သတင်းနှင့် လှုပ်ရှားမှုများ

                ၂၀၂၂ခုနှစ်၊ ဇူလိုင်လ ၂၂ ရက်နေ့ (၁၀း၀၀) အချိန်တွင် စားသုံးသူရေးရာဦးစီးဌာန ၊ မိတ္ထီလာခရိုင်၊ ခရိုင်ဦးစီးမှူးရုံးခန်းတွင် ခရိုင်ဦးစီးမှူး ဦးဇော်မင်းမှ လုပ်ငန်းရှင်များအား စားသုံးသူကာကွယ်ရေးဥပဒေအကြောင်း အသိပညာပေး ဟောပြောဆွေးနွေးခဲ့ပါသည်။

       စားသုံးသူရေးရာဦးစီးဌာနသည် စားသုံးသူအခွင့်အရေးများကို သိရှိနားလည်စေရန် စားသုံးသူကာကွယ်ရေးအသိပညာပေးဟောပြောပွဲလုပ်ငန်းများဆောင်ရွက်ခြင်းနှင့် စားသုံးသူများဘေးအန္တရာယ်ကင်းရှင်းရေး၊ ထုတ်ကုန်လုံခြုံစိတ်ချရမှုရှိစေရေးအတွက် ဈေးကွက်စောင့်ကြည့်စစ်ဆေးခြင်းလုပ်ငန်းများ လုပ်ဆောင်လျက်ရှိပါသည်။ စားသုံးသူပြည်သူများ နေ့စဉ်ဝယ်ယူစားသုံးနေသောကုန်စည်များနှင့်ပတ်သက်သော သတင်းအချက်အလက်များကို စားသုံးသူပြည်သူများအား မှန်ကန်စွာသိရှိစေရေး၊ လုပ်ငန်းရှင်များအနေဖြင့် ကုန်အညွှန်းအမှတ်အသားများကို ဖော်ပြရာတွင် ၂၀၁၉ စားသုံးသူကာကွယ်ပေးရေး ဥပ‌‌ဒေပြဌာန်းချက်များကို လိုက်နာပြီးထုတ်ကုန်လုံခြုံစိတ်ချရမှုရှိသော ကုန်ပစ္စည်းများကို ထုတ်လုပ်အသုံးပြုနိုင်ရေးနှင့် စားသုံးသူအခွင့်အ‌ရေးများ နစ်နာဆုံးရှုံးမှုမရှိစေရေးအတွက် ရည်ရွယ်၍ ဟောပြောဆွေးနွေးခဲ့ပါသည်။

            ကုန်စည်များ ထုတ်လုပ်ရောင်းချရာ၌ ကုန်အညွှန်းအမှတ်အသား ပြည့်စုံစွာဖော်ပြရန် လုပ်ငန်းရှင်များအား ကုန်အညွှန်းအမှတ်အသားသည် ၂၀၂၀ ခုနှစ်၊ မတ်လ (၁၆) ရက်နေ့မှစ၍ စတင်အာဏာသက်ရောက်နေပြီဖြစ်ကြောင်းနှင့် ကုန်အညွှန်း အမှတ်အသားပြည့်စုံစွာမပါရှိပါက မည်သည့်စီးပွားရေးလုပ်ငန်းရှင်မဆို စားသုံးသူကာကွယ်ရေး ဥပဒေပုဒ်မ (၇၃) အရ (၂) နှစ်ထက်မပိုသောထောင်ဒဏ်ဖြစ်စေ၊ ကျပ်သိန်း (၂၀၀ )ထက် မပိုသောငွေဒဏ်ဖြစ်စေ ၊ ဒဏ် (၂) ရပ်လုံးဖြစ်စေ အရေးယူမှုများ ပြုလုပ်နိုင်ကြောင်း အသိပညာပေး ဆွေးနွေးပြောကြားခဲ့ပြီး  ကုန်အညွှန်းအမှတ်အသားတပ်ဆင်ရန် အခက်အခဲရှိပါက စားသုံးသူရေးရာဦးစီးဌာနသို့ လာရောက်တိုင်ပင်ဆွေးနွေးနိုင်ကြောင်း၊ လုပ်ငန်းရှင်များအနေဖြင့်လည်း မိမိတို့ကိုယ်တိုင် စာသုံးသူများဖြစ်သည့်အတွက် စာသုံးသူအခွင့်အရေးဆုံးရှုံးနစ်နာမှုများရှိခဲ့လျှင် DOCA Myanmar Application နှင့် စားသုံးသူရေးရာဦးစီးဌာန၏ Website www.doca.gov.mm တွင် ဝင်ရောက်လေ့လာတိုင်ကြားနိုင်သည်ကို ဆွေးနွေးပြောကြားခဲ့ပြီး လက်ကမ်းစာစောင်များလည်း ဖြန့်ဝေခဲ့ကြောင်း သိရသည်။ဟောပြောပွဲကို နံနက် (၁၁း၁၅) အချိန်တွင် ရုတ်သိမ်းခဲ့ကြောင်း သိရှိရပါသည်။

DOCA(မန္တလေး)

          ရှမ်းပြည်နယ်(အရှေ့ပိုင်း)၊ စားသုံးသူရေးရာဦးစီးဌာန၊ တာချီလိတ်မြို့နယ်တာဝန်ခံရုံးမှ ဝန်ထမ်းများသည် အထွေထွေအုပ်ချုပ်ရေးဦးစီးဌာန၊ ပြန်ကြားရေးနှင့်ပြည်သူ့ဆက်ဆံရေးဦးစီးဌာန၊ မြို့ နယ်စည်ပင်သာယာရေးအဖွဲ့၊ အစားအသောက်နှင့်ဆေးဝါးကွပ်ကဲရေးဦးစီးဌာနတို့မှ ဝန်ထမ်းများနှင့် ပူးပေါင်း၍  ၂၀၂၂ခုနှစ်၊ ဇူလိုင်လ(၂၅)ရက်နေ့ နံနက်(၁၀:၀၀)အချိန်တွင် တာချီလိတ်ခရိုင်၊ ကျိုက်လပ်မြို့ပေါ်ရှိ ဆေးဝါးအရောင်းဆိုင်များနှင့် သောက်ရေသန့်လုပ်ငန်းများအား ကုန်အညွှန်းအမှတ်အသားများ ပြည့်စုံစွာဖော်ပြနိုင်ရေးနှင့် ထုတ်ကုန်များလုံခြုံစိတ်ချမှုရှိစေရေးအတွက် ဈေးကွက်စောင့်ကြည့် စစ်ဆေးခြင်းများ ဆောင်ရွက်ခဲ့ပါသည်။

        တာချီလိတ်မြို့နယ်တာဝန်ခံနှင့် ဌာနဆိုင်ရာဝန်ထမ်းများသည် ဆေးဝါးအရောင်းဆိုင်ရှင်များအား သက်တမ်းလွန်ဆေးပစ္စည်းများနှင့် သက်ဆိုင်ရာဌာနများမှ တားမြစ်ပိတ်ပင်ထားသော ဆေးပစ္စည်းများကိုရောင်းချခြင်း မပြုရန်၊ ထုတ်လုပ်သည့်နိုင်ငံ၊ ထုတ်လုပ်သည့်ကုမ္ပဏီ၊ တင်သွင်းသည့် ကုမ္ပဏီ၊ ဆေးဝါးမှတ်ပုံတင်အမှတ်၊ Import Resgistration No.(IR)များ ဖော်ပြထားသော ဆေးပစ္စည်းများကိုသာ ရောင်းချရန်၊ သောက်ရေသန့်လုပ်ငန်းရှင်များအား သက်ဆိုင်ရာလုပ်ငန်း လိုင်စင်များအား ပြုလုပ်/သက်တမ်းတိုးခြင်းများဆောင်ရွက်ရန်၊ လုပ်သားများ၏ တစ်ကိုယ်ရေသန့်ရှင်းရေးနှင့် သက်ဆိုင်ရာဌာနများ၏ လမ်းညွှန်ချက်များအား စနစ်တကျလိုက်နာဆောင်ရွက်ရန်နှင့် စားသုံးသူကာကွယ်ရေးဥပဒေ အခန်း(၁၈)ပါ “ကုန်အညွှန်းအမှတ်အသားဖော်ပြခြင်း”၊ အခန်း(၁၀)ပါ “စီးပွားရေး လုပ်ငန်းရှင်၏တာဝန်များ”အား သိရှိလိုက်နာဆောင်ရွက်နိုင်စေရန်အတွက် အသိပညာပေးဆွေးနွေး ခြင်းများ  ဆောင်ရွက်ခဲ့ပါသည်။

DOCA(ရှမ်း)

            မကွေးတိုင်းဒေသကြီး၊ တောင်တွင်းကြီးမြို့နယ် ၊ ကုန်စည်ဒိုင်၌  မြို့နယ်ပွဲစား စက်မှုလက်မှု လုပ်ငန်းရှင်များအသင်း ကုန်စည်ဒိုင်အလုပ်အမှုဆောင်အသစ် ပြန်လည်ရွေးချယ်ပွဲကို ဇူလိုင်လ(၂၀)ရက် နံနက်(၁၀:၀၀)နာရီ အချိန်တွင် ကျင်းပပြုလုပ်ခဲ့ပါသည်။

         ကုန်စည်ဒိုင် အလုပ်အမှုဆောင်အသစ်ရွေးချယ်ပွဲသို့ မြို့နယ်စီမံအုပ်ချုပ်ရေးအဖွဲ့ဝင် ဗိုလ်မှူး သက်နိုင်ထွန်း၊ အဖွဲ့ဝင်(၂) ဦးလှသောင်း၊ မြို့နယ်အထွေထွေအုပ်ချုပ်ရေးဦးစီးဌာနမှ ဒေါ်အိအိကြွယ်နှင့် ကုန်သည်/ပွဲစား/စက်ပိုင် (၃၀)ဦး တက်ရောက်ခဲ့ပြီး တက်ရောက်လာသော ပွဲစား၊ ကုန်သည် စက်မှုလက်မှုလုပ်ငန်းရှင်များမှ တစ်ဦးချင်းမိတ်ဆက်စကားများပြောကြားခဲ့ပါသည်။ ဆက်လက်၍ မြို့နယ်စားသုံးသူရေးရာဦးစီးဌာန၊ တောင်တွင်းကြီးမြို့နယ် တာဝန်ခံဒေါ်ဌေးဌေး(ဒု-ဦးစီးမှူး)က မကွေးတိုင်းဒေသကြီး၊ စီမံစီးပွားရေးရာဝန်ကြီးဦးအောင်ချိန်၏ လမ်းညွှန်ချက်နှင့်အညီ အလုပ်အမှုဆောင်(၂၅)ဦးဖြင့် ရွေးချယ်ဖွဲ့စည်းရမည်ဖြစ်သကဲ့သို့ အသင်းကျစ်လစ်ခိုင်မာတောင့်တင်းမှသာလျှင် ဒေသတွင်းရောင်းဝယ် ဖောက်ကားမှု၊ ဒေသတွင်းဖွံ့ဖြိုးမှုနှင့် ဒေသခံတောင်သူများ၏ လူမှုစီးပွားဘဝဘက်စုံဖွံ့ဖြိုးတိုးတက် လာမည်ဖြစ်ပါကြောင်း ရှင်းလင်းဆွေးနွေးပြောကြားခဲ့ပါသည်။

            ဆက်လက်၍ ဆီစက်၊ ဝါစက်၊ ဆန်စက်လုပ်ငန်းနှင့် ပွဲရုံ လုပ်ငန်းရှင်များမှ ကုန်စည်ဒိုင်ဥက္ကဌအဖြစ် ဦးမောင်ချို၊ အတွင်းရေးမှူးအဖြစ် ဦးစိုးမြင့်နိုင်တို့ပါဝင်သော အလုပ်အမှုဆောင်(၂၅)ဦးတို့ကို အများဆန္ဒနှင့်အညီ အသစ်ပြန်လည်ရွေးချယ်ဖွဲ့စည်းပေးခဲ့ကြောင်း သတင်းရရှိပါသည်။

DOCA(မကွေး)

          မကွေးတိုင်းဒေသကြီး၊ စားသုံးသူရေးရာဦးစီးဌာန၊ မကွေးခရိုင်ဦးစီးမှူးရုံးမှ ဒု-ခရိုင်ဦးစီးမှူး ဦးမျိုးဝင်း(မကွေးမြို့နယ်တာဝန်ခံ)၊ ဦးအောင်ဖြိုးဝေ(ဒု-ဦးစီးမှူး)နှင့် ခရိုင်ဦးစီးမှူးရုံးမှ ဝန်ထမ်း များသည်  (၂၂.၇.၂၀၂၂)ရက်နေ့ နံနက်(၀၉:၀၀)နာရီမှ (၁၁:၀၀)နာရီထိ မကွေးမြို့၊ အခြေခံပညာ အလယ်တန်း(လေ့ကျင့်ရေးသင်တန်းကျောင်း)၌ ကျောင်းကျန်းမာ‌ရေးအဖွဲ့နှင့်ပူးပေါင်း၍  စားသုံးသူ ကာကွယ်‌ပေးရေး အသိပညာပေး ဆွေးနွေးခြင်းနှင့် ကျောင်းသား/ ကျောင်းသူများ ဘေးအန္တရာယ် ကင်းရှင်းစေရေး ကျောင်းမုန့်စျေးတန်းအား စျေးကွက်စောင့်ကြည့်စစ်ဆေးခြင်းကို ဆောင်ရွက်ခဲ့ပါသည်။

          မကွေးမြို့နယ်တာဝန်ခံ ဦးမျိုးဝင်း(ဒု-ခရိုင်ဦးစီးမှူး)မှ စားသုံးသူရေးရာဦးစီးဌာန၏ မျှော်မှန်း ချက်၊ ရည်မှန်းချက်များ၊ စားသုံးသူများရရှိနိုင်မည့် အခွင့်အရေး(၈)ချက်၊ တာဝန်(၄)ချက်နှင့် စားသုံးသူကာကွယ်ပေးရေး ဥပဒေ-၂၀၁၉ အခန်း(၁၈) ကုန်အညွှန်းအမှတ်အသား ပြည့်စုံစွာ ပါဝင်ရမည့် အချက်များကို အသေးစိတ်ရှင်းလင်း ဆွေးနွေးခဲ့ပါသည်။ ဆွေးနွေးပွဲအပြီးတွင် ကျောင်းမုန့်စျေးတန်းအား ကျောင်းစည်းကမ်းထိန်းသိမ်းကြီးကြပ်ရေးအဖွဲ့၊ ဆရာ/ဆရာမတို့နှင့် ပူးပေါင်းပြီး သက်တမ်း လွန်၊ မှိုတက်နှင့် ကုန်အညွှန်းအမှတ်အသား မပြည့်စုံသော ကုန်ပစ္စည်းများ မရောင်းချရေး ကျောင်းမုန့် စျေးသည်များအား အသိပညာပေးဆွေးနွေးပြီး စျေးကွက်စောင့်ကြည့် စစ်ဆေးခဲ့ပါသည်။

          အဆိုပါ စားသုံးသူရေးရာအသိပညာပေးဆွေးနွေးပွဲသို့ မကွေးမြို့၊ အခြေခံပညာအလယ်တန်း (လေ့ကျင့်‌ရေးသင်တန်းကျောင်း)မှ ကျောင်းအုပ်ဆရာမကြီး၊ ဆရာ/ဆရာမများ နှင့် ကျောင်းသား/ ကျောင်းသူ (၂၀၀)ဦးခန့် တက်ရောက်ခဲ့ပြီး ဌာနမှ စားသုံးသူအသိပညာပေး လက်ကမ်းစာစောင်များ ဖြန့်ဝေပေးခဲ့ကာ ကျောင်းသား/သူများအား ဆွေးနွေးဟောပြောခဲ့သည်များကို ပြန်လည်မေးမြန်းခဲ့ပြီး ဆုလက်ဆောင်များ ပေးအပ်ခဲ့ကြောင်း သိရှိရပါသည်။

DOCA(မကွေး)

         ပုသိမ်ခရိုင်၊ ပုသိမ်မြို့နယ်တာဝန်ခံဦးဝင်းမြင့်သည် မြို့နယ်စည်ပင်သာယာရေးအဖွဲ့နှင့်အတူ ကုန်သည်လမ်းရှိ မြို့ချစ်ကုန်စုံဆိုင်တွင် ရောင်းချနေသောအသားလုံး၊အသားချောင်း ထုတ်များအား စားသုံးသူများ ဘေးဥပါဒ်အန္တရာယ်မဖြစ်စေရေးနှင့် ကုန်အညွှန်းအမှတ်အသား ပြည့်စုံမှုမရှိသော ကုန်စည်များ ဈေးကွက်အတွင်းမှ ပပျောက်စေရန်ရည်ရွယ်၍ စားသုံးသူရေးရာဦးစီးဌာနမှ ဦးဆောင်ပြီး စည်ပင်သာယာရေးအဖွဲ့နှင့်အတူ ဇူလိုင်လ(၁၃)ရက်၊ နံနက် ၁၀ နာရီတွင် ကွင်းဆင်းစစ်ဆေးခဲ့ကြောင်း သိရသည်။

          အဆိုပါကုန်စုံဆိုင်အတွင်းရှိ အသားချောင်း၊ အသားလုံးထုတ်များများအား ကုန်အညွှန်း အမှတ်အသားကိုက်ညီမှုရှိ၊မရှိ ဈေးကွက် စောင့်ကြည့်စစ်ဆေးရာ ကုန်အညွှန်းအမှတ်အသား ကိုက်ညီမှုရှိကြောင်းတွေ့ရှိရသဖြင့် လုပ်ငန်းရှင်များအား ပြည့်စုံမှုမရှိသောကုန်စည်များ၊ မြန်မာ ဘာသာဖြင့် ဖော်ပြထားခြင်းမရှိသောကုန်စည်များအား ထုတ်ကုန်လုံခြုံစိတ်ချရမှု မရှိသဖြင့် မရောင်းချရန်အသိပညာပေးဆောင်ရွက်ခဲ့ပြီး ညွှန်ကြားချက် အမှတ်(၂/၂၀၁၉)ပါအတိုင်း သတ်မှတ်ချက်နှင့်အညီ ဆောင်ရွက်နိုင်ရန် လက်ကမ်းစာစောင်များ ဖြန့်ဝေပေးခဲ့ကြောင်း သတင်းရရှိပါသည်။

DOCA(ဧရာဝတီ)