သတင်းနှင့် လှုပ်ရှားမှုများ

      ဧရာဝတီတိုင်းဒေသကြီး၊ မအူပင်ခရိုင်၊ မအူပင်မြို့နယ်၊စားသုံးသူရေးရာဦးစီးဌာနမြို့နယ်ဦးစီးမှူး၊ ဦးအောင်ဇော်ဦးနှင့်ဝန်ထမ်းများသည် ရေလဲကလေးရွာရှိ သီရိရတနာဈေးမှကုန်မျိုးစုံရောင်းချသူ လုပ်ငန်းရှင်(၉)ဦးအား  (၂၀.၂.၂၀၂၃) ရက်နေ့ နံနက် (၁၀:၀၀) နာရီအချိန်တွင် ရေလဲကလေးကျေးရွာ အုပ်ချုပ်ရေးမှူးရုံး၌ လုပ်ငန်းရှင်များအား စားသုံးသူကာကွယ်ရေးအသိပညာပေးဟောပြောခဲ့ကြပါသည်။

          အဆိုပါဟောပြောပွဲတွင် မြို့နယ်ဦးစီးမှူးက၊ စားသုံးသူကာကွယ်ရေး အသိပညာပေးရခြင်း၏ ရည်ရွယ်ချက်ကိုရှင်းလင်းပြောကြားခဲ့ပြီးနောက် စားသုံးသူကာကွယ်ရေးဥပဒေပါ အခန်း(၁)အရ စီးပွားရေးလုပ်ငန်းရှင်ဆိုသည်မှာ ကုန်စည်ကိုထုတ်လုပ်ခြင်း၊ ဖြန့်ဖြူးခြင်း၊သိုလှောင်ခြင်း၊ ရောင်းချခြင်း၊ ပြုပြင်ထုတ်လုပ်ခြင်း၊ ပြည်ပသို့တင်ပို့ခြင်း၊ ပြည်တွင်းသို့တင်သွင်းခြင်း၊ ပြန်လည်ရောင်းချခြင်းကိုဖြစ်စေ၊ ထောက်ပံ့ပေးခြင်းကိုဖြစ်စေ၊ ဝန်ဆောင်မှုပေးခြင်းကိုဖြစ်စေ၊ ကြော်ငြာလုပ်ငန်းလုပ်ကိုင်ခြင်းကိုဖြစ်စေတစ်ဦးချင်းသော်လည်းကောင်း၊ အဖွဲ့အစည်းနှင့်သော်လည်းကောင်း/ ဆောင်ရွက်သူကိုဆိုလိုကြောင်း၊ စီးပွားရေးလုပ်ငန်းရှင်သည် မိမိရောင်းချသောကုန်စည်သို့မဟုတ် ဝန်ဆောင်မှုစပ်လျဉ်း၍ အာမခံချက်ပေးရမည့် (၇)ချက် ဖြစ်သည့် စားသုံးသူလက်ခံသုံးစွဲနိုင်သောအရည်အသွေးရှိခြင်း၊ ကုန်စည်၏အရည်အသွေး၊ အချိန်အတွယ်ပမာဏနှင့်အလေးချိန်မှန်ကန်မှုရှိခြင်း၊ ဘေးအန္တရာယ်ကင်းရှင်းစေခြင်း၊ သုံးစွဲသူလိုအပ်ချက်အတွက်သင့်လျော်မှုရှိခြင်း၊ နမူနာပစ္စည်းတွင်ဖော်ပြလိုသည့်အတိုင်းတူညီစွာပါရှိခြင်း၊ အာမခံချက်ပေးထားသည့်ကာလ သို့မဟုတ် အသုံးပြုနိုင်မည့်ကာလအတွင်း အပိုပစ္စည်းရရှိနိုင်ခြင်း၊ ပြန်လည်ပြုပြင်နိုင်ခြင်း သို့မဟုတ် လဲလှယ်နိုင်ခြင်း၊ ကုန်အညွှန်းအမှတ်အသားပါအချက်အလက်၊ ကြော်ငြာကမ်းလှမ်းချက် သို့မဟုတ် အရောင်းမြှင့်တင်ခြင်းတွင်ပါဝင်သော ဖော်ပြချက်နှင့်ကိုက်ညီမှုရှိခြင်းတို့ကို အပြည့်အဝအာမခံနိုင်ရမည်ဖြစ်ကြောင်း၊ အဆိုပါ ကုန်စည်နှင့်စပ်လျည်း၍ အာမခံထားမှုအပေါ် စားသုံးသူကအခွင့်အရေး တောင်းဆိုပိုင်ခွင့်ရှိပါကြောင်းနှင့်စားသုံးသူသည် နစ်နာဆုံးရှုံးမှုရှိလာပါကစားသုံးသူရေးရာ ဦးစီးဌာနသို့ တိုင်ကြားနိုင်ပါကြောင်းတို့ကို တိုင်ကြားလာသည့်ဖြစ်စဉ်များ၊ ဖြေရှင်းဆောင်ရွက်ပေးခဲ့ရသည့် ဖြစ်စဉ်များဖြင့် ဥပမာပေး၍ အကျယ်တဝင့်ရှင်းလင်း ဆွေးနွေးအသိပညာ ပေးခဲ့ကြောင်းသိရပါသည်။

DOCA(ဧရာဝတီ)

 ဧရာဝတီတိုင်းဒေသကြီး၊ စားသုံးသူရေးရာဦးစီးဌာန၊ မြန်အောင်ခရိုင်၊ ကြံခင်းမြို့၊ မြို့နယ်တာဝန်ခံဦးကျော်နိုင်ဝင်းသည် ၂၀၂၃ခုနှစ်၊ ဖေဖော်ဝါရီလ (၂၁)ရက်နေ့ နံနက် (၀၉:၀၀) နာရီအချိန်တွင် အထွေထွေအုပ်ချုပ်ရေးဦးစီးဌာန၊ စည်ပင်သာယာရေးဦးစီးဌာန၊ ရဲတပ်ဖွဲ့တို့နှင့်ပူးပေါင်း၍  ရွာသစ်ရပ်ကွက်ရှိ စတိုးဆိုင်နှင့် ကုန်မျိုးစုံအရောင်းဆိုင်များအား ဈေးကွက်စောင့်ကြည့်စစ်ဆေးခြင်းများ ဆောင်ရွက်ခဲ့ပါသည်။

   ထိုသို့စစ်ဆေးခဲ့ရာတွင်  မြို့နယ်တာဝန်ခံက ဈေးကွက်အတွင်းရောင်းချနေသော ကုန်စည်များအား စားသုံးသူများ ဘေးအန္တရာယ်ကင်းရှင်းစေရေးအတွက် ကုန်စည်များပေါ်တွင် ကုန်အညွှန်းအမှတ်အသား ပြည့်စုံမှု ရှိ/မရှိတို့ကိုစစ်ဆေးခဲ့ပြီး၊ တားမြစ်ကုန်စည်များတင်သွင်း ရောင်းချခြင်း မပြုရန်၊ စီးပွားရေးလုပ်ငန်းရှင်များအနေဖြင့် ထုတ်ပြန်ထားသော ညွှန်ကြားချက်များအတိုင်း လိုက်နာဆောင်ရွက်ရန်၊  ကုန်စည်နှင့်စပ်လျဉ်း၍ အာမခံချက်ပေးရာတွင် စားသုံးသူများ စိတ်ကျေနပ်မှုရှိစေရေးနှင့် သတ်မှတ်အရည်အသွေးပြည့်မီသော ကုန်စည်များကိုသာ ရောင်းချရန်၊ စားသုံးသူ ကာကွယ်ရေးဥပဒေပါ စီးပွားရေးလုပ်ငန်းရှင်၏ တာဝန်များအကြောင်းနှင့် တားမြစ်ချက်များအကြောင်း စသည်တို့ကို အသိပညာပေး ဆွေးနွေးခဲ့ပြီး၊ ကုန်မျိုးစုံအရောင်းဆိုင်(၅)ဆိုင်အား ဈေးကွက်စောင့်ကြည့်စစ်ဆေးခြင်းများ ဆောင်ရွက်ခဲ့ကြကြောင်း သတင်းရရှိပါသည်။

DOCA(ဧရာဝတီ)

   ဧရာဝတီတိုင်းဒေသကြီး၊ မအူပင်ခရိုင်၊ ပန်းတနော်မြို့နယ် ဦးစီးမှူးရုံးမှ ဦးခိုင်လွမ်းမိုးနှင့် ဝန်ထမ်းများသည် ပန်းတနော်မြို့ပေါ်ရှိ သင်ဖျာလုပ်ငန်းရှင်(၃)ဦးအား (၂၂.၂.၂၀၂၃) နေ့ နံနက် (၁၀:၀၀)နာရီတွင်  ပန်းတနော်မြို့နယ်တာဝန်ခံရုံး၌ စားသုံးသူကာကွယ်ရေးအသိပညာပေး ဟောပြောခဲ့ကြပါသည်။

  ထိုသို့ ဟောပြောဆွေးနွေးရာတွင် သင်ဖျာလုပ်ငန်းရှင်များအား တွေ့ဆုံ၍ သင်ဖျာယက်လုပ်ခြင်း၊ သင်ဖျာထွက်ရှိမှု၊ သင်ဖျာဈေးကွက်နှင့်ဈေးနှုန်း၊ ကုန်ကြမ်းရရှိမှုအခြေအနေများကို ကနဦး မေးမြန်းခဲ့ပြီး လုပ်ငန်းရှင်များမှ လုပ်ငန်းဆောင်ရွက်မှု အခြေအနေများကို တင်ပြဆွေးနွေးကြပါသည်။ ဆက်လက်၍တာဝန်ရှိသူမှ သင်ဖျာလုပ်ငန်းရှင်များအား စားသုံးသူကာကွယ်ရေးဥပဒေ (၂၀၁၉) အကြောင်း ရှင်းလင်းဆွေးနွေးပြီး၊ လုပ်ငန်းရှင်တို့လိုက်နာရမည့် တာဝန်အချက်များ၊ ကုန်အညွှန်းအမှတ်အသား ဖော်ပြခြင်းစပ်လျဉ်းသည့် ကိစ္စရပ်များအကြောင်း၊ ကုန်စည်နှင့်စပ်လျဉ်း၍ အာမခံပေးခြင်းအကြောင်း၊ ကုန်စည်နှင့် ဝန်ဆောင်မှုအပေါ် လုပ်ငန်းရှင်ဘက်မှ တာဝန်ရှိအချက်များအကြောင်း၊ မိမိတို့ စားသုံးသူရေးရာဦးစီးဌာနအနေဖြင့် “ဖွံ့ဖြိုးကုန်သွယ်နိုင်ငံကြွယ်” ဆိုသည် ဆောင်ပုဒ်အတိုင်း လုပ်ငန်းရှင်များ ပြည်တွင်းကုန်သွယ်မှု ဖွံ့ဖြိုးတိုးတက်ရေးနှင့် ဈေးကွက်နည်းပညာသုတေသနလုပ်ငန်းများ ဆောင်ရွက်ရန် ရည်ရွယ်၍ လုပ်ကိုင်ဆောင်ရွက်လျက်ရှိကြောင်းကို ထည့်သွင်းဆွေးနွေးခဲ့ကြောင်း သိရှိရပါသည်။

  ထို့နောက် (၁၄:၀၀) နာရီအချိန်တွင် ပန်းတနော်မြို့ပေါ်ရှိ သင်ဖြူး၊သင်ဖျာလုပ်ငန်းများသို့ သွားရောက်၍ ထုတ်ကုန်လုံခြုံစိတ်ချရမှုရှိစေရေး ကွင်းဆင်းဆောင်ရွက်ခဲ့ကြပါသည်။

DOCA(ဧရာဝတီ)

        စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ စားသုံးသူရေးရာဦးစီးဌာနသည် စားသုံးသူ ပြည်သူများ ကုန်စည်နှင့်ဝန်ဆောင်မှုများ ဝယ်ယူအသုံးပြုရာတွင် ဘေးအန္တရာယ်ကင်းရှင်းစေရန်၊  လုံခြုံစိတ်ချရမှုရှိစေရန်၊ လုံခြုံစိတ်ချရမှုမရှိသော ကုန်စည်များ ဈေးကွက်အတွင်းသို့ မရောက်ရှိ စေရန်နှင့် ဈေးကွက်အတွင်းမှ ပပျောက်သွားစေရန် စသည့်ရည်ရွယ်ချက်များဖြင့် ဈေးကွက် စောင့်ကြည့်စစ်ဆေးခြင်း လုပ်ငန်းများကို အစဉ်တစိုက် ကြိုးပမ်းဆောင်ရွက်လျက် ရှိပါသည်။

          စားသုံးသူရေးရာဦးစီးဌာန၊ မုံရွာခရိုင်ဦးစီးမှူးရုံးမှ ခရိုင်ဦးစီးမှူး၊ ဒု-ခရိုင်ဦးစီးမှူးနှင့် မုံရွာမြို့နယ် တာဝန်ခံတို့သည် (၂၀.၂.၂၀၂၃)ရက်နေ့ နံနက် (၁၀:၀၀)နာရီအချိန်တွင် မုံရွာမြို့ပေါ်ရှိ အလှကုန် ပစ္စည်းအရောင်းဆိုင်များ၊ လူသုံးကုန်ပစ္စည်းအရောင်းဆိုင်များ၊ စတိုးဆိုင်များသို့ သွားရောက်၍ ဈေးကွက်အတွင်း ရောင်းချနေသော စားသောက်ကုန်ပစ္စည်းများ၊ လူသုံးကုန်ပစ္စည်းများတွင် စားသုံးသူကာကွယ်ရေးဥပဒေ အခန်း(၁၈)၊ ပုဒ်မ(၄၁)ပါ ကုန်အညွှန်းအမှတ်အသား ဖော်ပြချက် များ၊ မြန်မာနိုင်ငံ စားသုံးသူကာကွယ်ရေးကော်မရှင်၏ ညွှန်ကြားချက်အမှတ်(၂/၂၀၁၉)ဖြင့်ထုတ်ပြန် ထားသော ကုန်စည်အုပ်စုအလိုက် မဖြစ်မနေ ဖော်ပြရမည့် ကုန်အညွှန်းအမှတ်အသားများ ပြည့်စုံမှု ရှိ/မရှိ ဈေးကွက်စောင့်ကြည့် စစ်ဆေးခဲ့ကြပြီးနောက် ဆိုင်ရှင်များအား  ကုန်အညွှန်းအမှတ်အသားနှင့် ပြည့်စုံသော ကုန်စည်များကိုသာ ရောင်းချကြရန်၊ စီးပွားရေးလုပ်ငန်းရှင်များ လိုက်နာရမည့် တာဝန်များ၊ ကုန်စည် ဝန်ဆောင်မှုနှင့်ပတ်သက်၍ အာမခံပေးရမည့် အချက်များကို ရှင်းလင်းဆွေးနွေးကာ မြန်မာနိုင်ငံစားသုံးသူကာကွယ်ရေးကော်မရှင်၏ ညွှန်ကြားချက်အမှတ် (၂/၂၀၁၉) လက်ကမ်းစာစောင်များကို ဖြန့်ဝေပေးခဲ့ကြောင်း သတင်းရရှိပါသည်။

DOCA(စစ်ကိုင်း)

   စားသုံးသူရေးရာဦးစီးဌာန၊ ချင်းပြည်နယ်ဦးစီးမှူးရုံးမှ တီးတိန်မြို့နယ်တာဝန်ခံ ဦးပြောင် ဒါလ်း(အကြီးတန်းစာရေး)သည် (၂၃.၂.၂၀၂၃) ရက်နေ့၊ နံနက် (၀၉:၃၀) အချိန်တွင် တီးတိန်မြို့နယ်၊ ခိုင်ကမ်းမြို့ အမှတ်(၄)ရပ်ကွက်ရှိ အခြေခံပညာအလယ်တန်းကျောင်း(လိုင်ဘုန်)ကျောင်း၌ ဆရာ/မများ၊ ကျောင်းသား/သူများကို တွေ့ဆုံ၍ စားသုံးသူကာကွယ်ရေးဆိုင်ရာ အသိပညာပေးဟောပြောပွဲအား ကျင်းပပြုလုပ်ခဲ့ပါသည်။

   အဆိုပါဟောပြောပွဲအခမ်းအနားတွင် ကျောင်းအုပ်ဆရာကြီး ဦးနန်လမ့်ကဲပ်က အဖွင့်အမှာစကားပြောကြားရာတွင် ယခုလို ကျောင်းသူ/ကျောင်းသားများသာမက ဆရာ/ဆရာမများကိုပါ စားသူသုံးသူ၏ အခွင့်အရေးနှင့်ပတ်သက်သည့် အသိပညာများ ရရှိမည့် ဟောပြောပွဲဖြစ်သည့် အတွက် အထူးပင် ကျေးဇူးတင်ရှိပါကြောင်း ဦးစွာပြောကြားခဲ့ပါသည်။ ထို့နောက် ဦးပြောင်ဒါးလ်က စားသုံးသူကာကွယ်ရေးဥပဒေတွင် ပြဋ္ဌာန်းထားသည့် စားသုံးသူ၏ အခွင့်အရေးနှင့်လုပ်ငန်းတာဝန် များ၊ ကုန်အညွှန်းအမှတ်အသားနှင့်ပတ်သက်သည့် ပြဋ္ဌာန်းချက်များကို အကျယ်တဝင့် ရှင်းလင်း ဆွေးနွေးခဲ့ရာ ဆရာ/ဆရာမများနှင့် ကျောင်းသား/ကျောင်းသူများက စားသုံးသူ၏ အခွင့်အရေးနှင့် အကျိုးစီးပွားဆိုင်ရာ ကိစ္စရပ်များနှင့်ပတ်သက်၍ သိရှိလိုသည်များကို မေးမြန်းဆွေးနွေးခြင်းများ ပြုလုပ်ခဲ့ရာ တာဝန်ရှိသူမှ ပြန်လည် ရှင်းလင်းဆွေးနွေးခဲ့ပါသည်။ နိဂုံးချုပ် ပြောကြားရာတွင် ကျောင်းသား/ကျောင်းသူများနှင့် ဆရာ/ဆရာများအနေဖြင့် စားသုံးသူအခွင့်အရေးနှင့်ပတ်သက်၍ မိမိ၏ အခွင့်အရေးကို ပထမဦးစွာ သိရှိနားလည်ရန် အရေးကြီးပြီး ထို့မှတဆင့် မိမိ၏ ပတ်ဝန်းကျင်တွင် နေထိုင်လျက်ရှိသော အများပြည်သူကိုလည်း နားလည်သဘောပေါက်အောင် အသိပညာပေး မျှဝေစေလိုကြောင်း ရှင်းလင်းဆွေးနွေးခဲ့ကြောင်း သိရသည်။ အခမ်းအနားတွင် ဆရာ/ဆရာမများနှင့် ကျောင်းသား/ကျောင်းသူ စုစုပေါင်း (၁၁၇)ဦး တက်ရောက်ခဲ့ကြောင်း သတင်းရရှိပါသည်။

DOCA(ချင်း)