သတင်းနှင့် လှုပ်ရှားမှုများ

  ကယားပြည်နယ်၊စားသုံးသူရေးရာဦးစီးဌာန၊ ပြည်နယ်ဦးစီးမှူးရုံးမှ ဝန်ထမ်းများသည် ၂၀၂၂ ခုနှစ်၊ စက်တင်ဘာလ(၁၉)ရက်နေ့၊ နံနက်(၁၀:၀၀)နာရီအချိန်တွင် လွိုင်ကော်မြို့၊ ဒေါဥခူရပ်ကွက်ရှိ အမှတ်(၆)အခြေခံပညာအထက်တန်းကျောင်း၌ ကျောင်းသား/ကျောင်းသူစုစုပေါင်း(၁၁၀)ဦးကို COVID စည်းကမ်းများနှင့်အညီ စားသုံးသူကာကွယ်ရေးအကြောင်း အသိပညာပေးဟောပြောဆွေးနွေးခဲ့ပါ သည်။

    အဆိုပါဟောပြောပွဲတွင် ဦးမိုးညွန့်ဦး(ဦးစီးအရာရှိ)က စားသုံးသူကာကွယ်ရေးနှင့်စပ်လျဉ်း၍ အခွင့်အရေးများ၊ စားသုံးသူများလိုက်နာရမည့် တာဝန်များကို ရှင်းလင်း ပြောကြားခဲ့ပြီး ဒေါ်နော်ကြူကြူ(ဒု-ဦးစီးမှူး)က ကျောင်းသား/ ကျောင်းသူများအား စားသုံးသူ ကာကွယ်ရေးဥပဒေပါ စားသုံးသူအခွင့်အရေးများ၊ ကုန်စည်(သို့)ဝန်ဆောင်မှုကို ဝယ်ယူသုံးစွဲခြင်း ကြောင့် နစ်နာဆုံးရှုံးမှုနှင့်စပ်လျဉ်း၍ စားသုံးသူဘက်မှ တောင်းဆိုနိုင်သည့် အချက်များကို လည်း ကောင်း၊ စားသုံးသူများ လိုက်နာရမည့်တာဝန်များကိုလည်းကောင်း၊ ကုန်အညွန်းအမှတ်အသားနှင့် စပ်လျဉ်း၍ ကုန်ပစ္စည်းများ ဝယ်ယူသုံးစွဲခြင်းမပြုမီ သတိပြုရမည့် အချက်များကိုလည်းကောင်း၊ စားသုံးသူအခွင့်အရေးများ နစ်နာဆုံးရှုံးမှုများရှိပါက စားသုံးသူသတင်းပြန်ကြားရေးနှင့် တိုင်ကြားမှု လက်ခံဆောင်ရွက်ရေးဌာနသို့ လူကိုယ်တိုင်ဖြစ်စေ၊ Website မှဖြစ်စေ၊ Doca Myanmar application များမှဖြစ်စေ ဆက်သွယ်တိုင်ကြားနိုင်ပါကြောင်း ၊ Consumer call center ၁၅၃၅ နံပါတ်များသို့ ခေါ်ဆို၍ စားသုံးသူရေးရာနှင့် စပ်လျဉ်း၍ သိရှိလိုသည်များကို မေးမြန်းနိုင်ပါကြောင်း ရှင်းလင်းပြောကြားခဲ့ပြီး အသိပညာပေးလက်ကမ်းစာစောင်များ၊ ဗွီနိုင်းများကို သက်ဆိုင်ရာ ကျောင်းအုပ်ဆရာမကြီးထံသို့ ပေးအပ်ခဲ့ကြောင်း သတင်းရရှိပါသည်။

DOCA(ကယား)

     မွန်ပြည်နယ်၊ စားသုံးသူရေးရာဦးစီးဌာန၊ မွန်ပြည်နယ်ဦးစီးမှူးရုံးမှ ဝန်ထမ်းများသည် ၁၃.၉.၂၀၂၂ ရက်နေ့၊ ၁၄.၉.၂၀၂၂ ရက်နေ့တို့တွင် ပို့ကုန်/သွင်းကုန် လုပ်ငန်းရှင်မှတ်ပုံတင် သက်တမ်း(၅) နှစ်နှင့် အောက်သက်တမ်းရှိသော ကုမ္ပဏီများအား မြေပြင်ကွင်းဆင်းစစ်ဆေးခြင်း ဆောင်ရွက်ခဲ့ကြောင်း သိရှိရသည်။

       ထိုသို့ စစ်ဆေးရာတွင် မော်လမြိုင်မြို့နယ်အတွင်းရှိ ကုမ္ပဏီ (၇၈) ခု၏ ကုမ္ပဏီတည်ရှိမှု၊ စီးပွားရေးလုပ်ငန်းအမျိုးအစားများခိုင်မာမှု ရှိ/မရှိနှင့် အမှန်တကယ်လုပ်ငန်းဆောင်ရွက်မှု ရှိ/မရှိ အခြေအနေတို့အား စစ်ဆေးခဲ့ကြောင်း သိရှိရပါသည်။

DOCA(မွန်)

      မွန်ပြည်နယ်စားသုံးသူရေးရာဦးစီးဌာန၊ ပြည်နယ်ဦးစီးမှူးသည် (၁၆.၉.၂၀၂၂) ရက်နေ့တွင် ပြည်တွင်းကုန်သွယ်ရေးဖွံ့ဖြိုးတိုးတက်မှုအတွက် မွန်ပြည်နယ်ရှိ ကွမ်းသီးလုပ်ငန်းရှင်များအား ပြည်နယ်ဦးစီးမှူးရုံးခန်း၌ တွေ့ဆုံဆွေးနွေးခဲ့သည်။

    ထိုသို့ဆွေးနွေးရာတွင် ဒေသထွက်ကွမ်းသီးများ အခြားဒေသများသို့ သယ်ယူပို့ဆောင်ရာတွင် မလိုလားအပ်သောကြန့်ကြာမှုများ မဖြစ်ပေါ်စေရန်နှင့် ကုန်စည်စီးဆင်းမှု လျင်မြန်ချောမွေ့စေရေးအတွက် ကွမ်းသီးများသယ်ဆောင်ရာတွင် စည်ပင်လုပ်ငန်းလိုင်စင်၊ ပြည်တွင်းအခွန်များဦးစီးဌာနသို့ ကြိုတင်ခွန် ၂% ပေးဆောင်ထားသည့်အထောက်အထားနှင့် မွန်ပြည်နယ်ကွမ်းသီးစိုက်ပျိုး ထုတ်လုပ်တင်ပို့ရောင်းချသူများအသင်း၏ ဒေသထွက်ဖြစ်ကြောင်း ထောက်ခံချက်များ လိုအပ်ကြောင်းနှင့် ကွမ်းသီးယာဉ်များဖြတ်သန်း သွားလာခြင်းများအား သက်ဆိုင်ရာဌာနများမှ ကဏ္ဍအလိုက်စစ်ဆေးခြင်းများ ဆောင်ရွက်နိုင်ရန်အတွက် ဌာနအလိုက်စစ်ဆေးရမည့် အချက်များအပေါ် မူတည်၍ ဒေသအခြေအနေနှင့် ကိုက်ညီသည့် Standard Operating Procedures (SOPs) ရေးဆွဲဆောင်ရွက်သွားရန် ပြည်နယ်အစိုးရအဖွဲ့မှညွှန်ကြားထားသည့် ကိစ္စရပ်များကို တွေ့ဆုံဆွေးနွေးခဲ့ကြောင်း သိရှိရပါသည်။

DOCA(မွန်)

    ရခိုင်ပြည်နယ်၊  စားသုံးသူရေးရာဦးစီးဌာန၊  ကျောက်ဖြူခရိုင်ဦးစီးမှူးရုံးမှ ဝန်ထမ်းများသည် ကျောက်ဖြူခရိုင်ဦးစီးမှူး၏ညွှန်ကြားချက်ဖြင့် (၁၆-၉-၂၀၂၂)နေ့ နေ့လယ် (၃:၀၀) နာရီအချိန်တွင်  ကျောက်ဖြူမြို့မဈေးကြီးသို့ သွားရောက်၍ ဈေးအတွင်းရောင်းချနေသော စားသောက်ကုန်ပစ္စည်း များအား ဈေးကွက်စောင့်ကြည့်စစ်ဆေးခြင်းဆောင်ရွက်ခဲ့ပါသည်။

    ဤကဲ့သို့ စစ်ဆေးရခြင်းမှာ ကျန်းမာရေးဝန်ကြီးဌာန အစားအသောက်နှင့်ဆေးဝါးကွပ်ကဲရေး ဦးစီးဌာန၏ Facebook လူမှုကွန်ယက်စာမျက်နှာပေါ်တွင် ၂၀၂၂ ခုနှစ် ဇန်နဝါရီလမှ ဇူလိုင်လအထိ ဓါတ်ခွဲစမ်းသပ်စစ်ဆေးချက်အရ စားသုံးရန်မသင့်သည့် အစားအသောက်များစာရင်းအား စားသုံးသူ မိဘပြည်သူများသိရှိစေရန် ထုတ်ပြန်ထားရှိမှုနှင့်စပ်လျဉ်း၍ မိမိတို့မြို့နယ် ဈေးကွက်အတွင်း ရောင်းချမှုရှိ/မရှိ သွားရောက်စစ်ဆေးရခြင်းဖြစ်ပါသည်။

    စားသုံးသူရေးရာဦးစီးဌာမှ ဝန်ထမ်းများသည် ဈေးအတွင်း စားသောက်ကုန်ရောင်းချနေသော  ဈေးဆိုင်လုပ်ငန်းရှင်များအား အစားအသောက်နှင့်ဆေးဝါးကွပ်ကဲရေးဦးစီးဌာနမှ ထုတ်ပြန်ကြောငြာ ထားသည့် အစားအသောက်နမူနာများအားသိရှိစေရန်နှင့် ဆိုင်တင်ရောင်းချမှုမပြုကြရန် အသိပေး ပြောကြားခြင်း၊ စားသုံးသူများဘေးဥပါဒ်မဖြစ်စေရေး ၎င်းအစားအသောက်များအားရောင်းချမှုရှိ/မရှိ ဈေးကွက်စောင့်ကြည့်စစ်ဆေးခြင်းဆောင်ရွက်ခဲ့ပါကြောင်းသိရှိရပါသည်။

DOCA(ရခိုင်)

    မကွေးတိုင်းဒေသကြီး၊ စားသုံးသူရေးရာဦးစီးဌာန၊ တိုင်းဒေသကြီးဦးစီးမှူး၏ လမ်းညွှန်မှုဖြင့် တိုင်း/ ခရိုင်/ မြို့နယ်များမှ ဝန်ထမ်းများသည် စားသုံးသူပြည်သူများ ကုန်စည်နှင့်ဝန်ဆောင်မှုများ  ဝယ်ယူသုံးစွဲရာတွင် ဘေးအန္တရာယ်ကင်းရှင်းရေး၊ ကျန်းမာရေးနှင့် စိတ်ကျေနပ်မှုရရှိစေရေး၊ ထုတ်ကုန်များ လုံခြုံစိတ်ချရမှုရှိစေရေးနှင့် ဘေးကင်းလုံခြုံမှုရှိသော ကုန်ပစ္စည်းများကို ထုတ်လုပ်၊ ဖြန့်ဖြူး ၊ ရောင်းချ နိုင်စေရန်ရည်ရွယ်၍ ကုန်အညွှန်းအမှတ်အသားဖော်ပြရာတွင် မြန်မာဘာသာဖြင့် ပြည့်စုံစွာ ဖော်ပြ လာရေး စိစစ်ဆောင်ရွက်ခြင်းနှင့် ဈေးကွက်စောင့်ကြည့်စစ်ဆေးခြင်း လုပ်ငန်းများကို ကျယ်ကျယ်ပြန့်ပြန့်‌ ဆောင်ရွက်လျက်ရှိပါသည်။

     ထို့သို့ဆောင်ရွက်ရာတွင် မကွေးခရိုင်၊ ချောက်ခရိုင်၊ မင်းဘူးခရိုင်၊သရက်ခရိုင်၊ အောင်လံခရိုင် နှင့် ပခုက္ကူခရိုင်အတွင်းရှိ မြို့ပေါ်ကုန်စုံဆိုင်၊ စတိုးဆိုင်များ၌ ရောင်းချလျက်ရှိသော ကုန်စည်များ တွင် စားသုံးသူကာကွယ်ရေးဥပဒေ (၂၀၁၉)၊ အခန်း(၁၈)ပါ ကုန်အညွှန်းအမှတ်အသား ဖော်ပြချက် များနှင့် မြန်မာနိုင်ငံစားသုံးသူကာကွယ်ရေးကော်မရှင်၏ ညွှန်ကြားချက်အမှတ် (၂/၂၀၁၉)အရ ကုန်စည်အုပ်စု(၈)ခု၊ ကုန်စည်အမျိုးအစား(၄၄)မျိုးတို့တွင် မြန်မာဘာသာဖြင့်     ကုန်အညွှန်းအမှတ်အသားများ ပြည့်စုံစွာ ‌ဖော်ပြထားခြင်း ရှိ/မရှိ ဈေးကွက်စောင့်ကြည့်စစ်ဆေးခြင်းကို စည်ပင်သာယာဈေးတွင် (၆၁)ကြိမ်၊ ကျောင်းမုန့်ဈေးတန်းတွင်(၂)ကြိမ်၊ ရပ်ကွက်/ ကျေးရွာတွင် (၅၆)ကြိမ်၊ ဆေးဝါးနှင့်ဆေး ပစ္စည်းအရောင်းဆိုင်တွင်(၄)ကြိမ်၊ စုစုပေါင်း ဈေးကွက်စောင့်ကြည့်စစ်ဆေးခြင်း (၁၂၃)ကြိမ် ဆောင်ရွက်ခဲ့ကြောင်း သိရှိရပါသည်။

     ကုန်အညွှန်းအမှတ်အသားဖော်ပြခြင်းနှင့်စပ်လျဉ်း၍ မကွေးခရိုင်အတွင်းရှိ လုပ်ငန်းရှင် (၃)ဦး မှ ကုန်အမှတ်တံဆိပ်(၃)ခု၊ ကုန်စည်အမျိုးအစား(၄)မျိုး၊ မင်းဘူးခရိုင်အတွင်းရှိ လုပ်ငန်းရှင်(၂)ဦးမှာ ကုန်အမှတ်တံဆိပ်(၂)ခု၊ ကုန်စည်အမျိုးအစား(၃)မျိုး၊ ပခုက္ကူခရိုင်အတွင်းရှိ လုပ်ငန်းရှင်(၂၁)ဦး၊ ကုန်အမှတ်တံဆိပ်(၂၁)ခု၊ ကုန်စည်အမျိုးအစား( ၆၃ )မျိုး၊  စုစုပေါင်း ကုန်အမှတ်တံဆိပ် ( ၂၆ )ခု၊ ကုန်စည်အမျိုးအစား(၇၀)မျိုးတို့အား စားသုံးသူကာကွယ်ရေးဥပဒေနှင့် ကိုက်ညီမှုရှိ/ မရှိ စိစစ်၍ ကိုက်ညီမှုရှိကြောင်း အတည်ပြုပြန်ကြားခြင်းများ ဆောင်ရွက်ခဲ့ကြောင်း သိရှိရပါသည်။

    ဤသို့ဈေးကွက်စောင့်ကြည့်စစ်ဆေးခြင်းနှင့် ကုန်အညွှန်းအမှတ်အသားများ စိစစ်ဆောင်ရွက် ခြင်းအားဖြင့် စားသုံးသူပြည်သူများ ဘေးကင်းလုံခြုံမှုရှိသော ကုန်စည်များရွေးချယ်ဝယ်ယူ သုံးစွဲနိုင်ခြင်း၊ စီးပွားရေးလုပ်ငန်းရှင်များမှလည်း ကုန်စည်များကို အရည်အသွေးပြည့်မီပြီး သတ်မှတ်စံချိန်စံညွှန်းနှင့် ကိုက်ညီမှုရှိသည့် ကုန်စည်များထုတ်လုပ်ဖြန့်ဖြူး ရောင်းချလာခြင်းဖြင့် ၊ ဈေးကွက်ဝေစုများ ပိုမိုရရှိကာ ဒေသတွင်းစီးပွားရေး ပိုမိုဖွံ့ဖြိုးတိုးတက်လာမည် ဖြစ်ပါကြောင်း ရေးသားတင်ပြလိုက်ရပါသည်။

DOCA(မကွေး)