ပြည်တွင်းကုန်သွယ်မှုသတင်း

       ကယားပြည်နယ်တွင် ဂေါ်ဖီထုပ်များကို လွိုင်ကော်မြို့နယ်ရှိ လင်ဖုံလေးနှင့် ကုန်းသာကျေးရွာများတွင် အနည်းငယ်စိုက်ပျိုးကြပြီး ဈေးကွက်အတွက်လိုအပ်သောဂေါ်ဖီများကို ရှမ်းပြည်နယ် ပင်လောင်း၊ တီဂျစ်တို့မှ မှာယူရောင်းချကြပါသည်။ ဂေါ်ဖီထုပ် ဈေးနှုန်းမှာ ယခု နိုဝင်ဘာလအတွင်း ဂေါ်ဖီထုပ်တစ်ထုပ်လျှင် အကြီး(၈၀၀)ကျပ်၊ အသေး (၅၀၀) ကျပ်ဈေး အရောင်းအဝယ်ဖြစ်လျှက်ရှိရာ ယခင် အောက်တိုဘာလတွင် ဂေါ်ဖီထုပ် တစ်ထုပ်လျှင် အကြီး (၆၀၀)ကျပ်၊ အသေး(၄၀၀) ကျပ်ဈေးရှိခဲ့ပြီး ယခင် အောက်တိုဘာလနှင့် ယခု နိုဝင်ဘာလ နှိုင်းယှဉ်လျှင် ဂေါ်ဖီထုပ်တစ်ထုပ်လျှင် အကြီး(၂၀၀)ကျပ် ၊ အသေး (၁၀၀) ကျပ်ခန့် ဈေးနှုန်းမြင့်တက်လာကြောင်း လွိုင်ကော်မြို့၊  သီရိမင်္ဂလာဈေးရှိ ဂေါ်ဖီထုပ်ရောင်းချသော လုပ်ငန်းရှင်တစ်ဦးထံမှ သိရပါသည်။

DOCA(ကယား)

     လွိုင်ကော်မြို့နယ် သီရိမင်္ဂလာဈေးအတွင်းရှိ အခြေခံကုန်ဈေးနှုန်းများ၏ နေ့စဉ်ဈေးနှုန်းများအရ (၁၇-၁၁-၂၀၂၂) ရက်နေ့မှ (၂၄-၁၁-၂၀၂၂) ရက်နေ့အထိ ဖြစ်ပေါ်နေသော အခြေခံစားကုန် ဈေးနှုန်းများမှာ ကြက်သွန်နီ တစ်ပိဿာလျှင်(၄၂၀၀)ကျပ်၊ ကြက်သွန်ဖြူ(ရှမ်းစ) တစ်ပိဿာလျှင် (၅၂၀၀)ကျပ်၊ ဂျင်း တစ်ပိဿာလျှင် (၁၁၀၀)ကျပ်၊ နနွင်း တစ်ပိဿာလျှင် (၄၃၀၀)ကျပ်၊ ငရုတ်သီး (ခြောက်) တစ်ပိဿာလျှင် (၁၄၀၀၀)ကျပ်၊ အာလူး တစ်ပိဿာလျှင် (၂၃၀၀)ကျပ် တို့ရှိပါကြောင်း၊ ယခင်အပတ်နှင့် နှိုင်းယှဉ် ကြည့်လျှင် ဂျင်း တစ်ပိဿာလျှင်(၂၀၀)ကျပ်ခန့် ဈေးနှုန်းကျဆင်းလာပြီး ကျန်ကုန်ဈေးနှုန်းများ ဈေးနှုန်း တည်ငြိမ်လျှက်ရှိပါကြောင်း သိရှိရပါတယ်။

DOCA(ကယား)

        ကယားပြည်နယ်တွင်လိမ္မော်သီးကို ဘောလခဲမြို့နယ်အတွင်းရှိလွိုင်ဝိန်ကျေးရွာ၊ဝမ်မလန်ကျေးရွာတို့တွင်လည်း မိသားစုအပိုဝင်ငွေရရန်အတွက် တစ်နိုင်တစ်ပိုင်စိုက်ပျိုးကြပြီးမိုးအကုန်ဆောင်းဝင်စအချိန်တွင် ရောင်းချနိုင်သော ရာသီပေါ်သီးနှံတစ်မျိုးလည်းဖြစ်သည်။ဈေး ကွက်အတွင်းရောင်းချသောလိမ္မော်သီးမှာ ရှမ်းပြည်နယ်အတွင်းရှိ ပင်လောင်း၊ အောင်ပန်းနှင့် ကလောစသည့်ရှိဒေသများမှမှာ ယူတင်သွင်းကြပြီးယခုနိုဝင်ဘာလအတွင်း ဈေးကွက်အတွင်း၌ လိမ္မော်သီးအလုံးသေးတစ်ပိဿာလျှင် (၂၅၀၀)ကျပ်၊ အလုံးလတ်တစ်ပိ ဿာလျှင် (၃၄၀၀)ကျပ်၊ အလုံးကြီးတစ်ပိဿာလျှင်(၃၈၀၀)ကျပ်ခန့်အထိရောင်းချလျှက်ရှိပြီး ဈေးကွက်အတွင်းအရောင်း သွက်သောသီးနှံတစ်မျိုးဖြစ်သည်ဟု လွိုင်ကော်မြို့အတွင်းရှိ သစ်သီးဝလံရောင်းချသူတစ်ဦးထံမှ သိရှိရပါသည်။

DOCA(ကယား)

       ပြည်နယ်တွင်းထွက်ရှိသည့် ဆီထွက်သီးနှံများကို ဒေသတွင်း စားသုံးလျက်ရှိပြီး အခြားဒေသများသို့လည်း တင်ပို့ရောင်းချလျက်ရှိပါသည်။ ဈေးကွက်လိုအပ်ချက်အရ စားအုန်းဆီကို အခြားမြို့များမှ တင်သွင်းရောင်းချနေရကြောင်း၊ စားအုန်းဆီကို စားသုံးမှုအပြင် ပြည်နယ်အတွင်းရှိ စားသောက်ဆိုင်များ၊ အသေးစားစီးပွားရေးလုပ်ငန်းရှင်များကလည်း အိမ်တွင်းမှုအကြော်နှင့် မုန့်လုပ်ငန်းများတွင် အများဆုံးအသုံးပြုကြပါသည်။ ယခုနိုဝင်ဘာလအတွင်း ဈေးကွက်၌ဖြစ်ပေါ်နေသော စားအုန်းဆီဈေးနှုန်းမှာ လက်လီဈေးနှုန်းတစ်ပိဿာလျှင် (၇၃၀၀) ကျပ်နှင့် လက်ကားဈေးတစ်ပိဿာလျှင် (၇၀၀၀) ကျပ်ဖြင့် အရောင်းအဝယ်ဖြစ်လျက်ရှိပြီး ယခင်အောက်တိုဘာလတွင် စားအုန်းဆီလက်လီဈေးနှုန်းတစ်ပိဿာလျှင် (၉၀၀၀) ကျပ်နှင့် လက်ကားဈေးနှုန်းတစ်ပိဿာလျှင် (၈၅၀၀) ကျပ်ဈေးရှိခဲ့၍ ယခုနိုဝင်ဘာလနှင့် ယခင်အောက်တိုဘာလနှိုင်းယှဉ်လျှင် စားအုန်းဆီလက်လီဈေးနှုန်းတစ်ပိဿာလျှင် (၁၇၀၀) ကျပ်နှင့် လက်ကားဈေးနှုန်းတစ်ပိဿာလျှင် (၁၅၀၀) ကျပ်ခန့်ကျဆင်းလာကြောင်း သီရိမင်္ဂလာဈေးရှိ စားသုံးဆီရောင်းချသူတစ်ဦးထံမှ သိရပါတယ်။

DOCA(ကယား) 

         ပဲခူးတိုင်းဒေသကြီး၊ ပြည်ခရိုင်ရှိ ဆီထွက်သီးနှံတစ်မျိုးဖြစ်သော နှမ်းသီးနှံ၏ ၂၀၂၂ခုနှစ် နှစ်ဆန်းပိုင်းမှစ၍ အရောင်းအဝယ်ဖြစ်မှုနှင့် ဈေးနှုန်းနှိုင်းယှဉ်ချက်များကို လေ့လာသုံး သပ်တင်ပြ အပ်ပါသည်။

နှမ်းနီ

          ၂၀၂၂ ခုနှစ်၊ ဇန်နဝါရီလဆန်းတွင် နှမ်းနီဈေးမှာ (၃)တင်းတစ်အိတ်လျှင် ၁၀၀၀၀၀ကျပ် ဈေးရှိခဲ့ပြီး ဖေဖော်ဝါရီလတွင် (၃)တင်းတစ်အိတ်လျင် ၁၆၀၀၀၀ကျပ်ဖြင့် ဆီစက်သမားများ အဝယ်လိုက်လာသဖြင့် ဈေးများပြန်လည်မြင့်တက်လာခဲ့ပါသည်။ မတ်လမှစ၍ ဇွန်လဆန်းပိုင်းအထိ (၃)တင်းတစ်အိတ်လျှင် ၁၅၀၀၀၀ကျပ်ဖြင့် ဈေးပြန်ကျလာခဲ့ပါသည်။ ဇွန်လကုန်ပိုင်းမှစ၍ ဇူလိုင်လကုန်အတွင်း တစ်အိတ်လျှင် ၁၆၀၀၀၀ကျပ်ဖြင့် မကွေးတိုင်းမှအဝယ်ရှိ၍ ဈေးပြန်မြင့်လာပြီး တစ်ရက်လျှင် အိတ် ၅၀၀/၆၀၀ခန့် အရောင်းအဝယ်ဖြစ်လျက်ရှိပါသည်။ ဩဂုတ်လတွင် နှမ်းနီ ဈေးများ ဆက်လက်မြင့်တက်လာခဲ့ပြီး တစ်အိတ်လျှင် ၁၉၅၀၀၀-၂၃၀၀၀၀ကျပ်ထိရှိလာကာ စက်တင်ဘာလ ဆန်းပိုင်းမှစ၍ ဆီစက်သမားများက သီတင်းကျွတ်အခါသမယအတွက် ဆီကြိတ်ရန် ဝယ်ယူမှုရှိသဖြင့် တစ်အိတ်လျှင် ၂၄၅၀၀၀ကျပ်မှ စ၍ ဈေးနှုန်းများမြင့်တက်လာခဲ့ရာ အောက်တို ဘာလဆန်းတွင် တစ်အိတ်လျှင် ၂၆၀၀၀၀ကျပ်အထိဈေးအမြင့်ဆုံးထိ တက်လာခဲ့ပါသည်။ အောက်တိုဘာလ ဒုတိယပတ်မှစ၍ နိုဝင်ဘာလအတွင်း ဝင်ရောက်မှုများမရှိခြင်း၊ ဝယ်လက် ဝယ်ယူမှု နည်းသွားခြင်းကြောင့် အရောင်းအဝယ်အေးသွားသဖြင့် နှမ်းနီဈေးမှာ တစ်အိတ်လျှင်၂၂၀၀၀၀-၂၄၅၀၀၀ကျပ် အထိဈေးများကျဆင်းလာကြောင်း သိရှိရပါသည်။

နှမ်းနက်

       ပြည်ဈေးကွက်တွင် ၂၀၂၂ ခုနှစ်၊ ဇန်နဝါရီလဆန်းတွင် နှမ်းနက်(၃)တင်းတစ်အိတ်လျှင် ၁၄၀၀၀၀ကျပ်ဖြင့် ဈေးဖွင့်ပြီး အရောင်းအဝယ်ဖြစ်ခဲ့ပါသည်။ ဇန်နဝါရီလကုန်မှစ၍ ဖေဖော်ဝါရီလ ကုန်အထိ တစ်အိတ်လျှင် ၂၀၀၀၀၀ကျပ်ဖြင့် အောင်လံဘက်မှ ဝယ်ယူမှုရှိသဖြင့် တစ်နေ့လျှင် အိတ် ၆၀၀/၇၀၀ခန့် အရောင်းအဝယ်ဖြစ်လျက်ရှိပါသည်။ မတ်လဆန်းမှစ၍ ဧပြီလ တတိယပတ်တွင် တစ်အိတ်လျှင် ၁၈၀၀၀၀ကျပ်ဖြင့် တစ်အိတ်လျှင် ၂၀၀၀၀ကျပ်ခန့် ဈေးနှုန်းများကျဆင်းလာသလို မေလကုန်မှ ဇွန်လဆန်းတွင် တစ်အိတ်လျှင် ၁၆၀၀၀၀-၁၆၅၀၀၀ကျပ်ဖြင့် ဝယ်လက်ဝယ်ယူမှု နည်းသွားသဖြင့် နှမ်းနက်ဈေးမှာ ဆက်လက်ကျဆင်းလာခဲ့ပါသည်။ ဇွန်လဒုတိယပတ်မှ ဇူလိုင်လ တတိယပတ်ထိ တစ်အိတ်လျှင် ၁၇၀၀၀၀-၁၈၀၀၀၀ကျပ်ဖြင့် ဈေးအနည်းငယ်ပြန်လည်မြင့် တက်လာခဲ့ပါသည်။ ဇူလိုင်လနောက်ဆုံးပတ်မှစ၍ ဩဂုတ်လကုန်ထိ မြို့တွင်းရှိပွဲရုံများက လှောင်ရန် အဝယ်ရှိသလို ရန်ကုန်ဝယ်လက်များကအဝယ်ရှိသဖြင့် တစ်အိတ်လျှင် ၂၀၀၀၀၀-၂၂၀၀၀၀-၂၄၀၀၀၀ ကျပ်ထိ ဈေးနှုန်းများမြင့်တက်လာခဲ့ပြီး တစ်ရက်လျှင် အိတ် (၅၀၀)ခန့် အရောင်းအဝယ် ဖြစ်လျက်ရှိပါသည်။ စက်တင်ဘာလဆန်းပိုင်းမှ အောက်တိုဘာလကုန်အထိ ဝယ်လက်များ အဝယ်ပြန်လိုက်လာ၍ တစ်အိတ်လျှင် ၂၇၀၀၀၀-၂၈၀၀၀၀ကျပ်အထိ ဈေးအမြင့်ဆုံး တက်လာခဲ့ပါသည်။ နိုဝင်ဘာလအတွင်း အရောင်းအဝယ်များအေးလာသဖြင့် တစ်အိတ်ကို ၂၃၀၀၀၀ ကျပ်ဖြင့် တစ်အိတ်လျှင် ၅၀၀၀၀ကျပ်အထိ ဈေးများကျဆင်းကြောင်း သိရှိရပါသည်။

စမုံနက်(ခ)သိပ္ပံနှမ်း

          ၂၀၂၂ခုနှစ်၊ ဇန်နဝါရီလတွင် ပြည်ဈေးကွက်၌ အရောင်းအဝယ်လျက်ရှိသော စမုံနက်နှမ်း(ခ) သိပ္ပံနှမ်းဈေးမှာ (၃)တင်းတစ်အိတ်လျှင် ၁၇၀၀၀၀ကျပ်ဖြင့် ဈေးဖွင့်ပြီး အရောင်းအဝယ် ဖြစ်ခဲ့ပါသည်။ ဖေဖော်ဝါရီလတွင် တစ်အိတ်လျှင် ၂၂၀၀၀၀ကျပ်ဖြင့် ရန်ကုန်ဝယ်လက်အဝယ်ရှိ၍ တစ်နေ့လျင် အိတ် ၅၀၀ခန့် အရောင်းအဝယ်ဖြစ်လျက်ရှိပါသည်။ မတ်လနှင့် ဧပြီလတွင် ဝယ်လက် ဝယ်ယူမှု နည်းသွားသဖြင့် တစ်အိတ်လျှင် ၂၀၀၀၀၀-၂၁၀၀၀၀ကျပ်ဖြင့် ဈေးများကျဆင်း လာခဲ့ပါသည်။ မေလတွင် နှမ်းဈေးများဆက်လက်ကျဆင်းလာပြီး တစ်အိတ်လျှင် ၁၈၀၀၀၀ကျပ်ဖြင့် တစ်အိတ်လျှင် ၂၀၀၀၀-၃၀၀၀၀ခန့် ဈေးကျလာခဲ့ပါသည်။ ဇွန်လနှင့်ဇူလိုင်လတွင် ပြည်ပတင်ပို့ရန် အဝယ်ပြန်လိုက်လာသဖြင့် တစ်အိတ်လျှင် ၂၁၀၀၀၀-၂၂၀၀၀၀-၂၃၅၀၀၀၀ကျပ် ထိဈေးများ မြင့်တက်လာပြီး တစ်နေ့လျှင် အိတ် (၅၀၀)ခန့် အရောင်းအဝယ်ဖြစ်လျက်ရှိပါသည်။ ဩဂုတ်လနှင့် စက်တင်ဘာလတွင် တစ်အိတ်လျှင် ၂၂၀၀၀၀ကျပ်ဖြင့် ဈေးငြိမ်နေပြီး အောက်တိုဘာလတွင် တစ်အိတ်လျှင် ၂၇၀၀၀၀-၃၀၀၀၀၀-၃၂၀၀၀၀ကျပ်ဖြင့် ဈေးပြန်မြင့်တက်လာပါသည်။  နိုဝင်ဘာလ တွင် (၃)တင်းတစ်အိတ်လျှင် ၂၃၀၀၀၀၀ ကျပ်ဖြင့် ဈေးများပြန်လည်ကျဆင်းလာပြီး အရောင်း အဝယ်လည်း အေးသွားကြောင်း သိရှိရပါသည်။

DOCA(ပဲခူး)