချိန်တွင် ရုတ်သိမ်းခဲ့ကြောင်း သိရှိရပါသည်။

DOCA(မွန်)

 မွန်ပြည်နယ်၊ ဘီးလင်းမြို့နယ်စီမံအုပ်ချုပ်ရေးအဖွဲ့၏ ဦးဆောင်မှုဖြင့် မြို့နယ်လုံးဆိုင်ရာ ဇီဝိတဒါန စုပေါင်းငါးလွှတ်ပွဲ အခမ်းအနားကို ၉.၄.၂၀၂၅ ရက်နေ့ နံနက်ပိုင်းက ဘီးလင်းမြို့ ရန်ကုန် - မော်လမြိုင်အဝေးပြေးကားလမ်းဘေးရှိ ဘီးလင်းချောင်း၌ ကျင်းပပြုလုပ်ခဲ့သည်။

  စုပေါင်းငါးလွှတ်ရာတွင် မြို့နယ်စီမံအုပ်ချုပ်ရေးအဖွဲ့ ဥက္ကဋ္ဌ ဦးစည်သူအောင်နှင့်အဖွဲ့ဝင် များ၊ ဘီးလင်းတပ်နယ်မှ တပ်နယ်မှူးနှင့် တပ်ရင်းတပ်ဖွဲ့များ၊ မြို့နယ်အဆင့်ဌာနဆိုင်ရာများ၊ လူမှုကူညီကယ်ဆယ်ရေးအဖွဲ့များက ဘီးလင်းချောင်းအတွင်းသို့ ငါးခူ၊ ငါးပြေမ၊ ငါးမြစ်ချင်း စသည့် ငါးသား‌ပေါက်ကောင်ရေ (၂၀၀၀)အား ဇီဝိတဒါန ဘေးမဲ့လွှတ်ပေးခဲ့ကြသည်။

   အဆိုပါ အခမ်းအနားသို့ မြို့နယ်စီမံအုပ်ချုပ်ရေးအဖွဲ့ဥက္ကဋ္ဌနှင့် အဖွဲ့ဝင်များ၊ နယ်မြေခံ တပ်နယ်မှူးနှင့် တပ်ရင်းတပ်ဖွဲ့အသီးသီးမှ တာဝန်ရှိသူများ၊ မြို့နယ်အဆင့် ဌာနဆိုင်ရာများ၊ ရပ်ကွက်အုပ်ချုပ်ရေးအဖွဲ့မှ တာဝန်ရှိသူများ၊ မြို့နယ်အမျိုးသမီးရေးရာအဖွဲ့၊ မိခင်နှင့်ကလေး စောင့်ရှောက်ရေးအသင်းဝင်များ စုပေါင်းတက်ရောက်ခဲ့ကြကြောင်း သိရသည်။

DOCA(မွန်)

    မုဒုံမြို့နယ်၊ နယ်စပ်ရေးရာဝန်ကြီးဌာန၊  အမျိုးသမီးအိမ်တွင်းမှုသက်မွေးလုပ်ငန်း ပညာသင်တန်းကျောင်းတွင် လူငယ်လူရွယ်များ အသိပညာဗဟုသုတများပြည့်စုံစေရန် စာဖတ်ရှိန်မြှင့်တင်ရေး ဟောပြောပွဲနှင့် စာအုပ်စာစောင်ပြပွဲကို ၁၆.၅.၂၀၂၅ ရက်နေ့တွင် သင်တန်းကျောင်းခန်းမ၌ ပြုလုပ်ခဲ့ရာ စားသုံးသူရေးရာဦးစီးဌာန၊ မုဒုံမြို့နယ်တာဝန်ခံ တက်ရောက်ခဲ့သည်။

    ဟောပြောပွဲတွင် ကျောင်းအုပ်ဆရာမကြီး ဒေါ်ညိုညိုရှိန်က အဖွင့်အမှာစကားပြော ကြားပြီး မြို့နယ်ပြန်ကြားရေးနှင့်ပြည်သူ့ဆက်ဆံရေးဦးစီးဌာနမှ ဦးစီးအရာရှိက စာပေ ဖတ်ရှုလေ့လာခြင်းသည် ဘဝအတွက် အလွန်အရေးကြီးသည့် အချက်ဖြစ်သောကြောင့် ငယ်ရွယ်စဥ်ကတည်းက စာပေဖတ်ရှုလေ့လာမှု အလေ့အကျင့်ကောင်းကို ပြုစုပျိုးထောင် ရမည်ဖြစ်ပါကြောင်း၊ ပြင်ပစာပေများကို ဖတ်ရှုလေ့လာခြင်းဖြင့် အမှား/အမှန် ခွဲခြားတတ် စေရန်၊ အသိပညာ ဗဟုသုတပြည့်စုံ၍ ဗလငါးတန်ဖွံ့ဖြိုးစေရန်နှင့် စာဖတ်ရှိန်မြှင့်တင်ရေး လုပ်ငန်းများအကြောင်းကို ရှင်းလင်းပြောကြားသည်။

    ဆက်လက်၍ ကလေးအလုပ်သမားပပျောက်ရေး၊ စားသုံးသူကာကွယ်ရေး၊ သဘာဝ ဘေးအန္တရာယ်ဆိုင်ရာနှင့် လူကုန်ကူးမှုတားဆီးကာကွယ်ရေး အသိပညာပေးနံရံကပ်ပိုစတာ များ၊ စာအုပ်စာစောင်များကို ပြသဆောင်ရွက်ခဲ့ရာ သင်တန်းသူ (၃၀) ဦးနှင့် နည်းပြဆရာမများက စိတ်ပါဝင်စားစွာ ဖတ်ရှုလေ့လာခဲ့ကြောင်း သိရသည်။

DOCA (မွန်)