ပြည်တွင်းကုန်သွယ်မှုသတင်း

          ပဲခူးတိုင်းဒေသကြီး၊ တောင်ငူခရိုင်၊ ဖြူးမြို့နယ်တွင် တစ်ပိုင်တစ်နိုင် မြေပဲယိုလုပ်ငန်းလုပ်ကိုင်သူ (၃) ဦးခန့်ရှိပါသည်။ မြေပဲယိုရရှိရန်အတွက် ကုန်ကြမ်းအနေဖြင့် သကြား၊ မြေပဲ၊ နှမ်း၊ ထန်းလျက်၊ ကပ်စေး၊ ပဲဆီတို့ကို အသုံးပြုရပြီး ဒေသတွင်း ဖြူးမြို့နယ်မှ မှာယူရရှိကြောင်း  သိရှိရပါသည်။ မြေပဲယိုထုတ်လုပ်ရာတွင် ပထမဦးဆုံးအနေဖြင့် မြေပဲဆံကို ရွေးရပါသည်။ မြေပဲဆံရွေးပြီးသည့်အခါ လှော်ရပါသည်။ သကြားကိုကျို၍ ကျသည့်အခါ ကပ်စေးထည့်ရပါသည်။ ကပ်စေးထည့်ပြီးသည့်အခါ မြေပဲဆံထည့်၍ ကျလျှင် ဖြန့် (လှိမ့်) ခြင်းဖြင့် အချပ်ရပါက လှီးခြင်းပြုလုပ်ရပါသည်။ လုပ်ငန်း (၁) ခုလျှင် လုပ်သား (၅) ဦးခန့် အသုံးပြုပြီး လုပ်အားခပေးချေရမှုအနေဖြင့် တစ်ဦးလျှင် (၈၀၀ဝိ-/) ကျပ်ခန့် ပေးချေရပါသည်။  မြေပဲယိုထုတ်လုပ်ရာတွင် စုစုပေါင်းကုန်ကျစရိတ်မှာ တစ်နေ့လျှင် (၁၄၀၃၅ဝိ-/) ကျပ်ခန့် ကုန်ကျပြီး အကျိုးအမြတ်မှာ တစ်ရက်လျှင် (၃၁၁၅ဝိ-/) ရရှိကြောင်း သိရှိရပါသည်။  ဈေးကွက်ရောင်းချမှုအားဖြင့် မြေပဲယိုကို တစ်ရက်လျှင် (၅) ချပ်တွဲ (၄၉) တွဲ ထုတ်လုပ်လျက်ရှိပြီး ဒေသတွင်း ဖြူးမြို့နယ်နှင့် အနယ်နယ်အရပ်ရပ်သို့ ဖြန့်ဖြူး‌ရောင်းချလျက်ရှိကြောင်း သိရှိရပါသည် ။

DOCA(ပဲခူး)

         အိမ်ရှင်မများအနေဖြင့် နံနံပင်ကို ဟင်းခတ်အမွှေးအကြိုင်အဖြစ် အသုံးပြုကြပါသည်။ တချို့ မှာ ဟင်းချက်ရာတွင် နံနံပင်ကို မပါမဖြစ်အသုံးပြုကြသဖြင့် နံနံပင်မှာ အသုံးဝင်သည့်ဟင်းသီးဟင်းရွက်တစ်မျိုးဖြစ်ပါသည်။

      နံနံပင်ကို ဇွန်လနှင့်ဇူလိုင်လတို့တွင် စိုက်ပျိုးနိုင်သလို အောက်တိုဘာလနှင့်နိုဝင်ဘာလတို့တွင်လည်း စိုက်ပျိုးကြပါသည်။ နံနံပင်သည် ဆောင်းရာသီတွင် အများဆုံးဖြစ်ထွန်းပြီး ကျန်ရာသီများတွင် ရှားပါးသဖြင့် ဈေးကြီးပေး၍ ဝယ်ယူသုံးစွဲကြပါသည်။ နံနံပင်သည် ကျန်းမာရေးအတွက် ကောင်းမွန်သော ဟင်းသီးဟင်းရွက်ဖြစ်သလို  လူကြိုက်လည်းများကြသဖြင့် မုန့်ဟင်းခါးစားရာတွင်လည်းကောင်း၊ အုန်းနို့ခေါက်ဆွဲ၊ အသုပ်စုံတို့ စားသုံးရာတွင်လည်းကောင်း အသုံးပြုကြပါသည်။ ထို့အပြင် တို့စရာအဖြစ်လည်း အသုံးပြုကြပါသည်။

      နံနံပင်သည် ဆောင်းရာသီတွင်အထွက်များ၍ ဈေးနှုန်းများသက်သာရမည့်အစား ယခုနှစ် နံနံပင်ပေါ်ချိန်တွင် နံနံပင်ဈေးများမြင့်တက်လာကြောင်း တွေ့ရှိရပါသည်။ နံနံပင်ဈေးမှာ ယခင်က တစ်ပိဿာလျှင် ၉၀၀၀ ကျပ် ဈေးဖြစ်ခဲ့ပြီး၊ ယခုနိုဝင်ဘာလဆန်းမှစ၍ နံနံပင်ဈေးမှာ တစ်ပိဿာလျှင် ၁၅၀၀၀ ကျပ်ဖြင့် ဈေးနှုန်းမြင့်တက်လာသဖြင့် တစ်ပိဿာလျင် ၆၀၀ ကျပ်ခန့် ဈေးနှုန်းများမြင့်တက်လာခဲ့ပါသည်။ ယခုလိုနံနံပင် ဈေးနှုန်းများမြင့်တက်လာရခြင်းမှာ နံနံပင်စိုက်ပျိုးရာတွင် အသုံးပြုရသော သွင်းအားစုများ ဈေးနှုန်းမြင့်တက်ခြင်း၊ စိုက်ပျိုးစရိတ်များမြင့်မားလာခြင်းနှင့် သယ်ယူစရိတ်များမြင့်တက်လာခြင်းတို့ကြောင့်ဖြစ်သည်ဟု သိရှိရပါသည်။

DOCA(ပဲခူး)

         ကျွန်တော်တို့ ကမ္ဘာမြေကြီးတွင်ရှိသော  လူသားများသည် စားရေး၊ ဝတ်ရေး၊ နေရေးဆိုသော အရေးသုံးပါးအတွက် နေ့စဉ်နှင့်အမျှ လှုပ်ရှားရုန်းကန်နေကြပါသည်။ နိုင်ငံအသီးသီး၊ လူမျိုးအသီးသီးတို့၌ အစားအသောက်နှင့်ပတ်သက်၍ မတူညီသည်ကို တွေ့ရှိရပါသည်။ နိုင်ငံတစ်ခုအတွင်းတွင်လည်း ဒေသအလိုက် အစားအစာများရှိကြပါသည်။ ကျွန်တော်တို့မြန်မာနိုင်ငံတွင်လည်း ဒေသအလိုက် ရာသီအလိုက် ရိုးရာအစားအစာများရှိကြပါသည်။

         ပဲခူးတိုင်းဒေသကြီးအတွင်း ဒေသအလိုက်၊ မြို့နယ်အလိုက် ရိုးရာအစားအစာထုတ်လုပ်သည့် လုပ်ငန်းများရှိရာ ပြည်မြို့အတွင်း ကျေးရွာတစ်ရွာ ထုတ်ကုန်တစ်မျိုး လုပ်ငန်းများအနက်  ပေါက်ပေါက်လုပ်ငန်းများအကြောင်း လေ့လာတင်ပြလိုက်ရပါသည်။

       ပဲခူးတိုင်းဒေသကြီး၊ ပြည်မြို့နယ်အတွင်း ပေါက်ပေါက်လုပ်ငန်းလုပ်ကိုင်သူ ၁၅-၂၀ ဦးခန့်ရှိပြီး၊ စက်မှုဇုန် (၁) အတွင်း လုပ်ငန်းရှင် (၁၀) ဦးခန့်ရှိကြောင်း သိရှိရပါသည်။ စားသုံးသူအနေဖြင့် စက်မှုဇုန်အတွင်း ပေါက်ပေါက်လုပ်ငန်းလုပ်ကိုင်သူ လုပ်ငန်းရှင်တစ်ဦးနှင့်တွေ့ဆုံ၍ ကျေးရွာတစ်ရွာ ထုတ်ကုန်တစ်မျိုး (OVOP) ထုတ်လုပ်မှုအခြေအနေအား ကွင်းဆင်းမေးမြန်းခဲ့ခြင်းဖြစ်ပါသည်။

      လုပ်ငန်းရှင်အနေဖြင့် ပေါက်ပေါက်လုပ်ငန်းလုပ်ကိုင်ခဲ့သည်မှာ (၁၀) နှစ်ခန့်ရှိပြီဖြစ်ကြောင်း၊ ပေါက်ပေါက်လုပ်ရန် ဆန်ကွဲအဓိကလိုအပ်ပြီး ဆားဆိုဒါအနည်းငယ်လိုအပ်ကြောင်း သိရှိရပါသည်။ ယခင်ကတစ်ရက်လျှင် ဆန်ကွဲအိတ် ၄၀/၅၀ ခန့်ကြိတ်ခွဲနိုင်သော်လည်း ယခု ကုန်ကြမ်းပစ္စည်း ဈေးနှုန်းမြင့်တက်နေသည့်အတွက် တစ်ရက်လျှင်အိတ် (၂၀) လောက်သာ ကြိတ်ခွဲလျက်ရှိကြောင်း သိရှိရပါသည်။

      ပေါက်ပေါက်လုပ်ငန်းအတွက် မှော်ဘီနှင့်ခြံဧရာဆန်ကွဲများမှာ အရည်အသွေးပိုကောင်းကြောင်း၊ ဆန်ကွဲ (၁၀၈) ပေါင်တစ်အိတ်လျှင် ပေါက်ပေါက်ကုန်ချော ၂၅/၂၆ ပိဿာခန့် ရရှိကြောင်း သိရှိရပါသည်။ ပေါက်ပေါက်ထုတ်လုပ်ပုံမှာ ဆန်ကွဲအိတ်ကို ဝေဖာကြိတ်စက်ထဲသို့ထည့်၍ (၂) နာရီ ကြာကြိတ်ဖွတ်ပါက ကုန်ချောရရှိမည်ဖြစ်ပါသည်။ ဆန်ကွဲကျစ်ပါက ဆားဆိုဒါ အနည်းငယ်ထည့်ပေးရပါသည်။

        ပေါက်ပေါက်ထုတ်လုပ်မှုကုန်ကျစရိတ်အနေဖြင့် ဆန်ကွဲ၊ လုပ်သားခ၊ လျှပ်စစ်မီတာခများ ထည့်သွင်းတွက်ချက်ပါက ဆန်ကွဲတစ်အိတ်လျှင် ၄၆၀၀၀ ကျပ် ကုန်ကျမည်ဖြစ်ပြီး အကျိုးအမြတ်အနေဖြင့် ပေါက်ပေါက်တစ်ပိဿာလျှင် ၂၀၀၀ ကျပ်၊ ပေါက်ပေါက် (၃) ပိဿာလျှင် ၅၀၀၀ ကျပ် ခန့်ရရှိသဖြင့် ဆန်ကွဲတစ်အိတ်လျှင် ၄၀၀၀ ကျပ်ခန့် အကျိုးအမြတ်ရရှိပါသည်။ တစ်နေ့လျှင် ဆန်ကွဲ (၂၀) အိတ်ကြိတ်လျှင် ၈၀၀၀၀ ကျပ်ခန့် အကျိုးအမြတ်ရရှိမည်ဖြစ်ကြောင်း သိရှိရပါသည်။

       ဈေးကွက်အနေဖြင့် ပေါက်ပေါက်ကို (၁၀) ပိဿာပါ ပလပ်စတစ်အိတ်အတွင်း လေလုံအောင်ထည့်ပြီး ဒေသထွက်ဆန်မရွေးလုပ်ငန်းများနှင့် တောင်ကုတ်၊ မြန်အောင်၊ ဟင်္သာတ၊ မင်းတုန်း၊ ကံမမြို့နယ်များအထိ တင်ပို့ရောင်းချကြောင်း သိရှိရပါသည်။

       ပေါက်ပေါက်လုပ်ငန်းသည် အကျိုးအမြတ်နည်းသော်လည်း ဆန်ကွဲကိုသာ အဓိကထားလုပ်ရသော လုပ်ငန်းဖြစ်သလို မိသားစုတစ်ပိုင်တစ်နိုင်လုပ်ကိုင်နိုင်ပြီး နေ့စဉ်အကျိုးအမြတ်ရှိသော လုပ်ငန်းတစ်ခုဖြစ်ပါကြောင်း လေ့လာတင်ပြအပ်ပါသည်။

DOCA(ပဲခူး)

      စားသုံးသူရေးရာဦးစီးဌာန၊ မုံရွာခရိုင်ဦးစီးမှူးနှင့် ဝန်ထမ်း(၃)ဦးတို့သည် (၁၆.၁၁.၂၀၂၂) ရက်နေ့၊ နံနက်(၁၀)နာရီအချိန်တွင် မုံရွာမြို့၊ စက်မှုဇုံရပ်ကွက်ရှိ မြို့နယ်ဆန်စက်လုပ်ငန်းရှင်များ အသင်းအတွင်းရေးမှူး ရှန်တက်ဆန်စက်လုပ်ငန်းပိုင်ရှင် ဦးမြင့်နှင့် တွေ့ဆုံ၍ ဆန်စက်လည်ပတ်နေမှု အခြေအနေများ၊ စပါး၊ ဆန်ဈေးနှုန်းဈေးကွက်အခြေအနေများ ဆွေးနွေးခဲ့ကြပါသည်။

       ထိုသို့ တွေ့ဆုံဆွေးနွေးရာတွင် လုပ်ငန်းရှင်က မိမိတို့တိုင်းရှိစားသုံးသူပြည်သူများအနေဖြင့် ငွေကြေးလှုပ်ခတ်မှုအခြေအနေများကြောင့် စိုးရိမ်စိတ်များကာ ရှေ့လများက လိုအပ်သည်ထက် ပိုမို ဝယ်ယူထားမှုများကြောင့် လက်ရှိတွင်အ‌ရောင်းအဝယ်အေး နေကြောင်း၊ပို့ကုန်ရှိသော ဆန်ကြမ်း အမျိုးအစားများသာ အရောင်းအဝယ်သွက်နေကြောင်း၊ ဧည့်မထအုပ်စုဝင်ဖြစ်သော မနောသုခ‌ (အသစ်) ဆန်(၁)အိတ်လျှင် ၄၂၀၀၀/ကျပ်ဖြင့် ရောင်းသူသာရှိပြီး ဝယ်သူမရှိကြောင်း၊ ရွှေဘို ပေါ်ဆန်း(အဟောင်း)(၁)အိတ်လျှင်(၉၀၀၀၀)ကျပ်နှင့်ဧရာမင်းဆန်(အဟောင်း)(၁)အိတ်လျှင်(၆၅၀၀၀)ကျပ်ရှိပြီးအရောင်းအဝယ်အေးနေကြောင်း၊ထိုသို့အရောင်းအဝယ်အေးသော်လည်း စစ်ကိုင်း တိုင်း အထက်ပိုင်းဒေသများတွင် စပါးအသစ်များပေါ်ချိန်ဖြစ်၍ ဆန်စက်များမှာ ပုံမှန်လည်ပတ် ကြိတ်ခွဲနိုင်ကြောင်း  ဆွေးနွေး ပြောကြားခဲ့ပြီး ခရိုင်ဦးစီးမှူးက  ဆန်စက်လုပ်ငန်းရှင်များ ကြုံတွေ့နေရသောအခက်အခဲများကို မေးမြန်းခဲ့ပြီး ဆန်စက်ကဏ္ဍဖွံ့ဖြိုးတိုးတက်ရေးအတွက် ပံ့ပိုးကူညီပေးရမည့် အချက်များအား မေးမြန်းဆွေးနွေးခဲ့ကြောင်း သိရှိရပါသည်။

DOCA(စစ်ကိုင်း)

          ပြည်ဈေးကွက်တွင် ခရမ်းချဉ်သီးများဈေးကောင်းရရှိကာ အရောင်းအဝယ်သွက်လျက်ရှိပါသည်။ ယခုလိုဆောင်းရာသီတွင် ခရမ်းချဉ်သီးများထွက်ပေါ်လာပြီဖြစ်၍ ပေါ်ခါစတွင် ဈေးကောင်းရသောသီးနှံတစ်မျိုးဖြစ်ပါသည်။ ပြည်မြို့နယ်အတွင်းရှိကျေးရွာတော်တော်များများတွင် ခရမ်းချဉ်ကို စိုက်ပျိုးကြသလို ရွှေတောင်မြို့ရှိကျွန်းများတွင်လည်း စိုက်ပျိုးကြပါသည်။ စိုက်ဧကအနေဖြင့် ဧကပြတ်စိုက်ပျိုးခြင်းမရှိဘဲ သီးညှပ်အဖြစ်သာ စိုက်ပျိုးကြပါသည်။ ခရမ်းချဉ်သီးများမှာ ရှမ်းပြည်ဘက်မှလာသော ရှမ်းသီးနှင့်ဒေသတွင်းစိုက်ပျိုးသော ကိုင်းသီးဟူ၍ (၂) မျိုးရှိပါသည်။ ခရမ်းချဉ်သီးဈေးမှာ ရှမ်းသီးတစ်ပိဿာလျှင် ၂၄၀၀ ကျပ်၊ ကိုင်းခရမ်းချဉ်သီးတစ်ပိဿာလျှင် ၄၀၀၀ ကျပ် ဖြင့် အရောင်းအဝယ်ဖြစ်လျက်ရှိပါသည်။ ကိုင်းခရမ်းချဉ်သီးမှာ အခွံပါးပြီး နှုးညံ့တဲ့အတွက် စားသုံးသူများအကြိုက်တွေ့၍ ရှမ်းသီးထက်စာလျှင် ဈေးများမြင့်တက်လာခဲ့ပါသည်။ ခရမ်းချဉ်သီးဈေးကွက်အနေဖြင့် ခရိုင်အတွင်း မြို့နယ်မှခရမ်းချဉ်သီးများကို ခြင်းများဖြင့် လာရောက်ရောင်းချပြီး ပြည်ဈေးကွက်မှတစ်ဆင့် တိုင်းအတွင်းမြို့နယ်များသို့လည်း တင်ပို့ရောင်းချကြောင်း သိရှိရပါသည်။

DOCA(ပဲခူး)