ပြည်တွင်းကုန်သွယ်မှုသတင်း

           စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ စားသုံးသူရေးရာဦးစီးဌာန၊  ရန်ကုန်အရှေ့ပိုင်းခရိုင်ဦးစီးမှူးရုံးအနေဖြင့် ပုဇွန်တောင်ဈေးမှ အခြေခံစားသောက်ကုန်များ၏ ဈေးနှုန်းများကို ကောက်ခံလျက် ရန်ကုန်တိုင်းဒေသကြီးဦးစီးမှူးရုံးသို့ နေ့စဉ်တင်ပြလျက်ရှိရာ (၁.၃.၂၀၂၂) ရက်နေ့ အခြေခံစားသောက်ကုန်ဈေးနှုန်းများမှာ စားအုန်းဆီ ၁ ပိဿာ ၆၆၀ဝိ/-၊ ပဲဆီသန့် ၁ ပိဿာ ၉၀၀ဝိ/-၊ ကြက်သွန်နီ ၁ ပိဿာ ၈၀ဝိ/-၁၂၀ဝိ/-၊ ကြက်သွန်ဖြူ(ကြူကုတ်) ၁ ပိဿာ ၄၅၀ဝိ/-၊ အာလူး ၁ ပိဿာ ၁၅၀ဝိ/-၁၈၀ဝိ/- ဂျင်း ၁ ပိဿာ ၂၅၀ဝိ/-  ၃၀၀ဝိ/-၊ ကုလားပဲခြမ်း ၁ ပိဿာ ၃၂၀ဝိ/-၊ ပဲနီလေး ၁ ပိဿာ ၅၀၀ဝိ/-၊ ပဲဝါလေး ၁ ပိဿာ ၃၇၀ဝိ/-၊ ဂေါ်ဖီထုပ် ၁ ထုပ် ၆၀ဝိ/-၈၀ဝိ/-၊ ပန်းဂေါ်ဖီ(ရှမ်း)၁ ပွင့် ၇၀ဝိ/-၈၀ဝိ/- ဖြင့် ရောင်းချလျက်ရှိကြောင်း သိရှိရပါသည်။

DOCA(ရန်ကုန်)

           ပြည်ထောင်စုနယ်မြေအတွင်းမှ နှစ်စဉ်ပြည်ပဝင်ငွေရရှိစေသော မန်ကျည်းသီးမှည့် (အစေ့ပါ/ အကြောဆွဲ)များအား နေပြည်တော်မှ ရန်ကုန်သို့ တင်ပို့နေမှု အခြေအနေများကို နေ့စဉ်တွေ့မြင်နေရပါသည်။

           နေပြည်တော်၊ တပ်ကုန်းမြို့နယ်မှ နေ့စဉ်နီးပါးခန့် ပိဿာချိန်‌(၈၀၀၀)ကျော် တင်ပို့မှုရှိနေသည်ကို တွေ့ရှိနေရပြီး ယခင်တင်ပို့ပြီး မန်ကျည်းသီးမှည့် ပိဿာချိန်(၁၇၀၀၀၀)ကျော် တင်ပို့ပြီးဖြစ်သည်ကိုလည်း လေ့လာတွေ့ရှိရပါသည်။ နေပြည်တော်အနေဖြင့် ယခင်နှစ် မန်ကျည်းသီးမှည့် တင်ပို့မှုမှာ ပိဿာချိန် (၃)သိန်းကျော် တင်ပို့နိုင်ခဲ့သည်ဟုလည်း သိရပါသည်။

       ပြည်ပတင်ပို့မှုအနေဖြင့် ယခင်နှစ်များက မြန်မာနိုင်ငံမှ မလေးရှားသို့ တင်ပို့မှုသာရှိနေသည့် အနေအထားရှိခဲ့သော်လည်း ယခုနှစ် မန်ကျည်းမှည့်တင်ပို့မှုများတွင် ပါကစ္စတန်သို့ တင်ပို့ရန်အတွက် ဝယ်ယူနေသည်ဟုသိရှိရပြီး တင်ပို့မှုများ အသင့်အနေအထားဖြစ်စေရန်အတွက် ထုတ်ပိုးမှုတွင် အိတ်အတွင်း ရေစိုခံပလပ်စတစ်ကို အတွင်းခံအဖြစ် အသုံးပြု၍ အိတ်တစ်အိတ် အလေးချိန်(၃၀.၆၅) ပိဿာ ထည့်သွင်းထုတ်ပိုးခြင်းဖြင့် တင်ပို့နေရသည်ဟု သိရပါသည်။

     မန်ကျည်းမှည့်စတင်ထွက်ပေါ်ချိန် ဒီဇင်ဘာလနောက်ဆုံးအပတ်မှစတင်၍ ဈေးနှုန်းဖြစ်ပေါ်လာမှုတွင် မန်ကျည်းသီးမှည့် (အစေ့ပါ/အကြောဆွဲ) မန်ကျည်းသီးမှည့် တစ်ပိဿာ(၁၃၀၀)ကျပ် ဈေးဖြစ်ပေါ်ခဲ့ပြီး ဖေဖော်ဝါရီလ ဒုတိယအပတ်တွင်(၁၂၅၀)ကျပ်အထိ ဈေးရှိခဲ့ပြီး ဖေဖော်ဝါရီလ နောက်ဆုံးအပတ်တွင် (၁၃၀၀)ကျပ် ဈေးဖြစ်ပေါ်ခဲ့ပါသည်။ ယခင်နှစ်မန်ကျည်းသီးမှည့် တစ်ပိဿာ ဈေးမှာ(၁၂၀၀) ကျပ်ဈေးနှုန်းသာ အမြင့်ဆုံးဖြစ်ခဲ့သည်ဟုလည်း သိရှိရပါသည်။

       သို့ဖြစ်ပါ၍ မန်ကျည်းပင်သည် ‌ရှေးလူကြီးများအဆိုအရ “နွေ ထနောင်း၊ ဆောင်း မန်ကျည်း” နွေရာသီတွင် ထနောင်းရိပ်က အေးချမ်းမှုကိုပေးစွမ်းသလို ဆောင်းရာသီတွင် မန်ကျည်းပင်ရိပ်က အေးချမ်းမှုကို ပေးစွမ်းနိုင်သည်ဟု ဆိုရိုးစကားရှိထားခဲ့သည့်အပြင် အရွက်နု၊ အသီးနု၊ အသီးမှည့်ကို   လည်း ဟင်းလျာအဖြစ်စား၊ အကိုင်းအခတ် အတက်အလက်ကိုလည်း ထင်း၊ မီးသွေး၊ လောင်စာအဖြစ် သုံးလို့ရ၊ အသီးမှည့်ကိုလည်း မြန်မာ့တိုင်းရင်းဘယဆေးဖက်ဝင်သည့်အပြင် တန်ဖိုးမြင့်ထုတ်ကုန် (value added) စားသောက်ကုန်အဖြစ် မန်ကျည်းသီးမှည့်အား မန်ကျည်းလိပ်၊ မန်ကျည်းပြား၊ မန်ကျည်းတော်ဖီ၊ မန်ကျည်းဖျော်ရည်၊ ဆေးမန်ကျည်း၊ အလှကုန်ပစ္စည်းများ စသည်ဖြင့် ပြည်ပဝင်ငွေရရှိစေသည့် တန်ဖိုးမြှင့်ထုတ်ကုန်တစ်ခုအဖြစ် မန်ကျည်းသီးမှည့် ထုတ်လုပ်မှုစွမ်းအား ပိုမိုမြှင့်တင်ကြစေရန် ရည်ရွယ်လျက် သတင်းကောင်းတစ်ပုဒ်အဖြစ် ရေးသားတင်ပြလိုက်ရပါသည်။

DOCA(ပြည်ထောင်စုနယ်မြေ)

           ပဲခူးတိုင်းဒေသကြီး၊ စားသုံးသူရေးရာဦးစီးဌာန၊ ပြည်ခရိုင်၊ ပြည်မြို့နယ်အနေဖြင့် စားသုံးသူများ သုံးစွဲနေသောကုန်ပစ္စည်းများ ဘေးအန္တရာယ်ကင်းရှင်းစေရေးအတွက် ပြည်မြို့နယ် တာဝန်ခံဦးထွန်းနိုင်လင်းနှင့်အဖွဲ့သည် ဖေဖော်ဝါရီလ (၂၄)ရက် နေ့လည် (၁:၃၀) အချိန်တွင် ပြည်မြို့နယ် အတွင်း၌ ထုတ်လုပ်ဖြန့်ဖြူးရောင်းချနေသော သစ်ရိပ်သာဒိန်ချဉ်လုပ်ငန်းရှင်နှင့် တွေ့ဆုံဆွေးနွေးခဲ့ပါသည်။

           ထိုသို့တွေ့ဆုံဆွေးနွေးရာတွင် ပြည်မြို့နယ်တာဝန်ခံမှ ထုတ်ကုန်များပေါ်တွင် ကုန်အညွှန်းအမှတ်အသားဖော်ပြချက်များမှာ စားသုံးသူကာကွယ်ရေးဥပဒေနှင့်အညီ မှန်ကန်ပြည့်စုံစွာ ဖော်ပြနိုင်ရေး၊ စားသုံးသူများ သုံးစွဲရာတွင် လုံခြုံစိတ်ချရမှုရှိသောထုတ်ကုန် ပစ္စည်းများကိုသာ အသုံးပြုနိုင် ရေးအတွက်  အသိပညာပေးဆွေးနွေးခဲ့ပြီး မြန်မာနိုင်ငံစားသုံးသူကာကွယ်ရေးကော်မရှင် ညွှန်ကြားချက် (၂/၂၀၁၉)ပါရှိသည့် လက်ကမ်းစာစောင်များအား ဖြန့်ဝေပေးခဲ့ကြောင်း သတင်းရရှိ ပါသည်။

DOCA(ပဲခူး)

        မကွေးတိုင်းဒေသကြီး၊ မင်းဘူးခရိုင်၊ ပွင့်ဖြူမြို့နယ်သည်  လယ်ယာစိုက်ပျိုးရေးဖြင့် အဓိက အသက်မွေးဝမ်းကျောင်းပြုကြပြီး စပါးစိုက်ပျိုးရန် မြေဆီမြေနှစ်နှင့်ဆည်ရေရရှိသဖြင့် ဧရာပဒေသာ စပါးကိုအဓိကထားစိုက်ပျိုးကြောင်း ဧရာပဒေသာဆန်ကိုဒေသစုံမှထွက်ရှိသော်လည်း မကွေးတိုင်း စလင်း၊ ကုန်းဇောင်း၊ ပွင့်ဖြူဘက်မှထွက်ရှိသည့် ဧရာပဒေသာဆန်ကိုမမှီကြောင်း ရေ၊ မြေ ရာသီဥတု ကွာခြားမှုကြောင့် ပွင့်ဖြူ၊ ကုန်ဇောင်းဧရာပဒေသာဆန်မှာ အရည်အသွေး‌ကောင်းမွန်ပြီး ပြည်တွင်းစားသုံးမှုတွင်လည်း လူကြိုက်များသဖြင့် ဈေးကွက်ခိုင်မာလျှက်ရှိကြောင်း သိရှိရပါသည်။

    ပွင့်ဖြူမြို့နယ်မှထွက်ရှိသည့် ကုန်းဇောင်းဧရာပဒေသာ ဆန်မှာထမင်းသားနူးညံ့ခြင်း၊ အေးသွားပါကထမင်းမမာခြင်း၊ နှစ်ရက်ထိထမင်းအထားခံနိုင်ခြင်း၊ ပေါ်ဆန်းနှင့်တွဲ၍စားသုံးပါက အထူးကောင်းမွန်ခြင်း၊ ဆီးချို၊ သွေးချိုသမားများအတွက်အထူးသင့်လျှော်ပြီး ရွှေဘိုပေါ်ဆန်းနေရာတွင် အစားထိုးစားသုံးမှုများရှိလာသည့်အတွက် မကွေး၊ မင်းဘူး၊ ချောက်၊ မန္တလေး၊ ညောင်ဦးနှင့် ကျောက်ပန်းတောင်းမြို့များအပြင် နေပြည်တော်သို့လည်း တင်ပို့ရောင်းချရကြောင်း၊ ယခုနှစ် သီးနှံပေါ်ချိန် နိုဝင်ဘာလမှ ဒီဇင်ဘာလတွင် စပါး (၄၆)ပေါင်တစ်တင်းကို (၉၀၀ဝိ/-မှ ၉၅၀ဝိ/-) နှင့်ဆန်(၂၄)ပြည်တစ်အိတ်ကို (၃၈၀၀ဝိ/- မှ၃၉၀၀ဝိ/-)ထိလည်းကောင်း၊ ဒီဇင်ဘာလမှ ဇန်နဝါရီလတို့တွင် စပါး (၄၆)ပေါင်တစ်တင်းကို (၉၅၀ဝိ/-မှ ၁၀၀၀ဝိ/-)နှင့် ဆန်(၂၄)ပြည်တစ်အိတ်ကို (၃၉၀၀ဝိ/-မှ၄၀၀၀ဝိ/-)လည်းကောင်း၊ ယခုလက်ရှိပေါက်ဈေးမှာ စပါး(၄၆)ပေါင် တစ်တင်းကို(၁၁၀၀ဝိ/-မှ ၁၂၀၀ဝိ/-)နှင့်ဆန်(၂၄)ပြည်တစ်အိတ်ကို (၄၃၅၀ဝိ/-မှ ၄၅၀၀ဝိ/-)ထိဈေးနှုန်းမြင့်တက်လျှက်ရှိ သော်လည်း ဧရာပဒေသာဆန်ကို စားသုံးနေကြလူများအဖို့ ကုန်ဇောင်းဧရာပဒေသာဆန်ကိုသာ ရွေးချယ်စားသုံးကြကြောင်း သတင်းရရှိပါသည်။

DOCA(မကွေး)

          စားသုံးသူရေးရာဦးစီးဌာန၊ မန္တလေးတိုင်း‌‌‌ဒေသကြီး၊ မိတ္ထီလာခရိုင်၊ မလှိုင်မြို့နယ်တာဝန်ခံ ဦးရဲမြင့်ဆန်း သည် (၂၃-၂-၂၀၂၂) ရက်နေ့ နေ့လည် ( ၁၀:၀၀ ) နာရီ အချိန်တွင် မလှိုင်မြို့နယ် ပန်းအိုင်ကျေးရွာရှိ ဝါကြိတ်စက်လုပ်ငန်းရှင် ဦးတင်မောင်းအေးနှင့်တွေ့ဆုံ၍ ဝါဝယ်ယူရရှိမှု၊ ကုန်ချောဝါဂွမ်းနှင့် ဝါစေ့ဆီကြိတ်ခွဲ ထုတ်လုပ်ရောင်းချမှုနှင့် ပတ်သက်၍ တွေ့ဆုံဆွေးနွေးခဲ့ပါသည်။

            ဝါကုန်ကြမ်းကို မလှိုင်မြို့နယ်အတွင်း ကျေးရွာများရှိ ဝါစိုက်တောင်သူများမှ တိုက်ရိုက်လာ‌‌ရောက် ရောင်းချကြကြောင်း၊ မြို့ပေါ်ပွဲရုံများမှ တဆင့်လာရောက်ရောင်းချကြကြောင်း၊ ဝါဝယ်ကြိတ်ခွဲရသည့်ကာလ နိုဝင်ဘာလမှစတင်၍ ဖေဖော်ဝါရီ၊ မတ်လ လဆန်းပိုင်းအထိဖြစ်ပြီး ယခုနှစ်တစ်ရာသီ ဝါကုန်ချိန် တစ်သိန်းခွဲ ခန့်ကြိတ်ခွဲရကြောင်း၊ ဝါ ၁၀၀ ပိဿာကို ကြိတ်ခွဲလျှင် ဝါဂွမ်း (ပျမ်းမျှ) ၃၁ ပိဿာ၊ ဝါစေ့ ၆၅ ပိဿာထွက်ရှိပြီး အလေအလွင့် ၄ ပိဿာခန့်ရှိကြောင်း၊ ဝါဂွမ်း ၁ ပိဿာလျှင် ၄၂၀၀ ကျပ်မှ ၅၆၀၀ ကျပ်ထိရှိပြီး ချည်ထည်စက်ရုံ နှင့် မန္တလေးမြို့များသို့ တင်ပို့ရောင်းချပြီး ဝါစေ့ကိုဆီကြိတ်ခွဲလျှက် ထွက်ရှိသောဆီကို သန့်စင်၍ ဆီချောကို သဲတော၊ ဝမ်းတွင်းနှင့် ကျောက်ပန်းတောင်းမြို့များမှ လာရောက်ဝယ်ယူပြီး တစ်ပိဿာလျှင် ၄၃၀၀ ကျပ်ဖြင့် လည်းကောင်း၊ ဆီချေးကို တစ်ပိဿာလျှင် ၁၀၀ ကျပ်ဖြင့် ဆပ်ပြာချက်လုပ်သောသူများမှ လာရောက်ဝယ်ယူလျက်ရှိပြီး လုပ်သားအင်အား နေ့၊ည ၁၂ ဦးဖြင့် လုပ်ကိုင်ပြီး ဝါတစ်ပိဿာ (၃၀ မှ ၅၀ ) ကျပ်ထိ အကျိုးအမြတ်ရရှိကြောင်း သိရှိရပါသည်။

DOCA(မန္တလေး)