သတင်းနှင့် လှုပ်ရှားမှုများ

        ၂၅.၇.၂၀၂၄ ရက်နေ့တွင် စားသုံးသူရေးရာဦးစီးဌာန၊ မွန်ပြည်နယ်၊ သထုံခရိုင်၊ ပေါင်မြို့နယ်တာဝန်ခံသည် မြို့နယ်ပြန်ကြားရေးနှင့်ပြည်သူ့ဆက်ဆံရေးဦးစီးဌာနနှင့်ပူးပေါင်း၍ အွန်လိုင်းစနစ်ဖြင့် ရောင်းချခြင်းလုပ်ငန်းမှတ်ပုံတင်ခြင်းဆိုင်ရာ အသိပညာပေး Talk Show ဆွေးနွေးပွဲ ကျင်းပပြုလုပ်ခဲ့ကြောင်း သိရှိရပါသည်။

       အဆိုပါဆွေးနွေးပွဲတွင် ပေါင်မြို့နယ်ပြန်ကြားရေးနှင့်ပြည်သူ့ဆက်ဆံရေးဦးစီးဌာနမှ ဦးစီးအရာရှိ ဒေါ်သဉ္ဇာစိုးမှ “Talk Show” ကျင်းပပြုလုပ်ရခြင်း၏ ရည်ရွယ်ချက်အား ရှင်းလင်းပြောကြားခဲ့ပြီး စားသုံးသူရေးရာဦးစီးဌာန၊ ပေါင်မြို့နယ်တာဝန်ခံ ဦးအောင်မျိုးဦးက စားသုံးသူရေးရာဦးစီးဌာန၏ လုပ်ငန်းဆောင်ရွက်မှုများ၊ အွန်လိုင်းစနစ်ဖြင့် ရောင်းချခြင်း လုပ်ငန်းကို အရေးကြီးကုန်စည်နှင့်ဝန်ဆောင်မှုလုပ်ငန်းအဖြစ် အမိန့်ကြော်ငြာစာအမှတ် (၅၀/၂၀၂၃) ကို ၂၀၂၃ခုနှစ်၊ ဇူလိုင်လ ၂၁ရက်နေ့တွင် ထုတ်ပြန်ခဲ့ကြောင်း၊ အွန်လိုင်းစနစ်ဖြင့် ရောင်းချသည့် စီးပွားရေးလုပ်ငန်းရှင်တိုင်း မှတ်ပုံတင်လျှောက်ထားပြီးမှသာ ရောင်းချရမည် ဖြစ်ကြောင်း၊ အမိန့်ကြော်ငြာစာထုတ်ပြန်ပြီး (၆) လပြည့်သည့် နေ့ရက်မှစတင်၍ မှတ်ပုံတင်မရှိဘဲ ရောင်းချသည့် အွန်လိုင်းရောင်းချသူများကို အရေးကြီးကုန်စည်နှင့် ဝန်ဆောင်မှုဥပဒေပုဒ်မ (၅)ဖြင့် အရေးယူသွားမည်ဖြစ်ကြောင်း၊ အွန်လိုင်းစနစ်ဖြင့်ရောင်းချခြင်း (Online Sales) လုပ်ငန်းများမှတ်ပုံတင်ခြင်းအတွက် အင်တာနက်ရရှိသည့် မည်သည့် နေရာတွင်မဆို အွန်လိုင်းမှ လျှောက်ထားထုတ်ယူနိုင်သော eComReg System ကို ၂၀၂၃ခုနှစ်၊ အောက်တိုဘာလ (၂)ရက်နေ့တွင် စတင်၍အသုံးပြုခဲ့ကြောင်း၊ မှတ်ပုံတင်ရာတွင် ပူးတွဲ တင်ပြရမည့်အချက်များ၊ မှတ်ပုံတင်မည့်သူများသိရှိလိုက်နာရမည့် စည်းကမ်းချက်များ အကြောင်းကို ရှင်းလင်းဆွေးနွေးခဲ့ကြောင်း သိရှိရပါသည်။

DOCA(မွန်)

       လှိုင်သာယာ(အရှေ့ပိုင်း)မြို့နယ်၊ ကျန်းမာရေးဦးစီးဌာန၏ ဖိတ်ကြားချက်အရ  ၂၅-၇-၂၀၂၄ ရက်နေ့၊ နံနက်(၀၉:၃၀)နာရီအချိန်၌ မြို့နယ်ကျန်းမာရေးခန်းမတွင် ဝမ်းပျက်/ဝမ်းလျှောရောဂါနှင့်ပတ်သက်ပြီး ဟောပြောဆွေးနွေးပွဲသို့ တက်ရောက်ခဲ့ပါသည်။

        အဆိုပါဆွေးနွေးပွဲသို့ ဌာနဆိုင်ရာပူးပေါင်းအဖွဲ့များတက်ရောက်ခဲ့ရာ မြို့နယ်ကျန်းမာရေးဦးစီးဌာနမှ  ဒေါက်တာကြူကြူသင်းက ယခုကာလသည် မိုးတွင်းကာလဖြစ်သည့်အတွက် ယခုရက်ပိုင်းတွင် ပြင်းထန်ဝမ်းပျက်/ဝမ်းလျှောရောဂါများဖြစ်ပွားနေပါသည်။ ထိုသို့ ဝမ်းပျက်/ ဝမ်းလျောရောဂါဖြစ်ပွားရခြင်းမှာ အဓိကအားဖြင့် မသန့်ရှင်းသောရေနှင့် အစားအသောက်များအား စားသုံးမိခြင်းမှ ဖြစ်ပေါ်လာသောရောဂါဖြစ်ပြီး ၎င်းဖြစ်ပွားမှုကို မပြန့်ပွားအောင် တားဆီးကာကွယ်ရန် အစားအသောက်ချက်ပြုတ်ရာတွင် အသုံးပြုမည့်သောက်သုံးရေတွင် ကလိုရင်း/ရေသန့်ဆေးပြားများထည့်သွင်း၍အသုံးပြုမှသာ ကျန်းမာရေးနှင့်ညီညွတ်သော အစားအစာများရရှိမည်ဖြစ်ကြောင်း အသိပညာပေးဆွေးနွေးခဲ့ကြောင်းသိရှိရပါသည်။

DOCA(ရန်ကုန်)

       လှိုင်သာယာ(အရှေ့ပိုင်း)မြို့နယ်အတွင်းရှိ စားသောက်ဆိုင်များသို့ ၂၅-၇-၂၀၂၄ ရက်နေ့၊ နံနက်(၁၀:၄၀)နာရီအချိန်တွင် ဝမ်းပျက်/ဝမ်းလျှောရောဂါနှင့်ပတ်သက်ပြီး ကွင်းဆင်းစစ်ဆေးခြင်း လုပ်ငန်းများဆောင်ရွက်ခဲ့ပါသည်။

        ထိုသို့ဆောင်ရွက်ခဲ့ရာတွင် မြို့နယ်ကျန်းမာရေးဦးစီးဌာနဦးဆောင်၍ ပူးပေါင်းအဖွဲ့များဖြင့်  အမှတ်(၃/အေ)၊ ဖွံ့ဖြိုးအောင်လမ်း၊ (၆)ရပ်ကွက်ရှိ ရေနံမြေအောင်မြင့်စားဖွယ်စုံနှင့် အမှတ် (၁၆၅)၊ (A/F)၊ မန္တလေးလမ်းနှင့် ကျန်စစ်သားလမ်းထောင့် (၈)ရပ်ကွက်ရှိ ရွှေကျွန်းမြေစားဖွယ်စုံများသို့ သွားရောက်စစ်ဆေးခဲ့ရာ ဆိုင်တာဝန်ခံများက ချက်ပြုတ်ရာတွင် အသုံးပြုသော သား၊ ငါးများ၊ ဟင်းသီးဟင်းရွက်များကို ကားများဖြင့် လာရောက်ရောင်းချပေးကြောင်း၊ သုံးစွဲသည့်ရေများမှာလည်း ရေသန့်များကိုအသုံးပြုချက်ပြုတ်ကြောင်း၊ ဆေးကြောရာတွင် အဝီစိတွင်းရေ ကိုသာသုံးကြောင်း၊ တစ်နေ့စာတစ်နေ့သာ ချက်ပြုတ်ကြောင်း၊ မီးဖိုချောင်သန့်ရှင်းရေး၊ သန့်စင်ခန်းသန့်ရှင်းရေးများကိုလည်း နေ့စဉ်ပြုလုပ်ကြောင်း၊ လက်ဆေးနေရာများတွင်လည်း ဆပ်ပြာများချထားပေးကြောင်း ဝန်ထမ်းများ၏ တစ်ကိုယ်ရေးသန့်ရှင်းရေး အလေးထားဆောင်ရွက်ကြောင်း ကွင်းဆင်းစစ်ဆေးမေးမြန်းချက်များအရသိရှိရပါသည်။

DOCA(ရန်ကုန်)

     ရန်ကုန်တိုင်းဒေသကြီး၊ မှော်ဘီခရိုင်၊ မှော်ဘီမြို့နယ်၊ အမှတ်(၄) လမ်းဆုံစစ်ဆေးရေးဂိတ်၌ (၂၄-၇-၂၀၂၄)ရက်နေ့၊ နေ့လယ်(၁၃:၀၀)နာရီအချိန်တွင် တရားမဝင်ကုန်စည်များတင်ဆောင် လာခြင်းရှိ/မရှိ မော်တော်ယာဉ် (၃၄)စီးအား စစ်ဆေးဆောင်ရွက်ခဲ့ပါသည်။

      အဆိုပါ အမှတ်(၄) လမ်းဆုံစစ်ဆေးရေးဂိတ်တွင် တရားမဝင်ကုန်သွယ်မှုတိုက်ဖျက်ရေးအထူးအဖွဲ့၏ လမ်းညွှန်ချက်အရ တရားမဝင်ကုန်သွယ်မှုတိုက်ဖျက်ရေးအထူးအဖွဲ့ခေါင်းဆောင် ဒုရဲမှူးကြီး ငွေတင်ဦးဆောင်၍ အမှတ်(၄) လမ်းဆုံစစ်ဆေးရေးဂိတ် ဗိုလ်မှူးဇော်ဇော်အောင်၊ အမှတ်(၆၄)ယာဉ်ထိန်းတပ်ဖွဲ့ရုံး၊ တပ်ကြပ်ကြီးအောင်ကိုလဒ်၊ မြို့နယ်စားသုံးသူရေးရာဦးစီးဌာန၊ မြို့နယ်လူဝင်မှုကြီးကြပ်ရေးဦးစီးဌာန၊ မြို့နယ်ပြည်တွင်းအခွန်များဦးစီးဌာန၊ မြို့နယ်သစ်တောဦးစီးဌာနမှ တာဝန်ရှိသူများပါဝင်သော ပူးပေါင်းအဖွဲ့သည် မြို့နယ်အတွင်းသို့ ကုန်ပစ္စည်းဝင်ရောက်ရာ၌ တရားမဝင်ကုန်စည်များ၏အန္တရာယ်နှင့် တရားမဝင်ကုန်သွယ်မှုကြောင့် ဒေသတွင်းထိခိုက်မှုမရှိစေရေးတို့အတွက်ရည်ရွယ်၍ စစ်ဆေးဆောင်ရွက်ခဲ့ခြင်းဖြစ်ကြောင်းသိရှိရပါသည်။

DOCA(ရန်ကုန်)

       ရန်ကုန်တိုင်းဒေသကြီး၊ တွံတေးခရိုင်၊ ကော့မှူးမြို့နယ်၊ မကျီးကန်ရပ်ကွက် အခြေခံပညာမူလတန်းကျောင်း၌ စားသုံးသူကာကွယ်ရေးအသိပညာပေးဟောပြောပွဲကို ၂၀၂၄ခုနှစ်၊ ဇူလိုင်လ (၂၂) ရက်နေ့၊ နံနက် (၁၀း၀၀) နာရီအချိန်တွင် ကျင်းပခဲ့ကြောင်းသိရသည်။

        အဆိုပါ စားသုံးသူကာကွယ်ရေးအသိပညာပေးဟောပြောခဲ့ရာတွင် ကော့မှူးမြို့နယ်တာဝန်ခံ ဦးတင်မင်းက စားသုံးသူပြည်သူများဘေးအန္တရာယ်ကင်းရှင်းစေရေး၊ ထုတ်ကုန်လုံခြုံစိတ်ချရမှုရှိစေရေးတို့အတွက် စားသုံးသူကာကွယ်ရေးဥပဒေပါ စားသုံးသူအခွင့်အရေးဖြစ်သော စားသုံးသူ၏အခြေခံလိုအပ်ချက်များပြည့်စုံစေနိုင်မှု၊ လုံခြုံစိတ်ချစွာ ဘေးအန္တရာယ်ကင်းရှင်းစေနိုင်မှု၊ သတင်းအချက်အလက်ပြည့်စုံစွာရရှိစေနိုင်မှု၊  လွတ်လပ်စွာရွေးချယ်နိုင်စေမှု၊ နစ်နာဆုံးရှုံးမှုများအတွက် ပြောဆိုတင်ပြကြားနာနိုင်စေမှု၊ ထိခိုက်နစ်နာမှုများအတွက် လျော်ကြေးရရှိစေမှု၊ စားသုံးသူရေးရာကိစ္စရပ်များနှင့်ပတ်သက်၍ သင်ယူလေ့လာနိုင်စေမှု၊ ကောင်းမွန်ရှင်သန်နိုင်စေသော ပတ်ဝန်းကျင်ကိုရရှိနိုင်စေမှု စသည့် စားသုံးသူပြည်သူများ၏အခွင့်အရေးဆိုင်ရာအချက်များနှင့် စားသုံးသူ၏တာဝန်များ၊ စားသုံးသူများအနေဖြင့် ကုန်ပစ္စည်းများနှင့်ဝန်ဆောင်မှုများဝယ်ယူခြင်းမပြုမီ သတိပြုဆောင်ရွက်ရမည့်အချက်များအား အကျယ်တဝင့်ရှင်းလင်းဆွေးနွေးဟောပြောခဲ့ကြားခဲ့ပြီး ယခုအချိန် လတ်တလောကာလတွင် ဖြစ်ပေါ်လာသောဝမ်းပျက်ဝမ်းလျောရောဂါနှင့်ပတ်သက်ပြီး လိုက်နာဆောင်ရွက်ရမည့်အချက်များဖြစ်သော လက်ကိုဆပ်ပြာဖြင့် မကြာခဏဆေးပါ၊ တစ်ကိုယ်ရေးသန့်ရှင်းမှုပြုလုပ်ပါ၊ ရေကိုကြိုချက်သောက်ပါ၊ အခုရက်အတွင်း အပြင်အစားအစားအသောက်များကို တတ်နိုင်သမျှရှောင်ပါ၊ အသီးအရွက်များကို သေချာစွာဆေးကြောပါ၊ ပူပူနွေးနွေးစားပါ၊ ယင်နာစာများမစားပါနှင့် ဆန်ဆေးရေကဲ့သို့သော ဝမ်းများသွားပါက နီးစပ်ရာကျန်းမာရေးဌာနသို့ပြသ၍ ချက်ချင်းကုသမှုခံယူပါဟု ကျန်းမာရေးဆိုင်ရာ သိသင့်သိထိုက်သည့်အကြောင်းအရာများအား ဆွေးနွေးပြောကြားခဲ့ပြီး စားသုံးသူကာကွယ်ရေးအသိပညာပေးဟောပြောပွဲကျင်းပခဲ့ကြောင်းသိရှိရပါသည်။

DOCA(ရန်ကုန်)