ပြည်တွင်းကုန်သွယ်မှုသတင်း

       အဝါရောင်သကြားပြောင်းဖူးတွင် ဓာတ်တိုးဆန့်ကျင်အာနိသင်ကြွယ်ဝစွာပါဝင်သောကြောင့် အရေပြားပျက်စီးမှုကနေအထိရောက်ဆုံးကာကွယ်ပေးပြီး အရေးအကြောင်းဖြစ်ခြင်း၊ အရွယ်မတိုင်ခင်အိုမင်းရင့်ရော်ခြင်းမှလည်း အထိရောက်ဆုံးကာကွယ်ပေးနိုင်ပါသည်။ ဗီတာမင်E ကြွယ်ဝစွာပါဝင်သောကြောင့် ဝက်ခြံအမာရွတ်များကို အထိရောက်ဆုံးသက်သာ ပျောက်ကင်းစေနိုင်ပြီး ပြောင်းဖူးကိုခြစ်ပြီးရလာသောအနှစ်ကို ဝက်ခြံအမာရွတ်များကိုလိမ်းပေးခြင်းဖြင့်လည်း သက်သာစေနိုင်ပါသည်။ ပြောင်းဖူးအဆီသည်သွေးစီးဆင်းမှုကောင်းစေနိုင်သလို ဆံသားကိုလည်း ကျန်းမာသန်စွမ်းစေပြီး  ဦးရေပြားတွင်ဖြစ်တတ်သော အရေပြားပြဿာနာများမှကင်းဝေးစေပြီး နတ်မှောင်သန်စွမ်းသောဆံသားကိုပိုင်ဆိုင်စေနိုင်ပါသည်။ ဗီတာမင်Cကြွယ်ဝစွာပါဝင်သောကြောင့် ဆံသားကိုအရင်းမှအဖျားအထိနတ်မှောင်သန်စွမ်းစေပြီး ဆံပင်ကျွတ်ခြင်းမှလည်း သက်သာစေနိုင် ပါသည်။ သကြားပြောင်းဖူးတွင် ဗီတာမင်B12၊ သံဓာတ်၊ ဖောလစ်အက်ဆစ်တို့ကြွယ်ဝစွာ ပါဝင်သောကြောင့် ပြောင်းဖူးစားသုံးပေးခြင်းဖြင့် သွေးအားနည်းရောဂါကိုကာကွယ်ပြီးသားဖြစ်စေ ပါသည်။ ဗီတာမင်A ကြွယ်ဝစွာပါဝင်သောကြောင့် အမြင်အာရုံကိုအားကောင်းစေနိုင်ပြီး အသက်အရွယ်ကြောင့်ဖြစ်သော အမြင်အာရုံပြဿာနာများမှလည်းကာကွယ်ပေးနိုင်ပါသည်။ သကြားပြောင်းဖူးသည် ကစီဓာတ်ပါဝင်သောကြောင့် အခြားအသီးအနှံများထက် စွမ်းအင်ပိုမိုရစေ နိုင်ပြီး ခန္ဓာကိုယ်အင်အားပြည့်ဝစေပါသည်။ သကြားပြောင်းဖူးတွင် ဖောလစ်အက်ဆစ် ကြွယ်ဝစွာပါဝင်သောကြောင့် ကိုယ်ဝန်ဆောင်မိခင်များအနေဖြင့် စားသုံးပေးသင့်သော အစားအစာ တစ်မျိုးဖြစ်ပြီး ကိုယ်ဝန်ဆောင်ချိန်တွင်ဖြစ်တတ်သော ခြေလက်ဖောရောင်ခြင်းမှလည်း သက်သာစေနိုင်ပါသည်။ ထို့ကဲ့သို့ အရသာရှိပြီး ကျန်းမာရေးအကျိုးကျေးဇူးများသော သကြားပြောင်းဖူးချိုချိုလေးကို မြင်းခြံမြို့၊အေးမြသီတာဈေးတွင် တစ်ဖူးလျှင် (၅၀၀-၆၀၀) ကျပ်ဖြင့် အရောင်းအဝယ် ဖြစ်လျက်ရှိကြောင်း သိရှိရပါသည်။            

DOCA(မန္တလေး)                

           ဂေါ်ရခါးသီးကိုမြန်မာနိုင်ငံတွင် ဈေးနှုန်းသက်သက်သာသာဖြင့်ဝယ်ယူရရှိနိုင်ပြီး ကျန်းမာရေးနှင့် လည်းညီညွတ်သော အသီးအနှံတစ်မျိုးဖြစ်ပါသည်။ ဂေါ်ရခါးသီးတွင် အစွမ်းထက်သော ဓာတ်တိုး ဆန့်ကျင်ပစ္စည်းများပါဝင်ပြီး ဆဲလ်များပျက်စီးမှုကိုကာကွယ်ပေးခြင်း၊ ရောင်ရမ်းခြင်းကိုလျော့ချ  ပေးပြီးခန္ဓာကိုယ်အတွင်း ဓာတ်တိုးဖိစီးမှုကိုလျော့ချပေးသည့်အပြင်ကင်ဆာရောဂါ၊ ဆီးချိုရောဂါနှင့် ရောင်ရမ်းမှုကိုဟန့်တားပေးပါသည်။ဂေါ်ရခါးသီးကိုစားသုံးပေးခြင်းဖြင့် သွေးတိုးခြင်း၊ ကိုလက် စထရောမြင့်မားခြင်းနှင့် သွေးစီးဆင်းမှုအားနည်းခြင်းကြောင့် နှလုံးရောဂါဖြစ်နိုင်ခြေအကြောင်း အရင်းများစွာကိုတားဆီးပေးသည့်အပြင် ဂေါ်ရခါးသီးတွင်ပါဝင်သောဓာတ်ပေါင်းများက သွေးကြော များကိုပြေလျော့စေကာ သွေးစီးဆင်းမှုကို ကောင်းမွန်စေပြီးသွေးပေါင်ချိန်ကို လျော့ကျစေနိုင် ပါသည်။ ဂေါ်ရခါးသီးတွင် ကာဗိုဟိုက်ဒရိတ်နည်းပါးပြီး ပျော်ဝင်နိုင်သော အမျှင်ဓာတ်မြင့်မား သောကြောင့် သွေးတွင်းသကြားဓာတ်ကိုထိန်းညှိ ပေးနိုင် ပါသည်။ ဖောလိတ်ဓာတ်ကြွယ်ဝစွာ ပါဝင်သောကြောင့် ကိုယ်ဝန်ဆောင်မိခင်များစားသုံးပေးခြင်းဖြင့်လမစေ့ဘဲ ကလေးမွေးဖွားခြင်းမှ တားဆီးပေးနိုင်ပါသည်။ ဂေါရခါးသီးကိုသင့်တင့်မျှတစွာစားသုံးပေးပါက ထူးခြားသည့် ဘေးထွက် ဆိုးကျိုးများစွာမရှိသော်လည်း အလွန်အကျွံစားသုံးပေးပါက ဝမ်းပျက်ဝမ်းလျှောခြင်း၊ လေပွခြင်းနှင့် ရင်ပြည့်ရင်ကယ်ဖြစ်ခြင်းစသည့် အစာအိမ်နှင့်အူလမ်းကြောင်းဆိုင်ရာပြဿာနာ များကိုဖြစ်စေနိုင် ပါသည်။ ထိုကဲ့သို့ကျန်းမာရေးအတွက်များစွာအကျိုးပြုနိုင်ပြီး ဘေးထွက်ဆိုးကျိုးနည်းသည့် ဂေါရခါးသီးကို မြင်းခြံမြို့၊ အေးမြသီတာဈေးတွင်တစ်လုံးလျှင် (၄၀၀-၅၀၀) ကျပ်ဖြင့် အရောင်း အဝယ်ဖြစ်လျက်ရှိကြောင်း သိရှိရပါသည်။

DOCA(မန္တလေး)

    မန္တလေးတိုင်းဒေသကြီး ၊ ကျောက်ဆည်ခရိုင်သည် သီးနှံမျိုးစုံအောင်မြင်ဖြစ်ထွန်းလျှက်ရှိရာ ၎င်းသီးနှံများအနက် ပဲတီစိမ်း(မိုး)ကို ၂၀၂၅ - ၂၀၂၆ ဘဏ္ဍာနှစ်တွင် စဉ့်ကိုင်မြို့နယ်တွင် (၅၆၃၆)ဧက စိုက်ပျိုးထားရှိပြီး (၄၆၄၁)ဧက ရိတ်သိမ်းပြီးစီးပြီဖြစ်ကြောင်း သက်ဆိုင်ရာဌာန၏ စာရင်းများအရ သိရှိရပါသည် ။ ပဲတီစိမ်းကို မတ်လနှင့်ဧပြီလများတွင် စတင်စိုက်ပျိုးကြပြီး ယခုအချိန်တွင် ဖြိုင်ဖြိုင်ရိတ်သိမ်းနေပြီဖြစ်ကြောင်း သိရှိရပါသည် ။ စိုက်ပျိုးရာတွင် မျိုးအနေဖြင့် ကျောက်စိမ်းမျိုးနှင့်ရေဆင်း(၁၁)မျိုးကို အများဆုံးစိုက်ပျိုးကြပြီး တစ်ဧကလျှင်မျိုးစေ့(၅-၆)ပြည်ခန့် ကုန်ကျကြောင်း ၊ ပဲတီစိမ်းမျိုး ဈေးနှုန်းအနေဖြင့် တစ်ပြည်လျှင်(၈၀၀၀)ကျပ်ဈေးနှုန်းဖြင့် ဝယ်ယူ စိုက်ပျိုးရပြီး တစ်ဧက ကုန်ကျစရိတ်အနေဖြင့် မျိုး ၊ သွင်းအားစု၊ လုပ်သားခအပါအဝင်၊ စုစုပေါင်း (၅၀၀၀၀၀/-)ကျပ်ခန့် ကုန်ကျကြောင်း ၊ (၁)ဧက အထွက်နှုန်းအနေဖြင့် (၁၁-၁၂)တင်းခန့် ထွက်ရှိ ကြောင်း ၊ ယခင်နှစ် ပဲတီစိမ်း ‌စျေးနှုန်းအနေဖြင့် တစ်တင်းလျှင်(၈၀၀၀၀/-)ကျပ် ဈေးနှုန်းရှိခဲ့ပြီး ယခုနှစ်တွင် ပဲတီစိမ်း တစ်တင်းလျှင်(၁၂၀၀၀၀/-)ကျပ် စျေးနှုန်းများဖြင့် အရောင်းအဝယ်ဖြစ်နေ ကြောင်း၊ ယခင်နှစ်နှင့်ယခုနှစ် စျေးနှုန်းများ နှိုင်းယှဉ်ပါက ပဲတီစိမ်းစျေးမှာမြင့်တက်လျှက်ရှိပါသည်။ စျေးကွက်အနေဖြင့် ကျောက်ဆည်မြို့ပေါ်ရှိ ပွဲရုံများသို့ လာရောက်ရောင်းချကြပြီး ပွဲရုံများမှတစ်ဆင့် မန္တလေး၊ ရန်ကုန်မြို့များသို့ တင်ပို့ရောင်းချကြကြောင်းသိရှိရပါသည် ။ အကျိုးအမြတ်အနေဖြင့် (၈၂၀၀၀၀/-)ကျပ်ဝန်းကျင်ခန့် မြတ်ကြောင်း ၊ တောင်သူများ ပဲတီစိမ်းစိုက်ပျိုးမှုဖြင့် ဝင်ငွေတိုး၍ အကျိုးအမြတ်များ ပိုမိုရရှိကြောင်း သိရှိရပါသည်။

DOCA (မန္တလေး)                                                                                         

           မန္တလေးတိုင်းဒေသကြီး မြင်းခြံမြို့နယ်သည် ဆည်ရေသောက် အသင့်အတင့်ရှိပြီး ကျေးရွာများတွင် လယ်ယာစိုက်ပျိုးရေးလုပ်ငန်းကို လုပ်ကိုင်ကြကြောင်း၊ ဆီထွက်သီးနှံ၊ ပဲမျိုးစုံ၊ ကြက်သွန်နီများကို စိုက်ပျိုးလျက်ရှိရာ မိုးအစေ့ထုတ်ပြောင်းသီးနှံကိုလည်း စိုက်ပျိုးထားကြောင်း သိရှိရသည်။ မြင်းခြံမြိုနယ်တွင်၂၀၂၅-၂၀၂၆ခုနှစ်၊ မိုးစေ့ထုတ်ပြောင်း စိုက်ဧကကို (၁၀၅) ဧကစိုက်ပျိုး ထားကြောင်း၊ ကြေးတိုင်နှင့် မြေစာရင်း ဦးစီးဌာန၏ စာရင်းများအရသိရှိရသည်။

            မိုးအစေ့ထုတ်ပြောင်းသီးနှံကို  မေလနှင့် ဇွန်လတို့တွင်စတင်စိုက်ပျိုးပြီး၊ အောက်တိုဘာလ၊ နိုဝင်ဘာလနှင့် ဒီဇင်ဘာလတို့များတွင် ရိတ်သိမ်းထွက်ပေါ်လေ့ရှိကြောင်း၊ စိုက်ပျိုးချိန်မှ လေးလခန့်အကြာတွင် ရိတ်သိမ်းရကြောင်း၊ စိုက်ပျိုးရန်ကျန်ရှိသော ဧကများဆက်လက်စိုက်ပျိုး မည်ဖြစ်ကြောင်း၊ ယခင်နှစ်တစ်ဧက အထွက်နှုန်း အနေဖြင့် (၈၀) တင်းနှုန်းခန့်ထွက်ရှိကြောင်း၊ ထွက်ရှိသော အစေ့ထုတ်ပြောင်းများကို တောင်သူများက မြင်းခြံမြို့ရှိ သီးနှံပွဲရုံများသို့ တင်ပို့ရောင်းချကြောင်း၊ မိုးကိုမျှော်ပြီးစိုက်ပျိုးရသောသီးနှံဖြစ်သောကြောင့် ရာသီဥတုကောင်းပါက ယခုနှစ်တွင် အထွက်နှုန်းပိုမိုထွက်ရှိနိုင်ကြောင်း၊ အစေ့ထုတ်ပြောင်း စိုက်တောင်သူတစ်ဦး၏ ပြောပြချက်အရသိရှိ ရသည်။ ၂၀၂၅ ခုနှစ်၊ ဩဂုတ်လပထမပတ် အစေ့ထုတ်ပြောင်းတစ်တင်းလျှင် (၂၇၃၆၀) ကျပ် ပေါက်ဈေးများရှိကြောင်း၊ ဈေးကွက်တင်ပို့မှုအနေဖြင့် ရန်ကုန်မြို့သို့တင်ပို့ကြောင်း မြင်းခြံကုန်စည်ဒိုင်၏ တာဝန်ရှိသူ၏ ပြောပြချက်အရသိရှိရပါသည်။

DOCA(မန္တလေး)       

          ငါန်းဇွန်မြို့နယ်တွင် စက်သုံးဆီအရောင်းဆိုင်(၁၀)ဆိုင်မှ စက်သုံးဆီများကို နေ့စဉ်ပုံမှန် ဖွင့်လှစ်ရောင်းချလျက်ရှိရာ ၂၀၂၅ခုနှစ်၊ ဩဂုတ်လ(၁)ရက်နေ့ စက်သုံးဆီတစ်လီတာ အရောင်းဈေးနှုန်းများအနေဖြင့် 92 Octance(၃၀၄၀)ကျပ်၊ 95 Octance(၃၀၉၀)ကျပ်၊ ရိုးရိုးဒီဇယ် (၂၈၅၅)ကျပ်၊ ပရီမီယမ် ဒီဇယ်(၃၅၀၀)ကျပ်ဝန်းကျင်ဖြင့် ရောင်းချလျက်ရှိကြောင်း သိရှိရသည်။

          စက်သုံးဆီတင်သွင်းသိုလှောင် ဖြန့်ဖြူးခြင်းလုပ်ငန်းကြီးကြပ်ရေးကော်မတီမှ ၁-၈-၂၀၂၅ရက်နေ့တွင် ထုတ်ပြန်ထားသည့် စက်သုံးဆီတစ်လီတာ၏ သတ်မှတ်ရည်ညွှန်းဈေးများမှာ 92 Octance (၂၉၉၅)ကျပ်၊ 95 Octance(၃၀၅၀)ကျပ်၊ ရိုးရိုးဒီဇယ်(၂၈၂၅)ကျပ်၊ ပရီမီယမ်ဒီဇယ် (၃၄၇၅)ကျပ် ဖြစ်ကြောင်း  သိရှိရသည်။ သတ်မှတ်ရည်ညွှန်းဈေးများသည် ယခင်အပတ်ထက် တစ်လီတာလျှင် 92 Octanceတွင်(၅၀)ကျပ်၊ 95 Octanceတွင်(၅၅)ကျပ်  ဈေးနှုန်းကျဆင်းခဲ့ပြီး ရိုးရိုးဒီဇယ်နှင့် ပရီမီယမ် ဒီဇယ်တို့တွင်(၅)ကျပ် ဈေးနှုန်းမြင့်တက်ခဲ့ကြောင်း သိရှိရပါသည်။

DOCA(မန္တလေး)