သတင်းနှင့် လှုပ်ရှားမှုများ

      စားသုံးသူပြည်သူများ စားသုံးဆီဝယ်ယူစားသုံးရာတွင် ဘေးအန္တရာယ် ကင်းရှင်းပြီး သင့်တင့်သောဈေးနှုန်းဖြင့်ဝယ်ယူစားသုံးနိုင်စေရန်နှင့်ပြည်တွင်းလိုအပ်ချက်များကို ဖြည့်ဆည်း ပေးနိုင်ရန် စီးပွားရေးနှင့် ကူးသန်းရောင်းဝယ်ရေးဝန်ကြီးဌာန၊ စားသုံးဆီ တင်သွင်း သိုလှောင် ဖြန့်ဖြူးခြင်းလုပ်ငန်း ကြီးကြပ်ရေးကော်မတီက ဆောင်ရွက်ပေးလျက်ရှိကြောင်း သိရပါသည်။

          စားအုန်းဆီကို ပြည်ပမှဝယ်ယူတင်သွင်းရာတွင် စားအုန်းဆီ တင်ပို့သည့်နိုင်ငံများ၏ စျေးနှုန်းအတက်အကျပေါ်မူတည်၍ ပြည်တွင်း၌ ဖြစ်သင့်ဖြစ်ထိုက်သည့်ဈေးနှုန်းများ ဖြစ်ပေါ် စေရေးကို ထိန်းကျောင်းဆောင်ရွက်လျက်ရှိပါသည်။

          ပြည်ပမှစားအုန်းဆီထုတ်လုပ်တင်ပို့သည့်နိုင်ငံများတွင် ဈေးကွက်နှင့်ဈေးနှုန်းဖြစ်ပေါ်မှု များအရ ၂၀၂၆ ခုနှစ်၊ ဩဂုတ်လ 7 ရက်နေ့မှ 13 ရက်နေ့အထိ ရန်ကုန်အထိုင်ဈေး အခြေခံ လက်ကားရည်ညွှန်းဈေးနှုန်းမှာ စားအုန်းဆီတစ်ပိဿာလျှင် ငွေကျပ် ၇,၂၀8 ဖြစ်ကြောင်း စားသုံးဆီတင်သွင်းသိုလှောင်ဖြန့်ဖြူးခြင်းလုပ်ငန်းကြီးကြပ်ရေးကော်မတီက အသိပေးထုတ်ပြန် ကြေညာထားကြောင်း သိရှိရပါ​သည်။  

          စားအုန်းဆီ အခြေခံလက်ကားရည်ညွှန်းဈေးနှုန်းကို အပတ်စဉ် သောကြာနေ့တိုင်း ထုတ် ပြန်ကြေညာလျက်ရှိပြီး စားသုံးသူပြည်သူများအနေဖြင့် စားသုံးသူရေးရာဦးစီးဌာန၏ Website: www.doca.gov.mm၊  Facebook Page  နှင့် မြန်မာနိုင်ငံဆီကုန်သည်နှင့် ဆီလုပ်ငန်းရှင်များ အသင်း၏ Facebook Page တို့တွင် ဝင်ရောက် ကြည့်ရှုလေ့လာနိုင်ကြောင်း သိရှိရပါသည်။

         ၂၀၂၆ ခုနှစ်၊ သြဂုတ်လ၊ ၃ ရက်နေ့၊ ၁၀း၀၀ နာရီအချိန်တွင် စားသုံးသူရေးရာဦးစီးဌာန၊ မြိတ်ခရိုင်ဦးစီးမှူးရုံး၊ အစည်းအဝေးခန်းမတွင် ခရိုင်ဦးစီးမှူးဦးဆောင်၍ မြိတ်မြို့၊ မြိတ်ခရိုင်ရွှေလုပ်ငန်းရှင်များအသင်းအား အွန်လိုင်းရောင်းချမှုဆိုင်ရာများနှင့်စပ်လျဥ်း၍ အသိပညာပေးရှင်းလင်းဆွေးပွဲအား ကျင်းပပြုလုပ်ခဲ့ကြောင်း သိရသည်။

       အဆိုပါဆွေးနွေးပွဲတွင် ခရိုင်ဦးစီးမှူးမှ နှုတ်ခွန်းဆက်သခြင်းနှင့် စီးပွားရေးလုပ်ငန်းရှင်များအား စားသုံးသူကာကွယ်ရေးဥပဒေပါ စီးပွားရေးလုပ်ငန်းရှင်များ၏ တာဝန်များအကြောင်း ရှင်းလင်းဆွေးနွေးခြင်း၊ လုပ်ငန်းရှင်များအနေဖြင့် မိမိတို့ရောင်းချလုပ်ကိုင်သည့် ကုန်စည်များ၊ လုပ်ငန်းများ၊ ဝန်ဆောင်မှုများအား Online Social Media အသုံးပြု၍ ကြော်ငြာခြင်း၊ ရောင်းချခြင်းများပြုလုပ်ပါက စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ အွန်လိုင်းမှတ်ပုံတင်စနစ် www.ecomreg.gov. mm တွင် အွန်လိုင်းမှတ်ပုံတင်လျှောက်ထားဆောင်ရွက်ပြီးမှသာလျှင် ရောင်းချရန်လိုအပ်ကြောင်း၊ မှတ်ပုံတင်လက်မှတ်လျှောက်ထားရာတွင် လိုအပ်သည့်အချက်အလက်များ၊ လျှေက်ထားပုံနည်းလမ်းများအား ရှင်းလင်းဆွေးနွေးခြင်းများ ဆောင်ရွက်ခဲ့ကာ  မှတ်ပုံတင်လက်မှတ်မရှိဘဲ အွန်လိုင်းမှရောင်းချနေမှုများအား ဥပဒေပြဌာန်းချက်များနှင့်အညီ အရေးယူဆောင်ရွက်ရမည်ဖြစ်သဖြင့် အွန်လိုင်းမှရောင်းချမှုများအား မှတ်ပုံတင်ဆောင်ရွက်သွားကြရန် တိုက်တွန်းပြောကြားခဲ့ကြောင်း သိရှိရပါသည်။

DOCA(တနင်္သာရီ)

    ပဲခူးတိုင်းဒေသကြီး၊ သာယာဝတီခရိုင်၊ ကြို့ပင်ကောက်မြို့နယ်၊စားသုံးသူရေးရာဦးစီးဌာန မြို့နယ်တာဝန်ခံရုံး၌ Online Shopping လျှောက်ထားရမည့် ကုန်စည်နှင့် ဝန်ဆောင်မှုများနှင့် ပတ်သတ်သည့် ခေါင်းစဉ်အလိုက် ရှင်းလင်းပြောကြားခဲ့ပါသည်။

          Online Shopping မှတ်ပုံတင်လျှောက်ထားလိုသည့် ဒေါ်နွဲ့နွဲ့ဝင်း ငါးပိလုပ်ငန်းနှင့် ဒေါ်တင်မိုးခိုင်ရွှေစင်စစ်အထည်ဆိုင် လုပ်ငန်းရှင်တို့အား စားသုံးသူရေးရာဦးစီးဌာနမှ ဝန်ထမ်း(၁)ဦး က လိုအပ်သည်များ ရှင်းလင်းပြောကြားပြီး တစ်ပါတည်းဆောင်ရွက်ခဲ့ပါသည်။သိလိုသည်များရှိပါက လည်း (1535)  Consumer Call Center သို့ ဆက်သွယ်မေးမြန်းနိုင်ပါကြောင်း အသိပညာပေး ဆောင်ရွက်ခဲ့ပါသည်။

 DOCA(ပဲခူး)

       ညောင်တုန်းမြို့နယ်အတွင်း ဆန်၊ စပါးလက်ကျန်အခြေအနေများကို တိကျမှန်ကန်စွာ စာရင်းကောက်ယူနိုင်ရေးနှင့် စားနပ်ရိက္ခာဖူလုံမှုအခြေအနေများကို စဉ်ဆက်မပြတ် စောင့်ကြည့်နိုင်ရေးအတွက် MyRo စနစ်ဖြင့် မှတ်ပုံတင်ထားသည့် လုပ်ငန်းရှင်များ၏ ဖြည့်သွင်းထားသော စာရင်းများကို မြို့နယ်စားသုံးသူရေးရာဦးစီးဌာနက လစဉ် ကြပ်မတ်ဆောင်ရွက်လျက်ရှိကြောင်း သိရသည်။

       (၃၁-၇-၂၀၂၆) ရက်နေ့အထိ MyRo စနစ်၌ ဖြည့်သွင်းထားသော စာရင်းများအရ တောင်သူများထံတွင် စပါး ၁,၆၃၄,၀၈၀ တင်းနှင့် ဆန် ၁,၇၀၀ အိတ်၊ စက်ပိုင်များထံတွင် စပါး ၃၇၉,၈၂၃ တင်းနှင့် ဆန် ၂၈၀,၄၃၃ အိတ်၊ ကုန်သည်များထံတွင် စပါး ၁၀၀,၂၀၀ တင်းနှင့် ဆန် ၁,၃၀၀ အိတ်၊ ဆန်ဆိုင်များတွင် ဆန် ၅,၂၀၀ အိတ်ရှိကြောင်း စာရင်းများအရ သိရသည်။

       ထို့ကြောင့် ညောင်တုန်းမြို့နယ်အတွင်း စုစုပေါင်း စပါး ၂,၁၁၄,၁၀၃ တင်းနှင့် ဆန် ၂၈၈,၆၃၃ အိတ် လက်ကျန်ရှိကြောင်း MyRo မှတ်ပုံတင်လုပ်ငန်းရှင်များ၏ (၃၁-၇-၂၀၂၆) ရက်စွဲဖြင့် ဖြည့်သွင်းထားသည့် စာရင်းများအရ ဖော်ပြထားကြောင်း သိရသည်။

         မြို့နယ်စားသုံးသူရေးရာဦးစီးဌာနအနေဖြင့် MyRo စနစ်တွင် လုပ်ငန်းရှင်များက စာရင်းများကို အချိန်နှင့်တစ်ပြေးညီ မှန်ကန်စွာဖြည့်သွင်းနိုင်ရေး၊ ဆန်နှင့် စပါးလက်ကျန်အခြေအနေများကို စဉ်ဆက်မပြတ် စောင့်ကြည့်နိုင်ရေးနှင့် လစဉ်စာရင်းများကို တိကျမှန်ကန်စွာ ပြုစုတင်ပြနိုင်ရေးအတွက် သက်ဆိုင်ရာလုပ်ငန်းရှင်များအား ကြပ်မတ်လမ်းညွှန် ဆောင်ရွက်လျက်ရှိကြောင်း သိရှိရပါသည်။

DOCA(ဧရာဝတီ)

      အထက်ဌာန၏ ညွှန်ကြားချက်အရ (၄-၈-၂၀၂၆) ရက်နေ့တွင် မအူပင်ခရိုင် စားသုံးသူရေးရာဦးစီးဌာနက အရေးကြီးကုန်စည်နှင့် ဝန်ဆောင်မှုဆိုင်ရာဥပဒေနှင့်အညီ ဆေးဝါးရရှိမှုနှင့် ရောင်းချမှု အခြေအနေများကို ကွင်းဆင်းစစ်ဆေးခဲ့ကြောင်း သိရသည်။

         မအူပင်မြို့နယ်ရှိ လက်ကားဆေးဆိုင်ကြီးများဖြစ်သည့် ဦးကျားဗိုလ်၊ မြမြနှင့် ဒေါ်သိန်းညွှန့် ဆေးဆိုင်များတွင် စစ်ဆေးရာ နှလုံးအားဖြည့်ဆေး Hepalucky နှင့် လေဆေး Air-X တို့မှာ ယခင်က ရောင်းချခဲ့သော်လည်း ကုမ္ပဏီမှ မှာယူမရရှိသဖြင့် (၁) လခန့် ပြတ်လပ်နေကြောင်း သိရသည်။ Hepalucky နှလုံးအားဖြည့်ဆေး၏ ရောင်းဈေးမှာ တစ်ကပ်လျှင် ၆,၂၀၀ ကျပ် ဖြစ်ပြီး Air-X လေဆေးမှာ တစ်ကပ်လျှင် ၂,၆၀၀ ကျပ် ဖြင့် ရောင်းချခဲ့ကြောင်း၊ လက်ရှိတွင် ကုမ္ပဏီမှ ဆေးဝါးအနည်းငယ် ပြန်လည်ရရှိလာသဖြင့် ပြန်လည်ဖြန့်ဖြူးရောင်းချလျက်ရှိကြောင်း စစ်ဆေးသိရှိရသည်။

         ထို့အပြင် ဓနုဖြူမြို့နယ် မြို့မဈေးကြီးအတွင်းရှိ မိဘမေတ္တာ၊ သိန်းကမ္ဘာ၊ ဦးတင်အေး၊ ရွှေတြဂံနှင့် စွမ်းထက် ဆေးဆိုင်များတွင်လည်း ကွင်းဆင်းစစ်ဆေးရာ Hepalucky နှလုံးအားဖြည့်ဆေးမှာ (၂) လခန့် ပြတ်လပ်နေသဖြင့် လက်ရှိရောင်းချနိုင်ခြင်း မရှိကြောင်း၊ Air-X လေဆေးကိုသာ ရောင်းချလျက်ရှိကြောင်း သိရသည်။ Air-X လေဆေးအား ကုမ္ပဏီခွဲမှ တိုက်ရိုက်မရရှိသဖြင့် ရန်ကုန်မြို့မှ ပြင်ပဈေးကွက်အတွင်း တစ်ကပ်လျှင် ၃,၅၀၀ ကျပ် ဖြင့် ဝယ်ယူရရှိပြီး ရောင်းချလျက်ရှိကြောင်း၊ ယခင်ရောင်းဈေးမှာ တစ်ကပ်လျှင်  ၂,၅၀၀ ကျပ် ဖြစ်ကြောင်း စစ်ဆေးသိရှိရသည်။

           ကွင်းဆင်းစစ်ဆေးစဉ် ဆေးဆိုင်များ၏ ဆေးဝါးဝယ်ယူရရှိမှု ဘောင်ချာများ၊ အရောင်းအဝယ်မှတ်တမ်းများနှင့် ဆေးဝါးရရှိမှုအခြေအနေများကို စိစစ်စစ်ဆေးခဲ့ပြီး၊ အရေးကြီးကုန်စည်နှင့် ဝန်ဆောင်မှုဆိုင်ရာ စည်းမျဉ်းစည်းကမ်းများနှင့်အညီ ရောင်းချဆောင်ရွက်ရေး၊ ဈေးနှုန်းများကို ပွင့်လင်းမြင်သာစွာ ဖော်ပြရောင်းချရေးနှင့် ဆေးဝါးရရှိမှုပြတ်လပ်မှုအခြေအနေများကို သက်ဆိုင်ရာဌာနများသို့ အချိန်နှင့်တစ်ပြေးညီ တင်ပြဆောင်ရွက်ရေးတို့ကို လမ်းညွှန်မှာကြားခဲ့ကြောင်း သိရှိရပါသည်။

DOCA(ဧရာဝတီ)