သတင်းနှင့် လှုပ်ရှားမှုများ

               မြင်းခြံခရိုင်စားသုံးသူရေးရာဦးစီးဌာနသည် စားသုံးသူများ ဘေးအန္တရာယ်ကင်းရှင်းစေရေး၊ ထိခိုက်နစ်နာဆုံးရှုံးမှုများ မဖြစ်ပေါ်စေရေးတို့အတွက် မြင်းခြံမြို့၊ အမှတ်(၁၃)ရပ်ကွက်ရှိ ကြံတိုင်းအောင် ဈေးဆိုင်တွင် ရောင်းချနေသော အရန်သင့်အစားအစာအမျိုးမျိုးအား ခရိုင်ဦးစီးမှူးရုံးမှ ဒု-ခရိုင် ဦးစီးမှူး ဦးတင်ဇော်ထွေး ဦးဆောင်၍ စစ်ဆေးရေးမှူးများသည် ၅.၃.၂၀၂၆ ရက်နေ့၊ နံနက် ၁၀:၀၀ နာရီ အချိန်တွင် ဈေးကွက်စောင့်ကြည့်စစ်ဆေးခြင်းများ ဆောင်ရွက်ခဲ့ကြပါသည်။

          စားသုံးသူရေးရာဦးစီးဌာန၊ ဒု-ခရိုင်ဦးစီးမှူး ဦးတင်ဇော်ထွေးနှင့်ဝန်ထမ်းများသည် ရောင်းချ လျက်ရှိသော အရန်သင့်အစားအစာအမျိုးမျိုးတွင် စားသုံးသူကာကွယ်ရေး ဥပဒေပါအခန်း(၁၈) ကုန်အညွှန်း အမှတ်အသားဖော်ပြခြင်းများနှင့် ကိုက်ညီမှုရှိ/မရှိ၊ သက်ဆိုင်ရာဌာနများ၏ ထောက်ခံချက်များ ပါဝင်မှု ရှိ/ မရှိ၊ သက်တမ်းလွန်ကုန်စည်များ ရောင်းချမှုရှိ/မရှိတို့ကို စစ်ဆေးခဲ့ကြပြီး၊ ကုန်အညွှန်းအမှတ်အသား ပြည့်စုံမှန်ကန်စွာ ဖော်ပြပါဝင်သော ကုန်စည်များ၊ သက်ဆိုင်ရာဌာနများမှ ဖော်ပြရန်သတ်မှတ်ထား သောအချက်များနှင့်ကိုက်ညီသော ကုန်စည်များကိုသာ ရောင်းချမှုရှိပြီး ဆက်လက်၍လည်း ဥပဒေ ပြဌာန်းချက်များ၊ သတ်မှတ်ချက်များနှင့်ကိုက်ညီသော ကုန်စည်များကိုသာ ဖြန့်ဖြူးရောင်းချရန်၊ စီးပွား ရေးလုပ်ငန်းရှင်၏တာဝန်များ၊ တားမြစ်ချက်များအား လိုက်နာကြရန်၊ စီးပွားရေးကျင့်ဝတ်စည်းကမ်းများနှင့်အညီ ဖြန့်ဖြူးရောင်းချကြရန်နှင့်ဥပဒေ၊ အမိန့်၊ ညွှန်ကြားချက် များအား အစဉ်တစိုက်လိုက်နာ ရောင်းချကြရန် ဆွေးနွေးပြောကြား၍ ဈေးကွက်စောင့်ကြည့် စစ်ဆေးခြင်းများ ဆောင်ရွက်ခဲ့ကြ ပါသည်။

          ဈေးကွက်စောင့်ကြည့်စစ်ဆေးခြင်းများကို စဉ်ဆက်မပြတ်ဆောင်ရွက်ခြင်းဖြင့် ထုတ်လုပ်သူ၊ ရောင်းချသူများပါ ဥပဒေပါပြဌာန်းချက်များကို လိုက်နာလာခြင်း၊ စီးပွားရေးကျင့်ဝတ်စည်းကမ်းများနှင့် အညီရောင်းချလာခြင်းကြောင့် စားသုံးသူများဘေးအန္တရာယ်ကင်းရှင်းစေခြင်း၊ ထိခိုက်နစ်နာဆုံးရှုံးမှုများ လျော့နည်းပပျောက်လာခြင်း ဖြစ်ပေါ်စေမည်မှာ အမှန်ပင်ဖြစ်ပါသည်။

DOCA(မန္တလေး)

         ဖျာပုံခရိုင်၊ စားသုံးသူရေးရာဦးစီးဌာနမှ ဝန်ထမ်းများနှင့် မြို့နယ်စည်ပင်သာယာရေးအဖွဲ့တို့ ပူးပေါင်း၍ ၂၀၂၆ခုနှစ်၊ ဇန်နဝါရီလ(၂၆) ရက်နေ့၊ နေ့လယ် (၁၃:၀၀)နာရီအချိန်တွင် ဖျာပုံမြို့မဈေးကြီးအတွင်းရှိ ကုန်မျိုးစုံအရောင်းဆိုင်များအား ဈေးကွက်စောင့်ကြည့် စစ်ဆေးခဲ့ကြပါသည်။

          အဆိုပါကွင်းဆင်းဆေးခဲ့ရာတွင် ပြည်သူများဈေးကွက်အတွင်း ဖြစ်သင့်ဖြစ်ထိုက်သည့် ဈေးနှုန်းဖြင့် ကုန်ပစ္စည်းများဝယ်ယူသုံးစွဲနိုင်စေရေး၊ စီးပွားရေးလုပ်ငန်းရှင်များအနေဖြင့် ထုတ်ပြန်ထားသော ညွှန်ကြားချက်များအတိုင်း လိုက်နာဆောင်ရွက်ရန်၊ သတ်မှတ်အရည်အသွေးပြည့်မှီသော ကုန်စည်များကိုသာရောင်းချရန်၊ စားသုံးသူကာကွယ်ရေးဥပဒေပါ စီးပွားရေးလုပ်ငန်းရှင်များ၏ တာဝန်များအကြောင်းပြောခဲ့ပြီး စားသုံးဆီများ သတ်မှတ်ရည်ညွှန်ဈေးအတိုင်း ရောင်းချခြင်းရှိ/ မရှိ ကွင်းဆင်းစစ်ဆေးခဲ့ကြောင်း သိရှိရပါသည်။

DOCA(ဧရာဝတီ)

          ဧရာဝတီတိုင်းဒေသကြီး၊ ဖျာပုံခရိုင်၊ ဖျာပုံမြို့နယ်အတွင်းရှိ “ဣစ္တိတံ” ဆန်စက်သို့ ဖျာပုံမြို့နယ် စားသုံးသူရေးရာဦးစီးဌာနမှ ဝန်ထမ်းတို့သည် ၂၀၂၆ ခုနှစ်၊ ဇန်နဝါရီလ(၂၆)ရက်နေ့၊ နံနက် (၁၁:၀၀)နာရီအချိန်တွင် MSMEလုပ်ငန်းများဖွံ့ဖြိုး တိုးတက်စေရေး ကွင်းဆင်းစစ်ဆေးခဲ့ကြပါသည်။

          အဆိုပါကွင်းဆင်းစစ်ဆေးရာတွင် စားသုံးသူရေးရာဦးစီးဌာနမှ ဝန်ထမ်းများက ဆန်စပါး ဈေးကွက်အတွင်း ဈေးနှုန်းအခြေအနေများ၊ ဆန်စပါးအရည်အသွေး ထုတ်လုပ်မှု ပြည့်မိစေရေး၊ အချိန်အတွယ်နှင့်ပတ်သက်၍ သတ်မှတ်ထားသည့်နှုန်းအတိုင်း ပြည့်မီစေရေး၊ ဆန်စက်ရှိ မြေပြင်လက်ကျန်စာရင်းများကို အခြေခံ၍ မြေပြင်သိုလှောင်ထားရှိမှု အခြေအနေများနှင့်  ဆန်စက် လုပ်ငန်းရှင်များကို ပူးပေါင်းဆောင်ရွက်ကြရန်၊ လစဉ်မြေပြင် သိုလှောင်မှုအခြေအနေမှန် စာရင်းများကို ဖြည့်သွင်းဆောင်ရွက်ကြရန် ဆွေးနွေးမှာကြားခဲ့ကြောင်း သတင်းရရှိပါသည်။

DOCA(ဧရာဝတီ)

          စားသုံးသူရေးရာဦးစီးဌာန၊ မကွေးတိုင်းဒေသကြီး၊ ပခုက္ကူခရိုင်ဦးစီးမှူးရုံး၏ CICC ခန်းမ၌ (၂၆.၂.၂၀၂၆)ရက်နေ့၊ နေ့လယ်(၁၄:၀၀)နာရီအချိန်တွင် ဌာနတွင်းဝန်ထမ်းများ၏ စွမ်းဆောင်ရည်မြှင့် တင်ရေး၊ အသိပညာပြန့်ပွားရေးနှင့် စဉ်းစားတွေးခေါ် ဆုံးဖြတ်နိုင်မှုတို့ကို  မြှင့်မားစေရန်ရည်ရွယ်၍ (၂/၂၀၂၆)ကြိမ်မြောက် Thursday Talk ဝန်ထမ်းစွမ်းဆောင်ရည်မြှင့်တင်ရေး အထောက်အကူပြု အသိပညာပေး ဆွေးနွေးပွဲကို ကျင်းပပြုလုပ်ခဲ့ရာ ဝန်ထမ်း(၁၆)ဦး တက်ရောက်ခဲ့ပါသည်။

          အဆိုပါ အသိပညာပေး ဆွေးနွေးပွဲတွင် မူဝါဒ(ပြည်တွင်း)တာဝန်ခံ ဦးစီးမှူး ဒေါ်စန်းမြင့်ရီက ဝန်ထမ်းများအား မြန်မာနိုင်ငံ၏ အထူးစီးပွားရေးဇုန်များအကြောင်း သိရှိနိုင်စေရန် ရည်ရွယ်၍ စီးပွား ရေးဇုန်များ၏ တည်နေရာနှင့် ရည်ရွယ်ချက်များ၊ ထုတ်လုပ်သော ပစ္စည်းများ၊ ရင်းနှီးမြုပ်နှံထားသော နိုင်ငံများ၊ ထားဝယ်အထူးစီးပွားရေးဇုန်တွင် ပါဝင်သောဇုန်များနှင့် ရင်းနှီးမြုပ်နှံမှု ပြုလုပ်နိုင်သည့် လုပ်ငန်းများ၊ မြန်မာနိုင်ငံရှိ ထင်ရှားသော ဆိပ်ကမ်းများနှင့် ရေနက်ဆိပ်ကမ်းများ၊ နိုင်ငံတကာရှိ အထူးစီးပွားရေးဇုန်များနှင့် နို်ငငံတကာစီးပွားရေးအဖွဲ့အစည်းများ အကြောင်းအား ရှင်းလင်းဆွေးနွေး ခဲ့ပြီး၊ ဆက်လက်၍ သတင်းအချက် အလက်နည်းပညာနှင့် အရည်အသွေး စီမံခန့်ခွဲရေးဌာနခွဲ တာဝန်ခံ ဒု-ဦးစီးမှူး ဒေါ်သူဇာကျော်က ဝန်ထမ်းများအနေဖြင့် Commerce  ဂျာနယ်နှင့် Website တွင် အရည် အသွေးပြည့်မီ ကျစ်လစ်သော သတင်း/ဆောင်းပါး ကောင်းတစ်ပုဒ်ဖြစ်စေရန် ရည်ရွယ်၍ သတင်းနှင့် ဆောင်းပါးရေးသားရာတွင် သတိပြုရမည့် အခြေခံအချက်များ သိရှိစေရန်နှင့်  အသိပညာပေးဟော ပြောပွဲများ၊ ကွင်းဆင်းစစ်ဆေးခြင်းများ၊ ကုန်ဈေးနှုန်း/ကုန်သွယ်မှုတို့နှင့် ပတ်သက်သည့်  သတင်းများ၊ ဆောင်းပါးများ ရေးသားရာတွင် ကဏ္ဍတစ်ခုချင်းအလိုက် ပါဝင်ရမည့် အချက်များအား အကျယ်တဝင့် ရှင်းလင်းဆွေးနွေးခဲ့ကြောင်း သိရှိရပါသည်။

DOCA(မကွေး)

         ဧရာဝတီတိုင်းဒေသကြီး၊ စားသုံးသူရေးရာဦးစီးဌာန မြို့နယ်တာဝန်ခံ ဦးမိုးမင်းသန်းနှင့် ဝန်ထမ်းများသည် အထွေထွေအုပ်ချုပ်ရေးဦးစီးဌာန ၊ မီးသတ်ဦးစီးဌာန၊ စည်ပင်သာယာရေးအဖွဲ့ တို့နှင့်အတူ ၂၀၂၆ ခုနှစ်၊ ဖေဖော်ဝါရီလ(၂၇) ရက်နေ့၊ နံနက် (၁၀:၀၀) နာရီအချိန်တွင် ကျိုက်လတ်မြို့၊  အမှတ်(၂) ရပ်ကွက်ရှိ “ ပတ္တမြား” ဆန်စက်သို့ MSMEs နှင့် ထုတ်ကုန်လုံခြုံစိတ်ချမှုရှိစေရေး ကွင်းဆင်းစစ်ဆေးခဲ့ကြောင်း သိရသည်။

          စားသုံးသူရေးရာ ဦးစီးဌာနမှ မြို့နယ်တာဝန်ခံ ဦးမိုးမင်းသန်းမှ ဆန်စပါးလက်ကျန်နှင့် ဈေးနှုန်းဈေးကွက် အခြေအနေတို့ကို ဆန်စက်ပိုင်ရှင် ဦးသန်း‌‌ဌေးလွင်နှင့် ဆွေးနွေးခဲ့ကြပြီး လက်ရှိကြိတ်ခွဲနေသော စက်စွမ်းအားနှင့် အပတ်စဉ် ပုံမှန်လည်ပတ်မှုရှိ/ မရှိနှင့် တစ်နေ့ ကြိတ်ခွဲနှုန်း တို့ကိုမေးမြန်းခဲ့ရာ စပါးလက်ကျန် (၃၀၀၀၀)၊ ဆန်လက်ကျန်(၁၅၀)၊ တစ်နေ့ (၂၄) နာရီ ကြိတ်ခွဲနှုန်းမှာ ဆန်တန်(၃၀) နှုန်းရှိပြီး တစ်နေ့လျှင် (၈) နာရီခန့်သာလည်ပတ်သဖြင့် ဆန်(၁၂)တန် ခန့်သာ ကြိတ်ခွဲနိုင်ပြီး လုပ်သားအင်အား (၁၈) ဦးဖြင့် ပုံမှန်လည်ပတ်လျက်ရှိကြောင်း ကွင်းဆင်းစစ်ဆေးခဲ့မှုအရ သတင်းရရှိခဲ့ပါသည်။

DOCA(ဧရာဝတီ)