ပြည်တွင်းကုန်သွယ်မှုသတင်း

     စစ်ကိုင်းတိုင်းဒေသကြီး၊ ကန့်ဘလူခရိုင်၊ ကန့်ဘလူမြို့ မြို့မစည်ပင်သာယာဈေးတွင် ဘုရားပန်း အမျိုးမျိုးဖြစ်သော ဂန္ဓာမာပန်း၊ သစ္စာပန်း၊ စိန်လည်တုံ၊ နှင်းဆီ၊ ခရေပန်း၊ စကားဝါပန်း၊ မေမြို့ပန်း (အက်စတာ)၊ ကျောက်စိမ်းပန်း မြေမြို့ပန်း (ကြက်လည်ဆံ) သပြေပန်း(အောင်သပြေ)အငုတ်၊ အောင်သပြေ အခက်များနှင့် အာစီယံသပြေ တို့ကို မိမိတို့ ဒေသထွက်နှင့် မန္တလေးမြို့၊ ပြင်ဦးလွင်မြို့တို့မှ မှာယူရောင်းချကြောင်းသိရှိရပါသည်။ မိမိတို့ ဗုဒ္ဓဘာသာ လူမျိုးများအတွက် ဘုရားပန်းသည်လည်း မိမိတို့ ကိုးကွယ်ယုံကြည်အားထားရာဖြစ်သည့် ဘုရားစင်ပေါ်တွင် ကုသိုလ်ယူရန် နေ့စဉ်ကပ်လှူ ပူဇော်ရသည့်အတွက် မရှိမဖြစ်သော အရာတစ်မျိုး လည်းဖြစ်ပါသည်။

      ခရေပန်းသည် ဧပြီလတွင် စတင်ပွင့်ဖူးကာ ပိတောက်ပန်း၊ ငုပန်းတို့နှင့်အပြိုင်ဖူးပွင့်ကြပါသည်။ ခရေပန်းသည် အပွင့်လှပသည်ထက် သူ၏အမွှေရနံ့ကပိုမိုဆွဲဆောင်မှုရှိသည့်အပြင် ညှိုးနွမ်းခြောက်သွေ့ သည့်တိုင် ရနံ့မပြယ်သောပန်းတစ်မျိုးလည်းဖြစ်ပါသည်။ ခရေပန်းသည် ပန်းပွင့်တင်သာမက အသီး ကလည်းဆေးဘက်ဝင်သည်ကို တွေ့ရှိရပါသည်။

       ယခု ၂၀၂၅ ခုနှစ်၊ မေလ(ဒုတိယပတ်)တွင် ကန့်ဘလူမြို့၌ ဖြစ်ပေါ်နေသော ခရေပန်း ဈေးနှုန်းဖြင့် ခရေပန်း တစ်ကုံးလျှင်(၂၀၀)ကျပ်၊ ခရေပန်း(၃)ကုံးလျှင်လျှင်(၅၀၀)ကျပ် ဈေးနှုန်းတို့ဖြင့် ရောင်းချလျက်  ရှိကြောင်း ကန့်ဘလူမြို့ မြို့မစည်ပင်သာယာ ဈေးတွင် ဘုရားပန်းမျိုးစုံ ရောင်းချနေသော ပန်းသည် ထံမှ သိရှိရပါသည်။

DOCA(စစ်ကိုင်း)

          မုန်ညင်းထုပ်သည် မြန်မာနိုင်ငံနှင့်အိမ်နီးချင်းနိုင်ငံများဖြစ်သည့် တရုတ်၊ ဂျပန်နှင့် အာရှတိုက် တစ်ဝန်းလုံးစိုက်ပျိုးကြပြီး  မြန်မာနိုင်ငံတွင်လည်း  ဒေသမရွေး စိုက်ပျိုးနိုင်သော သီးနှံဖြစ်သည်။ ဒေသမရွေးစိုက်ပျိုးနိုင်သော်လည်း သင့်တင့်သောရာသီဥတုရှိသည့် ရှမ်းပြည်နယ်၌ ပိုမိုဖြစ်ထွန်းသည်။ မုန်ညင်းထုပ်များသည် တစ်နှစ်ပတ်လုံး စိုက်ပျိုးစားသုံးနိုင်သောသီးနှံတစ်မျိုးဖြစ်သည့်အတွက်   စိုက်ပျိုးသူတောင်သူများအနေဖြင့်  တစ်နိုင်တစ်ပိုင်  စိုက်ပျိုးရောင်းချနိုင်ပြီး  ဝင်ငွေကောင်းသောသီးနှံပင်တစ်မျိုးလည်း ဖြစ်ပါသည်။

          ထားဝယ်မြို့ပေါ်ရှိ မြို့မဈေးကြီးနှင့်ရပ်ကွက်ဈေးများတွင် မေးမြန်းသိရှိရသောဈေးနှုန်းများ အရ မုန်ညင်းထုပ်တစ်ထုပ်လျှင် (၁၃၀၀)ကျပ်မှ(၁၅၀၀)ကျပ်ခန့်ရှိသဖြင့် မိသားစုအပိုဝင်ငွေများ ရရှိကြောင်းသိရှိရပါသည်။

DOCA(တနင်္သာရီ)

          တနင်္သာရီတိုင်းဒေသကြီး၏ ဝင်ငွေရရှိလျက်ရှိသော စီးပွားဖြစ်ဒေသထွက်ကုန်များမှ တစ်ခု အပါအဝင်ဖြစ်သည့် နှစ်ရှည်သီးပင်တစ်မျိုးဖြစ်သော သီဟိုဠ်ပင်များမှထွက်ရှိသော သီဟိုဠ်စေ့များ အား ဒေသတွင်း ပွဲရုံများ၊ အဝယ်ဒိုင်များ၊ သီဟိုဠ်အချောထုတ်လုပ်သည့်စက်ရုံများမှ ဝယ်ယူကာ ပုံချောအသန့်များရရှိအောင် ပြုလုပ်၍ ရန်ကုန်မြို့သို့ တင်ပို့ရောင်းချလျက်ရှိပါသည်။

          ဒေသတွင်း သီဟိုဠ်စျေးနှုန်းများမှာ မေလ ပထမအပတ်အတွင်း အခွံပါသီဟိုဠ်စေ့ အကြမ်း တစ်ပိဿာလျှင် (၈၀၀၀)ကျပ်၊ သီဟိုဠ်စက်ရုံများမှ ကြိတ်ခွဲထုတ်လုပ်ပြီး သီဟိုဠ်ပုံချောအသန့် တစ်ပိဿာလျှင် (၅၂၀၀၀) ကျပ်ရှိပြီး စျေးနှုန်းများမှာ တည်ငြိမ်လျက်ရှိကြောင်း သိရှိရပါသည်။

DOCA(တနင်္သာရီ)

    စစ်ကိုင်းတိုင်းဒေသကြီး၊ ကန့်ဘလူခရိုင်၊ ကန့်ဘလူမြို့ရှိ မြို့မဈေးတွင် ရာသီပေါ်နှင်းသီး များကို စတင်ရောင်းချလျက်ရှိပါသည်။ ရာသီစာနှင်းသီးများကို နေအိမ်ခြံစည်းရိုးများ၌ စိုက်ပျိုးပြီး မိမိတို့အိမ်တွင် စားသုံး၍ပိုလျှံသည့်အသီးများကို ကန့်ဘလူမြို့မဈေးသို့ လာရောက်ရောင်းချကြောင်း သိရသည်။

    နှင်းသီးသည် အနီရောင်၊ အဖြူရောင်၊ အစိမ်းရောင်နှင့် ခရမ်းရောင်ဟူ၍ ၄မျိုးရှိပါသည်။ နှင်းသီးသည် အရည်ရွှမ်း၍ ကျွတ်ဆတ်ကာချိုမြသောအရသာရှိပြီး သရေစာအဖြစ်အများဆုံး စားသုံးကြကြောင်း၊ ၂၀၂၅ခုနှစ်၊ မေလ ပထမပတ်အတွင်း နှင်းသီး(၂၅)ကျပ်သားလျှင်(၃၀၀၀) ကျပ်၊ နှင်းသီး(၁)ပိဿာလျှင်  (၁၂၀၀၀)ကျပ်ဖြင့် အရောင်းအဝယ်ဖြစ်လျက်ရှိကြောင်း၊ လူကြီးလူငယ်မရွေး ကြိုက်နှစ်သက်သောကြောင့် ရောင်းအားကောင်းကြောင်း သစ်သီးရောင်းချသူထံမှ သတင်းရရှိပါသည်။  

DOCA(စစ်ကိုင်း)

   ကန့်ဘလူခရိုင်သည် လယ်ယာစိုက်ပျိုးရေးလုပ်ငန်းများကို အဓိကထားလုပ်ကိုင်သော ဒေသတစ်ခုဖြစ်ပြီး ဒေသတွင်းစားသုံးဆီဖူလုံစေရေးအတွက် ကန့်ဘလူမြို့နယ် တောက္ကရှပ်ကျေးရွာ၊ မြေထူးကျေးရွာ၊ နတ်ပေးကျေးရွာနှင့် အခြားသောကျေးရွာများတွင် ဆောင်းနှမ်းကိုအဓိက စိုက်ပျိုး ကြောင်း၊ ဈေးကွက်အနေဖြင့် ကန့်ဘလူခရိုင်မှထွက်ရှိသော နှမ်းသီးနှံများကို မန္တလေးမြို့ရှိပွဲရုံများသို့ တင်ပို့ကြောင်း သိရသည်။

    ၂၀၂၅ ခုနှစ်၊ မေလ ပထမပတ်အတွင်း နှမ်းနက်(စမုံ)တစ်တင်းလျှင်(၂၃၅၀၀၀)ကျပ်၊ နှမ်းဖြူ (ဂျပန်)တစ်တင်းလျှင် (၁၀၇၀၀၀)ကျပ်ဖြင့် အရောင်းအဝယ် ဖြစ်လျက်ရှိသောကြောင့် ယခင်အပတ် ဈေးနှုန်းနှင့် နှိုင်းယှဉ်ပါက နှမ်းနက်(၁)တင်းလျှင်(၃၀၀၀၀)ကျပ်ခန့်မြင့်တက်ပြီး နှမ်းဖြူ(၁)တင်း လျှင်(၉၀၀၀)ကျပ်ခန့် ကျဆင်းသွားကြောင်း၊ ဈေးနှုန်းမှာ အချိန်နှင့်အမျှ ပြောင်းလဲမှုရှိကြောင်း  ဒေသတွင်းသီးနှံရောင်းဝယ်ရေး လုပ်ငန်းရှင်ထံမှ သတင်းရရှိသည်။

DOCA(စစ်ကိုင်း)