ပြည်တွင်းကုန်သွယ်မှုသတင်း

         တောင်ငူခရိုင်၊ ဖြူးမြို့မှ ဈေးကွက်အတွင်းရောင်းချလျက်ရှိသော အုန်းသီးခေါက်မုန့်များအတွက် လိုအပ်သောကုန်ကြမ်းပစ္စည်းများမှာ ဂျုံ၊ သကြား၊ ဆီ၊ ရေနှင့် အုန်းသီးတို့ပဲဖြစ်ပါသည်။ အုန်းသီးခေါက်မုန့် ပြုလုပ်ပုံအဆင့်ဆင့်မှာ ဂျုံ၊ သကြား၊ ဆီနှင့် ရေတို့အား ရော၍နယ်ရပါသည်။ ထို့နောက်  ဂျုံနှင့်ဆီကို သပ်သပ်ထပ်နယ်ရပါသည်။ အုန်းသီးကိုခွာ၍ အုန်းခြစ်နှင့်ခြစ်ကာ သကြားနှင့်သမအောင် ရောမွှေပေးရပါသည်။ ဂျုံ၊ သကြားနှင့် ရေနယ်ထားသောမုန့်အနှစ်အား ပြင်ပအခွံ ပြုလုပ်ရပါသည်။ ထိုအခွံထဲသို့ ဂျုံနှင့်ဆီနယ်ထားသော မုန့်အနှစ်ကိုထည့်၍ လိပ်ရပါသည်။ ပြီးလျှင် လိပ်ထားသောမုန့်အား ပိုက်လုံးလေးနှင့်ပြားကာ အုန်းသီးနှင့်သကြားနယ်ထားသော အုန်းသီးဌာပနာအား ထည့်၍ လက်နှင့်ခေါက်ရပါမည်။ ထိုမုန့်များ၏အပေါ်တွင် ကြက်ဥကိုမွှေပြီး သုတ်ကာ ဖုတ်ပြီးလျှင် အုန်းသီးခေါက်မုန့်အား ရရှိပြီဖြစ်ပါသည်။

            ထိုမုန့်များအား တံဆိပ်ထည့်ကာ ပလတ်စတစ်အိတ်ဖြင့် (၅) ခုပါ တစ်အိတ်ထုပ်ပြီးလျင် ဈေးကွက်အတွင်းသို့ ရောင်းချပါသည်။ အုန်းသီးခေါက်မုန့် ဈေးနှုန်း၊ ဈေးကွက်အနေဖြင့် (၅) ခုပါ အုန်းသီးခေါက်မုန့် တစ်ထုပ်လျှင် (၁၄၀၀) ကျပ် ဈေးဖြင့် ဖောက်သည်ပေးကာ ဈေးဆိုင်များအနေဖြင့် တစ်ထုပ်လျှင် (၁၅၀၀) ကျပ်ဈေးနှုန်းဖြင့် ပြန်လည်ရောင်းချလျက်ရှိကြောင်း သိရှိရပါ သည်။ ထုပ်လုပ်မှုအနေဖြင့် တစ်နေ့လျှင် အုန်းသီးခေါက်မုန့် (၅) ခုပါ အထုပ်(၁၀၀) ခန့် ထုပ်လုပ်နိုင်ကြောင်းနှင့် ဇေယျဝတီ၊ ဖြူး၊ ညောင်ပင်သာ၊ ကညွတ်ကွင်းနှင့် ကျောက်တံခါးမြို့များထိ ဖြန့်ဖြူးလျက်ရှိကြောင်း သိရှိရပါသည်။

DOCA(ပဲခူး)

            ပဲခူးတိုင်းဒေသကြီး၊ တောင်ငူခရိုင်၊ ဖြူးမြို့၊ ကင်မွန်းခြုံကျေးရွာအုပ်စု၊ ခြံကြီးမြိုင်ရှိ တောင်သူကြီး ဦးစိန်ဝင်းသည် ယမန်နှစ်က အထွက်ကောင်းထိုင်းစပါးမျိုးများဖြစ်သော jasmine-5 နှင့် DR-43 စပါးမျိုးအား စမ်းသပ်စိုက်ပျိုးရာတွင် ဆန်သားကောင်းမွန်၍ ရာသီဥတုဒဏ်ခံခြင်း၊ အထွက်နှုန်းကောင်းခြင်းများကြောင့် ယခုနှစ် မိုးရာသီတွင် ယင်းစပါးမျိုးများအား နွေစပါးရာသီတွင် မျိုးအဖြစ်ပြန်လည်ရောင်းချရန်အတွက် ရည်ရွယ်၍ စိုက်ပျိုးခဲ့ပါသည်။

         မိုးစပါးကာလ၌ jasmine-5 နှင့် DR-43 စပါးများမှာ တန်းစိုက်စနစ်ဖြင့်စိုက်ပျိုးပြီး ရက် ၁၀၀ သက်တမ်းရှိပါသည်။ ယခုအခါတွင် ရိတ်သိမ်းပြီးစီးပြီးဖြစ်ရာ ၁ ဧက ၉၃ တင်းနှုန်းထွက်ရှိကြောင်း သိရှိိရပါသည်။  ၎င်းစပါးများအားသန့်စင်ပြီး နွေစပါးမျိုးအဖြစ် ၂၀ ပိဿာ တစ်အိတ်လျှင် ၂၅၀၀၀ ကျပ်နှုန်းဖြင့် ယခုလ နိုဝင်ဘာလ ဒုတိယပတ်မှစတင်၍ ရောင်းချနေပြီဖြစ်ကြောင်း သိရှိရပါသည်။

DOCA(ပဲခူး)

         နိုဝင်ဘာလဆန်းပိုင်းမှစ၍ ဆောင်းဝင်လာပြီဖြစ်၍ ရာသီတုပ်ကွေးရောဂါများ ဖြစ်ပွားလျက်ရှိရာ မကွေးမြို့ပေါ်ရှိ ဆေးဆိုင်များတွင် ဖျားနာမှုအတွက် အဓိကဝယ်ယူလျှက်ရှိကြသော အိမ်သုံးဆေးဝါးများ နှင့် နေအိမ်သုံး ဆရာဝန်ညွှန်ကြားချက် မလိုအပ်သော ဆေးများမှာ အောက်တိုဘာလ စတုတ္ထအပတ်မှ နိုဝင်ဘာလ တတိယအပတ်အထိ ဆေးဝါးစျေးနှုန်းများ မြင့်တက်လျက်ရှိကြောင်း သိရှိရပါသည်။

            မ‌ကွေးမြို့နယ်အတွင်းရှိ စျေးကွက်အတွင်းဖြစ်ပေါ်လျှက်ရှိသော အိမ်သုံးဆေးဝါးနှင့် အိမ်သုံး အားဆေးများ၏ စျေးနှုန်းများမှာ နိုဝင်ဘာလ တတိယပတ်တွင်Decogin (၁၀)လုံးပါ တစ်ကဒ်လျှင် ကျပ်(၂၀၀၀)၊ Biogesic (၁၀) လုံးပါတစ်ကဒ်လျှင် ကျပ်(၉၅၀)၊  Amoxacillin (၁၀၀)လုံးပါ တစ်ဗူးလျှင် ကျပ်(၂၈၀၀)၊ Cetrine (၁၀)လုံး ပါတစ်ကဒ်လျှင် ကျပ်(၂၅၀)၊ ဓါတ်ဆား(MPF) တစ်ထုပ်လျှင် ကျပ်(၃၀၀)၊ Flemex (၁၀)လုံးပါ တစ်ကဒ်လျှင် ကျပ်(၄၀၀၀)၊ Solmux (၄)လုံးပါ တစ်ကဒ်လျှင် ကျပ်(၁၅၀၀)၊ Alexal (၁၀)လုံးပါ တစ်ကဒ်လျှင်ကျပ်(၂၁၀၀)၊ Mexagrip (၄)လုံးပါတစ်ကဒ်လျှင် ကျပ်(၅၀၀)၊ Enorvon-c (၄)လုံးပါ တစ်ကဒ်လျှင် ကျပ်(၁၅၅၀)၊ Oramin- G (၅)လုံးပါ တစ်ကဒ်လျှင် ကျပ်(၂၇၅၀)၊ Becozine (၁၀)လုံးပါ တစ်ကဒ်လျှင် ကျပ်(၃၉၅၀)၊ Vitahome (၁၀)လုံးပါတစ်ကဒ် လျှင် ကျပ်(၁၇၀၀)၊ Vitacee (၁၅)လုံးပါ တစ်ကဒ်လျှင် ကျပ်(၄၂၅၀)ဖြစ်၍ ယခင်အောက်တိုဘာလ စတုတ္ထပတ်ထက် ယခုအပတ်တွင် Decogin ကျပ်(၅၀)၊ Amoxacillin ကျပ်(၅၀)၊ Cetrine ကျပ်(၅၀)၊ Flemex ကျပ်(၁၀၀)၊ Solmux ကျပ်(၃၅၀)၊  Alexal ကျပ်(၅၀)၊ Mexagrip ကျပ်(၅၀)၊ Enorvon-c ကျပ်(၁၀)၊ Becozine ကျပ်(၅၀)၊ Vitahome ကျပ်(၅၀)၊ Vitacee ကျပ်(၁၀၀)ဖြင့် အသီးသီးစျေးနှုန်း မြင့်တက်ခဲ့ပြီး အတက်အကျရှိ‌ကြောင်းလည်း ဆေးဆိုင်များမှ သိရှိရပါသည်။

DOCA(မကွေး)

     ရန်ကုန်တိုင်းဒေသကြီး၊ မင်္ဂလာတောင်ညွှန့်မြို့နယ် သိမ်ဖြူဈေးကြီးအတွင်း ကြက်သွန်ဖြူ၊ ကြက်သွန်နီများအား ကား၊ ရထားတို့ဖြင့် ဘုရင့်နောင်ကုန်စည်ဒိုင်နှင့် ရှမ်းပြည်နယ်တို့မှ နေ့စဉ် ဝင်ရောက်လျက်ရှိပြီး လက်လီလက်ကား ပြန်လည်ရောင်းချလျက်ရှိရာ ၁၁.၁၁.၂၀၂၂ မှ ၁၆.၁၁.၂၀၂၂ ရက်အထိ ကြက်သွန်နီ(ဆိပ်ဖြူ)အဝင် (၂၉၇၅၀)ပိဿာနှင့် ကြက်သွန်ဖြူ(ကြူကုတ်) (၈၈၀၀) ပိဿာ ဝင်ရောက်ခဲ့ပြီး ကြက်သွန်နီ(ဆိပ်ဖြူ)လက်ကားဈေးမှာ ၁ပိဿာလျှင် ၄၂၀၀ ကျပ်မှ ၄၅၀၀ ကျပ် ထိ ဖြစ်၍ ကြက်သွန်ဖြူ(ကြူကုတ်) လက်ကားဈေးမှာ ၁ပိဿာလျှင် ၃၆၀၀ ကျပ်မှ ၃၇၀၀ ကျပ်ထိရှိပြီး ကြက်သွန်နီဈေးနှုန်းမှာ ဆက်လက်မြင့်တက်လျက်ရှိပြီး ကြက်သွန်ဖြူ ဈေးနှုန်း အနည်းငယ်ကျဆင်းကြောင်းနှင့် တနင်္ဂနွေနေ့တွင် ကုန်အဝင်မရှိကြောင်း ဈေးတာဝန်ခံရုံးမှ သိရှိရပါသည်။

DOCA(ရန်ကုန်)

               တောင်ငူမြို့  ၂၂ ရပ်ကွက်၊ ပန်းပဲလမ်းတွင် ပန်းပဲလုပ်ငန်းများလုပ်ကိုင်ရာတွင် ဓားကောက်၊ ဓားရှည်၊ ဓားမ၊ ဓားမြှောင် စသည်ဖြင့် အမျိုးအစားစုံလင်စွာထုတ်လုပ်လျက်ရှိကြောင်း သိရှိရပါသည်။ ပန်းပဲလုပ်ငန်းအတွက် တစ်နေ့လျှင် ကားလေးသံ ၁၅ ပိဿာနှင့် မီးသွေး ၂ အိတ်ခန့် အသုံပြုရပါသည်။

             ပန်းပဲလုပ်ငန်းတွင် လုပ်သားအင်အား (၉)ယောက်ခန့်သုံးရပြီး ၁ ဦးလျှင် လုပ်အားခ ၉၀၀၀ ကျပ်ခန့်ပေးရကြောင်း သိရှိရပါသည်။  ကုန်ကြမ်းအတွက် ကားလေးသံတစ်ပိဿာကို ၃၀၀၀ ကျပ် ဝယ်ယူရပြီး ပန်းပဲလုပ်ငန်းမှထွက်လာသော ကုန်ချောသံ(ဓါး)များအား ၁ပိဿာလျှင် ၉၀၀၀ ကျပ်နှုန်းဖြင့် ပြန်လည်ရောင်းချကြောင်း သိရှိရပါသည်။  ကားလေးသံတစ်ပိဿာလျှင် ဓားမ ၃ ချောင်း ထွက်ရှိပါသည်။

               ထွက်ရှိလာသောဓားများအား တောင်ငူမြို့ရှိဓားဆိုင်များသို့ အဓိကထားသွင်းပြီး မော်လမြိုင်၊ ဘားအံနှင့် ဖာပွန်မြို့များမှ တစ်နှစ်လျှင် ၂ ကြိမ်မှ ၃ ကြိမ်ထိ အမှာရှိပြီး ဓားချောင်းရေ ၂၀၀ မှ ၃၀၀ ခန့် ပို့ပေးရကြောင်း ပန်းပဲလုပ်ငန်းပိုင်ရှင်တစ်ဦးပြောကြားချက်အရ သိရှိရပါသည်။

DOCA(ပဲခူး)