သတင်းနှင့် လှုပ်ရှားမှုများ

          စားသုံးသူရေးရာဦးစီးဌာန၊ မအူပင်ခရိုင်၊ ညောင်တုန်းမြို့နယ်ဦးစီးမှူးရုံးမှ  ဝန်ထမ်းများသည် (၆.၃.၂၀၂၆) ရက်နေ့ ညနေ(၁၆း၀၀)နာရီအချိန်တွင် ညောင်တုန်းမြို့နယ် စက်သုံးဆီဆိုင်များသို့ ကွင်းဆင်းစစ်ဆေးခြင်းလုပ်ငန်းများ ဆောင်ရွက်ခဲ့ပါ သည်။

       ထိုသို့ကွင်းဆင်းစစ်ဆေးရာတွင် ပူးပေါင်းစစ်ဆေးရေးအဖွဲ့သည် ညောင်တုန်းစက်သုံး ဆီဆိုင်များဖြစ်သော အောင်ထက်လင်း၊ အိုကေ၊ UTTN, Denko, ထွန်းသူရ၊ ကျော်စံ ဆိုင်များရှိ ဆီရောင်းချမှုများကို မေးမြန်းခြင်း၊ ရောင်းချမှုဆီဈေးနှုန်းများကို သတ်မှတ်ရည်ညွှန်းဈေးဖြင့် ကိုက်ညီမှု ရှိမရှိစစ်ဆေးခြင်း၊ ဆီသိုလှောင်ကန်များ၏ လက်ကျန်အခြေအနေများနှင့် နေ့စဉ်ဆီဝင်ရောက်မှု အခြေအနေများကို သက်ဆိုင်ရာ ဌာနများသို့ စာရင်းများပေးပို့ရန် အသိပညာပေးဆွေးနွေးခဲ့ပြီး ရောင်းချသောဆီများကို တစ်ဦးလျှင် သတ်မှတ်ချက် လီတာဖြင့်သာရောင်းချနေကြောင်း တွေ့ရှိရပြီး၊ အများပြည်သူများ လုံလောက်စွာဝယ်ယူနိုင်ရန် ရောင်းချပေးနေကြောင်းတွေ့ရှိရပြီး စံချိန်စံညွှန်းကိုက်ညီမှု ရှိ/ မရှိကို တာဝန်ရှိသူများက ကွင်းဆင်းစစ်ဆေးလျက်ရှိပြီး သတ်မှတ်ချက်နှင့် တာမြစ်ချက်များကို ဖောက်ဖျက်ပါက ဆိုင်ပိတ်သိမ်းသည်အထိ အရေးယူမည်ဖြစ်ကြောင်း ဆီဆိုင်များမှ နေ့စဉ်ရောင်းချပေးနေပြီး မတ်လ ၇ ရက်နေ့မှစတင်ကာ တစ်နိုင်ငံလုံးအတိုင်းအတာဖြင့် စုံ/မ စနစ်ကို ကျင့်သုံးနေပြီဖြစ်ရာ (မတ် ၇) သည် "မ" ရက် ဖြစ်သဖြင့် ယာဉ်နံပါတ်အစ "မ" ဂဏန်းရှိသောကားများသာ မောင်းနှင်ရမည်ဖြစ်ပြီး၊ မနက်ဖြန် (မတ် ၈) တွင် "စုံ" ကားများသာ မောင်းနှင်ခွင့်ရှိမည်ဖြစ်သည်။ သို့သော် EV ယာဉ်များ၊ Taxi နှင့် လုပ်ငန်းသုံးယာဉ်များမှာမူ နေ့စဉ်ပုံမှန် မောင်းနှင်နိုင်ကြောင်းနှင့် အရန်ဆီ လုံလောက်စွာရှိသဖြင့် အလွန်အကျွံ ဝယ်ယူစုဆောင်းခြင်းမပြုရန် တိုက်တွန်းနိုးဆော်အသိပညာပေးခဲ့ကြောင်း သိရှိရပါသည်။

DOCA(ဧရာဝတီ)

         စားသုံးသူရေးရာဦးစီးဌာန၊ မအူပင်ခရိုင်ဦးစီးမှူးရုံးမှ ခရိုင်ဦးစီးမှူး ဦးဇော်မင်း(လက်ထောက်ညွှန်ကြားရေးမှူး) သည် မြို့နယ်တာဝန်ခံနှင့်အတူ မြို့နယ် အထွေထွေအုပ်ချုပ်ရေးဦးစီးဌာန အစည်းအဝေးခန်းမတွင် မိတ်ဖက်ဌာနဆိုင်များနှင့် အတူ တာဝန်ရှိသူများနှင့် ပူးပေါင်း၍ ၂၀၂၆ခုနှစ် မတ်လ ၅ရက်နေ့ နံနက် (၁၁:၀၀) နာရီအချိန်တွင် ဆက်သွယ်ရေးဝန်ဆောင်မှု၊  အင်တာနက်ဝန်ဆောင်မှု၊  ဆက်သွယ်ရေးလုပ်ငန်းရှင်များနှင့် အွန်လိုင်းရောင်းချသူ လုပ်ငန်းရှင်များနှင့် တွေ့ဆုံဆွေးနွေး အသိပညာပေးခဲ့ပါသည်။

         ခရိုင်တာဝန်ရှိသူမှ ဆွေးနွေးရာတွင် စားသုံးသူကာကွယ်ရေးဥပဒေတွင် ဝန်ဆောင်မှုဆိုသည်မှာ လုပ်ငန်း (သို့မဟုတ်) လုပ်ဆောင်မှုအသွင်ဖြင့် စားသုံးသူ၏ လိုအပ်ချက်ကို တန်ဖိုးဖြင့်ဖြစ်စေ၊ တန်ဖိုးမပါဘဲဖြစ်စေ ဖြည့်ဆည်းပေးသည့် ဆောင်ရွက်မှုကို ခေါ်ဆိုတာဖြစ်ကြောင်း၊ ဝန်ဆောင်မှုလုပ်ငန်းများ၏ အာမခံချက်နှင့် စပ်လျဉ်း၍ စားသုံးသူကတောင်းဆိုနိုင်သည့် အခွင့်အရေးများရှိပါကြောင်း၊ စီးပွားရေးလုပ်ငန်းရှင်သည် စားသုံးသူကာကွယ်ရေးဥပဒေ ပုဒ်မ ၂၆ အရ စားသုံးသူအပေါ် အာမခံချက်ပေးထားသည့်ကာလတိုင်း ဝန်ဆောင်မှုမပေးနိုင်လျှင် (သို့မဟုတ်) ဝန်ဆောင်မှုပေးရန် ပျက်ကွက်လျှင် ဝန်ဆောင်မှုပေးရန်ပျက်ကွက်ခဲ့မှုကြောင့် နစ်နာဆုံးရှုံးမှုဖြစ်ခဲ့လျှင် ယင်းအတွက် လျော်ကြေးပေးရန်၊ အာမခံထားသော အချိန်ကာလအတွင်း သဘောတူညီထားသော ဝန်ဆောင်မှုကိုမရခဲ့လျှင် စားသုံးသူ၏ နစ်နာမှုအတွက် ကုစားခွင့်ပေးရန် စားသုံးသူမှတောင်းဆိုပိုင်ခွင့်ရှိကြောင်းနှင့် စီးပွားရေးလုပ်ငန်းရှင်၏တာဝန်များ၊ တားမြစ်ချက်များကို အသိပညာပေးဆွေးနွေးဟောပြောခဲ့ပြီး ဆက်လက်၍  စီးပွားရေးနှင့် ကူးသန်းရောင်းဝယ်ရေးဝန်ကြီးဌာန၏ အမိန့်ကြော်ငြာစာအမှတ် ၅၁/၂၀၂၃ အရ အွန်လိုင်းစနစ်ဖြင့်ရောင်းချ ခြင်းလုပ်ငန်းကို အရေးကြီးဝန်ဆောင်မှုလုပ်ငန်းအဖြစ် သတ်မှတ်ထားရှိမှုအခြေအနေ၊ အွန်လိုင်းရောင်းချခြင်း၏ အဓိပ္ပာယ်ဖွင့်ဆိုချက်၊ အွန်လိုင်းမှဈေးဝယ်ယူရာတွင် တွေ့ရှိရသည့် အားသာချက်၊ အားနည်းချက်များ၊ အွန်လိုင်းမှ လိမ်လည်မှုပုံစံ (၂)မျိုး၊ စားသုံးသူများအနေဖြင့် အွန်လိုင်းမှတဆင့် ကုန်စည် သို့မဟုတ် ဝန်ဆောင်မှု ကိုဝယ်ယူရာတွင် စိစစ်သင့်သည့် အချက်အလက်များ၊ အွန်လိုင်းစနစ်ဖြင့်ရောင်းချခြင်းလုပ်ငန်းများနှင့် စပ်လျဉ်း၍ ကုန်သွယ်ရေးဦးစီးဌာနနှင့် စားသုံးသူရေးရာဦးစီးဌာနတို့မှ ဆောင်ရွက်ပေးမည့်အခြေအနေ၊ မှတ်ပုံတင်ထားသော အွန်လိုင်းရောင်းချမှုလုပ်ငန်းများမှ ဈေးဝယ်ယူခြင်းဖြင့်ရရှိလာမည့် အကျိုးရလဒ်များအား အသိပညာပေးဆွေးနွေးခဲ့ပြီး သက်ဆိုင်ရာဌာနများမှ သက်ဆိုင်ရာကဏ္ဍအလိုက် လုပ်ငန်းရှင်များသိရှိလိုက်နာရမည့် စည်းမျဉ်းစည်းကမ်းများ၊ ညွှန်ကြားချက်များ၊ ဥပဒေများပါသတ်မှတ်ပြဌာန်းချက်များ အား အသီးသီးအသိပညာပေး ဆွေးနွေးခဲ့ကြောင်း တက်ရောက်သူ ၁၂၀ဦးရှိကြောင်း သိရှိရပါသည်။

DOCA(ဧရာဝတီ)

    တနင်္သာရီတိုင်းဒေသကြီး၊ မြိတ်ခရိုင်အတွက် လိုအပ်သောစားအုန်းဆီများကို ရန်ကုန်တိုင်းဒေသကြီးရှိ ဆီကုမ္ပဏီများမှ ခွဲတမ်းရရှိခဲ့ပြီး YGND ကုမ္ပဏီ၊ GGPG ကုမ္ပဏီ MOA ကုမ္ပဏီတို့မှ ခွဲတမ်းရရှိခဲ့သော စားအုန်းဆီပေပါ(၆၈၇) လမ်းခရီးအခက်အခဲအခြေအနေကြောင့် ပိတ်မိနေပြီး (၁၄.၂.၂၀၂၆) ရက်နေ့တွင် (၁၀.၃.၂၀၂၆)ရက်နေ့တွင် ရေလမ်းခရီးဖြင့် ပြန်လည်တင်ဆောင်၍ မြိတ်မြို့သို့ သယ်ယူလာခဲ့ပါသည်။

    သယ်ယူရာတွင် ပိုပိုင်မြတ်ရေယာဉ်နှင့် MV-ဝိသာခါရေယာဉ်တို့ဖြင့် သယ်ဆောင်လာခဲ့ပြီး (၁၁.၃.၂၀၂၅)ရက်နေ့တွင် မြိတ်မြို့သို့ ရောက်ရှိလာခဲ့ကြောင်းသိရှိရပါသည်။  အဆိုပါရောက်ရှိလာသော ရေယာဉ်များကို မြိတ်ခရိုင်စားသုံးသူရေးရာဦးစီးဌာန၊ ဆီအရောင်းကိုယ်စားလှယ်နှင့် ဌာနဆိုင်ရာပူးပေါင်း အဖွဲ့များမှကွင်းဆင်းစစ်ဆေးခဲ့ပြီး ပိုပိုင်မြတ်ရေယာဉ် စားအုန်းဆီပေပါ(၅၄)နှင့် MV-ဝိသာခါရေယာဉ်ဖြင့် စားအုန်းဆီပေပါ (၆၃၃)၊ စုစုပေါင်း စားအုန်းဆီပေပါ (၆၈၇)ပေပါ ရောက်ရှိလာခဲ့ကြောင်း သိရှိပါသည်။ ရောက်ရှိလာသောစားအုန်းဆီများကို ၂% အမြတ်ဖြင့် မြိတ်မြို့ရှိ လက်လီအ‌ရောင်းဆိုင်များသို့ ပြန် လည်ရောင်းချပေးမည်ဖြစ်ကြောင်း သိရှိရပါသည်။

DOCA(တနင်္သာရီ)

        တနင်္သာရီတိုင်ဒေသကြီး၊ မြိတ်ခရိုင်စားသုံးသူရေးရာဦးစီးဌာနသည် တတိယဦးစားပေး အဖြစ် သယ်ယူပို့ဆောင်ရေးဝန်ဆောင်မှုလုပ်ငန်းအား မြိတ်မြို့၊ ကန်ခေါင်းရပ်၊ ပန်စရာလမ်းဆုံရှိ 7 STAR အဆင့်မြင့်ခရီးသည် ပို့ဆောင်ရေးဝန်ဆောင်မှုလုပ်ငန်းသို့ ၂၀၂၆ခုနှစ်၊ မတ်လ(၉)ရက်နေ့တွင် သွား ရောက်၍ စည်းကမ်းချက်များနှင့်အညီဆောင်ရွက်နေခြင်းရှိ/မရှိ ကွင်းဆင်းစစ်ဆေးခဲ့ကြောင်း သိရှိ ရပါသည်။ 

        ကွင်းဆင်းစစ်ဆေးရာတွင် ပို့ဆောင်ရေးဝန်ဆောင်မှုလုပ်ငန်းသည် ခရီးသည်နှင့် ကုန်ပစ္စည်းတန်ဆာများကို စားသုံးသူများ၏ လိုအင်ဆန္ဒနှင့်အညီ လုံခြုံချောမွေ့စွာဖြင့် ပို့ဆောင်ပေးနေသည့် ပို့ဆောင်ရေးကဏ္ဍဖြစ်သည့်အတွက် စားသုံးသူရေးရာဦးစီးဌာနမှ ခရီးသည်ပို့ဆောင်မှုအခြေအနေ များ၊ တင်ဆောင်သည့်လူဦးရေ၊ ယာဥ်မောင်းများအနေဖြင့် အရက်သေစာသောက်စားခြင်းရှိ/မရှိ စစ်ဆေးမေးမြန်းခြင်းနှင့် ယာဥ်အန္တရာယ်ကင်းရှင်းစေရေး သက်ဆိုင်ရာဌာနများ၏ ထုတ်ပြန်ထားသော စည်းကမ်းများ၊ လမ်းညွှန်ချက်များအတိုင်း လိုက်နာဆောင်ရွက်ခြင်းရှိ/မရှိ စစ်ဆေးခဲ့ကြောင်း သိရှိရပါသည်။

DOCA(တနင်္သာရီ)

        ဧရာဝတီတိုင်းဒေသကြီး၊ ပုသိမ်ခရိုင် စားသုံးသူရေးရာကော်မတီ လုပ်ငန်းညှိနှိုင်း အစည်းအဝေးကို ပုသိမ်ခရိုင်အထွေထွေအုပ်ချုပ်ရေးဦးစီးဌာန အစည်းအဝေးခန်းမတွင် (၂၅.၂.၂၀၂၆) ရက်နေ့၊ နေ့လယ် (၁၃:၀၀) နာရီအချိန်တွင် ကျင်းပပြုလုပ်ခဲ့ပါသည်။

     ထိုလုပ်ငန်းညှိနှိုင်းအစည်းအဝေးတွင် ခရိုင်စားသုံးသူရေးရာကော်မတီ ဥက္ကဌကိုယ်စား ဒုခရိုင် အထွေထွေအုပ်ချုပ်ရေးမှူးမှ အမှာစကားပြောကြားပြီး၊ စားသုံးသူရေးရာဦးစီးဌာန ခရိုင်ဦးစီးမှူး ဦးတင်စိုးလှိုင် (ခရိုင်စားသုံးသူရေးရာကော်မတီ အတွင်းရေးမှူး) က အမှာစာများအား ရှင်းလင်းပြောကြားခဲ့ပြီး ကော်မတီဝင်များက ဆွေးနွေးခဲ့ကြပါသည်။ ထိုအစည်းအဝေးတွင် ဆုံးဖြတ်ချက်(၅) ချက်ချမှတ်ခဲ့ပြီး ကော်မတီအဖွဲ့ဝင်အားလုံးဆောင်ရွက်ရန် အချက်(၃) ချက်၊ စားသုံးသူရေးရာဦးစီးဌာန/ ရုံးအဖွဲ့ဆောင် ရွက်ရန်အချက်(၂) ချက်၊ စုစုပေါင်း(၅) ချက်ချမှတ်ခဲ့ကြောင်းသိရှိရပါသည်။ထိုအစည်းအဝေးသို့ ခရိုင် စားသုံးသူရေးရာကော်မတီဝင်များဖြစ်ကြသော ခရိုင်အထွေထွေအုပ်ချုပ်ရေးဦးစီးဌာန၊ ခရိုင်ရဲတပ်ဖွဲ့၊ စည်ပင်သာယာရေးအဖွဲ့၊ ခရိုင်ပြည်သူ့ကျန်းမာရေးဦးစီးဌာန၊ ခရိုင်စားသုံးသူရေးရာဦးစီးဌာန စသည့် ကော်မတီအဖွဲ့ဝင်များနှင့် ခရိုင်စားသုံးသူရေးရာဦးစီးဌာနရုံးဝန်ထမ်း(၄) ဦး၊ စုစုပေါင်း (၉) ဦး တက်ရောက်ခဲ့ကြောင်း သတင်းရရှိပါသည်။

DOCA (ဧရာဝတီ)