သတင်းနှင့် လှုပ်ရှားမှုများ

      ဧရာဝတီတိုင်းဒေသကြီး၊ စားသုံးသူရေးရာဦးစီးဌာန၊ မြောင်းမြခရိုင် လပွတ္တာမြို့နယ်တာဝန်ခံ ဦးမြင့်ဌေးနှင့် ဝန်ထမ်းများသည် မြို့နယ်စည်ပင်သာယာရေးအဖွဲ့နှင့် ပူးပေါင်း၍ (၁၅.၈.၂၀၂၅)ရက်နေ့၊ နံနက်(၁၁:၀၀)နာရီ ကလပွတ္တာမြို့နယ် အမှတ်(၆)ရပ်ကွက်၊ကုန်သည်လမ်းရှိ ကုန်မျိုးစုံဆိုင်များတွင် ရောင်းချနေသော ကုန်မျိုးစုံဆိုင် များတွင်ရောင်းချနေသော သူဌေးမင်း၊  Good ဆီသန့်စားသုံးဆီဘူးများတွင် ကုန်အညွှန်းအမှတ်အသား ဖော်ပြချက် ပြည့်စုံခြင်း ရှိ/မရှိ ကွင်းဆင်းစစ်ဆေးခဲ့ပါသည်။

            ထိုသို့ကွင်းဆင်းစစ်ဆေးဆောင်ရွက်ရာတွင် လပွတ္တာမြို့နယ်တာဝန်ခံမှ အမှတ်(၆)ရပ်ကွက်၊ကုန်သည်လမ်း ရှိ ကုန်မျိုးစုံဆိုင်များတွင် ရောင်းချနေသောGood၊သူဌေးမင်းဆီသန့်စားသုံးဆီဘူးများတွင် ကုန်ညွှန်းအမှတ်အသား ဖော်ပြခြင်း ပြည့်စုံမှုရှိ/မရှိစစ်ဆေးခဲ့ပြီး၊ ကုန်မျိးစုံဆိုင်ပိုင်ရှင်များအား စီးပွားရေးနှင့်ကူးသန်းရောင်းဝယ်ရေးဝန်ကြီးဌာနမှ ထုတ်ပြန်ထားသော စားသုံးသူ ကာကွယ်ရေးဥပဒေ ၂၀၁၉ပါပြဌာန်းချက်များမှ အခန်း(၁၈)ပါ  ကုန်ညွှန်းအမှတ်အသား ဖော်ပြခြင်းနှင့်စပ်လျဉ်း၍ မည်သည့် စီးပွားရေးလုပ်ငန်းရှင်မဆို ပုဒ်မ၄၁ ပုဒ်မခွဲ(ခ)နှင့် (ဆ)တို့ပါ ကုန်ညွှန်းအမှတ်အသား ဖော်ပြရာတွင် မြန်မာဘာသာဖြင့်ဖြစ်စေ၊ မြန်မာဘာသာနှင့် အခြားဘာသာတစ်ခု (သို့) တစ်ခုထက်ပို၍ တွဲလျက်ဖြစ်စေရေးသား ဖော်ပြရမည်ဖြစ်ပြီး၊ စီးပွားရေးလုပ်ငန်းရှင်များအနေဖြင့် ကုန်စည်အမျိုးအစား အလိုက် သတ်မှတ်ထားသည့် ဥပဒေညွှန်ကြား ချက်များအား လိုက်နာဆောင်ရွက်ကြရန် ဈေးကွက်အတွင်းရောင်းချနေသော ကုန်စည်များတွင် ကုန်အညွှန်းအမှတ်အသား ဖော်ပြချက်၊ ပြည့်စုံမှုရှိ/မရှိအားဌာနအနေဖြင့် ဈေးကွက် စောင့်ကြည့် စစ်ဆေး မှုများ စဉ်ဆက်မပြတ်ဆောင်ရွက်သွားမည် ဖြစ်ကြောင်းသိရှိရပါသည်။

( DOCA ဧရာဝတီ)

   ကျောက်ဆည်ခရိုင် စားသုံးသူရေးရာဦးစီးဌာနမှ စစ်ဆေးရေးအရာရှိများသည် ဩဂုတ်လ(၁၄) ရက်နေ့တွင် မြို့နယ်စည်ပင်သာယာရေးအဖွဲ့များနှင့်အတူ ပူးပေါင်း၍ မြစ်သားမြို့နယ်၊ ကူမဲမြို့ရှိ ပြုံးပန်းတစ်ထောင် ဆန်လက်လီ၊လက်ကား ရောင်းချနေသော ဆန်အရောင်းဆိုင်သို့သွား ရောက်၍ ဆန်ဖြန့်ဖြူးရောင်းချမှု အခြေအနေများကို ကွင်းဆင်းစစ်ဆေးခဲ့ပါသည် ။ ထိုသို့ စစ်ဆေးရာတွင် မြစ်သားမြို့နယ်၊ ကူမဲမြို့ရှိ ပြုံးပန်းတစ်ထောင် ဆန်အရောင်းဆိုင်အား စားသုံးသူရေးရာဦးစီးဌာနမှ ဆန်သတ်မှတ်ရည်ညွှန်းဈေးများအား လစဉ်ထုတ်ပြန်ပေးလျက်ရှိကြောင်း၊ ဩဂုတ်လအတွင်း သတ်မှတ်ထားသည့် ရည်ညွှန်းဈေးနှုန်းထက် ဈေးနှုန်းမြှင့်တင်ရောင်းချဖြန့်ဖြူးခြင်း၊ ဈေးကစားရန် ရည်ရွယ်ချက်ဖြင့် ဆန်များကို သိုလှောင်ခြင်း မပြုရန်နှင့် သက်ဆိုင်ရာဌာနတို့၏ လမ်းညွှန်ချက်များ ကို လိုက်နာဆောင်ရွက်ရန် လိုအပ်ကြောင်း ၊ ဆန်တန်ချိန် (၂၅)တန်အထက် သိုလှောင်ပါက မြန်မာ့ ဆန်စပါး အွန်လိုင်း (Myanmar Rice Online) တွင် မဖြစ်မနေမှတ်ပုံတင် ရမည်ဖြစ်ကြောင်း ဆွေးနွေးပြောကြားခဲ့သည်ဟု သတင်းရရှိပါသည်။

DOCA(မန္တလေး)

   ကျောက်ဆည်ခရိုင်၊ စားသုံးသူရေးရာဦးစီးဌာနသည် စားသုံးသူများ ဘေးအန္တရာယ် ကင်းရှင်း စေရေး၊ ထုတ်ကုန်များလုံခြုံစိတ်ချရမှုရှိစေရေးအတွက် စားသုံးသူကာကွယ်ရေး အသိပညာပေး ဟောပြောဆွေးနွေးပွဲများကျင်းပခြင်းနှင့် စျေးကွက်စောင့်ကြည့်စစ်ဆေးခြင်းလုပ်ငန်းတို့ကို စဉ်ဆက် မပြတ်ဆောင်ရွက်လျှက်ရှိရာ ဩဂုတ်လ(၁၄)ရက်နေ့တွင် ကျောက်ဆည်မြို့နယ်၊ မင်းစုကျေးရွာ၌ စားသုံးသူကာကွယ်ရေးအသိပညာပေး ဟောပြောဆွေးနွေးပွဲ ကျင်းပြုလုပ်ခဲ့ပါသည် ။ ကျောက်ဆည် ခရိုင် စားသုံးသူရေးရာဦးစီးဌာန မှ ဦး‌ဇော်မင်းလတ် (ဒု-ခရိုင်ဦးစီးမှူး)က တက်ရောက်လာသည့် ကျေးရွာသူ၊ ကျေးရွာသားများအား စားသုံးသူကာကွယ်ရေး ဥပဒေ၏ရည်ရွယ်ချက်များအား ရှင်းလင်းပြောကြားခဲ့ပြီး၊ ကျောက်ဆည်မြို့နယ်၊ မြို့နယ်တာဝန်ခံ ဦးစိုးမင်းထွန်းက စားသုံးသူ ကာကွယ်ရေးဥပဒေပါ အချက်အလက်များဖြစ်သည့် စားသုံးသူများ၏ အခွင့်အရေးနှင့်တာဝန်များ ၊ စီးပွားရေးလုပ်ငန်းရှင်များ လိုက်နာရမည့်တာဝန်များ၊ ကုန်စည်ဝန်ဆောင်မှုနှင့်စပ်လျဉ်း၍ အာမခံ ပေးထားမှုအပေါ် စားသုံးသူကတောင်းဆိုနိုင်သည့် အခွင့်အရေး များနှင့်စားသုံးသူများနစ်နာဆုံးရှုံးမှု များဖြစ်ပေါ်ပါက တိုင်းဒေသကြီး / ပြည်နယ်များရှိ Consumer Information & Complaint Center (CICC)များ နှင့် Consumer Call Center ဖြစ်သည့်(1535)သို့ ခေါ်ဆိုတိုင်ကြားနိုင်သည့်အပြင် စားသုံးသူရေးရာဦးစီးဌာန၏ Website ဖြစ်သော www.doca.gov.mm ထဲသို့ဝင်‌ရောက်ပြီး တိုင်ကြား နိုင်ပါကြောင်းဆွေးနွေးပြောကြားခဲ့ပါသည်။ အသိပညာပေးဟောပြော ဆွေးနွေးပွဲသို့ ကျေးရွာသူ၊ ကျေးရွာသားများ စုစုပေါင်း(၂၀၀)ဦး တက်ရောက်ခဲ့ကြပြီး တက်‌ရောက် လာသော ကျေးရွာသူ၊ ကျေးရွာသားများအား စားသုံးသူအသိပညာပေး လက်ကမ်းစာစောင်များ ဖြန့်ဝေပေးခဲ့ကြောင်းသိရှိရ ပါသည်။

DOCA(မန္တလေး)

       ရန်ကုန်တိုင်းဒေသကြီး၊ တွံတေးခရိုင်၊ ကော့မှူးမြို့နယ်တွင် ၂၀၂၅-၂၀၂၆ခုနှစ် မိုးစပါးစိုက် တောင်သူများအား ဓာတ်မြေဩဇာဖြန့်ဖြူးရောင်းချရေးကော်မတီလုပ်ငန်းညှိနှိုင်း အစည်းအဝေးအား ဩဂုတ်လ(၁၆)ရက်နေ့၊ နံနက်(၁၀:၀၀)နာရီအချိန်တွင် ကော့မှူးမြို့နယ် အထွေထွေအုပ် ချုပ်ရေးဦးစီးဌာန မြို့နယ်အုပ်ချုပ်ရေးမှူးရုံးခန်းမ၌ ကျင်းပပြုလုပ်ခဲ့ကြောင်း သိရသည်။

        အဆိုပါ လုပ်ငန်းညှိနှိုင်း အစည်းအဝေးတွင် ကော့မှူးမြို့နယ် စီမံခန့်ခွဲရေးနှင့် အုပ်ချုပ်ရေး ကော်မတီဥက္ကဌ ဦးမျိုးမင်းက ကော့မှူးမြို့နယ်တွင် ၂၀၂၅-၂၀၂၆ ခုနှစ် မိုးစပါးအတွက် ရပ်ကွက်/ ကျေးရွာအုပ်စုများရှိ မိုးစပါးစိုက်တောင်သူများအား မြို့နယ်အဆင့် ဓာတ်မြေဩဇာ ဖြန့်ဖြူးရောင်းချရေးကော်မတီကို ဖွဲ့စည်းတာဝန်ပေးအပ်ခဲ့ပြီးဖြစ်ရာ ကော်မတီအနေဖြင့် မြို့နယ်အတွင်း ရပ်ကွက်/ ကျေးရွာအုပ်စုများအလိုက် ဓာတ်မြေဩဇာလိုအပ်ချက်စာရင်းနှင့် မြို့နယ်အတွင်းရှိ ဓာတ်မြေဩဇာအရောင်းဆိုင် စာရင်းကောက်ယူမှုအခြေအနေများ ရန်ကုန်ဆိပ်ကမ်းမှ မြို့နယ်အရောက်သယ်ယူပို့ဆောင်ရေးတွင် ကြီးကြပ်ဆောင်ရွက်ပေးခြင်း၊ ရောက်ရှိလာသော ဓာတ်မြေဩဇာအိတ်များအား လေလွင့်ပျက်စီးဆုံးရှုံးမှုများမရှိအောင် သိုလှောင်ထိန်းသိမ်းနိုင်ရေး လိုအပ်သည့်ကိစ္စရပ်များ ပေါင်းစပ်ညှိနှိုင်းဆောင်ရွက်နိုင်ရေး၊ တောင်သူများအား ဈေးနှုန်းသက်သာစွာဖြင့် ဝယ်ယူနိုင်ကြောင်း အသိပေးကြော်ငြာခြင်း၊ အမှန်တကယ်အသုံးပြုမည့် တောင်သူများသို့ ဓာတ်မြေဩဇာများ ဖြန့်ဖြူးရောင်းချရာတွင် အလွဲသုံးစားမှုများမရှိစေရေး၊ မြို့နယ်အရောင်းဆိုင်များ၏ ဓာတ်မြေဩဇာရောင်းချနေမှု စာရင်းအားစစ်ဆေး၍ စာရင်းပြုစုတင်ပြခြင်းများ ဆောင်ရွက်နိုင်ရေးစသည့် မြို့နယ်ဓာတ်မြေဩဇာဖြန့်ဖြူးရောင်းချရေးကော်မတီလုပ်ငန်းတာဝန်များအား အသေးစိတ်ဆွေးနွေး ပြောကြားခဲ့ပြီး တက်ရောက်လာသော မြို့နယ်အဆင့်ဌာနဆိုင်ရာ တာဝန်ရှိသူများမှ သိရှိလိုသည့် အချက်များအား ပြန်လည်ဖြေရှင်း ပြောကြားပေးခဲ့ကြောင်း သိရှိရပါသည်။

DOCA(ရန်ကုန်)

  ကျောက်ဆည်ခရိုင်၊ စားသုံးသူရေးရာဦးစီးဌာနသည် စားသုံးသူများ ဘေးအန္တရာယ် ကင်းရှင်းစေရေး၊ထုတ်ကုန်များလုံခြုံစိတ်ချရမှုရှိစေရေးအတွက် စျေးကွက်စောင့်ကြည့်စစ်ဆေးခြင်းလုပ်ငန်း များအား စဉ်ဆက်မပြတ်ဆောင်ရွက်လျှက်ရှိရာ သြဂုတ်လ (၁၄)ရက်နေ့တွင် မြို့နယ်ပြည်သူ့ ကျန်းမာရေးဦးစီးဌာန၊မြို့နယ်စည်ပင်သာယာရေးအဖွဲ့တို့နှင့် ပူးပေါင်းပြီး မြစ်သားမြို့ ၊ ကူမဲမြို့၊ မြို့မ စျေးအတွင်းရှိ ငရုတ်သီးမှုန့်၊ အရောင်တင်မှုန့်၊ နနွင်းမှုန့်အရောင်းဆိုင် နှင့် မျှစ်ရောင်းချသည့်ဆိုင် များသို့သွားရောက်၍ စျေးကွက်စောင့်ကြည့်စစ်ဆေးခဲ့ပါသည် ။  ထိုသို့စစ်ဆေးရာတွင် စစ်ဆေးရေး အရာရှိများက ငရုတ်သီးမှုန့်၊ အရောင်တင်မှုန့်၊ နနွင်းမှုန့်နှင့်မျှစ်ဆိုင်များ အနေဖြင့် မိမိတို့ရောင်းချသော ကုန်ပစ္စည်းများတွင် စားသုံးရန်မသင့်သည့် ဆိုးဆေးများပါဝင်သော ကုန်ပစ္စည်းများအားရောင်းချခြင်း မပြုရန်နှင့် ၄င်းဆိုးဆေး များပါသည့် အစားအစာများမှ စားသုံးသူပြည်သူများအား ဘေးအန္တရာယ် ဖြစ်စေနိုင်ပြီး နောက်ဆုံးကင်ဆာရောဂါအထိ ဖြစ်ပွားနိုင်ပါကြောင်း၊ ငရုတ်သီးမှုန့်ရောင်းချသည့် ဆိုင်များအနေဖြင့် မှိုများပါဝင်သည့် ငရုတ်သီးများအား ကြိတ်ခွဲရောင်းချခြင်းမပြုရန်နှင့် သန့်ရှင်း လတ်ဆက်သော ငရုတ်သီးများအားအသုံးပြုပြီး ရောင်းချရန်လိုအပ်ကြောင်း၊ ယခုအချိန်သည် မိုးတွင်း ကာလ ဖြစ်သောကြောင့် ငရုတ်သီးမှုန့်များတွင် အသည်းကိုထိခိုက်စေနိုင်သော အာဖလာတော့ဆင် မှိုပေါက်ဖွားနှုန်းများပြားသောကြောင့် ငရုတ်သီးမှုန့်များ ရောင်းချရာတွင် အထူးဂရုပြုရောင်းချရန် လိုအပ်ကြောင်း စသည့်အချက်များအား ရှင်းလင်းပြောကြားခဲ့ကြောင်း သတင်းရရှိပါသည်။

DOCA(မန္တလေး)