ပြည်တွင်းကုန်သွယ်မှုသတင်း

            ကျွန်းလှမြို့နယ်အတွင်းရှိ ကျေးရွာများတွင် ဒေသထွက် ပေါ်ဦးပေါ်ဖျား မျှစ်စိမ်းများကို  ရှာဖွေ၍ ဈေးကွက်အတွင်းသို့ ရောင်းချကာ မျှစ်များ လှိုင်လှိုင်ပေါလာသည့်အတွက် ဈေးနှုန်း ကျဆင်းပြီး အရောင်းအဝယ်ဖြစ်လျက်ရှိကြောင်း သိရှိရပါသည်။

           ဩဂုတ်လ ပထမပတ်အတွင်း မျှစ်စိမ်း တစ်ပိဿာလျှင်(၃၅၀၀)ကျပ်၊ (၅၀)ကျပ်သားလျှင် (၂၀၀၀)ကျပ်၊ မျှစ်ပြုတ် တစ်ပိဿာလျှင်(၃၅၀၀)ကျပ်၊ (၅၀)ကျပ်သားလျှင်(၂၀၀၀)ကျပ် ဈေးနှုန်း တို့ဖြင့် ရောင်းချလျက်ရှိခဲ့ပြီး ယခု ဩဂုတ်လ ဒုတိယပတ်အတွင်း မျှစ်စိမ်း တစ်ပိဿာလျှင်(၂၅၀၀)ကျပ်၊ (၅၀)ကျပ်သားလျှင်(၁၃၀၀)ကျပ်၊ မျှစ်ပြုတ် တစ်ပိဿာလျှင်(၃၀၀၀)ကျပ်၊ (၅၀)ကျပ်သားလျှင်(၁၅၀၀) ကျပ် ဈေးနှုန်းတို့ဖြင့် ရောင်းချလျက်ရှိသောကြောင့် ယခင်အပတ်ထက် မျှစ်စိမ်း တစ်ပိဿာလျှင်(၁၀၀၀) ကျပ်၊ မျှစ်ပြုတ် တစ်ပိဿာလျှင်(၅၀၀)ကျပ်ဈေးနှုန်းတို့ ဆက်လက်ကျဆင်းလျက်ရှိပြီး  အရောင်း အဝယ် ဖြစ်လျက်ရှိကြောင်း သိရ ပါသည်။

DOCA(စစ်ကိုင်း)

ကျွန်းလှမြို့၊ သစ်ရာမြိုင်‌ဈေးကွက်တွင် စားဖိုဆောင်သီးနှံများဖြစ်သည့် ခရမ်းသီး၊ ကြက်ဟင်းခါးသီး၊ ရုံးပတီသီး၊ ပဲတောင့်ရှည်သီး၊ သခွားသီး၊ ခရမ်းချဉ်သီး၊ ရွှေဖရုံသီး  တို့ကို စိုက်ပျိုး သည့်အနက် ဗုံလုံသီး (ခေါ်)ပဲလင်းမြွှေသီးများကို စိုက်ပျိုးလျက်ရှိကြောင်း သိရသည်။

ယခု ဩဂုတ်လ ဒုတိယအပတ်တွင် ဗုံလုံသီး(ခေါ်)ပဲလင်းမြွှေသီး ဈေးနှုန်းများမှာ ဗုံလုံသီး(ခေါ်) ပဲလင်းမြွှေသီး အကြီး တစ်တောင့်လျှင် လက်လီဈေး(၈၀၀)ကျပ်၊ အလတ် တစ်တောင့်လျှင် လက်လီဈေး (၆၀၀)ကျပ် နှင့် အသေး တစ်တောင့်လျှင် လက်လီဈေး(၄၀၀)ကျပ် အလားတူပင် သခွားသီး ဈေးနှုန်း အနေဖြင့် ဒေသထွက် ရိုးရိုး ဗမာသခွားသီး အကြီး(၁)လုံးလျှင်(၈၀၀)ကျပ် နှင့် အလတ်(၁)လုံးလျှင် (၆၀၀)ကျပ်၊ အသေးတစ်လုံးလျှင်(၅၀၀)ကျပ် ဈေးနှုန်းတို့ဖြင့် ရောင်းချလျက်ရှိပြီး ယခင် အပတ်ထက် ဗုံလုံသီး(ခေါ်)ပဲလင်းမြွှေသီး နှင့် သခွားသီး ဈေးနှုန်း အနည်းငယ်စီ ကျဆင်းပြီး  အရောင်းအဝယ်ဖြစ်လျက် ရှိကြောင်း သိရှိရ ပါသည်။

DOCA(စစ်ကိုင်း)

             မိတ္ထီလာခရိုင်တွင်း သာစည်မြို့နယ်ရှိ ညောင်တိုကျေးရွာတွင် ရွှေဖရုံသီးများကို စီးပွားဖြစ် စိုက်ပျိုးခဲ့ရာ ယခုအခါ တွင်အိုးဖရုံသီးများကိုပါတိုးချဲ့စိုက်ပျိုးလာကြောင်းသိရပါသည်။ ရွှေဖရုံသီး/ အိုးဖရုံသီးများကိုဇူလိုင်လလယ်မှစ၍စတင်ထွက်ရှိပြီးအောက်တိုဘာလလောက်ထိခူးဆွတ်နိုင်ကြောင်း၊ ၊ ဈေးကွက်တွင် ဒေသတွင်း ထွက်ရှိသောရွှေဖရုံသီး ၊ အိုးဖရုံသီးများအပြင် ရှမ်းပြည်နယ်မှလာသော ရှမ်းဖရုံသီးများဝင်ရောက်လျှက်ရှိကြောင်း ၊  ရွှေဖရုံသီး ၊အိုးဖရုံသီး များမှာအလုံးအနေတော်ဖြစ်၍ တစ် လုံးဈေးရောင်းချပြီး ၊ ရှမ်းဖရုံသီးများ မှာ အလုံးကြီးများဖြစ်၍ ပိဿာဈေးဖြင့် ရောင်းချကြကြောင်း သိရ ပါသည်။

          ဈေးကွက်အတွင်း ဝင်ရောက်မှုအနေဖြင့် တစ်ရက်လျှင် ဒေသတွင်းရွှေဖရုံသီး/အိုးဖရုံသီး အလုံး(ဂျွန်)(၆၀)ပါအိတ် (၂၀/၃၀)ဝင်ရောက် လျှက်ရှိပြီး ၊ ရှမ်းပြည်နယ်ဘက်မှ ရှမ်းဖရုံသီး (၃၀၀/ ၄၀၀)ဝင်ရောက်လျှက်ရှိကြောင်း ၊ တင်ပို့မှုအနေဖြင့် ဒေသတွင်းအပြင် တောင်သာ ၊ ပခုက္ကူ ၊ ရန်ကုန် ၊ မော်လမြိုင်မြို့များသို့ (၂)ရက်ခြားတင်ပို့မှုရှိကြောင်း ၊ဈေးနှုန်းအနေဖြင့် ရွှေဖရုံ/အိုးဖရုံ လက်ကားဈေး အလုံး(ဂျွန်) (၆၀)ပါတစ်အိတ် (၃၀၀၀၀/)ကျပ် ၊ ရှမ်းဖရုံတစ်ပိဿာ (၁၁၀၀/)ကျပ် ၊ လက်လီဈေး အနေဖြင့် အိုးဖရုံ/ရွှေဖရုံ အလုံးအရွယ်အစားအလိုက် တစ်လုံး (၅၀၀-၈၀၀)ကျပ် ၊ ရှမ်းဖရုံ တစ်ပိဿာလျှင် ၁၃၀၀/ကျပ် ဈေးတို့ဖြင့် အရောင်းအဝယ်ဖြစ်လျှက်ရှိကြောင်း မိတ္ထီလာမြို့ ဟင်းသီးဟင်းရွက်(ဘဲကန်)လက်ကားဈေးမှသိရှိရပါသည်။

DOCA (မန္တလေး)

စစ်ကိုင်းတိုင်းဒေသကြီး၊ ကျွန်းလှမြို့တွင် စိုက်ပျိုးရေး၊ မွေးမြူရေး လုပ်ငန်းများကို လုပ်ကိုင် ရာ အသက်မွေးဝမ်းကြောင်းပြုကြသူများရှိသလို တောတောင်ကို အမှီပြုပြီး သပြေပန်းချိုးရောင်း ခြင်း၊ မျှစ်ချိုရောင်းခြင်း၊ မှိုရှာရောင်းခြင်း၊ အသီးအရွက်ခူးရောင်းခြင်း၊ အင်ဖက်ခူးရောင်းခြင်းနှင် ပျားရှာသည့်လုပ်ငန်းတို့ကိုလည်း လုပ်ကိုင်ပြီး ရောင်းချလျက်ရှိကြောင်း သိရသည်။

ယခု ဩဂုတ်လ ဒုတိယပတ်တွင် တောမှိုအစုံ တစ်ပိဿာလျှင် (၂၀၀၀၀) ကျပ်၊ (၅၀)ကျပ်သားလျှင်(၁၀၀၀၀)ကျပ်၊ (၂၅)ကျပ်သားလျှင်(၅၀၀၀)ကျပ် (၁၀)ကျပ်သား တစ်ထုတ် လျှင်(၂၀၀၀)ကျပ် ဈေးနှုန်းဖြစ်ပြီး ယခင်အပတ်နှင့် နှိုင်းယှဉ်ပါက တောမှိုများ ရှားပါးလာ သည့်အတွက် တောမှို ဈေး အနည်းငယ်မြင့်တက်လျက်ရှိကြောင်း သိရသည်။

DOCA(စစ်ကိုင်း)

ကန့်ဘလူခရိုင်၊ ကျွန်းလှမြို့နယ်အတွင်း စိုက်ပျိုးရေးကို အဓိကလုပ်ကိုင်လျက်ရှိရာ မိမိတို့ အိမ်ခြံ ဝင်းအတွင်းနှင့် တောင်ယာမြေများတွင် တစ်နိုင်တစ်ပိုင်အနေဖြင့် စားဖိုဆောင်သီးနှံများကို  စိုက်ပျိုးထားကြသည့်အနက် ဆူးပုတ်ရွက်သည်လည်း တစ်မျိုးပါဝင်ပါသည်။ ပိတ်ချင်းရွက် နှင့် ဆူပုတ်ရွက်တို့ကို ကန့်ဘလူမြို့နယ်၊ ပေကုန်းကျေးရွာနှင့် ကျွန်းလှမြို့ပေါ်ရပ်ကွက်အသီးသီးတို့မှ   လာရောက်ရောင်းချခြင်းဖြစ်ပါသည်။

 ယခု ဩဂုတ်လ ဒုတိယပတ်အတွင်း ကျွန်းလှမြို့၊ ပိတောက်မြိုင်ဈေး၌ ရောင်းချလျက်ရှိသော ဆူးပုတ်ရွက် ဈေးနှုန်းများမှာ ဆူးပုတ်အစည်း(၁)စည်းလျှင်(၂၀၀)ကျပ်၊ (၃)စီးလျှင် (၅၀၀)ကျပ် နှင့် (၁၀)စည်းပါ တစ်ထုံး လျှင်(၁၈၀၀)ကျပ်ဈေးနှုန်းတို့ဖြင့် ရောင်းချ လျက်ရှိပြီး မိုးရွာသွန်းမှုများသောကြောင့် ဆူးပုတ်ရွက်များ ပေါက်ရောက်မှုများလာသည့်အတွက် ယခင်အပတ်ထက် ဆူးပုတ်ရွက်ဈေးနှုန်း အနည်းငယ် ကျဆင်း ပြီး အရောင်းအဝယ်ဖြစ် လျက်ရှိကြောင်း  ကုန်စိမ်းရောင်းချသူထံမှ သိရပါ သည်။

DOCA(စစ်ကိုင်း)