ပြည်တွင်းကုန်သွယ်မှုသတင်း

          စားသုံးသူရေးရာဦးစီးဌာန၊ မအူပင်ခရိုင်ဦးစီးမှူးရုံးမှ မြို့နယ်တာဝန်ခံ ဦးအောင်ဇော်ဦးနှင့် ဝန်ထမ်းများသည် (၇.၃.၂၀၂၂)နေ့နံနက် (၁၀:၃၀)အချိန်တွင် တပင်ရွှေထီးဆန်စပါးနှင့် ပဲမျိုးစုံရောင်းဝယ်ရေး လက္ကားပွဲရုံသို့ သွားရောက်၍ မတ်ပဲဈေးနှုန်း မတ်ပဲထွက်ရှိမှု တင်ပို့မှုနှင့် ဈေးကွက် အခြေအနေများကို ကွင်းဆင်းလေ့လာဆောင်ရွက်ခဲ့ပါသည်။

        အဆိုပါ ကွင်းဆင်းဆောင်ရွက်မှုတွင် တပင်ရွှေထီး ဆန်စပါးနှင့်ပဲမျိုးစုံရောင်းဝယ်ရေး လက္ကားပွဲရုံမှတာဝန်ရှိသူနှင့် တွေ့ဆုံမေးမြန်းရာတွင် လက်ရှိမတ်ပဲတစ်တင်းကို (၄၄၅၀၀)ကျပ်ဖြင့် အရောင်းအဝယ်ဖြစ်နေပြီး နေ့စဉ်မတ်ပဲတင်း(၁၀၀၀)ခန့် လာရောက်ရောင်းချလျှက်ရှိကြောင်း သိရှိရပြီး လာရောက်ရောင်းချသည့် ညောင်ပင်ဂရက်ကျေးရွာမှ ဦးသိန်းသန်းစိုးနှင့် ဆက်လက်တွေ့ဆုံ ဆွေးနွေးရာ မိမိမိုးစပါးရိတ်သိမ်းပြီးချိန်တွင် မတ်ပဲများစိုက်ပျိုးခဲ့ပြီး သွင်းအားစုအနည်းငယ်သာ အသုံးပြု၍ တစ်ဧကလျှင် (၁၀)တင်းနှုန်းခန့်ထွက်ရှိပြီး ယခုဈေးနှင့် ရောင်းရသည့်အတွက် တွက်ခြေကိုက်မှုရှိကြောင်း ပြောကြားခဲ့ပါသည်။

         ထို့အပြင် စစ်ချောင်းကျေးရွာမှတောင်သူဒေါ်သန်းဌေးနှင့်တွေ့ဆုံရာ ညောင်ပင်ဂရက်ကျေးရွာသည် အနိမ့်ကွင်းဖြစ်ပြီး ကုန်းတန်းဖြစ်သော စစ်ချောင်း၊ နတ်စဉ်၊ ကျွဲဒုံး ကျေးရွာများတွင် တစ်ဧက လျှင်မတ်ပဲ(၁၈)တင်းခန့် ထွက်နိုင်ကြောင်း ပြောကြားခဲ့ပါသည်။

          တပင်ရွှေထီးဆန်စပါးနှင့် ပဲမျိုးစုံရောင်းဝယ်ရေး လက္ကားပွဲရုံအနေဖြင့် နေ့စဉ်ဝယ်ယူရရှိသော မတ်ပဲများကို ရန်ကုန်ဘုရင့်နောင်ပွဲရုံနှင့် ရွှေပြည်သာစက်မှုဇုန်သို့ အဆက်မပြတ်ပေးပို့လျှက်ရှိကြောင်း သတင်းရရှိပါသည်။

DOCA(ဧရာဝတီ)

            မန္တလေးတိုင်းဒေသကြီး၊ ညောင်ဦးခရိုင်၊ ကျောက်ပန်းတောင်းမြို့နယ်သည် တိုင်းဒေသကြီးအတွင်းရှိ မြို့နယ်များတွင် ထန်းပင်အများဆုံး စိုက်ပျိုးထွက်ရှိရာ မြို့နယ်တစ်ခုဖြစ်ပါသည်။ထန်းပင် စိုက်ပျိုးမှုအနေဖြင့်(၄၁၇၂)ဧကရှိ ‌ကြောင်းသိရှိရပြီး ယခင်နှစ်များက ထန်းလှီးတောင်သူ နည်းပါး ခြင်း၊ မိုးနည်းခြင်းတို့ကြောင့် ထန်းလျက်ထွက်ရှိမှုနည်းခဲ့ပါသည်။ယခုနှစ်တွင် ထန်းလှီးတောင်သူများ တိုးလာပြီး မိုးကောင်းမွန်ခဲ့သောကြောင့် ယခင်နှစ်ထက် အထွက်နှုန်း သုံးဆခန့် ပိုမိုထွက်ရှိမည်ဟု ခန့်မှန်းကြောင်း ထန်းတောင်သူတစ်ဦးထံမှ သိရပါသည်။ကျောက်ပန်းတောင်းမြို့နယ်အတွင်းရှိ နှစ်ကျပ်ခွဲ၊ တောင်ဇင်၊ လက်ပံပင်၊တောင်ခြေ၊ ကျွန်းခင်းကြီး၊ ဂွေးပင်၊ ကြောင်ရှာတော၊ စမ်းစု စသည့်ကျေးရွာများမှ ထန်းလျက်များ စတင်ထွက်ရှိနေပြီး ကျောက်ပန်းတောင်းမြို့နယ်အနေဖြင့် ဖေဖော်ဝါရီလမှ စတင်၍ထန်းဖိုထန်းလျက်ကို ဈေးကွက်အတွင်းအရောင်းအဝယ် ပြုလုပ်ကြပါ သည်။

            ၂၀၂၀ ခုနှစ်တွင် ကျောက်ပန်းတောင်းမြို့နယ်အနေဖြင့် ထန်းလျက်အထွက်ပိဿာပေါင်း (၁၅၀၀၀၀၀)ခန့်ထွက်ရှိခဲ့ကြောင်းသိရှိရပြီး ထန်းလျက်များစတင်ထွက်ပေါ်ချိန်ဖြစ်သည့် ဖေဖော်ဝါရီလတွင် ထန်းလျက်လုံးသေးတစ်ပိဿာလျှင် (၁၉၀၀)ကျပ်၊လုံးလတ်တစ်ပိဿာလျှင် (၁၈၀၀)ကျပ်၊ လုံးကြီးတစ်ပိဿာလျှင်(၁၇၀၀)ကျပ်တို့ဖြင့် စတင်အရောင်းအဝယ်ဖြစ်ပေါ်ခဲ့ကြောင်း သိရှိရပါသည်။ နှစ်ကုန် ဒီဇင်ဘာလ၌ လုံးသေးတစ်ပိဿာလျှင်(၂၀၅၀)ကျပ်၊လုံးလတ်(၂၀၀၀)ကျပ်၊လုံးကြီး(၁၉၀၀) ကျပ်တို့ဖြင့် ဈေးပိတ်ခဲ့ပါသည်။

         ၂၀၂၁ ခုနှစ်တွင် ကျောက်ပန်းတောင်းမြို့နယ်အနေဖြင့် ထန်းလျက်အထွက် ပိဿာပေါင်း (၁၀၀၀၀၀၀) ခန့် ထွက်ရှိခဲ့ကြောင်း သိရှိရပြီး စတင်ပေါ်ချိန်တွင် လုံးသေးတစ်ပိဿာလျှင်(၁၃၀၀) ကျပ်၊လုံးလတ်မှာ(၁၂၀၀)ကျပ်နှင့် လုံးကြီး(၁၀၅၀)ကျပ်တို့ဖြင့် စတင်အရောင်းအဝယ်ဖြစ်ခဲ့ပါသည်။ ဒီဇင်ဘာလဈေးပိတ်ချိန်တွင် လုံးသေးတစ်ပိဿာလျှင်(၂၄၀၀)ကျပ်၊ လုံးလတ်(၂၃၀၀)ကျပ်နှင့် လုံး ကြီးမှာ(၂၁၅၀) ကျပ် တို့ဖြင့်ဈေးပိတ်ခဲ့ပြီး လက်ကျန်မရှိကြောင်း သိရပါသည်။

           ၂၀၂၂ ခုနှစ်၊ဖေဖော်ဝါရီလမှစတင်၍ ထန်းလျက်များ ဈေးကွက်အတွင်းသို့ ဝင်ရောက်လျက်ရှိရာ လုံးသေးတစ်ပိဿာလျှင်(၂၄၀၀)ကျပ်၊ လုံးလတ်တစ်ပိဿာလျှင်(၂၃၀၀)ကျပ်၊ လုံးကြီးမှာ ထွက်ပေါ်မှု မရှိသေးကြောင်းနှင့်တစ်ရက်လျှင် အဝင်ပိဿာပေါင်း(၁၂၀၀၀)ပိဿာခန့် ဝင်ရောက်နေပြီး အရောင်းအဝယ်ဖြစ်လျက်ရှိကြောင်း သိရပါသည်။ထန်းလျက်ကို ပြည်ပတင်ပို့မှုအနေဖြင့် မရှိသေးကြောင်းနှင့် ပြည်တွင်းဈေးကွက်များဖြစ်သည့် ရန်ကုန်၊မန္တလေး၊နေပြည်တော်၊ တောင်ကြီး၊ မိထ္တီလာ၊နတ်မောက်၊ပြည်၊အောင်လံ၊တောင်တွင်းကြီး၊မကွေး၊ဆင်ဖြူကျွန်း စသည့်မြို့ကြီးများသို့  အဓိက တင်ပို့ရောင်းချလျက်ရှိကြောင်း သိရပါသည်။ထန်းလျက်အား တန်ဖိုးမြှင့်ထုတ်ကုန်(Value Added)အနေဖြင့် ကျောက်ပန်းတောင်းမြို့၊သာယာအေးရပ်ကွက်ရှိ Toddy Palm Village Food Distribution မှ ထန်းလျက်အမှုန့်၊ထန်းသကြားမှုန့်၊ချင်းထန်းလျက်မှုန့်တို့ကို မြန်မာ့ရိုးရာစားသောက်ကုန်တစ်မျိုးဖြစ်တဲ့ ထန်းလျက်ဈေးကွက် ပြန်ပြီးအားကောင်းလာစေရန်၊ထန်းလျက်ကို အသွင်တစ်မျိုးဖြင့် မြန်မာ့လက်ဆောင်တစ်ခုအနေနှင့် နိုင်ငံခြားတိုင်းပြည်များသို့ ထိုးဖောက်နိုင်ရန်၊ထန်းပင်ကို အခြေပြုထားသည့် အခြားသောထုတ်ကုန်များကို ဈေးကွက်ထိုးဖောက်နိုင်ပြီး ထန်းတောင်သူများ၏ ဘဝကိုတစ်ဖက်တစ်လမ်းမှ အထောက်အကူဖြစ်စေဖို့ ရည်ရွယ်၍ထုတ်လုပ်ရောင်းချလျက်ရှိရာ ထန်းလျက်အမှုန့် တစ်ပိဿာလျှင်(၆၀၀၀)ကျပ်၊ထန်းသကြားမှုန့်(၃၀၀)ဂရမ် တစ်ထုပ်လျှင်(၂၀၀၀) ကျပ်၊ ချင်းထန်းလျက်မှုန့်(၁၅)ဂရမ် အထုပ်သေး(၂၀)ထုပ်ပါ တစ်ပါကင်ကို (၃၀၀၀)ကျပ်ဖြင့် ထုပ်လုပ်ရောင်းချလျက်ရှိကြောင်း ထုတ်လုပ်သူလုပ်ငန်းရှင်တစ်ဦးထံမှ သိရှိရပါသည်။

DOCA(မန္တလေး)

             မန္တလေးတိုင်းဒေသကြီး၊ စားသုံးသူရေးရာဦးစီးဌာန၊ မိတ္ထီလာခရိုင်ဦးစီးမှူး ဦးဇော်မင်းသည် ၂၀၂၂ခုနှစ်၊ ဖေဖော်ဝါရီ လ ၂၃ ရက်နေ့တွင်  မိတ္ထီလာမြို့၊ ရန်မျိုးအောင်၊ စပယ်ဦးရပ်ကွက်၊ နယ်မြေ (၁)၌ ထုတ်လုပ်တင်သွင်းရောင်းချနေသော ပေါင်မုန့်၊ ကိတ်မုန့်လုပ်ငန်းရှင်တစ်ဦးသည် ၎င်း၏ အမှတ်တံဆိပ်တွင် ထည့်သွင်းဖော်ပြသွားမည့် ကုန်အညွှန်းအမှတ်အသားများတွင် စားသုံးသူကာကွယ်‌ရေးဥပဒေပြဌာန်းချက်များနှင့် ကိုက်ညီမှုရှိ/မရှိနှင့် လိုအပ်ချက်များ ပြင်ဆင်ပြုပြင်နိုင်ရန်အတွက် တွေ့ဆုံဆွေးနွေးခဲ့ပါသည်။

          အဆိုပါတွေ့ဆုံမှုအရ ပေါင်မုန့်၊ ကိတ်မုန့်လုပ်ငန်းတွင် ပျားရည်စမ်းပေါင်မုန့်နှင့် ကိတ်မုန့်စသည့်မုန့်များကို မိသားစုတစ်ပိုင်တစ်နိုင်လုပ်ကိုင်ကြကြောင်း၊ မိတ္ထီလာမြို့အတွင်း ဖြန့်ဖြူးရောင်းချလျက်ရှိကြောင်း သိရှိရပါသည်။ ထို့နောက် ခရိုင်ဦးစီးမှူးမှ မုန့်အမျိုးအစားအလိုက် ကုန်အညွှန်းအမှတ်သားများအား ပြည့်စုံစွာဖော်ပြရန်အတွက် မြန်မာနိုင်ငံစားသုံးသူကာကွယ်ရေးကော်မရှင်ထုတ်ပြန်ထားရှိသည့် ကုန်အညွှန်းအမှတ်အသား‌ဖော်ပြခြင်းဆိုင်ရာ အမိန့်ကြေငြာစာ (၂/၂၀၁၉)အားထုတ်ပြန်ထားရှိကြောင်းကိုလည်းကောင်း၊ ကုန်စည်များတွင် မြန်မာဘာသာဖြင့်ဖြစ်စေ၊ မြန်မာဘာသာနှင့် အခြားဘာသာတွဲလျက်ရှိစေ ဖော်ပြရမည့်အချက်အလက်များကိုလည်းကောင်း ရှင်းလင်းဆွေးနွေးပြောကြားခဲ့ပြီး ဌာနသို့ စိစစ်ဆောင်ရွက်ပေးပါရန် တင်ပြလာမှုအပေါ် ကူညီဆောင်ရွက်ပေးမှုများ ပြုလုပ်ခဲ့ပါသည်။

DOCA(မန္တလေး)

           စားသုံးသူရေးရာဦးစီးဌာန၊ မန္တလေးတိုင်းဒေသကြီး၊ မိတ္ထီလာခရိုင်ဦးစီးမှူးရုံးမှ ခရိုင်ဦးစီးမှူး၏ကြီးကြပ်မှုဖြင့် ဦးစီးအရာရှိနှင့်ဝန်ထမ်းများသည် (၂၅.၂.၂၀၂၂) ရက်နေ့ (၁၀:၀၀)အချိန်တွင် မိတ္ထီလာမြို့နယ်အတွင်းရှိ ကြက်သွန်ကြော်လုပ်ငန်းလုပ်ကိုင်သူများနှင့် ကွင်းဆင်းလေ့လာတွေ့ဆုံခဲ့ပါသည်။

      ကြက်သွန်ကြော်လုပ်ငန်းကို မိတ္ထီလာမြို့နယ် မြို့သစ် (ကွက်သစ်ရပ်)၊ မိတ္ထီလာ-ကျောက်ပန်းတောင်း လမ်းဘေးကျေးရွာများဖြစ်သော မြင်းကန်ကျေးရွာအနီးနှင့် ဂွေ့ကြီးကျေးရွာအနီးတွင် တွေ့ရှိရပါသည်၊၊ ဂွေ့ကြီး ကျေးရွာအနီးရှိ “ဟိုးလေးကြော်” ကြက်သွန်ကြော်လုပ်ငန်းနေရာသို့ သွားရောက်လေ့လာရာတွင် လုပ်ငန်းပိုင်ရှင်ကိုသန့်ဇင်ဝင်းမှ ကြက်သွန်ကြော်လုပ်ငန်းကို လုပ်ကိုင်လာရာ (၅) နှစ်ခန့်ရှိပြီဖြစ်ကြောင်း၊ ကြက်သွန်ကြော် (အဖြူ/အနီ) (၂) မျိုးလုံးလုပ်ကိုင်ကြကြောင်း၊ ကုန်ကြမ်းဖြစ်သော ကြက်သွန်နီကို မြင်းခြံနှင့် မြစ်သားမြို့နယ်ဘက်မှ (၁) ပိဿာလျှင်(အသေး)(၁၅၀-၂၀၀)ကျပ်ဖြင့် လည်းကောင်း၊ ကြက်သွန်ဖြူကို တောင်ကြီးဘက်မှ (၁) ပိဿာ (၇၀၀) ကျပ်စျေးနှုန်းဖြင့် လည်းကောင်း ဝယ်ယူရကြောင်း၊ ကြက်သွန်ကြော်ရန် ဆီနှင့် လိုအပ်သော ဆန်မှုန့်ကိုလည်း ဝယ်ယူရကြောင်း၊ ကြက်သွန်ခွဲစက် (၂) လုံးထားရှိကြီး ပုတ်ပြတ်လုပ်သား (၃၆) ဦးနှင့် နေ့စား(၄) ဦးရှိကြောင်း၊ နေ့စားလုပ်သား(၁)ဦးကို (၁) ရက်လျှင် (၁၀၀၀၀) ပေးရပြီး ပုတ်ပြတ်လုပ်သားများမှာ အခွံချွတ်ခြင်း၊ သန့်စင်ခြင်းလုပ်ငန်းကို လုပ်ဆောင်ရပြီး ကြက်သွန်နီ (၁) ပိဿာ အခွံချွတ်သန့်စင်ပြီးလျှင် (၁၀၀) ကျပ်၊ ကြက်သွန်ဖြူဆိုလျှင် (၁၅၀) ကျပ် ရရှိကြကြောင်းသိရှိရပါသည်၊၊

          ကြက်သွန်ကြော်ရာတွင် အခွံချွတ်ခြင်း၊ ကြိတ်ခွဲခြင်း၊ နေလှမ်းခြမ်း၊ ကြော်ခြင်း ၊ ပါကင်ထုပ်ပိုးခြင်း စသည်ဖြင့် အဆင့်ဆင့်ပြုလုပ်ရပြီး (၁) ရက်လျှင် ကုန်ကြမ်း(၁၀၀၀) ပိဿာပြီးကြောင်း၊ ကုန်ချောထွက်ရှိမှုအနေဖြင့် ကုန်ကြမ်း (၁) ပိဿာလျှင် ကုန်ချော (၄၀-၅၀) ကျပ်သားခန့်ရရှိကြောင်း၊ ကြက်သွန်ကြော်ရန် ကုန်ကြမ်း ပိဿာ (၁၀၀၀) အတွက် ဆီ (၁၁၅) ပိဿာခန့်၊ ဆန့်မှုန့် (၃၀) ပိဿာခန့်ကုန်ကျကြောင်း သိရှိရပါသည်။

         ထွက်ရှိလာသော ကြက်သွန်ကြော်များကို ကြက်သွန်ဆိုလျှင် (၁၂)ပိဿာ ဆံ့ဖာများဖြင့် ထုပ်ပိုပြီး ကြက်သွန်ဖြူဆိုလျှင် (၂၅) ပိဿာဆံ့အိတ်များဖြင့်ထုပ်ပိုး၍ ကြက်သွန်နီကြော် (၁) ပိဿာလျှင် (၃၇၀၀) ကျပ် ကြက်သွန်ဖြူကြော် (၁) ပိဿာလျှင် (၄၅၀၀ )ကျပ် စျေးနှုန်းဖြင့် ရန်ကုန်သို့တင်ပို့ကြကြောင်း သိရှိရပါသည်၊၊

          ယခုအချိန်အခါမျိုးတွင် အကျိုးအမြတ်အနေဖြင့် နည်းသော်လည်းလုပ်သားများအတွက် အလုပ်အကိုင် အခွင့်အလမ်းနှင့် ပုံမှန်ဝင်‌ငွေရရှိစေရန်၊ လုပ်သားများအဆက်အသွယ်မပြတ်ရှိနေစေရန် ရည်ရွယ်၍ပုံမှန်အတိုင်း လုပ်ကိုင်ဆောင်ရွက်လျက်ရှိကြောင်း လုပ်ငန်းရှင်များထံမှ သိရှိရပါသည်။

DOCA(မန္တလေး)

          စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ စားသုံးသူရေးရာဦးစီးဌာန၊ မကွေးတိုင်းဒေသကြီး၊ တိုင်း/ခရိုင်ဦးစီးမှူး၏ လမ်းညွှန်ချက်ဖြင့် ပခုက္ကူခရိုင်ဦးစီးမှူးရုံးမှ ဌာနခွဲစာရေးဒေါ်ဝါဝါကြည်သည်  (၁.၃.၂၀၂၂)ရက်နေ့၊ နံနက် (၁၀:၀၀)နာရီအချိန်တွင် ပြည်တွင်းကုန်သွယ်မှုဖွံ့ဖြိုးတိုးတက်စေရေးအတွက် ပခုက္ကူမြို့နယ်၊ သံပုရာပင်ကုန်းကျေးရွာရှိ ပြောင်းစိုက်တောင်သူဒေါ်ဌေးဌေး၏ အစေ့ထုတ်ပြောင်း(CP)၏ စိုက်ပျိုးထွက်ရှိမှုအခြေအနေကို ကွင်းဆင်းလေ့လာ မေးမြန်းခဲ့ပါသည်။

            သံပုရာပင်ကုန်းကျေးရွာတွင် အိမ်ခြေ(၂၀၀)ခန့်ရှိပြီး ပြောင်းဖူးစေ့ (CP) အား ဧက(၁၀၀) ဝန်းကျင်ခန့် စိုက်ပျိုးကြောင်း၊ တောင်သူဒေါ်ဌေးဌေးမှ ယခုနှစ်တွင် (၁)ဧကခန့် စိုက်ပျိုးထားရှိ၍ အောက်တိုဘာလဆန်းပိုင်းတွင် စတင်စိုက်ပျိုးကြောင်း၊ စိုက်ပျိုးရာတွင် ရှေးဦးစွာ စိုက်ပျိုးမြေအား မြေဆီပန်းဖူး(၁) အိတ်လျှင် (၇၆၀၀၀)ကျပ်နှုန်းဖြင့် (၂)အိတ်ဝယ်ယူကျဲပတ်ပြီး စိုက်ပျိုးပါကြောင်း၊ စက်ကြီးဖြင့် မြေပြုပြင်ရာတွင်(၁)နာရီ (၃၀၀၀၀)နှုန်းဖြင့် (၃)နာရီကြာစက်ခုတ်၍ မြေသားအစိုဓါတ်တက်လာစေရန်အတွက် မြေညှိထားခဲ့ပါကြောင်း၊ (၃)ရက်ခန့်အကြာတွင် နွား(၁)ရှဉ်းလျှင် (၁၃၀၀၀)ကျပ် ဖြင့်ငှားရမ်းပြီး တန်းကြား(၁)ပေခွဲမြောင်းများဆွဲ၍ အလုပ်သမား(၃)ဦးကို တစ်ဦး လျှင်(၁၅၀၀)ကျပ်နှုန်းဖြင့် ငှားရမ်းပြီးစိုက်ပျိုးကြကြောင်း၊  ပြောင်းဖူးစေ့(CP)808မျိုးကို မျိုးစေ့ (၁) ထုပ်ကို(၄၅၀၀၀)ကျပ်ပေးဝယ်ရ၍ (၁)ဧကစိုက်ပျိုးရကြောင်း သိရှိရပါသည်။

          အစေ့ထုတ်ပြောင်း(CP)ကိုစိုက်ပျိုးရာတွင် အဓိကရေသွင်း၍ စိုက်ပျိုးရကြောင်း၊ စိုက်ပျိုးချိန်မှစ၍ ပြောင်းဖူးရင့်၍ ရိတ်သိမ်းချိန်အထိ(၄)လခန့်ကြာမြင့်ပါကြောင်း၊ စိုက်ပျိုးချိန်၌ မိုးရွာသွန်းမှုမရှိလျှင် ရေသွင်းစိုက်ပျိုးရ၍ ယခုနှစ်စိုက်ပျိုးချိန်၌ အောက်တိုဘာလတွင် မိုးများစွာရွာသွန်းသောကြောင့် အစိုဓါတ်များ၍ ရေပေးသွင်းခြင်းမပြုလုပ်ရသည့်အတွက် ကုန်ကျစရိတ်သက်သာပါကြောင်း၊ စိုက်ပျိုးပြီး(၇)ရက်ကြာတွင် အပင်ပေါက်စုံ၍ (၁)လသားအရွယ် ဝတ်မှုံကပ်ချိန်တွင် အပင်ကြီးထွားစေရန်အတွက် အားဆေးပက်ဖြန်းပြီး ရေ(၁)ကြိမ်၊ ဖူးလုံးကပ်ချိန်တွင် ပိုးမွှားကျရောက်မှု အန္တရာယ်ကင်းစေရန်နှင့် အထွက်နှုန်းကောင်းစေရန်အတွက် ပိုးသတ်ဆေး၊ မှိုဆေး၊ အားဆေးများပက်ဖျန်းပြီး ရေ(၁)ကြိမ်၊ အဖူးအောင်ခါနီး အချိန်တွင် ပြောင်းဖူးစေ့ ကြီးထွားစေရန်အတွက် ရေ(၁)ကြိမ်စသည့်  စိုက်ပျိုးချိန်မှစပြီး အဖူးရင့်၍ ရိတ်သိမ်းချိန်အထိ စုစုပေါင်း ရေ(၃)ကြိမ်ပေးသွင်းရကြောင်း၊ တစ်ကြိမ်သွင်းလျှင် (၁၂)နာရီခန့် အချိန်ကြာမြင့်ပြီး အလုပ်သမား(၄)ဦးခန့် ငှားရမ်းရ၍ (၁)ဦးလျှင် (၈၀၀၀)ကျပ် ပေးရကြောင်း၊ ရေ(၁)ကြိမ်သွင်းလျှင် ဆီ(၁)ဂါလံ(၆၀၀၀)ကျပ်နှုန်းဖြင့် ဆီ(၃)ဂါလံခန့် ကုန်ကျကြောင်း သိရှိရပါသည်။

          အဖူးရင့်၍ ရိတ်သိမ်းရာတွင် အလုပ်သမား(၁၀)ဦးခန့် ငှားရမ်းပြီး အပင်ရိတ်ခြင်း၊ အဖူး ချိုးခြင်းများပြုလုပ်ပြီး စိုက်ခင်းမှ အိမ်သို့သယ်ယူရာတွင် Faw ကားများဖြင့် (၄)စီးခန့် သယ်ယူ၍ (၁)ခေါက်လျှင်(၁၅၀၀၀)ကျပ်နှုန်းဖြင့် သယ်ယူစရိတ်ပေးရကြောင်း၊ အိမ်ရောက် လျှင်အဖူးများအား  ကွင်းပြင်တွင်  ပါးပါးဖြန့်၍  (၁၀)ရက်ခန့် နေပူလှန်းရပြီး အဖူးခြောက်လျှင် ပြောင်းဖူးချွေလှေ့စက်ဖြင့်ချွေရာတွင် ပြောင်းဖူးစေ့ (၁)တင်းလျှင် (၅၀၀)ကျပ်နှုန်းဖြင့် စက်ငှားရမ်းခပေးရပြီး တင်း(၉၀)ခန့် ထွက်ရှိ၍ ချွေလှေ့ခ(၄၅၀၀၀)ကျပ်ကုန်ကျကြောင်း သိရှိရပါသည်။

          အစေ့ထုတ်ပြောင်း(CP) (၁)ဧကကုန်ကျစရိတ်မှာ မြေပြုပြင်ရန်စက်ဖိုး၊ ထွန်ရှဉ်းခ၊ မျိုးစေ့ဝယ်ယူခ၊ သွင်းအားစုအမျိုးမျိုးဝယ်ယူခ၊ ရေသွင်းရန်စက်ဆီဝယ်ယူခ၊ အလုပ်သမားငှားရမ်းခ စသည့် စုစုပေါင်းကုန်ကျစရိတ်မှာ ခန့်မှန်း(၆)သိန်းခွဲ ဝန်းကျင်ခန့်ရှိပြီး၊ ပြောင်းဖူးစေ့(CP)၏ ယခုပေါက်ဈေးမှာ (၁)တင်းလျှင် (၁၅၀၀၀)ကျပ်ခန့်ဈေးရသဖြင့် ထွက်ရှိသည့် ပြောင်းဖူးစေ့ (CP)တင်း(၉၀)အတွက် စုစုပေါင်းဝင်ငွေမှာ (၁၃)သိန်းဝန်းကျင်ခန့်ရှိသောကြောင့် အကျိုးအမြတ်အနေဖြင့်(၆)သိန်းခွဲခန့်ရရှိကြောင်း တောင်သူဒေါ်ဌေးဌေး၏ ပြောကြားချက်အရ သိရှိရပါသည်။

         အစေ့ထုတ်ပြောင်း(CP)စိုက်ပျိုးခြင်းသည် ပြည်တွင်းသုံးစွဲမှုအနေဖြင့် တိရိစ္ဆာန်အစာအဖြစ် သုံးစွဲရုံသာမက ရန်ကုန်၊ မြဝတီတို့မှ တစ်ဆင့် ပြည်ပဈေးကွက်သို့ တင်ပို့ရောင်းချလျက်ရှိသည့်အတွက် စိုက်ပျိုးရေရရှိပါက (CP)ပြောင်းမှာ ဈေးနှုန်း/ဈေးကွက် ကောင်းမွန်မှုရှိသဖြင့် တောင်သူများအနေဖြင့် အကျိုးအမြတ်များသည့် (CP)ပြောင်းကိုလည်း စိုက်ပျိုးသင့်ပါကြောင်း လေ့လာတင်ပြလိုက်ရပါသည်။

DOCA(မကွေး)