သတင်းနှင့် လှုပ်ရှားမှုများ

     ဧရာဝတီတိုင်းဒေသကြီး၊ ဖျာပုံခရိုင် ၊ ဒေးဒရဲမြို့နယ် စားသုံးသူရေးရာဦးစီးဌာနမှ မြို့နယ် တာဝန်ခံ ဦးသိန်းမောင်နှင့် ဝန်ထမ်းတို့သည် စည်ပင်သာယာရေးဦးစီးဌာနနှင့် ပူးပေါင်း၍ ၂၀၂၅ ခုနှစ်၊ မေလ(၂၁) ရက်နေ့၊ နေ့လည် (၁၂:၀၀) နာရီအချိန်တွင် ဒေးဒရဲမြို့ (၁) ရပ်ကွက်ရှိ “သန့်” ရေခဲချောင်း စက်ရုံသို့ MSMEs  လုပ်ငန်းများ ဖွံ့ဖြိုးတိုးတက်ရေး ကွင်းဆင်းစစ်ဆေးခဲ့ကြပါသည်။

     အဆိုပါ ကွင်းဆင်းရာတွင် “သန့်” ရေခဲချောင်း စက်ရုံမှ တာဝန်ရှိသူ က မိသားစုဝင်များနှင့် လုပ်သားအင်အား(၃) ဦးဖြင့် လည်ပတ်လုပ်ကိုင်လျက်ရှိပြီး စည်ပင်လိုင်စင်၊ စက်မှုကြီးကြပ် လိုင်စင်နှင့် ထုတ်လုပ်ရောင်းချနေသော ရေခဲချောင်းများတွင် ကုန်အညွှန်းအမှတ်အသား များ ပြည့်စုံစွာ ဖော်ပြထားရှိပြီး ဈေးနှုန်းဈေးကွက်အနေဖြင့် ရေခဲချောင်းများကို မြို့တွင်းဖောက်သည်များနှင့် အနီးနားရှိ ကျေးရွာများသို့ ရောင်းချကြောင်းသိရသည်။ ထို့နောက်မြို့နယ်တာဝန်ခံမှ ထုတ်လုပ်သော ရေခဲ‌ချောင်းများနှင့် ပက်သက်၍ စားသုံးသူများ ဘေးအန္တရာယ်ကင်းရှင်းစေရေးနှင့် MSMEs လုပ်ငန်းများ ရေရှည်တွင် ဖွံ့ဖြိုးတိုးတက်နိုင်ရေးအတွက် လိုအပ်သည်များကို အသိပညာပေး ဆွေးနွေးခဲ့ကြောင်း ကွင်းဆင်းစစ်ဆေးမှုအရ သတင်းရရှိပါသည်။

DOCA(ဧရာဝတီ)

          စားသုံးသူရေးရာဦးစီဌာနသည် ပြည်တွင်းကုန်သွယ်မှုလုပ်ငန်းများဖွံ့ဖြိုးတိုးတက်ရေးအတွက် ပြည်တွင်းရှိ ကုန်ထုတ်လုပ်မှုလုပ်ငန်းများဖွံ့ဖြိုးတိုးတက်ရေးကို အားပေးမြှင့်တင်ဆောင်ရွက်နေသလို တစ်ဖက်မှာ စားသုံးသူများ ကုန်စည်ဝန်ဆောင်မှုကို ဝယ်ယူသုံးစွဲခြင်းမှ ဖြစ်ပေါ်လာသော နစ်နာဆုံးရှုံးမှုများကို စားသုံးသူကာကွယ်ရေးဥပဒေနှင့်အညီ ဖြေရှင်းဆောင်ရွက်ပေးလျှက်ရှိရာ ၂၈-၄-၂၀၂၅ ရက်နေ့တွင် အင်တာနက် Wifi ရယူသုံးစွဲမှုနှင့်ပတ်သက်၍ မြင်းခြံမြို့၊အမှတ် (၁၁) နေ စားသုံးသူတစ်ဦးမှ အင်တာနက် Wifi ရယူသုံးစွဲရာတွင် မကြာခဏ အင်တာနက်လိုင်းပြတ် တောက်ခြင်းအတွက် ပြန်လည်အစားထိုးမရရှိခြင်း ၊ ကြိုတင်ငွေပေးဆောင်ရက်မတိုင်မီ တစ်ရက် စော၍ အင်တာနက်လိုင်းဖြတ်တောက်ခံရ၍ စိတ်ကျေနပ်မှုမရရှိသည့်အတွက် စားသုံးသူရေးရာဦးစီးဌာန၊ မြင်းခြံခရိုင်ရုံးရှိ စားသုံးသူသတင်းပြန်ကြားရေးနှင့်တိုင်ကြားမှု လက်ခံဆောင်ရွက်ရေးစင်တာ (CICC) ရုံးသို့ လာရောက်တိုင်ကြားထားကြောင်းသိရသည်။ အဆိုပါတိုင်ကြားမှုနှင့်ပတ် သက်၍စိစစ်ပြီး သက်ဆိုင်ရာမှ တာဝန်ရှိသူအား ဖိတ်ကြား၍ စားသုံးသူစိတ်ကျေနပ်မှုရရှိ စေရေးအတွက် စေ့စပ်ညှိနှိုင်းဖြေရှင်းသွားမည်ဖြစ်ကြောင်း သိရှိရပါသည်။

DOCA(မန္တလေး)

  ၂၅.၄.၂၀၂၅ ရက်နေ့တွင် မွန်ပြည်နယ်၊ စားသုံးသူရေးရာဦးစီးဌာန၊ သထုံခရိုင်၊ ပေါင်မြို့နယ်တာဝန်ခံ ဦးအောင်မျိုးဦးသည် မြို့နယ်အထွေထွေအုပ်ချုပ်ရေးဦးစီးဌာန၊ မြို့နယ်ကျန်းမာရေးဦးစီးဌာန၊ မြို့နယ်စည်ပင်သာယာရေးအဖွဲ့တို့နှင့် ပူးပေါင်း၍ ပေါင်မြို့ပေါ် ရှိ  ရပ်ကွက်စတိုးဆိုင်များတွင် သောက်ရေသန့်အမျိုးမျိုးနှင့်စပ်လျဉ်း၍ ဈေးကွက်ကွင်းဆင်း စစ်ဆေးခဲ့ကြောင်း သိရှိရပါသည်။

 ထိုသို့ ဈေးကွက်ကွင်းဆင်းစစ်ဆေးရာ အဆိုပါ ရပ်ကွက်စတိုးဆိုင်များတွင် ရောင်းချနေ သော သောက်ရေသန့်အမျိုးမျိုးတွင် ကုန်အညွှန်းအမှတ်အသားပြည့်စုံစွာ ပါဝင်မှု ရှိ/မရှိ၊ သက်ဆိုင်ရာဌာနများ၏ ထောက်ခံချက် ပါ/မပါတို့အား စစ်ဆေးပြီးနောက် ဈေးကွက်အတွင်း မရောင်းချမှီ ကုန်အညွှန်းအမှတ်အသားပြည့်စုံစေရန်၊ နေရောင်ခြည်နှင့် တိုက်ရိုက်ထိတွေ့ သည့်နေရာတွင် မထားကြရန် ဆိုင်ပိုင်ရှင်များအား အသိပေးပြောကြားခဲ့ကြောင်း သိရသည်။

DOCA(မွန်)

     ဧရာဝတီတိုင်းဒေသကြီး၊ စားသုံးသူရေးရာဦးစီးဌာန၊ ပုသိမ်ခရိုင် ငပုတောမြို့နယ် တာဝန်ခံ ဒေါ်မြင့်မြင့်စန်းနှင့်ဝန်ထမ်းများသည် (၂၁.၅.၂၀၂၅)ရက်နေ့ မွန်းလွဲ(၁:၀၀)အချိန်တွင် ငပုတောမြို့နယ်၊ ဝက်ဆူကျေးရွာရှိ အုပ်ချုပ်ရေးမှူးရုံးတွင် ရပ်ကွက်အုပ်ချုပ်ရေးမှူးနှင့်ပူးပေါင်း၍ စားသုံးသူပြည်သူ များအား စားသုံးဆီထုတ်ယူရန်အတွက် ဆီစာအုပ်များပြုလုပ်ဆောင်ရွက်ပေးခဲ့ပါသည်။

     ထို့သို့ပြုလုပ်ဆောင်ရွက်ရာတွင် စားသုံးသူရေးရာဦးစီးဌာန၊ ငပုတောမြို့နယ်တာဝန်ခံမှ ဦးစွာ မိတ်ဆက်စကားပြောကြားပြီး ဆီစာအုပ်ဖြင့်စားသုံးဆီဝယ်ယူပါက စာအုပ်ပြုလုပ်ထားသော အမည်နှင့် လူမှလွဲ၍ အခြားမည်သူမျှဝယ်ယူခြင်းမရှိစေရန်၊ ဆီဝယ်ယူခွင့်ပြုထားသောကာလ အတွင်း သတ်မှတ် ပမာဏကိုသာဝယ်ယူရန်၊ ဝယ်ယူရှိသည့်ဆီကို မိမိ မိသားစုစားသုံးရန်အတွက်သာ အသုံးပြု ရန်၊ တစ်ဆင့်ပြန်လည်ရောင်းချခြင်းမရှိစေရန်၊ စာအုပ် ပျက်စီး/ပျောက်ဆုံးပါက စာအုပ် ထုတ်ပေးသည့် ဌာနသို့ သတင်းပေးပို့ရန်၊ ဆီဝယ်ယူခွင့်စာအုပ်အား ဝယ်ယူသည့်ဆိုင်တွင် အပ်နှံထားခြင်းမရှိစေရန် စသည်တို့ကိုပြောကြားပြီး လိုအပ်သည်များကိုလည်းအသေးစိတ်ရှင်းလင်း ပြောကြားခဲ့ပါသည်။

DOCA(ဧရာဝတီ)

     ဧရာဝတီတိုင်းဒေသကြီး၊ စားသုံးသူရေးရာဦးစီးဌာန ပုသိမ်ခရိုင် ငပုတောမြို့နယ် တာဝန်ခံ ဒေါ်မြင့်မြင့်စန်းနှင့်ဝန်ထမ်းများသည် (၂၁.၅.၂၀၂၅) ရက်နေ့ နံနက် (၁၁:၀၀)နာရီအချိန်တွင် ငပုတောမြို့နယ် အုန်းပင်စုကျေးရွာရှိ မြရတနာဆန်စက်လုပ်ငန်းရှင်နှင့်တွေဆုံ၍ ဈေးနှုန်းဈေးကွက် နှင့် ဆန်/စပါး သိုလှောင်ထားရှိမှုအား ကွင်းဆင်းစစ်ဆေးခဲ့ပါသည်။

     ထို့သို့ကွင်းဆင်းစစ်ဆေးရာတွင် ငပုတောမြို့နယ်တာဝန်ခံမှ အုန်းပင်စုကျေးရွာရှိ မြရတနာ ဆန်စက်မှ ဆန်နှင့်စပါးများအား သိုလှောင်ထားရှိမှုနှင့် ဆန်များအား ဈေးကစားရန်ရည်ရွယ်ချက် ဖြင့် သိုလှောင်ထားခြင်းမပြုကြရန်၊ မြန်မာနိုင်ငံဆန်၊ စပါး အသင်းချုပ်(MRF) မှ ထုတ်ပြန် ထားသော ရည်ညွှန်းဈေးနှုန်းဖြင့်သာရောင်းချကြရန်၊ ဆန်စက်များအနေဖြင့် ဈေးနှုန်းမြင့်တင် ရောင်းချခြင်း၊ ဈေးကစားရန်ရည်ရွယ်ချက်ဖြင့်သိုလှောင် ထားရှိခြင်းများစစ်ဆေးတွေ့ရှိပါက အရေးကြီး ကုန်စည်နှင့် ဝန်ဆောင်မှုဥပဒေအရ အရေးယူဆောင်ရွက်သွားမည်ဖြစ်ကြောင်း ရှင်းလင်း ပြောကြားခဲ့ပါသည်။

DOCA(ဧရာဝတီ)