သတင်းနှင့် လှုပ်ရှားမှုများ

  စားသုံးသူရေးရာဦးစီးဌာန ညောင်ဦးခရိုင်တာဝန်ခံနှင့်ဝန်ထမ်းများသည် ကျောင်းကျန်းမာရေး အဖွဲ့နှင့်အတူ ကျောင်းရှိ ကျောင်းသား/ကျောင်းသူများ ကုန်စည်များနှင့်ပတ်သက်၍ လုံခြုံစိတ်ချရမှု ရှိစေရေး၊ ဘေးအန္တရာယ်ကင်းရှင်းစေရေးတို့အတွက် ၅.၁.၂၀၂၆ ရက်နေ့၊ နံနက်(၀၉:၀၀) နာရီအချိန် တွင် ညောင်ဦးမြို့၊ အခြေခံပညာအထက်တန်းကျောင်းမုန့်ဈေးတန်းသို့ ကွင်းဆင်းစစ်ဆေးခဲ့ပါသည်။

          အဆိုပါစစ်ဆေးရာတွင် ကျောင်းမုန့်ဈေးတန်းရောင်းချသူများအား ကုန်အညွှန်းအမှတ်အသား ဖော်ပြခြင်းနှင့်စပ်လျဉ်း၍ ပြည့်စုံမှန်ကန်စွာဖော်ပြထားရှိသော ကုန်စည်များနှင့်သက်ဆိုင်ရာဌာများ၏ ထောက်ခံချက်ပါဝင်သော ကုန်စည်များကိုသာရောင်းချမှုရှိစေရေး၊ ကလေးများအတွက် ဘေးအန္တရာယ် ဖြစ်စေနိုင်သော တရားမဝင်ကုန်စည်နှင့်မုန့်များ၊ သက်တမ်းကုန်ဆုံးသည့်မုန့်များအား ရောင်းချခြင်း မပြုရန် ၊ တိုက်ရိုက်စားသောက်ရသော မုန့်များရောင်းချရာတွင် Mask နှင့် လက်အိတ်များဝတ်ဆင် အသုံးပြုကြရန်နှင့်အစားအသောက်များအား အဖုံးအအုပ်များဖုံးအုပ်ထားရှိရန်၊ တစ်ကိုယ်ရေသန့်ရှင်း ရေး ဂရုစိုက်ဆောင်ရွက်ကြရန်နှင့် စားသုံးသူကာကွယ်ရေးဥပဒေ အခန်း ၁၈ ပါ ကုန်အညွှန်းအမှတ် အသားနှင့်စပ်လျဉ်း၍  အချက်များအား ပြည့်စုံစွာဖော်ပြပါရှိသော ကုန်စည်များနှင့် သက်ဆိုင်ရာဌာန ထောက်ခံချက်ပါသောကုန်စည်များကိုသာ ရောင်းချမှုပြုရန် စသည်ဖြင့်အကျယ်တဝင့် ရှင်းလင်းမှာ ကြား၍ ဈေးကွက်စောင့်ကြည့်စစ်ဆေးခဲ့ကြောင်း သိရှိရသည်။

DOCA(မန္တလေး)

      မြန်မာနိုင်ငံရှိ MSME လုပ်ငန်းများအတွက် နည်းပညာပိုင်းဆိုင်ရာအထောက်အပံ့များသည် လုပ်ငန်းများဖွံ့ဖြိုးတိုးတက်စေရန်နှင့်နိုင်ငံတကာနှင့်ယှဉ်ပြိုင်နိုင်ရန်အတွက် အလွန်အရေးကြီးပြီး ခေတ်ရေစီးကြောင်းနှင့် အညီ ရင်ဘောင်တန်းနိုင်ရန်အတွက် ဒစ်ဂျစ်တယ်နည်းပညာများကို မဖြစ်မနေအသုံးပြုရမည့် အခြေအနေသို့ ရောက်ရှိလာခဲ့ပြီဖြစ်ပါသည်။ ယခင်က MSME လုပ်ငန်းများသည် စက်အဟောင်းများ၊ လက်ဖြင့်ကိရိယာများဖြင့်သာ လုပ်ကိုင်နေရပြီး တီထွင်ဆန်းသစ်မှုနည်းပါးခြင်း၊ အရည်အသွေးအားနည်းခြင်းစသည့် စိန်ခေါ်မှုများနှင့် ရင်ဆိုင် နေရသော်လည်း ယခုအခါနိုင်ငံတော် အစိုးရနှင့် နိုင်ငံတကာမိတ်ဖက်အဖွဲ့အစည်းများပူးပေါင်း၍ MSMEလုပ်ငန်းများအတွက် ခေတ်နှင့် အညီဖွံ့ဖြိုးတိုးတက်လာစေရန် နည်းပညာပိုင်းဆိုင်ရာ စွမ်းဆောင်ရည်ကိုမြှင့်တင်ပေးသော အထောက်အပံ့အစီအစဉ်များအား အရှိန်အဟုန်မြှင့်ဆောင်ရွက်ပေးလျက်ရှိပါသည်။

          MSME ထုတ်ကုန်များကို ပြည်တွင်းသာမကပြည်ပဈေးကွက်သို့ပါ E-Market Platform များပေါ်တွင် တင်ပြီးရောင်းချနိုင်ရန် လိုအပ်သည့်နည်းပညာအကူအညီများပံ့ပိုးပေးခြင်းဖြင့် MSME လုပ်ငန်းများ၏ဈေးကွက် ဝေစုကိုပိုမိုရရှိစေရန် အထောက်အကူပြုပါသည်။ ယခင်အသုံးပြုခဲ့သော စက်အဟောင်းများအစား ခေတ်မီစက်ကိရိယာများအသုံးပြုခြင်းဖြင့် ထုတ်လုပ်မှုစရိတ်လျှော့ချနိုင်ပြီး ကုန်ထုတ်လုပ်မှုအရည်အသွေးပိုမို ကောင်းမွန်လာစေနိုင်ပါသည်။ လုပ်ငန်းများတွင် စီမံခန့်ခွဲမှုစနစ်ပိုမိုကောင်းမွန်စေရန်၊ ဒေတာအခြေပြုဆုံးဖြတ်ချက်များ ချမှတ်နိုင်ရန်အတွက် AI နည်းပညာနှင့်သက်ဆိုင်ရာ Toolsများကို နားလည်အသုံးပြုနိုင်ရန်အတွက်လည်း သင်တန်းများပေးလျက်ရှိပါသည်။

         MSME လုပ်ငန်းများအနေဖြင့် ဝန်ဆောင်မှုအပိုင်းတွင်လည်း အွန်လိုင်းမှတစ်ဆင့် ယုံကြည်စိတ်ချစွာဝယ်ယူနိုင်ရန် အာမခံချက်ပေးနိုင်ခြင်း၊ ကြိုတင်မှာယူနိုင်ခြင်းတို့ကြောင့် ဈေးကွက်ကိုပိုမို ကျယ်ပြန့်စေနိုင်ပါသည်။ အဓိကအားဖြင့်စားသောက်ကုန်လုပ်ငန်းများအတွက် ထုတ်ကုန်အရည်အသွေးမြှင့်တင်ရန် ကမ္ဘာလုံးဆိုင်ရာ စီးပွားရေးလေ့ကျင့်ရေးအစီအစဉ်များကို မြန်မာ့စားသောက်ကုန်လုပ်ငန်းလိုအပ်ချက်များနှင့် အညီပြုပြင်ပေးလျက်ရှိပြီး MSME လုပ်ငန်းများတွင် ရင်းနှီးမြှုပ်နှံမှုအတွက် ဘဏ္ဍာရေးစီမံခန့်ခွဲမှု၊ အုပ်ချုပ်မှုစနစ်နှင့် ပွင့်လင်းမြင်သာမှုရှိသော လုပ်ထုံးလုပ်နည်းများဆိုင်ရာ နည်းပညာနှင့် အသိပညာများကိုလည်း သင်ကြားပို့ချပေးလျက်ရှိပါသည်။

       MSME လုပ်ငန်းရှင်များကလည်း ဒစ်ဂျစ်တယ်နည်းပညာများ သင်ယူအသုံးပြုရန်နှင့် ဆိုက်ဘာလုံခြုံရေးကို အလေးထားရန်လိုအပ်ပြီး MSME ကဏ္ဍအတွက် ဒစ်ဂျစ်တယ်နည်းပညာများကို အသုံးပြုခြင်းဖြင့် ကုန်ထုတ်စွမ်းအားမြင့်မားလာခြင်း၊ ကုန်ကျစရိတ်သက်သာလာခြင်းနှင့် ပြည်ပဈေးကွက်သို့ထိုးဖောက်နိုင်ခြင်းစသည့် အကျိုးကျေးဇူးများရရှိလာကာ မြန်မာ့စီးပွားရေးတည်ငြိမ်မှုနှင့် ရေရှည်ဖွံ့ဖြိုးတိုးတက်မှုအတွက် အထူးလိုအပ်စေကြောင်း သိရှိရပါသည်။

DOCA(ပဲခူး)

    Online စနစ်ဖြင့်ရောင်းချခြင်းလုပ်ငန်းအား ၂၁-၇-၂၀၂၃ ရက်စွဲပါ အမိန့်ကြော်ငြာစာအမှတ် (၅၀/၂၀၂၃) ဖြင့် အရေးကြီးဝန်ဆောင်မှုလုပ်ငန်းအဖြစ် သတ်မှတ်ခဲ့ပါသည်။ ၂၀၂၅ ခုနှစ်၊ ဇန်နဝါရီလ (၁)ရက်နေ့မှစ၍    Online Sale မှတ်ပုံတင်လက်မှတ် လျှောက်ထားလာမှုများအား  မြေပြင်ကွင်းဆင်း စစ်ဆေး၍ လျှောက်ထားသည့်အချက်အလက်များနှင့်  မြေပြင်တွင် အမှန်တကယ် ကိုက်ညီမှုရှိမှသာလျှင် မှတ်ပုံတင်လက်မှတ်ထုတ်ပေးမည်ဖြစ်ရာ စားသုံးသူရေးရာဦးစီးဌာန၊ မန္တလေးတိုင်းဒေသကြီးဦးစီးမှူး ရုံးမှ   စစ်ဆေးရေးအရာရှိ  ဦးမျိုးထွန်းနှင့် ဒေါ်မြင့်မာလာဝင်းတို့သည်    မန္တလေးမြို့ပေါ်ရှိ Online Sale မှတ်ပုံတင်လျှောက်ထားသည့် လုပ်ငန်းများ (၃၉) ခုတို့မှ လျှောက်ထားသည့် ကုန်စည်များဖြစ်သည့် လက်ဝတ်ရတနာပစ္စည်းများ၊ ဖန်စီပစ္စည်း၊ အထည်အလိပ်အဝတ်အထည်နှင့် ဆက်စပ်ပစ္စည်းများ၊ စိုက်ပျိုးရေးလုပ်ငန်းသုံးပစ္စည်းများ၊ ဖက်ရှင်အသုံး အဆောင်ပစ္စည်းများ၊ ကလေးအသုံးအဆောင်ပစ္စည်းများ၊ အီလက်ထရောနစ်ပစ္စည်းများ၊ အခြားသုံးပစ္စည်းများ၊ ပညာရေးနှင့်သင်ကြားရေး ဝန်ဆောင်မှု၊ စာပေနှင့် အနုပညာဝန်ဆောင်မှုလုပ်ငန်း၊ စားသောက်ကုန် ပစ္စည်းများ၊အလှကုန်များနှင့် လူသုံးကုန်များစသည့် လုပ်ငန်းများအား မြေပြင်ကွင်းဆင်းစစ်ဆေးခြင်းများ ဆောင်ရွက်ခဲ့ပါသည်။  Online Sale မှတ်ပုံတင်လျှောက်ထားသည့် လုပ်ငန်းများဖြစ်သည့် လက်ဝတ်ရတနာပစ္စည်းများ၊ ဖန်စီပစ္စည်းများ၊  ကလေးအသုံးအဆောင်ပစ္စည်းများ ၊ အထည်အလိပ် ၊ အဝတ်အထည်နှင့်ဆက်စပ် ပစ္စည်းများ၊ ဖက်ရှင်အသုံးအဆောင်ပစ္စည်းများ ၊ အလှကုန်များ ၊ လူသုံးကုန်များ ၊ လက်မှုပစ္စည်းများ၊ အခြားသုံးပစ္စည်းများ၊ အီလက်ထရောနစ်ပစ္စည်းများ၊ အခြားသုံးပစ္စည်းများ၊ ပညာရေးနှင့်သင်ကြားရေး ဝန်ဆောင်မှု၊စာပေနှင့်အနုပညာဝန်ဆောင်မှုလုပ်ငန်း၊ စားသောက်ကုန်ပစ္စည်းများ၊ FDAမှ အတည်ပြု ထားသည့် ဆေးဝါးဖြည့်စွက်စာများ၊ အခြားဝန်ဆောင်မှုများ၊ စိုက်ပျိုးရေးလုပ်ငန်းသုံးပစ္စည်းများ၊ ယာဉ်အမျိုးမျိုးနှင့့််ဆက်စပ်ပစ္စည်းများ ၊ ကုသရေးသုံးပစ္စည်းများ ရောင်းချသည့် လုပ်ငန်းများအား မြေပြင်စစ်ဆေးခဲ့ပြီး တင်ပြဆောင်ရွက်လျှက်ရှိကြောင်းနှင့် စစ်ဆေးရန် ကျန်ရှိနေသော Online Sale မှတ်ပုံတင်လျှောက်ထားသည့် လုပ်ငန်းများအား ဆက်လက်၍ မြေပြင်စစ်ဆေးသွားမည်ဖြစ်ကြောင်း  သတင်းရရှိပါသည်။

DOCA(မန္တလေး)

   မန္တလေးတိုင်းဒေသကြီး၊ မြင်းခြံခရိုင်စားသုံးသူရေးရာဦးစီးဌာနမှ ဦးဝင်းထွန်းဦး(ဦးစီးမှူး)နှင့် ဝန်ထမ်းများသည် ၂၀၂၆ခုနှစ်၊ ဇန်နဝါရီလ(၉)ရက်၊ နံနက်(၀၉:၀၀)နာရီအချိန်က မြင်းခြံမြို့၊ အမှတ် (၁၆)ရပ်ကွက် အခြေခံပညာမူလတန်းလွန်ကျောင်းသို့ သွားရောက်၍ စားသုံးသူကာကွယ်ရေးဥပဒေ အကြောင်း သိကောင်းစရာများကို အသိပညာပေးဟောပြောပွဲကျင်းပရာ ဆရာ၊ဆရာမ(၂၂)ဦး ကျောင်းသား၊ ကျောင်းသူ(၆၁၉)ဦးခန့် တက်ရောက်သည်။

          အဆိုပါဟောပြောပွဲတွင် ဦးစီးမှူး ဦးဝင်းထွန်းဦးက မြန်မာနိုင်ငံတွင် စားသုံးသူကာကွယ်ရေး ဥပဒေပြဌာန်းထားရှိမှု၊ ကုန်စည်နှင့်ဝန်ဆောင်မှုတို့နှင့်ပတ်သက်၍ စားသုံးသူများ၏ အခွင့်အရေးနှင့် တာဝန်များ၊ စားသုံးသူများထိခိုက်နစ်နာမှုများရှိပါက စားသုံးသူသတင်းပြန်ကြားရေးနှင့်တိုင်ကြားမှု လက်ခံဆောင်ရွက်ရေးစင်တာ(CICC)၊ စားသုံးသူရေးရာဦးစီးဌာနအင်တာနက်စာမျက်နှာများ၊ စားသုံးသူ ရေးရာဦးစီးဌာနFacebookစာမျက်နှာများ၊ DOCA Myanmar Mobile Application နှင့် Call Center ၁၅၃၅သို့ ဖုန်းခေါ်ဆို၍ အလွယ်အကူတိုင်ကြားနိုင်ခွင့်ရှိသည့် အခြေအနေများ၊ အရေးယူမှုနည်းလမ်း များ၊ ကုန်စည်များတွင် ကုန်အညွှန်းအမှတ်အသားဖော်ပြခြင်းနှင့် မြန်မာဘာသာဖြင့် မဖြစ်မနေဖော်ပြ ရမည့် အခြေအနေများကို အသိပညာပေးဟောပြောပြီး လက်ကမ်းစာစောင်များဖြန့်ဝေကြောင်း သိရ သည်။

DOCA(မန္တလေး)

     ၇.၁.၂၀၂၆ ရက်နေ့တွင် မွန်ပြည်နယ်၊ မော်လမြိုင်ခရိုင်၊ ကျိုက်မရောမြို့နယ်တွင် အရန်သင့်အစားအစာအမျိုးမျိုးတို့အား ဈေးကွက်စောင့်ကြည့်စစ်ဆေးခြင်း ဆောင်ရွက်ခဲ့ရာ စားသုံးသူရေးရာဦးစီးဌာန၊ ကျိုက်မရောမြို့နယ်တာဝန်ခံ ဦးစိုးညီညီသည် သက်ဆိုင်ရာ မိတ်ဖက်ဌာနများဖြစ်သော မြို့နယ်အထွေထွေအုပ်ချုပ်ရေးဦးစီးဌာန၊ ပြည်နယ်အစား အသောက်နှင့် ဆေးဝါးကွပ်ကဲရေးဦးစီးဌာန၊ မြို့နယ်ကျန်းမာရေးဦးစီးဌာန၊ မြို့နယ်စည်ပင် သာယာရေးအဖွဲ့တို့နှင့် ပူးပေါင်း၍ ကျိုက်မရောမြို့ရှိ မြို့မစျေးအတွင်းရှိ ရောင်းချနေသော အရန်သင့်အစားအစာအမျိုးမျိုးတို့အား ဈေးကွက်စောင့်ကြည့်စစ်ဆေးခြင်း ဆောင်ရွက် ခဲ့ကြောင်း သိရှိရသည်။

     ထိုသို့ ဈေးကွက်စောင့်ကြည့်စစ်ဆေးရာတွင် ကုန်စုံဆိုင်များတွင် ရောင်းချနေသော  အရန်သင့်အစားအစာအမျိုးမျိုးတို့တွင် စားသုံးသူ ကာကွယ်ရေးဥပဒေ၊ အခန်း(၁၈) ပြဌာန်းချက်အတိုင်း ကုန်အညွှန်းအမှတ်အသားပြည့်စုံစွာဖော်ပြထားခြင်း ရှိ/မရှိ စောင့်ကြည့် စစ်ဆေးခဲ့ရာ အဆိုပါ အရန်သင့်အစားအစာအမျိုးမျိုးတွင် ကုန်အညွှန်းအမှတ်အသား ပြည့်စုံစွာဖော်ပြ ထားသည်ကို စစ်ဆေးတွေ့ရှိကြောင်း သိရှိရပါသည်။

DOCA (မွန်)