သတင်းနှင့် လှုပ်ရှားမှုများ

         ပုသိမ်ခရိုင်၊ ရေကြည်မြို့နယ်တာဝန်ခံသည် မြို့နယ်ပြန်/ဆက်၊ မြို့နယ် အား/ကာ အဖွဲ့ များနှင့် ပူးပေါင်း၍ ဇူလိုင်လ (၁၅)ရက် နေ့လယ်(၁) နာရီအချိန်တွင် ရေကြည်မြို့နယ်၊ အ.မ.က ကျွန်းကုန်းကြီး ကျောင်းတွင် ဆရာ၊ဆရာမ (၄)ဦး၊ ကျောင်းသား၊ကျောင်းသူ(၈၂) ဦးတို့အားအသိ ပညာပေးဟောပြော ဆွေးနွေးခဲ့ပါသည်။

          ဟောပြောဆွေးနွေးပွဲတွင် စားသုံးသူရေးရာဦးစီးဌာန၏ မျှော်မှန်းချက်၊ ရည်ရွယ်ချက် အပါအဝင် ဈေးကွက်အတွင်းရောင်းချနေသော ကုန်ပစ္စည်းများတွင် ကုန်စည်အမျိုးအစား အပေါ်မူတည်၍ ကုန် အညွှန်းအမှတ်အသားပြည့်စုံစွာပါရှိရေး၊ စားသုံးသူကာကွယ်ရေးဥပဒေပါ စားသုံးသူများရရှိနိုင်သော အခွင့်အရေး(၈)ချက်နှင့် တာဝန်များ အစရှိသည့် စားသုံးသူ အခွင့်အရေးနှင့်ပတ်သက်၍ ဆွေးနွေးခဲ့ပြီး  စားသုံးသူပြည်သူများအနေနှင့် သိသင့်သိထိုက်သော ကုန်အညွှန်းအမှတ်အသားဖော်ပြထားသည့် အသိပညာပေးလက်ကမ်းစာစောင်များ ဖြန့်ဝေပေးခဲ့ကြောင်း သိရှိရပါသည်။

DOCA(ဧရာဝတီ)

စားသုံးသူရေးရာဦးစီးဌာန၏ ဝန်ထမ်းစွမ်းဆောင်ရည်မြှင့်တင်ရေး အထောက်အကူပြု အသိ ပညာပေးသင်တန်း(၁/၂၀၂၂)အား ၂၀၂၂ခုနှစ်၊ ဇူလိုင်လ (၂၁)ရက်နေ့ နေ့လည်(၁၃:၀၀)နာရီအချိန်တွင် မကွေးတိုင်းဒေသကြီး စားသုံးသူရေးရာဦးစီးဌာန၊ တိုင်းဒေသကြီးဦးစီးမှူးရုံး အစည်းအဝေးခန်းမ၌ ကျင်းပပြုလုပ်ခဲ့ရာ တိုင်းဒေသကြီးဦးစီးမှူး ဦးမြင့်ဝင်းမှ အဖွင့်အမှာစကား ပြောကြားခဲ့ပါသည်။
ဆက်လက်၍သင်တန်းတွင် ဟောပြောဆွေးနွေးမည့် သင်တန်းသား/သူများမှ အလှည့်ကျ မိတ်ဆက်ခြင်းများ ဆောင်ရွက်ခဲ့ကြပြီး ဟောပြောရန် အလှည့်ကျသည့် ဒုကြီးကြပ်ရေးမှူး ဦးမြင့်ကြည် မှ စားသုံးသူရေးရာဦးစီးဌာန ဖြစ်ပေါ်လာပုံ အဆင့်ဆင့်နှင့် စားသုံးသူကာကွယ်ရေးဥပဒေဖြစ်ပေါ်လာပုံ၊ စားသုံးသူကာကွယ်ရေးနှင့် အသိ ပညာပေးလုပ်ငန်း များဆောင်ရွက်နေမှုများအား Power Point ဖြင့် အသေးစိတ် ရှင်းလင်းဆွေးနွေးခဲ့ပြီး ဒုကြီးကြပ်ရေးမှူး ဒေါ်တင်လျမ်းဝေမှလည်း မိမိ တာဝန်ယူ ဆောင်ရွက်နေရသော မူဝါဒလေ့လာရေးနှင့် စီမံကိန်းစာရင်းအင်းဌာနခွဲမှ လုပ်ငန်းတာဝန်များ အကြောင်း ရှင်းလင်းဆွေးနွေးခဲ့ပါသည်။ ထို့နောက် ဒု-ဦးစီးမှူး ဒေါ်ဇင်ဝေဦးမှ စားသုံးသူအခွင့်အရေး (၈)ချက်နှင့် စားသုံးသူတာဝန်များ၊ စားသုံးသူတိုင်ကြား မှုဖြေရှင်းခြင်းဆိုင်ရာ ကိစ္စရပ်များအားလည်း ကောင်း၊ ဒု-ဦးစီးမှူး ဒေါ်ခင်စုစုမွန်မှ ကုန်အညွှန်းအမှတ်အသားဖော်ပြခြင်းနှင့် စပ်လျဉ်းသည်များ၊ ဈေးကွက်စောင့်ကြည့် စစ်ဆေးခြင်းလုပ်ငန်းနှင့် ထုတ်ကုန်လုံခြုံစိတ်ချရမှုဆိုင်ရာ လုပ်ငန်းများအား လည်းကောင်း Power Point များဖြင့် ရှင်းလင်းဆွေးနွေးခြင်းများ ဆောင်ရွက်ခဲ့ကြပါသည်။
ထို့နောက် စားသုံးသူရေးရာဦးစီးဌာနမှ ဒုတိယတိုင်းဒေသကြီးဦးစီးမှူး ဒေါ်အေးအေးမိုးမှ ဆွေးနွေးဟောပြောမှုများအပေါ် ပြန်လည်သုံးသပ်၍ လိုအပ်ချက်များအပေါ် လမ်းညွှန်မှာကြားမှုများ ပြုလုပ်ခဲ့ပြီး တိုင်းဒေသကြီးဦးစီးမှူး ဦးမြင့်ဝင်းမှ ယခုကဲ့သို့ အလေ့အကျင့်များပြုလုပ်ပေးခြင်းအားဖြင့် မြေပြင်ကွင်းဆင်းခြင်းလုပ်ငန်းများ၊ စားသုံးသူအသိပညာပေးလုပ်ငန်းများ ဆောင်ရွက်ရာ၌ အမှား အယွင်းမရှိ ကောင်းမွန်စွာ ဆွေးနွေးဟောပြောခြင်းများ ပြုလုပ်နိုင်မည်ဖြစ်ပါကြောင်း နိဂုံးချုပ်အမှာ စကားပြောကြားကာ ဆွေးနွေးပွဲအား (၁၅:၃၀)နာရီအချိန်တွင် ရုတ်သိမ်းခဲ့ပါသည်။ သင်တန်းသို့ စားသုံးသူရေးရာဦးစီးဌာနမှ တိုင်းဒေသကြီးဦးစီးမှူး၊ ဒုတိယတိုင်းဒေသကြီးဦးစီးမှူး၊ ခရိုင်ဦးစီးမှူးများ နှင့် ဌာနခွဲတာဝန်ခံများ၊ အရာထမ်း/ အမှုထမ်းများ စုစုပေါင်း(၄၅)ဦးတက်ရောက်ခဲ့ကြကြောင်း သတင်း ရရှိပါသည်။
DOCA(မကွေး)

              စားသုံးသူရေးရာဦးစီးဌာန၊ ကယားပြည်နယ်ဦးစီးမှူးရုံးမှ ၂၀၂၂ ခုနှစ်၊ ဇူလိုင်လ (၂၅) ရက် နေ့၊ နံနက် (၁၀:၀၀) နာရီအချိန်တွင် လွိုင်ကော်မြို့ပေါ်ရှိ ရွှေတောင်ရပ်ကွက်၊ မင်္ဂလာရပ်ကွက်၊ မင်းစုရပ်ကွက်နှင့် နောင်ယား(ခ)ရက်ကွက်ရှိ စတိုးဆိုင်များ၌ Thiri Comestic Co.,Ltd မှ တရား ဝင်တင်သွင်း ဖြန့်ဖြူးရောင်းချနေသော Mistine အလှကုန်ပစ္စည်းများတွင် FDA ခွင့်ပြုချက်၊ Hologram (ရောင်ပြန်) စတစ်ကာနှင့် မြန်မာစာ labelling များ မပါရှိဘဲ ကုန်ပစ္စည်းဆင်တူယိုးမှား ထုတ်လုပ်ဖြန့်ဖြူးရောင်းချနေမှုများ ရှိ/မရှိ မိတ်ဖက်ဌာနများဖြစ်သော ပြည်နယ်အစားအသောက်နှင့် ဆေးဝါးကွပ်ကဲရေးဦးစီးဌာန၊ မြို့နယ်အထွေထွေအုပ်ချုပ်ရေးဦးစီးဌာန၊ မြို့နယ်စည်ပင်သာယာရေးအဖွဲ့တို့နှင့် ပူးပေါင်း၍ ဈေးကွက်စောင့်ကြည့်စစ်ဆေးဆောင်ရွက်ခဲ့ပါသည်။

         ထိုသို့ဈေးကွက်စောင့်ကြည့်စစ်ဆေးရာတွင် လွိုင်ကော်မြို့ပေါ်ရှိ Peral Mart ၊ ဇဝတီစတိုး တို့တွင် Thiri Comestic Co.,Ltd မှ တရားဝင်ဖြန့်ဖြူး ရောင်းချသည့် Mistine အလှကုန် ပစ္စည်းများတွင် မြန်မာနိုင်ငံစားသုံးသူကာကွယ်ရေးကော်မရှင်မှ ထုတ်ပြန်ထားသော (၂ /၂၀၁၉) ညွှန်ကြားချက်ပါ ကုန်စည်နှင့် ကိုက်ညီသောအချက်များအား FDA ခွင့်ပြုချက်၊ Hologram (ရောင်ပြန်) စတစ်ကာနှင့် မြန်မာစာ labelling များဖော်ပြပါရှိသောကုန်စည်များအား တင်သွင်း ဖြန့်ဖြူးရောင်းချလျှက်ရှိကြောင်း၊ ရွှေကသစ်စတိုးနှင့် တော်ဝင်စတိုးဆိုင်တို့တွင် Mistine အလှကုန် ပစ္စည်းများ တင်သွင်းရောင်းချနေမှုမရှိကြောင်း စစ်ဆေးတွေ့ရှိရပြီး အလှကုန်ပစ္စည်းများ တင်သွင်း ဖြန့်ဖြူးရောင်းချနေသည့် လုပ်ငန်းရှင်များအနေဖြင့် (၂/၂၀၁၉)  ညွှန်ကြားချက်ပါ ကုန်အညွှန်းအမှတ်အသားဖော်ပြချက်နှင့်  ကိုက်ညီမှုရှိသော ကုန်စည်များကိုသာ တရားဝင်ဖြန့်ဖြူးရောင်းချကြရန်နှင့် တရားမဝင် တင်သွင်းဖြန့်ဖြူးသော ကုန်စည်များအား ရောင်းချခြင်းမပြုကြရန် အသိ‌ပေးဆွေးနွေးခဲ့ကြောင်း သတင်းရရှိပါသည်။

DOCA(ကယား)

            ၂၀၂၂ခုနှစ်၊ ဇူလိုင်လ (၂၀)ရက်နေ့ နံနက်(၀၉:၃၀)နာရီအချိန်တွင် မကွေးတိုင်းဒေသကြီးအစိုးရအဖွဲ့ စီးပွားရေးရာဝန်ကြီး ဦးအောင်ချိန်၊ မကွေးတိုင်းဒေသကြီး စားသုံးသူရေးရာဦးစီးဌာန တိုင်းဒေသကြီးဦးစီးမှူး ဦးမြင့်ဝင်း၊ စားသုံးသူရေးရာဦးစီးဌာန မကွေး ခရိုင်ဦးစီးမှူး ဒေါ်တင်တင်လှနှင့် တာဝန်ရှိသူတို့သည် ရေနံချောင်းမြို့နယ် အထွေထွေအုပ်ချုပ်ရေးဦးစီးဌာန အစည်းအဝေးခန်းမတွင် ရေနံချောင်းမြို့နယ်ရှိ ကုန်သည်များနှင့် စက်မှုလက်မှု လုပ်ငန်းရှင်များနှင့် တွေ့ဆုံခဲ့ကြကြောင်း သိရှိရပါသည်။

            အဆိုပါတွေ့ဆုံပွဲတွင် ဌာနဆိုင်ရာမှ တာဝန်ရှိသူ(၁၁)ဦး၊ ကုန်သည် စက်မှုလက်မှု လုပ်ငန်းရှင်များ (၃၇)ဦးတို့ တက်ရောက်ခဲ့ကြပြီး တိုင်းဒေသကြီးအစိုးရအဖွဲ့ စီးပွားရေးရာဝန်ကြီး ဦးအောင်ချိန်က ဒေသအလိုက်ကုန်စည်ဒိုင်အသင်းအဖွဲ့များ  ရေရှည်တည်တံ့ခိုင်မြဲပြီး ဒေသဖွံ့ဖြိုးတိုးတက်တိုးတက်အောင် ဆောင်ရွက်ရေး၊ မကွေးတိုင်းဒေသကြီး ကုန်သည်များနှင့် စက်မှုလက်မှု လုပ်ငန်းရှင်းများ  အသင်းအားပြန်လည်ဖွဲ့စည်းရာတွင်ဒေသစုံ၊ကဏ္ဍစုံမှ ကုန်သည်/လုပ်ငန်းရှင်များအားလုံး ပူးပေါင်းပါဝင် ဆောင်ရွက်နိုင်ရေးတို့ကိုအကျယ်တဝင့် ဆွေးနွေးခဲ့ပါသည်။

           ဆက်လက်၍ နေ့လယ် (၁၃:၃၀)နာရီအချိန်တွင် မကွေးတိုင်းဒေသကြီး အစိုးရအဖွဲ့ စီးပွား ရေးရာဝန်ကြီးနှင့် မကွေးတိုင်းဒေသကြီး၊ စားသုံးသူရေးရာဦးစီးဌာန တိုင်းဒေသကြီးဦးစီးမှူး၊ စားသုံးသူရေးရာဦးစီးဌာန မကွေးခရိုင်၊ ပခုက္ကူခရိုင် ဦးစီးမှူးနှင့် ဝန်ထမ်းများသည် ဆိပ်ဖြူမြို့နယ် အထွေထွေ အုပ်ချုပ်ရေးဦးစီးဌာန ငွေသဲဖြူခန်းမ၌လည်း ဆိပ်ဖြူမြို့နယ်နှင့် ချောက်မြို့နယ်ရှိ ကုန်သည် စက်မှုလက်မှု လုပ်ငန်းရှင်များနှင့် တွေ့ဆုံ၍ ကုန်စည်ဒိုင်ဖွံ့ဖြိုးတိုးတက်ရေးလုပ်ငန်းများ ပူးပေါင်း ပါဝင်ဆောင်ရွက်ရေး၊ ကျေးလက်နေ တောင်သူများလူမှုဘဝမြင့်မားတိုးတက်စေရေး၊ ဒေသတွင်းတည်ငြိမ် အေးချမ်းရေးနှင့် မိမိတို့အရပ်ဒေသတွင် ကျစ်လစ်ခိုင်မာသည့် ကုန်သည်နှင့် စက်မှုလက်မှုလုပ်ငန်းရှင် အသင်းဖော်ဆောင် နိုင်ပြီး တိုင်းဒေသကြီးအဆင့် ကုန်သည်နှင့်စက်မှုလက်မှုလုပ်ငန်းရှင်များ အသင်းအဖွဲ့ ဖွဲ့စည်းနိုင်ရေးနှင့် ထိုသို့ဖွဲ့စည်းရာတွင် တိုင်းဒေသကြီးအဆင့်တွင် အဖွဲ့ဝင်များပါဝင်နိုင်ရေး သက်ဆိုင်ရာ မြို့နယ် ကုန်စည်ဒိုင်များက သင့်တော်သည့် ကုန်သည်နှင့် စက်မှုလက်မှုလုပ်ငန်းရှင်များအားရွေးချယ်၍ ကိုယ်စားလှယ်စာရင်းများကို တိုင်းဒေသကြီးသို့ ပေးပို့ဆောင်ရွက်နိုင်ရေး လမ်းညွှန်ဆွေးနွေးပြောကြားခဲ့ပါသည်။ 

             ထို့နောက် တက်ရောက်လာကြသည့် ကုန်သည်နှင့် စက်မှုလက်မှုလုပ်ငန်းရှင်များမှ ဒေသတွင်း စီးပွားရေးလုပ်ငန်းများနှင့် ကုန်စည်ဒိုင်များ ဖွံ့ဖြိုးတိုးတက်ရေး လုပ်ငန်းများကို အသီးသီး တင်ပြ ဆွေးနွေးခဲ့ကြပြီး တိုင်းဒေသကြီးအစိုးရအဖွဲ့ စီးပွားရေးရာဝန်ကြီးမှ သက်ဆိုင်ရာ ခရိုင်/မြို့နယ် စီမံအုပ်ချုပ်ရေး အဖွဲ့ဝင်များနှင့် ပေါင်းစပ်ညှိနှိုင်း ဆောင်ရွက်သွားရန် လမ်းညွှန်ဆွေးနွေးခဲ့ပါသည်။ အဆိုပါ တွေ့ဆုံဆွေးနွေးပွဲသို့  ဌာနဆိုင်ရာတာဝန်ရှိသူ(၂၀)ဦးနှင့်ချောက်၊ ဆိပ်ဖြူမြို့နယ်တို့မှ ကုန်သည် လုပ်ငန်းရှင် (၄၅)ဦး တက်ရောက်ခဲ့ကြကြောင်း သတင်းရရှိပါသည်။

DOCA(မကွေး)

        စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ စားသုံးသူရေးရာဦးစီးဌာန၊ မကွေးတိုင်း ဒေသကြီး၊ တိုင်း/ခရိုင်ဦးစီးမှူး၏ လမ်းညွှန်ချက်ဖြင့် ပခုက္ကူခရိုင်ဦးစီးမှူးရုံးမှ ဒုတိယခရိုင်ဦးစီးမှူး ဒေါ်မွန်မွန်စိုးဦးဆောင်၍ မြို့နယ်တာဝန်ခံ ဦးဇော်မင်းဦးနှင့်ဝန်ထမ်းများအဖွဲ့သည် စားသုံးသူ ကာကွယ်ရေး ဥပဒေ (၂၀၁၉)  အခန်း(၁၈) ပါ ကုန်အညွှန်းအမှတ်အသား ပြည့်စုံစွာဖော်ပြခြင်းဖြင့် ဈေးကွက်အတွင်းရှိ မိမိတို့ထုတ်ကုန်များမှာ စားသုံးသူများအား ဘေးအန္တရာယ်ကင်းရှင်းစေနိုင် ကြောင်းကို သုံးစွဲသူကသိရှိလာပြီး စီးပွားရေးလုပ်ငန်းရှင်များအနေဖြင့်လည်း ဈေးကွက်များပိုမိုရရှိ လာစေရေးရည်ရွယ်ပြီး ဇူလိုင်လ(၇)ရက်နေ့၊နံနက်(၉:၀၀) အချိန်မှစတင်၍ ပခုက္ကူမြို့ပေါ်ရှိ "ရွှေလီ"ကိတ်နှင့်မုန့်မျိုးစုံလုပ်ငန်း၊ "အောင်ကမ္ဘာ"ဆားလှော်လုပ်ငန်း၊ "အောင်သစ္စာ" ဆီးယို/ဆီးထုပ် လုပ်ငန်း၊ "ဂွတ်ရှယ်"နှင့် "စတား-ရွှေ"ပဲကြော်လုပ်ငန်းများ၊"New Power" သောက်ရေသန့်လုပ်ငန်း စသည့် လုပ်ငန်းများအားကွင်းဆင်း၍ လုပ်ငန်းရှင်များနှင့် တွေ့ဆုံ ဆွေးနွေးခဲ့ပါသည်။

       ဒု-ခရိုင်ဦးစီးမှူးမှ လုပ်ငန်းရှင်များအား စားသုံးသူကာကွယ်ရေးဥပဒေပါ စီးပွားရေးလုပ်ငန်း ရှင်၏တာဝန်များ၊ မြန်မာနိုင်ငံ စားသုံးသူကာကွယ်ရေးကော်မရှင်၏ ညွှန်ကြားချက် (၂/၂၀၁၉) ပါ ကုန်စည်အုပ်စု(က)ရှိအရန်သင့်အစားအစာအမျိုးမျိုး၊  အသင့်စားမုန့်အမျိုးမျိုး၊ သောက်ရေသန့်တို့တွင် မြန်မာဘာသာဖြင့် ထည့်သွင်းရမည့်အချက်များ၊ ကုန်အညွှန်းအမှတ်အသားဖော်ပြခြင်းနှင့် ပတ်သက် သည့် ဥပဒေပြဌာန်းချက်များ၊ စီမံခန့်ခွဲရေးနည်းလမ်းအရအရေးယူခြင်း၊ တားမြစ်ချက်များ၊ ပြစ်မှုနှင့် ပြစ်ဒဏ်များအကြောင်း သိရှိလိုက်နာစေရန် အသေးစိတ်ရှင်းလင်းဆွေးနွေးခဲ့ပြီး မြန်မာနိုင်ငံ စားသုံးသူကာကွယ်ရေးကော်မရှင်၏ ညွှန်ကြားချက် (၂/၂၀၁၉) လက်ကမ်းစာစောင်များ ဖြန့်ဝေခဲ့ ပါသည်။

        သောက်ရေသန့်လုပ်ငန်း၏ ကုန်အမှတ်တံဆိပ်အား လေ့လာရာတွင် သောက်ရေသန့်မှာ စားသုံးသူကာကွယ်ရေးဥပဒေအရ ကုန်အညွှန်းအမှတ်အသားဖော်ပြချက်နှင့် ကိုက်ညီမှုရှိကြောင်း တွေ့ရှိရပါသည်။

        ဆက်လက်၍ "ဂွတ်ရှယ်" ပဲကြော်လုပ်ငန်းနှင့် "စတား-ရွှေ"ပဲကြော်လုပ်ငန်းများမှ ယခုအချိန် တွင် လက္ကားဖြန့်ဖြူးရောင်းချကြောင်း၊ ထိုမှတစ်ဆင့် လက်လီရောင်းချနိုင်ရန်နှင့် ရောင်းချချိန်တွင် မြန်မာဘာသာဖြင့် ထည့်သွင်းရမည့်အချက်များ၊ ကုန်အညွှန်းအမှတ်အသားဖော်ပြခြင်းနှင့် ပတ်သက် သည့် အလေးချိန်ပမာဏအလိုက် ခွဲခြား၍ ကုန်အမှတ်တံဆိပ်ရိုက်နှိပ်ဖြန့်ဖြူးသွားမည်ဖြစ်ကြောင်း ဈေးကွက်အနေဖြင့် ပခုက္ကူဒေသတွင်းနှင့် မုံရွာမြို့သို့ ဖြန့်ဖြူးရောင်းချကြောင်း၊ လုပ်သားဦးရေ (၁၀) ဦး ခန့်စီရှိပြီး နေ့စားလုပ်အားခအနေဖြင့် ( ၃၀၀၀ မှ ၅၀၀၀ ) ကျပ်ထိ ပေးရကြောင်းလုပ်ငန်းရှင်၏ ပြောကြားချက်အရ သိရှိရပါသည်။

DOCA(မကွေး)