ပြည်တွင်းကုန်သွယ်မှုသတင်း

ငရုတ်ပွကို ငရုတ်ချို၊ ငရုတ်ပွဟူ၍ ခေါ်ဆိုကြသည်။ သူ၏ချိုသောအရသာကြောင့် လူသိများပြီး  စျေးကောင်းရသောသီးနှံတစ်မျိုးဖြစ်၍ ဟင်းသီးဟင်းရွက်စိုက်ပျိုးကြသူတိုင်းက အနည်းနှင့်အများ စိုက်ပျိုးကြသော သီးနှံလည်းဖြစ်သည်။ ငရုတ်ပွကို လတ်လတ်ဆက်ဆက် စားကြသောသီးနှံ၊ ပုပ်သိုးလွယ်သောသီးနှံဖြစ်၍ ဂရုစိုက်အချိန်ပေးရသောကြောင့် စီးပွားဖြစ်စိုက်ပျိုးသူများက သီးညှပ် စိုက်ခင်းများ၌ ညှပ်၍စိုက်ခြင်းကိုလည်း ပြုလုပ်ကြသည်။ ငရုတ်ပွစိုက်ပျိုးရန် မြေသြဇာကြွယ်ဝပြီး ရေမဝပ်သောမြေမျိုး၊ သဲနုန်း၊ နုန်းမြေပွမျိုးသည် အကောင်းဆုံးဖြစ်ပါသည်။ မြေစေးအသင့်အတင့် ပါဝင်သောမြေများတွင်လည်း စိုက်ပျိုးနိုင်ပါသည်။ သို့သော် ရေမဝပ်စေရန်အတွက် ရေမြောင်းများ ပြုလုပ်ထားရန်လည်း လိုအပ်ပါသည်။  သဲမြေတွင် စိုက်ပျိုးပါက သဘာဝမြေသြဇာလုံလုံ လောက်လောက် ထည့်သွင်းပြီးမှစိုက်ပျိုးသင့်ပါသည်။ မြေသားပါးပြီး အောက်ခံသဲကြပ်သော မြေများတွင် မစိုက်ပျိုးသင့်ပါ။ မြေသားထုနက်ပြီး ကျောက်စရစ်ကင်းစင်ရန် အထူးလိုအပ်သည်။ ပျိုးဘောင်ကို အကျယ်(၃)ပေ၊ အမြင့်(၆)လက်မ၊ အရှည်(၃၀)ပေ ဘောင်များပြုလုပ်ပြီး နွားချေး၊ မြေဆွေးများကိုထည့်ပြီးလျှင် ဘောင်မျက်နှာပြင်ညီအောင် ပြုလုပ်ပြီး မျိုးစေ့ကို ပြာ၊သဲနှင့်ရောပြီး ညီညာအောင် ခပ်ပါးပါးကြဲပေးရမည်။  မျိုးစေ့များကို ခိုင်ခိုင်မာမာစွဲကပ်လာစေရန် လက် သို့မဟုတ် ပျဥ်ပြားနှင့်ဖိပေးပြီး ကောက်ရိုးပါးပါးနှင့်အုပ်ပေးပြီးလျှင် ရေလောင်းပေးနိုင်သလို မျိုးဘောင်များ ပေါ်တွင် ကန့်လန့်ဖြတ်(၃)လက်မခြား မြောင်းများဖော်ပြီး အစေ့များကို အတန်းလိုက်ချပြီး စိုက်ပျိုးခြင်း အားဖြင့်လည်း  ပျိုးထောင်နိုင်ပါသည်။  တစ်ဧကအတွက်မျိုးစေ့(၅၀-၇၀)ကီလိုဂရမ်လိုအပ်ပါသည်။  ပျိုးထောင်ပြီး (၇-၁၀)ရက်အတွင်း အပင်ပေါက်စုံလျှင် ကောက်ရိုးဖယ်ပြီး နံနက်တစ်ကြိမ် ညတစ်ကြိမ် ရေလောင်းပေးရန်လိုအပ်ပါသည်။  မိုးများသောဒေသများ သို့မဟုတ် မိုးများသောအချိန်ကာလတွင် ပျိုးထောင်ပါက အရိပ်ပြုလုပ်ပေးရမည်ဖြစ်သည်။  ပျိုးပင်များ (၂၅-၃၅)ရက်သားရသောအချိန်တွင် ရွှေ့ပြောင်း၍စိုက်ပျိုးနိုင်ပါသည်။ မြေတစ်ဧကလျှင် နွားချေးလှည်း(၂၀)စီးခန့်ထည့်ရန်လိုအပ်ပြီး ထယ်ရေး၊ထွန်ရေး ကောင်းမွန်အောင် ပြုလုပ်ရန်လိုအပ်ပါသည်။ ပင်ကြား(၁)ပေခွဲ၊ တန်းကြား (၃)ပေထားပြီး စိုက်ပျိုးနိုင်ပါသည်။

          မိုးရေချိန် (၂၅-၅၀)လက်မရွာသောဒေသများတွင် စိုက်ပျိုးရန်သင့်တော်ပြီး မိုးများသွားလျှင်လည်း အသီးပုပ်နိုင်ပါသည်။ မိုးများသောဒေသများတွင် မိုးနည်းသောကာလများတွင် စိုက်ပျိုးလေ့ရှိပါသည်။  အပူပိုင်းနှင့်သမပိုင်းသီးနှံဖြစ်ပါသည်။ နှင်းဒဏ်မခံနိုင်ပါ။ အပူချိန်(၅-၁၅)ဒီဂရီစင်တီဂရိတ်အတွင်း ကောင်းကောင်းမဖြစ်ထွန်းနိုင်ပါ။  ငရုတ်ပွစိုက်ပျိုးရန်အတွက် အကောင်းဆုံးအပူချိန်သည်  (၂၀-၂၅)ဖြစ်ပါသည်။ ငရုတ်ပွပန်းပွင့်ချိန်မှာ အပူချိန် (၃၃)ဒီဂရီစင်တီဂရိတ်ကျော်ခဲ့လျှင် အပွင့်ကန်းပြီး အထွက်နှုန်းကိုထိခိုက်စေနိုင်ပါသည်။ ရွေ့ပြောင်းစိုက်ပျိုးပြီး (၃-၄)ရက်ကြာသောအခါ အပင်စလန်း လာမှာဖြစ်ပြီး (၁၀-၁၂)ရက်ကြာသောအခါ ပေါင်းနှိမ်နှင်းခြင်း၊ ရေသွင်းခြင်းများကို ပြုလုပ်ပေးရ မည်ဖြစ်သည်။ ကြားပေါင်းလိုက်ခြင်း၊ မြေတောင်မြှောက်ပေးခြင်း၊ မြေသြဇာကျွေးခြင်းများကို (၂)ပတ်လျှင် တစ်ကြိမ်ခန့်ပြုလုပ်ပေးရမည်ဖြစ်သည်။ ငရုတ်ပွမျိုးများသည် မျိုးအပေါ်မူတည်ပြီး ရက် (၉၀-၁၀၀)အတွင်း ခူးဆွတ်နိုင်ပါသည်။ မိမိအသုံးပြုသော မျိုး၊ သွင်းအားစုအပေါ်မူတည်ပြီး တစ်ဧက လျှင်အသီးနှုန်း တစ်သောင်းခန့်(၃၀၀-၄၀၀)ပိဿာခန့်ထွက်ရှိနိုင်ပါသည်။

          ငရုတ်ပွစားသုံးခြင်းဖြင့်အာရုံကြောစနစ်များကို ကောင်းမွန်စေပါသည်။ လေ့လာချက်များအရ ငရုတ်ပွတွင် စိတ်ကျန်းမာရေးနှင့် အသိဉာဏ်ဆိုင်ရာများအတွက် ကောင်းမွန်စေသော အာဟာရ ဓာတ်များပါဝင်ကြောင်း သိရသည်။ ပိုတက်ဆီယမ်နှင့် မဂ္ဂနီဆီယမ်ကဲ့သို့ ဓာတ်ပါဝင်မှုကြောင့် စိတ်ပိုင်းဆိုင်ရာကျန်းမာရေးနှင့် စိတ်ဖောက်ပြန်ခြင်းများအတွက်လည်း ကောင်းမွန်စေပါသည်။ ငရုတ်ပွသည် ခုခံအားစနစ်ကောင်းမွန်စေပါသည်။ ကိုယ်တွင်းမှ ခုခံအားစနစ်သည် ဗက်တီးရီးယား ပိုးမွှားများ လူသားများ၏ခန္ဓာကိုယ်ကို ကူးစက်ခြင်းမှာကာကွယ်ရန်အတွက် ဆောင်ရွက်ပေးပါသည်။ ငရုတ်ပွကိုစားသုံးပေးလျှင် သွေးလည်ပတ်မှုကိုကောင်းမွန်စေခြင်း၊ နှလုံးကျန်းမာရေးကို ထိန်းသိမ်း ပေးခြင်း၊ နှလုံးရောဂါမဖြစ်စေရန်ကာကွယ်ပေးခြင်းနှင့် လေဖြတ်ခြင်းကဲ့သို့သော ရောဂါများမဖြစ် စေရန်လည်း အကျိုးပြုပေးပါသည်။ ယခုဒီဇင်ဘာလဒုတိယအပတ်တွင် ငရုတ်ပွ တစ်ဆယ်သားလျှင် (၁၀၀၀-၁၂၀၀)ခန့်စျေးနှုန်းရှိကြောင်းသိရှိရပါသည်။

DOCA(ပဲခူး)

 မကွေးတိုင်းဒေသကြီး၊ သရက်ခရိုင်၊ အထက်မင်းလှမြို့နယ်တွင် ကွမ်းရွက်များကို ဧရာဝတီ တိုင်းဒေသကြီး၊ ကနောင်၊ မြန်အောင်၊ ပဲခူးတိုင်းဒေသကြီး၊ ပေါက်ခေါင်း၊ ပေါင်းတလည်၊ စစ်ကိုင်း တိုင်းဒေသကြီး၊ မုံရွာမြို့တို့ရှိ ကွမ်းခြံများမှ တိုက်ရိုက်ဝယ်ယူရောင်းချကြောင်း၊ ကွမ်းသီးများကို ထားဝယ်မှတိုက်ရိုက်တင်ပို့သည့် ပြည်မြို့ရှိကွမ်းဒိုင်မှတဆင့် မှာယူရောင်းချကြောင်း၊ ကွမ်းစား ထုံးကို မကွေးမှဝယ်ယူရောင်းချပြီး နှပ်ဆေးနှင့်ဗမာဆေးကို မုံရွာနှင့်ပခုက္ကူမှ ဝယ်ယူရောင်းချကြောင်း သိရသည်။

          မင်းလှမြို့နယ်တွင် ကွမ်းသီး၊ ကွမ်းရွက်လက်လီလက်ကားရောင်းချသည့်ဆိုင် (၁၀)ဆိုင်ခန့် ရှိပြီး ကွမ်းစိမ်းနှင့် ကွမ်းရွက်ဝါ(၂)မျိုးရှိသည့်အနက် ကွမ်းရွက်ဝါကို ပိုအစားများကြကြောင်းသိရသည်။ ကွမ်းရွက်ဈေးနှုန်းအနေဖြင့် ၂၀၂၅ခုနှစ်၊ ဒီဇင်ဘာလ(ပထမပတ်)တွင် ကွမ်းရွက်ဝါ(၁)ပိဿာလျှင် ကွမ်းရွက်အကြီး၊ အသေးနှင့် ဝယ်ယူတင်သွင်းရသည့်နေရာဒေသအလိုက် ကျပ်(၁၅၀၀၀ - ၂၀၀၀၀ -၂၅၀၀၀)၊ ကွမ်းသီးခြမ်း(၁)ပိဿာလျှင် ကျပ်(၂၈၀၀၀)၊ ကွမ်းသီးစိပ်(၁)ပိဿာလျှင် ကျပ် (၂၉၀၀၀)၊ ကွမ်းစားထုံး(၁)လီတာ(၁)ဘူးလျှင် ကျပ်(၂၈၀၀)၊ ကွမ်းစားနှပ်ဆေး(၁)ထုပ်လျှင် ကျပ်(၁၁၀၀)၊ ဗမာ ဆေး(၁)ထုပ်လျှင် ကျပ်(၁၀၀၀)စသည့် ဈေးနှုန်းများဖြင့် ရောင်းချလျက်ရှိကြောင်း သိရသည်။

          အရောင်းအဝယ်အနေဖြင့် (၁)ရက်လျှင်ကွမ်းရွက်ပိဿာချိန် (၁၀)ပိဿာနှင့်အထက် ရောင်းချ ရပြီး ကွမ်းသီး၊ ကွမ်းစိပ်မှာ(၅)ပိဿာမှ (၇)ပိဿာထိပုံမှန်ရောင်းချရပါကြောင်း၊ ယခင်‌နိုဝင်ဘာလ (စတုတ္ထပတ်)နှင့်ဈေးနှုန်းနှိုင်းယှဉ်ပါက ယခုတစ်ပတ်တွင် ကွမ်းရွက်ကျပ်(၅၀၀၀-၇၀၀၀)၊ ကွမ်းသီးခြမ်း ကျပ်(၁၅၀၀)၊ ကွမ်းသီးစိပ် ကျပ်(၁၀၀၀) ဈေးနှုန်းမြင့်တက်၍ အရောင်းအဝယ်ဖြစ်ကြောင်းသိရသည်။ ယခုအချိန်သည် ကွမ်းစိုက်ပျိုးထွက်ရှိရာဒေသများရှိ ကွမ်းခြံများ၌ ကွမ်းအထွက်နှုန်းများ လျော့နည်း သည့်အပြင် သယ်ယူစရိတ်မှာလည်း မြင့်မားလာသောကြောင့် ကွမ်းရွက်နှင့် ကွမ်းသီး ဈေးနှုန်းမှာ မြင့်တက်ရခြင်းဖြစ်ကြောင်း အထက်မင်းလှ-သရက်ကားလမ်းဘေးရှိ ကွမ်းသီး၊ ကွမ်းရွက်ရောင်းချသည့် ကွမ်းဆိုင် ပိုင်ရှင်တစ်ဦးထံမှ သိရှိရသည်။

DOCA(မကွေး)

  မကွေးတိုင်းဒေသကြီး၊ မင်းဘူးခရိုင်၊ မင်းဘူးမြို့၊ မြို့မဈေး၌ ငါးသလဲထိုးငါးများကို မြို့အနီးပတ်ဝန်းကျင်ရှိ ကျေးရွာများနှင့် ရေပုတ်၊ ပေါက်ကုန်း၊ သနပ်ပင်စုကျေးရွာများမှ လာရောက် ရောင်းချကြောင်း သိရသည်။

          ၂၀၂၅ခုနှစ်၊ ဒီဇင်ဘာလ(ပထမပတ်)တွင် ငါးသလဲထိုးငါးဈေးနှုန်းမှာ (၁၀)ကျပ်သားလျှင် ကျပ် (၃၅၀၀)၊ (၁)ပိဿာဈေးနှုန်းမှာ ကျပ်(၃၃၀၀၀)ဖြင့် ရောင်းချကြောင်း သိရှိရပါသည်။ ငါးသလဲထိုးငါးမှာ အသားနုပြီး အာဟာရဓါတ်အလွန်ပြည့်ဝ၍ ကျန်းမာရေးနှင့်ညီညွတ်ပြီး အရိုးပါမကျန် စားသုံးနိုင်သော ငါးဖြစ်သည့်အတွက် ငါးသလဲထိုးငါးများကို ငါးလေးအိုးကပ်ဟင်းအဖြစ် စားသုံးကြပါသည်။ ယခုအချိန် တွင် ခေတ်နှင့်အညီ ငါးသလဲထိုးငါးများကိုကြော်ကာ ထုတ်ပိုးရောင်းချနေမှုများကိုလည်း တွေ့ရသည်။

DOCA(မကွေး)

     တနင်္သာရီတိုင်းဒေသကြီး၊ ထားဝယ်မြို့ပေါ်ရှိ အိမ်ခြံမြေများရှိ နေရာလွတ်များတွင် တစ်နိုင် တစ်ပိုင်နှင့်မြို့အနီးရှိ ကျေးရွာများတွင် ချဉ်ပေါင်ပင်များအား စိုက်ပျိုးလျက်ရှိပြီးဒေသတွင်း ဈေးကွက် အတွင်း ပို့ဆောင်ရောင်းချခြင်းဖြင့်  ဝင်ငွေများရရှိလျက်ရှိသည်။

     ဒေသတွင်းထွက်ရှိသော ချဉ်ပေါင်ရွက်များအား ကျေးရွာစျေးများနှင့် ထားဝယ်မြို့ပေါ်ရှိ ကိုယ်ပိုင်စျေးများ၊ စည်ပင်သာယာစျေးများတွင် ‌ရောင်းချလျက်ရှိရာ ၂၀၂၅ခုနှစ်၊ ဒီဇင်ဘာလ ပထမပတ်တွင် ချဉ်ပေါင်ရွက်ဈေးနှုန်းမှာ တစ်စီးလျှင်(၁၅၀၀) ကျပ်ဖြင့် ရောင်းချလျက်ရှိကြောင်း ရောင်းချသူများထံမှ သိရှိရပါသည်။

DOCA(တနင်္သာရီ)

  မကွေးတိုင်းဒေသကြီး၊ ပခုက္ကူခရိုင်၊ ပခုက္ကူမြို့နယ်တွင် “ဝါ”သီးနှံကို ကံတော်၊ ကံလှ၊ ကံတိန်၊ ကံရက်၊ ကံမြင့်ကုန်း၊ မြိုင်နှင့် ရေစကြိုမြို့ နယ်အတွင်းရှိ ရွာများမှ “ဝါ”ကို အဓိကစိုက်ပျိုးကြပါသည်။ ထွက်ရှိသော“ဝါ”များကို ပခုက္ကူမြို့ပေါ်သို့ ဝင်ရောက်အရောင်းအဝယ်ဖြစ်လျက်ရှိပါသည်။ ပခုက္ကူမြို့ “ဝါ”စိုက်ဧကမှာ ယခင်က (၅၀၀၀ မှ ၆၀၀၀)ရှိခဲ့ပြီး ယခုအခါတွင် စိုက်ဧက(၂၅၀၀) ဝန်းကျင်ခန့်သာ စိုက်ပျိုးကြောင်း သိရှိရပါသည်။“ဝါ”စိုက်ပျိုးရာတွင်အဓိကချည်မျှင်ရှည်ဝါနှင့် ချည်မျှင်တိုဝါများကို စိုက် ပျိုးကြပါသည်။ “ဝါ” စတင်ပေါ်စတွင် အစေ့ပါ တစ်ပိဿာလျှင် ကျပ်(၃၈၀၀)ဖြစ်ခဲ့ပြီး တစ်နေ့လျှင် ကုန်ချိန်(၃၀ မှ ၅၀ ထိ) ဝင်ရောက်လျက်ရှိကြောင်း “ဝါ”ကုန်သည် များထံမှ သိရှိရပါသည်။

          ဈေးနှုန်းဈေးကွက်အနေဖြင့် ပခုက္ကူမြို့နယ်မှ ထွက်ရှိသော“ဝါ”များကို မန္တလေးတိုင်းဒေသကြီး နှင့် သရက်၊ အောင်လံခရိုင်များသို့လည်း တင်ပို့ရောင်းဝယ်လျက်ရှိပါသည်။ ယခု နိုဝင်ဘာလ အစော ပိုင်းတွင် “ဝါ”ဝင်ရောက်မှုမှာ အလွန်းနည်းပါးကြောင်း၊ ဒီဇင်ဘာလ(ပထမပတ်)တွင် “ချည်မျှင်ရှည်ဝါ” တစ်ပိဿာလျှင် ကျပ်(၄၄၀၀-၄၈၀၀)၊ “ချည်မျှင်တိုဝါ” တစ်ပိဿာလျှင်ကျပ်(၄၁၅၀-၄၆၅၀)ဖြစ်ပြီး ဝါကြိတ်ဖတ် တစ်ပိဿာလျှင် ကျပ်(၂၀၀၀)၊ ဝါစေ့တစ်ပိဿာလျှင် ကျပ်(၂၀၀၀)၊ ဝါစေ့ဆီတစ် ပိဿာလျှင် ကျပ်(၉၀၀၀)ဈေးဖြင့်  အရောင်းအဝယ်ဖြစ်ကြောင်း၊ “ဝါ”ဝင်ရောက်မှုမှာ နည်းပါးနေကြောင်း “ဝါ” ကုန်သည်များထံမှ သိရှိရပါသည်။

DOCA(မကွေး)