သတင်းနှင့် လှုပ်ရှားမှုများ

စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ စားသုံးသူရေးရာဦးစီးဌာန၊ ကချင်ပြည်နယ်၊ ပြည်နယ်ဦးစီးမှူး ဦးကိုကိုဦးသည် ၆.၁၂.၂၀၂၁ ရက်နေ့တွင် မြစ်ကြီးနားမြို့၊ စီတာပူရပ်ကွက်ရှိ Star Light သောက်ရေသန့်၊ Grage 40 သောက်ရေသန့်၊ သက်စမ်းရေသောက်ရေသန့် လုပ်ငန်းရှင်များနှင့် တွေ့ဆုံ၍ ကုန်အညွှန်းအမှတ်အသားဖော်ပြခြင်းဆိုင်ရာ အသိပညာပေးဆွေးနွေးခဲ့ပါသည်။
ဆွေးနွေးရာတွင် ပြည်နယ်ဦးစီးမှူးက “ကုန်စည်လုံခြုံစိတ်ချရမှုအစ ကုန်အညွှန်းအမှတ်အသား က”ဆိုသည့်အတိုင်း ထုတ်ကုန်ပစ္စည်းများတွင် ကုန်အညွှန်းအမှတ်အသားပြည့်စုံစွာ ဖော်ပြပေးခြင်း ကြောင့် ထုတ်ကုန်များအပေါ်ယုံကြည်စိတ်ချရမှု ရှိလာမည်ဖြစ်ပြီး စီးပွားရေးလုပ်ငန်းရှင်သည်လည်း မိမိထုတ်လုပ်သည့်ကုန်စည်များတွင် ကုန်အညွှန်းအမှတ်အသားများကို ပြည့်စုံစွာဖော်ပြပေးခြင်းသည် စားသုံးသူအား ရိုးရှင်းမှန်ကန်သော သတင်းအချက်အလက်ပေးခြင်းဖြစ်ကြောင်း၊ စားသုံးသူကာကွယ်ရေး ဥပဒေပုဒ်မ ၄၁ အရ စီးပွားရေးလုပ်ငန်းရှင်သည် ကုန်အညွှန်အမှတ်အသားဖော်ပြခြင်းနှင့် စပ်လျဉ်း၍ ကုန်စည်အမျိူးအစားအလိုက်သတ်မှတ်အချက်နှင့်အညီ စီးပွားရေးလုပ်ငန်းရှင်များ လိုက်နာဆောင်ရွက်ရမည့် အချက်(၈)ချက် ဖော်ပြပါရှိပြကြောင်း၊ ပုဒ်မ ၄၃ အရ ကုန်စည်၏ အမျိုးအမည်၊ အရွယ်အစား၊ အရေအတွက်နှင့်အသားတင်ပမာဏ၊ ထားသိုသိမ်းဆည်းမှုအညွှန်း၊ သုံးစွဲပုံနည်းလမ်း၊ ကျန်းမာရေး ဆိုင်ရာဘေးထွက်ဆိုးကျိုး သို့မဟုတ် ဓာတ်မတည့်ကြောင်းဖော်ပြချက်နှင့် ကြိုတင်သတိပေးချက် တို့ကို မြန်မာဘာသာဖြင့်ဖြစ်စေ၊ မြန်မာဘာသာနှင့် အခြားဘာသာတစ်ခု သို့မဟုတ် တစ်ခုထက်ပို၍ တွဲလျက်ဖြစ်စေ မဖြစ်မနေဖော်ပြပေးရမည်ဖြစ်ကြောင်း ဆွေးနွေးခဲ့ပါသည်။

စားသုံးသူရေးရာဦးစီးဌာန
ကချင်ပြည်နယ်

        ကရင်ပြည်နယ်အတွင်းရှိလယ်မြေများတွင် ယခင်နှစ်က ရာသီဥတုများ ဆိုးရွားခဲ့ မှုကြောင့် ဆောင်းသီးနှံများဖြစ်သော ဆီထွက်သီးနှံ မြေပဲနှင့် အခြားပဲမျိုးစုံတို့အား စိုက်ပျိုး ထုတ်လုပ်မှု အားနည်းခဲ့သော်လည်း ယခုနှစ် ၂၀၂၁-၂၀၂၂ ခုနှစ်တွင် ဆောင်းသီးနှံဖြစ်သော မြေပဲစိုက်ဧကမှာ ၂၆၄၁၇ ဧက၊ နှမ်းစိုက်ဧကမှာ ၃၉၂၇၄ ဧက၊ ပဲတီစိမ်း စိုက်ဧကမှာ ၁၀၈၃၃ ဧက၊ မတ်ပဲစိုက်ဧကမှာ ၈၈၅ ဧက၊ ဘိုကိတ်ပဲစိုက်ဧကမှာ ၂၁၂၃၇ ဧက ၊ ပဲပုပ်စိုက်ဧကမှာ ၉၀၃၅ ဧကနှင့် အခြားပဲမျိုးစုံများလည်း စိုက်ပျိုးထားကြောင်း၊  ရာသီဥတုကောင်းမွန်မှုကြောင့် ဆောင်းသီးနှံဖြစ်သော မြေပဲ၊ နှမ်း နှင့် ပဲမျိုးစုံမှ ပဲတီစိမ်း၊ မတ်ပဲနှင့် အစေ့ထုတ်ပြောင်း သီးနှံများကို ယခင်နှစ်ကထက်ပိုမိုစိုက်ပျိုးလုပ်ကိုင်လျက်ရှိကြောင်း ဒေသတွင်းစိုက်ပျိုး ထုတ်လုပ်သူ တောင်သူများထံမှ လေ့လာစုံစမ်းသိရှိရပါသည်။

စားသုံးသူရေးရာဦးစီးဌာန(ကရင်ပြည်နယ်)

            စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ စားသုံးသူရေးရာဦးစီးဌာန၊ မကွေးတိုင်းဒေသကြီး၊ မင်းဘူးခရိုင်ဦးစီးမှူးရုံးမှ  ခရိုင်ဦးစီးမှူး ဒေါ်စုစုထွန်းနှင့်မြို့နယ်တာဝန်ခံ ဦးမြင့်ကြည်တို့သည် မင်းဘူးမြို့အတွင်း မြေဧက(၂၀)ပေါ်တွင် ဆောက်လုပ်ထားရှိသည့် နဂါးနီပလပ်စတစ် ထုပ်ပိုးပစ္စည်းစက်ရုံသို့  (၅.၁.၂၀၂၂)နေ့၊ နံနက် (၁၀:၃၀) အချိန်တွင် ကွင်းဆင်းလေ့လာခဲ့ပါသည်။ စားသုံးသူများနေ့စဉ်ဝယ်ယူသုံးစွဲလျှက်ရှိသော ငရုတ်သီး အကြမ်းမှုန့်၊ အရောင်တင်မှုန့်၊ လက်ဖက်၊ ကြက်သွန်ကြော်၊ နှမ်းအစရှိသည့် ပစ္စည်းအမျိုးအမယ် ပေါင်းများစွာကို ပါကင်ထုပ်ပိုးသည့် ပလပ်စတစ်(PP)အိတ်‌ဆိုဒ်အကြီး/အသေးအမျိုးအစား ပေါင်း(၅၀၀)ကျော်ကို နဂါးနီပလပ်စတစ်ထုပ်ပိုးပစ္စည်းစက်ရုံမှ နေ့စဉ်ထုတ်လုပ်ရောင်းချဖြန့်ဖြူးလျှက်ရှိကြောင်း၊ စက်ရုံအတွက်လိုအပ်သော ကုန်ကြမ်းကော်စေ့ကို နိုင်ငံခြားမှ မှာယူတင်သွင်း အသုံးပြုထုတ်လုပ်ကြောင်း၊ ထွက်ရှိလာသောကုန်ချောပလပ်စတစ်အိတ်ကို ယခင်(၁)ပေါင်ကို (၁၂၀ဝိ/-) ရောင်းချရပြီး  ယခုလက်ရှိပေါက်ဈေးမှာ (၁) ပေါင်ကို(၁၄၀ဝိ/-)ကျပ်ဝန်းကျင် ရောင်းချ ရပါကြောင်း၊ ဈေးကွက်အနေဖြင့် မကွေးတိုင်း၊ မန္တလေးတိုင်း၊ ရခိုင်ပြည်နယ်နှင့် ရှမ်းပြည်နယ် (တောင်ကြီး)၊ စစ်ကိုင်တိုင်း(မုံရွာ)မြို့များသို့ တင်ပို့ရောင်းချဖြန့်ဖြူးပေးလျှက်ရှိသည်ကိုလေ့လာသိရှိရပါသည်။တစ်လထုတ်လုပ်နိုင်မှုမှာ ပေါင်သုံးသိန်းမှ လေးသိန်းထိ ထုတ်လုပ်ရောင်းချနိုင်ပြီး စက်ရုံအတွက် နေ့စဉ်လုပ်သားဦးရေ(၂၀၀)ခန့်အသုံးပြုရသည့်အတွက် ဒေသခံပြည်သူများအတွက်  အလုပ်အကိုင်အခွင့်အလမ်းများဖန်တီးပေးလျှက်ရှိသည်ကို လေ့လာတွေ့ရှိရပါကြောင်း၊        ပလပ်စတစ်အိတ် ထုတ်လုပ်ရောင်းချသည့် လုပ်ငန်းများအောင်မြင်မှုများစွာရရှိသည့်အတွက် စက်ရုံလုပ်သားများအနေဖြင့် စားဝတ်နေရေးပြေလည်မှုများစွာရရှိသည်ကိုသိရှိရပါကြောင်း၊ ယခု Covid-19 ရောဂါဖြစ်ပွားချိန်တွင်လည်း လုပ်ငန်းများရပ်နားမှုမရှိဘဲ လည်ပတ်လျှက်ရှိသည့်အတွက် လုပ်သားများစားဝတ်နေရေးပြေလည်စေရန် အလှည့်ကျနေ့ဆိုင်း၊ညဆိုင်းများဖြင့်  လုပ်ကိုင်နိုင်ရေး စီစဉ်ဆောင်ရွက်ပေးလျှက်ရှိပါကြောင်း၊ မကွေးတိုင်းတွင် ပလပ်စတစ်ထုပ်ပိုးပစ္စည်း ထုတ်လုပ် သည့်စက်ရုံမရှိသည့်အတွက် စက်ရုံမှထုတ်သမျှအကုန်ရောင်းချရပါကြောင်း၊ ဒေသတွင်း အလုပ်အကိုင်များ ဖန်တီးပေးထားနိုင်သည့်အပြင် သဘာဝပတ်ဝန်းကျင်မထိခိုက်စေရေး အတွက်လည်း သက်ဆိုင်ရာဌာနများ၏ အကြံပြုချက်အတိုင်း ဆောင်ရွက်ထားသည်ကို လေ့လာသိရှိရပါကြောင်း၊ ဝန်ထမ်းအားလုံးလည်း Covid-19 ကာကွယ်ဆေးထိုးနှံပေးပြီးဖြစ်ပါကြောင်း၊ စက်ရုံမန်နေဂျာ ဦးအောင်မျိုး၏ ရှင်းလင်းပြောပြချက် အရသိရှိရသည့်အတွက် အညာဒေသနမ္မဒါမြေမှ ဒေသတွင်းအလုပ်အကိုင်ဖန်တီးပေးထားနိုင်မှုအခြေအနေအား ဝမ်းမြှောက်ဖွယ်ရာရေးသား တင်ပြလိုက်ရပါသည်။

စားသုံးသူရေးရာဦးစီးဌာန

မကွေးတိုင်းဒေသကြီး

                စားသုံးသူရေးရာဦးစီးဌာန၊ ကချင်ပြည်နယ်ဦးစီးမှူးရုံးတွင် ၅.၁.၂၀၂၂ ရက်နေ့ ၁၀:၀၀ နာရီအချိန်၌ စားသုံးဆီထုတ်လုပ်ဖြန့်ဖြူးရောင်းချသည့် လုပ်ငန်းရှင်(၈)ဦးအားဖိတ်ကြား၍ ဟင်းသီးဟင်းရွက်ဆီနှင့် စပ်လျဉ်း၍ ကုန်အညွှန်းအမှတ်အသားဖော်ပြရာတွင် စီးပွားရေးလုပ်ငန်းရှင်များ လိုက်နာဆောင်ရွက်ရန် ညွှန်ကြားချက် အမှတ်(၁/၂၀၂၁)အပေါ် ရှင်းလင်းဆွေးနွေးခဲ့ပါသည်။

         ဆွေးနွေးရာတွင် ဒုတိယပြည်နယ်ဦးစီးမှူး ဦးစန်းလွင်ဦးက ကုန်စည်အုပ်စု(၈)ခုအနက် အုပ်စု(က) အစားအသောက်ကုန်စည်အုပ်စုတွင်ပါဝင်သည့် စားသုံးဆီအမျိုးမျိူးနှင့်စပ်လျဉ်း၍ အမျိုး အမည်၊ အရွယ်အစား၊ အရေအတွက်နှင့် အသားတင်ပမာဏ၊ ထားသိုသိမ်းဆည်းပုံအညွှန်းတို့ကို မြန်မာဘာသာဖြင့် မဖြစ်မနေဖော်ပြရန်လိုအပ်ကြောင်း၊ ဈေးကွက်အတွင်း အချို့သော စားသုံးဆီများကို ဟင်းသီးဟင်းရွက်ဆီဟူ၍ဖော်ပြပြီး ထုတ်လုပ်ဖြန့်ဖြူးလျှက်ရှိခြင်းကြောင့် ပင်ရင်းပစ္စည်းများကို အခြေခံဖော်ပြထားခြင်းမရှိသော ယေဘုယျဆန်သည့် အမျိုးအမည်တစ်ခုသာဖြစ်ကြောင်း၊ စားသုံးသူများထင်ယောင်ထင်မှားမဖြစ်စေရေးနှင့် အခြေခံလိုအပ်ချက်အပေါ်တွင် စိတ်ကျေနပ်မှုရှိစေရေးအတွက် ဈေးကွက်အတွင်းဖြန့်ဖြူးရောင်းချသည့် ဟင်းသီးဟင်းရွက်ဆီ (Vegetable Oil, Cooking Oil) အမျိုးအစားနှင့်စပ်လျဉ်း၍ ကုန်အညွှန်းအမှတ်အသားဖော်ပြရာတွင် ပင်ရင်းပါဝင်ပစ္စည်းကို အခြေခံသောကုန်စည်အမျိူးအမည်ကိုတိကျစွာ မြန်မာဘာသာဖြင့်ဖော်ပြရမည်ဖြစ်ပြီး ကုန်စည်၏ အသားတင်ပမာဏနှင့် အရွယ်အစားတို့အား မြန်မာအလေးချိန်ယူနစ်ဖြစ်သော ပိဿာ/ကျပ်သား တို့ဖြင့် ဖော်ပြရမည်ဖြစ်ကြောင်း၊ ညွှန်ကြားချက် ၁/၂၀၂၁ သည် စတင်ထုတ်ပြန်သည့် ၂၀.၁၂.၂၀၂၁ ရက်နေ့မှ (၆)လ ပြည့်မြောက်ပြီးသည့်နေ့မှစ၍ အာဏာသက်ရောက်မည်ဖြစ်သည့်အတွက် စီးပွားရေးလုပ်ငန်းရှင်များ အနေဖြင့် ကုန်အညွှန်းအမှတ်အသားဖော်ပြရာတွင် ကိုက်ညီမှု ရှိ/မရှိ သက်ဆိုင်ရာ ဦးစီးဌာနတွင် တင်ပြလျှောက်ထားရန်နှင့် ကုန်အညွှန်းအမှတ်အသားကိုက်ညီကြောင်း  အကြောင်းကြားစာ ရရှိပြီးမှသာ ဈေးကွက်သို့ တင်ပို့ဖြန့်ဖြူးရောင်းချရမည်ဖြစ်ကြောင်း၊ စားသုံးသူကာကွယ်ရေးဥပဒေပါ တားမြစ်ချက်ပုဒ်မ(၆၈)အရ ကုန်အညွှန်းအမှတ်အသား ကိုက်ညီမှုမရှိသည့် ကုန်စည်ကို ထုတ်လုပ်ခြင်း၊ ကုန်သွယ်ခြင်း သို့မဟုတ် ရောင်းချခြင်း မပြုရန်နှင့် ဖောက်ဖျတ်ကျူးလွန်ပါက ပုဒ်မ(၇၃)အရ ပြစ်ဒဏ်ကျခံရမည်ဖြစ်ကြောင်း အကျယ်တဝင့် ရှင်းလင်းဆွေးနွေးခဲ့ကြောင်း သတင်းရရှိပါသည်။

စားသုံးသူရေးရာဦးစီးဌာန                                                     

ကချင်ပြည်နယ်        

           မြင်းခြံခရိုင်သည်မြို့နယ်(၄)ခုဖြင့် ဖွဲ့စည်းထားရှိပြီးစိုက်ပျိုးရေးအနေဖြင့် မြေပဲကိုအဓိထား စိုက်ပျိုးကြပါသည်။ မြေပဲတွင် ပင်တောင်နှင့်ပင်ပြန့်(၂)မျိုးရှိပါရာ ပင်တောင်မြေပဲမျိုးသည် စိုက်ပျိုး ရက်ပေါင်း (၁၁၀) မှ (၁၃၀) အတွင်းခူးဆွတ် ရိတ်သိမ်းရပြီး ပင်ပြန့်မျိုးသည် ရက်ပေါင်း (၁၃၀) မှ (၁၅၀) အတွင်း ခူးဆွတ်ရိတ်သိမ်းလေ့ရှိပါသည်။

        မြင်းခြံခရိုင်၏၂၀၂၀-၂၀၂၁ခုနှစ် ယခင်နှစ်မိုးမြေပဲစိုက်ဧကမှာ (၁၇၉၀၅၂) ဧကရှိပြီး အထွက်နှုန်းမှာ (၄၀.၀၅) တင်းနှုန်းဖြင့် တင်းပေါင်း (၇၁၇၁၀၃၂) တင်းထွက်ရှိခဲ့ပါသည်။ ၂၀၂၁-၂၀၂၂ခုနှစ်တွင် မိုးမြေပဲကို (၁၈၀၆၉၄) ဧကစိုက်ပျိုးခဲ့ပြီး ဒီဇင်ဘာလ စတုတ္တအပတ်အထိ ရိတ်သိမ်းဧကမှာ (၁၀၆၉၂၂) ဧက၊ အထွက်နှုန်းမှာ (၄၂.၄၀) တင်းနှုန်းဖြင့် တင်းပေါင်း (၄၅၃၃၄၉၂) တင်း ထွက်ရှိခဲ့ကြောင်း သက်ဆိုင်ရာဌာနများ၏ စာရင်းများအရသိရပါသည်။

        ယခင်နှစ်စိုက်ဧကထက် ပိုမိုစိုက်ပျိုးနိုင်ခဲ့ပြီး အထွက်နှုန်း အနေဖြင့်လည်း ပိုမိုထွက်ရှိခဲ့ပါသည်။၂၀၂၁-၂၀၂၂ခုနှစ် ခရိုင်အတွင်းရှိမြို့နယ်များ၏ စိုက်ပျိုးထုတ်လုပ် မှုအခြေအနေများမှာ မြင်းခြံမြို့နယ်တွင် စိုက်ဧက(၂၃၅၂၈)၊ ရိတ်ဧက(၁၈၉၄၀)ဧက၊ အထွက်နှုန်း (၄၆.၇၉)တင်း၊ အထွက်တင်းပေါင်း(၈၈၆၂၀၂)တင်း၊ တောင်သာမြို့နယ်တွင် စိုက်ဧက(၉၉၇၄၇) ဧက၊ ရိတ်ဧက(၅၀၂၁၁)ဧက၊ အထွက်နှုန်း(၃၉.၂၅)တင်းနှင့် အထွက်တင်းပေါင်း (၁၉၇၀၇၈)တင်း၊ နွားထိုးကြီးမြို့ နယ်တွင်စိုက်ဧက(၃၉၁၆၈)ဧက၊ ရိတ်သိမ်းဧက(၁၉၅၂၀)ဧက၊ အထွက်နှုန်း(၄၁.၅၁)တင်းနှင့်ငါန်းဇွန်မြို့ နယ်တွင်စိုက်ဧက(၁၈၂၅၁)ဧက၊ ရိတ်ဧက(၁၈၂၅၁)ဧက၊ အထွက်နှုန်း(၄၇.၄၆)တင်းနှုန်းဖြင့် တင်းပေါင်း (၈၆၆၁၉၂)တင်းထွက်ရှိခဲ့ပါသည်။ မိုးမြေပဲကို မေလနှင့်ဇွန်လတို့တွင်စတင်စိုက်ပျိုးကြပြီး၊ပင်ထောင်မျိုး မြေပဲကိုစက်တင်ဘာ၊အောက်တိုဘာ၊ပင်ပြန့်မျိုးမြေပဲကို နိုဝင်ဘာနှင့်ဒီဇင်ဘာလ  တို့တွင်ရိတ်သိမ်း လေ့ရှိကြောင်းသိရပါသည်။ မြေပဲကိုစားသုံးဆီအဖြစ် အသုံးပြုသည်သာမက မြေပဲကြော် မြေပဲဆား လှော်နှင့် မုန့်ပဲသွားရေစာများတွင်လည်းကောင်း၊အခြားမုန့်အမျိုးမျိုးတွင်ရောစပ်၍လည်းကောင်း၊ဟင်းချက်စရာအဖြစ်လည်း ကောင်းအသုံးပြုကြပါသည်။ ထို့အပြင် ဆီထုတ်ယူပြီး မြေပဲကြိတ်ဖတ်ကို တိရိစ္ဆာန်အစာအဖြစ် မွေးမြူရေးလုပ်ငန်းများတွင် အရေးပါသည့် ကုန်ကြမ်းအနေဖြင့် အသုံးပြုကြပါသည်။ ယခင်လ မြေပဲဆံဈေးအနေဖြင့် ဆီဆံတစ်ပိဿာလျှင် (၂၁၀၀)ကျပ်၊ လုံးဆံတစ်ပိဿာလျှင် (၂၂၀၀)ကျပ်ဖြစ်ပေါ်ခဲ့ပြီး ယခုလအတွင်းဆီဆံ(၂၄၀၀)ကျပ်၊ လုံးဆံ(၂၅၀၀)ကျပ်နှင့် မြေပဲကြိတ်ဖတ် တစ်ပိဿာလျှင်မြို့ပေါ် ဈေး(၁၁၀၀)ကျပ်နှင့် ရွာဈေးအနေဖြင့် (၉၀၀)ကျပ်၊ မြေပဲဆီသန့်တစ်ပိဿာလျှင် (၆၃၀၀)ကျပ်ဖြင့် အရောင်းအဝယ်ဖြစ်ပါသည်။

          ယခင်နှစ်ထက် စိုက်ပျိုးဧက ပိုမိုစိုက်ပျိုးပြီး တစ်ဧကအထွက်နှုန်းများလည်း ၂.၃၅တင်း ပိုမိုထွက်ပြီး ဈေးကောင်းရရှိသဖြင့် တောင်သူများပိုမိုစိုက်ပျိုးသင့်ကြောင်း ပြည်ပဆီတင်သွင်းမှုအား လျော့ချနိုင်ရေးနှင့် ပြည်တွင်းဆီစက်လုပ်ငန်းများ ပိုမိုကြိတ်ခွဲ ထုတ်လုပ်နိုင်ရေးအတွက် တစ်ဖက် တစ်လမ်းမှ အထောက်အကူပြုသကဲ့သို့ နိုင်ငံတော်နိုင်ငံခြားငွေအသုံးချမှု လျော့ချစေနိုင်ပြီး ပြည်သူများ အလုပ်အကိုင်အခွင့်အလမ်း ပိုမိုရရှိစေမှာဖြစ်ပြီး လူနေမှုဘဝ တိုးတက်မြင့်မားလာစေမည် ဖြစ်ကြောင်း သုံးသပ်တင်ပြလိုက်ရပါသည်။‌

DOCA(မန္တလေး)