ပြည်တွင်းကုန်သွယ်မှုသတင်း

     စားသုံးသူရေးရာဦးစီးဌာန၊ စစ်ကိုင်းတိုင်းဒေသကြီး၊ ကန့်ဘလူမြို့နယ်အနေဖြင့် ဒေသတွင်း စိုက်ပျိုးထွက်ရှိသည့် သီးနှံဈေးနှုန်းများ၊ ရာသီပေါ်အစားအစာများ၏ ဈေးနှုန်း၊ဈေးကွက်အခြေအနေ တို့အား ရေးသားတင်ပြလျက်ရှိရာ ယခုအခါ ကန့်ဘလူမြို့ပေါ်ရှိ ကုန်စုံဆိုင်များတွင်ရောင်းချလျက် ရှိသည့် နှမ်းပျစ်(ခေါ်)နှမ်းကပ်ယိုကို ကန့်ဘလူမြို့နယ်မှထွက်ရှိသလို ရွှေဘိုမြို့ရှိလက္ကားဆိုင်များမှ ဝယ်ယူရောင်းချကြောင်း သိရသည်။

      ၂၀၂၅ ခုနှစ်၊ ဩဂုတ်လ ပထမပတ်တွင် ရောင်းချနေသော နှမ်းပျစ်(ခေါ်)နှမ်းကပ်ယို ဈေးနှုန်းမှာ (၁)ပိဿာလျှင်(၁၀၀၀၀)ကျပ်၊ (၅၀)ကျပ်သားလျှင် (၅၀၀၀)ကျပ်နှင့် (၁၀)ကျပ်သား လျှင် (၁၀၀၀)ကျပ်ဖြင့်ရောင်းချကြောင်း၊ အသင့်ထုတ်ပြီးနှမ်းကပ်ယို(၁)ထုတ် (၁၅၀၀)ကျပ်ဖြင့် ရောင်းချကြောင်း၊ နှမ်းပျစ်(ခေါ်)နှမ်းကပ်ယိုကို နှမ်းလှော်၊ ထန်းလျက် စသည့်တို့ဖြင့်ပြုလုပ်ထား သည့်အတွက် နှမ်း၏အစိမ့်အရသာနှင့် အချိုအရသာ ပေါင်းစပ်ထားသောကြောင့် စားဖူးသူတိုင်း ကြိုက်နှစ်သက်၍ ဝယ်ယူစားသုံးသူများကြောင်း လုပ်ငန်းရှင်များထံမှ သိရှိရသည်။

DOCA(စစ်ကိုင်း)

  မအူပင်ခရိုင်၊ မအူပင်မြို့နယ် အနီး ကျေးရွာများမှ တစ်ပိုင်တနိုင် ဂွေးချိုပင်ကို စိုက်ပျိုး ထားပြီး  ဂွေးချိုသီးပင်များကို အိမ်ခြံဝင်းအတွင်း  အနည်းငယ်စီစိုက်ပျိုးထားပြီး  မိသားစုအပိုဝင်ငွေများရလျက်ရှိကြောင်း သိရသည်။

   ဂွေးချိုသီးပင်များမှာ ပူ၍ခြောက်သွေ့သော ရာသီဥတုကိုကြိုက်နှစ်သက်၍ မိမိတို့နေထိုင်ရာ ကျေးရွာရာသီဥတုနှင့် ကိုက်ညီခြင်း၊ ဂွေးချိုသီးကို ဝယ်ယူစားသုံးခဲ့ရာမှ နှစ်ခြိုက်မှုရှိခြင်း၊ ဂွေးချိုသီးကို သွားရေစာအဖြစ် ထုတ်လုပ်ရောင်းချမှုများကို  မြင်တွေ့ရခြင်း၊ ဂွေးချိုသီးကို ဒေသတွင်းတွင် အချဉ်ပေါင်းရောင်းချသူများလည်း ရှိကြသည်။ ဒေသတွင်း စီးပွား ဖြစ် စိုက်ပျိုးသူမရှိခြင်း၊ စိုက်ပျိုးအောင်မြင်ဖြစ်ထွန်းပါက အပိုဝင်ငွေရရှိခြင်းတို့ကြောင့် အိမ်ခြံဝင်းအတွင်း စိုက်ပျိုး သူများ နှစ်စဉ် ဝင်ငွေရရှိလျက်ရှိကြောင်း သိရသည်။

   ဂွေးချိုသီးများကို ကလေးလူကြီးမကျန် နှစ်ခြိုက်ကြ၍ သွားရေစာအဖြစ် ၁လုံးလျှင်  (၅၀ဝိ/-) ကျပ်မှ (၈၀ဝိ/-) ကျပ်အထိ အရောင်းအဝယ်ဖြစ်ကြကြောင်း၊ နှစ်စဉ် ဩဂုတ်လတွင် ဂွေးချိုသီးထွက်ရှိနေ၍ ဂွေးချိုသီးပင်ကို စတင်စိုက်ပျိုးရာ ၅နှစ်အကြာတွင် အသီးထွက်ရှိသောကြောင့် နှစ်စဉ် ရောင်းချလျက်ရှိသော နှစ်ရှည်သီးနှံပင်ဖြစ်၍ ဂွေးချိုသီးရောင်းချသူများမှ တစ်နေ့လျှင် အလုံးရေ ၅၀၀နီးပါး ရောင်းချရပြီး အခွန်လွတ်ဈေးတွင် ဂွေးချိုးသီးရောင်းချသူ ၅ဦးခန့်ရှိကြောင်း ၊ဒေသတွင်း စားသုံးရန်သာ ရောင်းချနေပြီး၊ ဂွေးချိုသီးပင်များကို စီးပွားဖြစ်စိုက်ပျိုးသင့်သော သီးနှံတစ်ခုဖြစ်ကြောင်းနှင့်  အခြားသော ဈေးများတွင်လည်း ဂွေးချိုသီးရောင်းချသူများလည်း ရှိကြောင်း သိရသည်။

DOCA(ဧရာဝတီ)

   မအူပင်မြို့နယ်အတွင်းရှိ ကျေးရွာများတွင် စိုက်ပျိုးရေးလုပ်ငန်းများကို လုပ်ကိုင်လျက်ရှိရာ မိုးတွင်းကာလတွင် ဟင်းသီးဟင်းရွက်ကို ပိုမိုစိုက်ပျိုးပြီး စားဖို ဆောင်သီးနှံဖြစ်သည့် ပဲတောင့်ရှည်သီး၊ ချဉ်ပေါင်ရွက်၊ ရုံးပတီသီး၊ သခွားသီး၊ ခရမ်းသီးနှင့်ကန်ဇွန်းရွက်များကို စိုက်ပျိုးလျက်ရှိသည့်အနက် ချဥ်ပေါင်ရွက်ကို တစ်ပိုင်တစ်နိုင် စိုက်ပျိုးလျက်ရှိပြီး၊  မအူပင်မြို့၊ အခွန်လွတ်ဈေးတွင် အရောင်းအဝယ်ဖြစ်လျက်ရှိကြောင်း သိရရှိသည်။

     ချဉ်ပေါင်ရွက်သည် ရာသီမရွေး ပေါများစွာ စိုက်ပျိုးထွက်ရှိနိုင်သော အရွက်တစ်မျိုးဖြစ်သည်။  မိုးရာသီတွင်သာ ဟင်းရွက်ဈေးနှုန်း ပေါများလှပြီး ချဉ်ပေါင်ရွက်ကို  နေ့စဉ် ချက်ပြုတ်စား သောက်ကြသည်။ 

         ၂၀၂၅ ခုနှစ်၊ ဩဂုတ်လ ပထမပတ်အတွင်း အခွန်လွတ်ဈေး၊ ၃လမ်းဈေးများတွင် ဖြစ်ပေါ်နေသော ချဉ်ပေါင်ရွက် ဈေးနှုန်းများမှာ ချဉ်ပေါင်ရွက် လက္ကားဈေး အစီး၁၀၀ လျှင်(၁၅၀၀၀)ကျပ်၊ ချဉ်ပေါင်ရွက် လက်လီဈေး ၁စီးလျှင် (၂၀၀)ကျပ်၊ ဈေးနှုန်းတို့ဖြင့် လည်းကောင်း  ‌အရောင်းအဝယ် ဖြစ်လျက်ရှိကြောင်း သိရ သည်။ချဉ်ပေါင်ပင် စိုက်ပျိုးပါကလည်း ကုန်ကျစရိတ်နည်းပါးပြီး တစ်ဧကလျှင် ၄သိန်းခန့်ကုန်ကျပြီး အထွက်နှုန်းအနေဖြင့် ချဉ်ပေါင် အစီးရေ ၄၀၀၀-၅၀၀၀ နီးပါးထွက်ရှိကြောင်း၊ စိုက်ပျိုးပြီး ၄၅ရက်- ၆၀ရက်အတွင်း ဈေးကွက်တင်ပို့နိုင်ကြောင်း ဈေးနှုန်း အတက်အကျပေါ်မူတည်၍ အကျိုးအမြတ်ကျန်ရှိကြောင်း၊ ယနေ့ဈေးဖြင့် အမြတ် ၃၅၀၀၀၀ကျပ်ရရှိကြောင်း နှင့် ရန်ကုန်သို့လည်း စီးပွားဖြစ်စိုက်ပျိုး တင်ပို့သူများရှိကြောင်း ကို ကုန်စိမ်းရောင်းချသူထံမှသိရသည်။

DOCA(ဧရာဝတီ)

      စစ်ကိုင်းတိုင်းဒေသကြီး၊ ကန့်ဘလူခရိုင်၊ ကန့်ဘလူမြို့မဈေးတွင် ဒေသထွက်ကုန်များအပြင် အခြားဒေသမှဝင်ရောက်သည့် ဟင်းသီးဟင်းရွက်များကို ရောင်းချလျက်ရှိရာ ကန့်ဘလူခရိုင်၌ မိုးရာသီတွင် သဘာဝဟင်းသီးဟင်းရွက်များ ပေါများစွာပေါက်ရောက်ကြပြီး ဟင်းကြွက်နားတောင်း ရွက်နှင့် ငါးရံ့ပတူရွက်တို့ ရောင်းချလျက်ရှိကြောင်း သိရသည်။

        ၂၀၂၅ ခုနှစ်၊ ဩဂုတ်လ ပထမပတ်အတွင်း ကန့်ဘလူမြို့၊ မြို့မဈေးတွင် ရောင်းချနေသည့်  ဟင်းကြွက်နားတောင်းရွက် အစိမ်း(၁)ပုံလျှင် (၃၀၀)ကျပ်၊ (၂)ပုံလျှင် (၅၀၀)ကျပ်၊ အပြုတ်(၁)လုံး လျှင် (၅၀၀)ကျပ်ဖြင့်လည်းကောင်း၊ ငါးရံ့ပတူရွက်အစိမ်း(၁)ပုံလျှင် (၃၀၀)ကျပ်၊ အပြုတ်(၁)လုံး လျှင်(၅၀၀)ကျပ်ဖြင့်လည်းကောင်း အရောင်းအဝယ်ဖြစ်လျက်ရှိကြောင်း၊ ဟင်းကြွက်နားတောင်း ရွက်နှင့် ငါးရံ့ပတူရွက်တို့ကို ပြုတ်၍ငါးပိရည်နှင့်ပဲစားစား၊ မြေပဲလှော်ထောင်းနှင့် သုတ်၍ပဲစားစား ခံတွင်းမြိန်စေသည့် သဘာဝအစားအစာ တစ်မျိုးဖြစ်သည့်အတွက် ပုံမှန်အရောင်းအဝယ်ဖြစ်လျက်ရှိကြောင်း၊ ဟင်းသီးဟင်းရွက်ရောင်းချသူများထံမှ သိရှိရသည်။

DOCA(စစ်ကိုင်း)

      စစ်ကိုင်းတိုင်းဒေသကြီး၊ ကန့်ဘလူခရိုင်၌ ကွမ်းသီးပင်များကို နေအိမ်ခြံဝင်းများ၌ မိသားစု အပိုဝင်ငွေရရှိသည့်အတွက် တစ်နိုင်တစ်ပိုင်စိုက်ပျိုးကြကြောင်း ၊ ကွမ်းသီးများကို ကန့်ဘလူခရိုင်အတွင်းမှလည်းကောင်း၊ ဘိတ်ဒေသမှလည်းကောင်းဝယ်ယူပြီး ကွမ်းသီးစိတ်များပြုလုပ်၍ ပြန်လည် ရောင်းချကြောင်း သိရသည်။

       ၂၀၂၅ ခုနှစ် ၊ ဩဂုတ်လ ပထမပတ်အတွင်း ကန့်ဘလူမြို့နယ်၏ ကွမ်းသီးစိတ်ဈေးနှုန်းများမှာ အရည်အသွေးပေါ်မူတည်၍ ကွမ်းသီးစိတ်(ရှယ်)တစ်ပိဿာလျှင် (၃၈၀၀၀)ကျပ်၊ အလတ်စ(၁) ပိဿာလျှင် (၃၃၀၀၀)ကျပ်၊ အညံ့(၁)ပိဿာလျှင် (၁၆၀၀၀)ကျပ်ဖြင့် အရောင်းအဝယ်ဖြစ်လျက် ရှိကြောင်း၊ ယခင်အပတ်ဈေးနှုန်းနှင့် နှိုင်းယှဉ်ပါက အလတ်စ(၁)ပိဿာလျှင်(၁၀၀၀)ကျပ်မြင့်တက်ပြီး အညံ့(၁)ပိဿာလျှင် (၂၀၀၀)ကျပ် ကျဆင်းသွားကြောင်း၊ ဈေးကွက်အနေဖြင့် ကန့်ဘလူမြို့ ပေါ်ရှိဆိုင်များနှင့် ကျွန်းလှမြို့နယ်သို့ လက်လီ/လက္ကားရောင်းချပေးလျက်ရှိကြောင်း  ကွမ်းသီးစိတ် ရောင်းဝယ်ရေး လုပ်ငန်းရှင်၏ ပြောပြချက်အရ သိရှိရပါသည်။

DOCA(စစ်ကိုင်း)