ပြည်တွင်းကုန်သွယ်မှုသတင်း

    ရှမ်းပြည်နယ်တောင်ပိုင်းက ထွက်ရှိတဲ့ အင်းသီး ခေါ် အင်းလေးကန် ကျွန်းမျောပေါ်မှာအဓိက စိုက်ပျိုးတဲ့ ခရမ်းချဉ်တွေဟာ အရင်နှစ်ကထက် ဈေးကောင်းရနေပေမဲ့ စိုက်ပျိုးစရိတ်နဲ့ စိုက်တဲ့တောင်သူ နည်းပါးလာပြီး၊ ကျွန်းမျောတွေ ပျက်စီးကုန်တာကြောင့်   အသီးအထွက်နှုန်းတွေလည်း နည်းလာပြီး တောင်သူတွေ အရှုံးပေါ်နေတယ်လို့လည်း သိရပါတယ်။ အင်းလေးကန် အတွင်းက ကျွန်းမျောတွေက ရာသီဥတု ပူပြင်းတာကြောင့်  ပျက်စီးကုန်တဲ့အ ပြင် အရင်ကထက် စိုက်ပျိုးတဲ့ တောင်သူတွေ နည်းပါးလာတာကြောင့် အသီးအထွက်နှုန်း လျော့ကျကာ  ဈေးကွက်အတွင်းကိုလည်း အရင်နှစ်တွေကလောက် တင်သွင်းနိုင်ခြင်းမရှိတော့ဘူးလို့လည်း သိရပါတယ်၊ ဈေးကောင်းနေပေမဲ့ စိုက်ပျိုးစရိတ်ကြီးလာတာကြောင့် တောင်သူတွေက အရှုံးပေါ်နေတယ်လို့ ဆိုပါတယ်။

    မနှစ်ကတော့ ခရမ်းချဉ်သီးတွေက အထွက်နှုန်းများပြီး ဈေးကောင်းမရခဲ့တာကြောင့် တိရစ္ဆာန်တွေကျွေး၊ ဒီအတိုင်းလွင့်ပစ်ခဲ့ရပါတယ်၊ မနှစ်က အနိမ့်ဆုံးဈေးက ၁၀ဝိ/ထိတောင် ဖြစ်ခဲ့ပါတယ်။  ဒီနှစ်မှာတော့ ဈေးနှုန်းကအတော်ကောင်းလာပြီး ဂွတ်ရှယ်သီးက တစ်ပိဿာ ၃၀၀ဝိ/-၊ ရှယ်သီးက ၂၈၀ဝိ/ နဲ့ အသေးက ၂၅၀ဝိ/- ဈေးထိပေါက်နေပါတယ်၊ အသီးကြီး အသီးညီပြီး၊ အလုံးလှတာကို(ဂွတ် ရှယ်)သီး၊ သူ့ထက် အလုံးငယ်တာကို (ရှယ်သီး) နဲ့ အသေးမျိုးကိုတော့ (အသေးသီး)ဆို ခွဲခြားပြီး ဈေးကွက်ကိုဝင်ပါတယ်၊ ခရမ်းချဉ်သီးကို ရှမ်းပြည်နယ်တောင်ပိုင်း အင်းလေးဒေသမှာ အများဆုံးစိုက်ပျိုးကြပြီး၊ စိုက်ပျိုးချိန်ကတော့ (၃)လ မှ (၄) လကြာပါတယ်၊ နှစ်စဉ် ဇန်နဝါရီလမှာ ၁ ကြိမ်နဲ့ မေလမှာ၁ ကြိမ် စိုက်ပျိုးကြပါတယ်၊  ဒီနှစ်မှာတော့ မနှစ်ကထက် စိုက်ပျိုးမှုလျော့နည်းလာပြီး ၄ပုံ ၁ပုံသာစိုက်ပျိုးနိုင်ခဲ့ပြီး၊ အင်းလေးဒေသအတွင်း ကျေးရွာပေါင်း ၅၀ ကျော်ခန့် စိုက်ပျိုးကြပါတယ်၊ စိုက်ပျိုးမြေ ကျွန်းမျော ဧကပေါင်း ၂ သိန်းနီးပါးခန့်ရှိတယ်လို့လည်း ဒေသခံတွေထံက သိရပါတယ်၊ ရှမ်းပြည်နယ် အင်းလေးဒေသကထွက်တဲ့ ခရမ်းချဉ်သီးတွေကို ရန်ကုန်၊ မန္တလေးတို့အပြင်  ရှမ်းပြည်နယ်(အရှေ့ ပိုင်း) ရှမ်းပြည်နယ် (မြောက်ပိုင်း)သာမက မြန်မာပြည်တပြည်လုံးကို တင်ပို့ရောင်းချရတယ်လို့ ညောင်ရွှေမြို့ ခရမ်းချဉ်ပွဲရုံတွေက သိရှိရပါတယ်။

DOCA(ရှမ်း)

      တောင်ငူမြို့၊ ညောင်ပင်ဈေးနှင့် ရွှေဆံတော်ဘုရားဈေးတို့တွင် ခရမ်းချဉ်သီးများ ဈေးနှုန်းမြှင့်တက်လျက်ရှိပါသည်။ ခရမ်းချဉ်သီးမှာ ဟင်းအိုးတော်တော်များများတွင်ထည့်သွင်းအသုံးပြုရသော ပါဝင်ပစ္စည်းတစ်မျိုးဖြစ်သောကြောင့် အိမ်ရှင်မများအနေဖြင့်မဖြစ်မနေဝယ်ယူအသုံးပြုနေရပါသည်။

      ခရမ်းချဉ်သီးသည် မြန်မာတို့အတွက်မရှိမဖြစ်သော ဟင်းသီးတစ်မျိုးဖြစ်သည်။ ခရမ်းချဉ်သီးကိုဆီပြန်ဟင်းများချက်ရာတွင် အများဆုံးအသုံးပြုကြသလို၊ အသုတ်စုံရောင်းသောဆိုင်များတွင် ခရမ်းချဉ်သီးကိုသုတ်၍ ခရမ်းချဉ်သီးသုတ်အဖြစ်လည်းရောင်းချကြပါသည်။ ထို့ပြင် လက်ဖက်သုတ်တွင်လည်း ခရမ်းချဉ်သီးအားပါးပါးလှီးလှီး၍ ထည့်သုတ်စားကြပါသည်။

     ခရမ်းချဉ်သီးဈေးနှုန်းများအနေဖြင့် ၂၀၂၄ခုနှစ်၊ မေလပထမအပတ်တွင် ခရမ်းချဉ်သီးအလုံးသေးတစ်ပိဿာလျှင် (၂၀၀၀)ခန့်ရှိရာမှ မေလ နောက်ဆုံးအပတ်တွင် တစ်ပိဿာ (၄၀၀၀)ခန့်နှင့် ခရမ်းချဉ်သီးအလုံးကြီးအလုံးလှ တစ်ပိဿာလျှင် (၃၀၀၀)ကျပ်ခန့်ရှိရာမှ ယခုမေလနောက်ဆုံးအပတ်တွင် တစ်ပိဿာ (၅၀၀၀) ကျပ်ခန့်အထိ ဈေးနှုန်းမြင့်တက်သွားပါသည်။

     ယခုအချိန်အခါတွင် မိုးဦးကျပြီဖြစ်သဖြင့် ဒေသတွင်းခရမ်းချဉ်သီးများတုံးသွားပြီဖြစ်၍ ရှမ်းပြည်မှဝင်ရောက်သောခရမ်းချဉ်သီးများသာ ဈေးကွက်တွင်းရှိသောကြောင့် ခရမ်းချဉ်သီးဈေးနှုန်းမြင့်တက်သွားခြင်းဖြစ်ကြောင်း တောင်ငူမြို့၊ ညောင်ပင်ဈေးရှိ ဟင်းသီးဟင်းရွက်ရောင်းချသူများထံမှ သိရှိရပါသည်။

DOCA(ပဲခူး)

     သံတောင်ကြီးမြို့နယ်၊ လိပ်သိုဒေသရှိတောင်သူများသည် ဥယျာဉ်ခြံလုပ်ငန်း၊ မွေးမြူရေးလုပ်ငန်းများအပြင် တောင်ယာလုပ်ငန်းကိုပါ တွဲဖက်လုပ်ကိုင်ကြသည်။ ယခုမိုးဦးကျကာလတွင် တောင်ယာခင်းများ၌ နနွင်းများစတင်စိုက်ပျိုးနေပြီဖြစ်ကြောင်းသိရှိရပါသည်။

     တောင်သူများသည် နနွင်းမစိုက်မှီ တောင်ယာခင်းများအားခုတ်ထွင်ရှင်းလင်းပြီး တောင်ယာမီးရှို့ခြင်းများလုပ်ဆောင်ကြသည်။ နနွင်းစိုက်ပျိုးရာတွင် ယခင်နှစ်က မျိုးကောင်းမျိုးသန့်အဖြစ်ရွေးချယ်သိုလှောင်ထားသောနနွင်းများကို မိုးဦးမကျမီနှင့် မိုးဦးကျကာလတွင်စိုက်ပျိုးကြကြောင်းသိရှိရသည်။

      စိုက်ပျိုးထားသောနနွင်းတက်များကို ဖေဖေါ်ဝါရီလတွင်စတင်တူးဖေါ်ကြပြီး တောင်ငူမြို့ရှိနနွင်းအဝယ်ဒိုင်များသို့ လာရောက်ရောင်းချကြပါသည် ၂၀၂၃ခုနှစ်၊ မေလနောက်ဆုံးပတ်တွင် နနွင်းအစိုတစ်ပိဿာလျှင် (၆၀၀)ကျပ်နှင့် အခြောက်တစ်ပိဿာလျှင် (၇၂၀၀)ကျပ် အထိဈေးကောင်းရရှိသောကြောင့် တောင်သူများအနေဖြင့် ယခုနှစ်တွင်လည်းဈေးကောင်းရရှိရန် မျှော်လင့်နေကြကြောင်းသိရှိရသည်။

DOCA(ပဲခူး)

     ဖြူးမြို့ အဝေးပြေးမော်တော်ယာဉ်ရပ်နားစခန်းဝင်းအတွင်း မုန့်အရောင်းဆိုင်၌ မုန့်မျိုးစုံကြားတွင်စိတ်ကြိုက်အမှတ်တံဆိပ်ဖြင့် ထမင်းခြောက်ကြော်ဘူးလေးများကိုတွေ့ရှိရပါသည်။ ယာဉ်ရပ်နားစခန်းဝင်းရှိထမင်းဆိုင်များမှ ရောင်းမကုန်သည့်ထမင်းများအလဟဿမဖြစ်ရလေအောင် အခြောက်လှန်း၍ပြန်ကြော်ပြီး ခရီးသွားပြည်သူများ အဆာပြေစားနိုင်ရန်ရောင်းချခြင်းဖြစ်ကြောင်းသိရှိရပါသည်။

       ထမင်းကိုလတ်ဆတ်ချိန်မှာ နေပူထဲတွင်အခြောက်လှန်းပြီး ဆီနှင့်သင့်တင့်စွာကြော်ရပါသည်။ ထို့နောက် သင့်တင့်စွာထုပ်ပိုးပြီး ပြန်၍ရောင်းချခြင်းသည် ရောင်းချသူအတွက် ကောင်းမွန်သည့်စိတ်ကူးစိတ်သန်းဖြစ်သကဲ့သို့ ခရီးသွားပြည်သူများအတွက် ဝန်မကျယ်ဘဲသင့်တင့်သည့်ဈေးနှုန်းဖြင့် အာဟာရဓါတ်ကို ရရှိစေပါသည်။

       ထမင်းခြောက်ကြော်သည် အဆာပြေအတွက်ရည်ရွယ်၍ရောင်းချခြင်းဖြစ်သော်လည်း အာဟာရပြည့်၍အားဖြစ်စေသဖြင့် ခရီးသွားများကြိုက်နှစ်သက်ကြောင်း၊ တန်ဖိုးမှာလည်းတစ်ဗူးလျှင် ၁၅၀၀ကျပ်သာရှိသဖြင့် ဈေးသက်သာကာဝယ်ယူစားသုံးသူများသဖြင့် ရောင်းရကြောင်း ထမင်းခြောက်ကြော်ရောင်းချသူများထံမှ သိရှိရပါသည်။

DOCA(ပဲခူး)

      မကွေးတိုင်းဒေသကြီး၊ သရက်ခရိုင်၊ အထက်မင်းလှမြို့၊ ဇေယျာသီရိဈေးတွင် မြစ်ငါးအမျိုးမျိုးနှင့် ပုဇွန်တို့ကို မြို့ပေါ်ရှိ အမှတ်(၃)ရပ်ကွက်မှ ဈေးသည်များနှင့် မြို့အရှေ့ဘက်ကမ်းတွင်တည်ရှိသော မြင်ကွန်းရွာမှဈေးသည်များ အများဆုံးလာရောက်ရောင်းဝယ်ဖောက်ကားလျက်ရှိကြောင်း သိရှိရပါသည်။

       ၂၀၂၄ခုနှစ်၊ မေလ(စတုတ္ထပတ်)တွင် အထက်မင်းလှမြို့၊ ဇေယျာသီရိဈေး၌ရောင်းချလျက်ရှိသော မြစ်ငါး၊ ပုဇွန်ဈေးနှုန်းများမှာ ငါးကြင်း(၁)ပိဿာလျှင် ကျပ်(၂၄၀၀၀)၊ ငါးတန်(၁)ပိဿာလျှင် ကျပ် (၁၆၀၀၀)၊ ငါးကွန်မှန်(၁)ပိဿာလျှင် ကျပ်(၂၀၀၀၀)၊ ငါးဘတ်(၁)ပိဿာလျှင် ကျပ်(၂၀၀၀၀)၊ ငါးသ လောက်(အကောင်အလတ်) (၁)ပိဿာလျှင် ကျပ်(၃၅၀၀၀)၊ ပုဇွန်(အကောင်အကြီး)(၁)ပိဿာလျှင် ကျပ်(၅၀၀၀၀)၊ ငါးယင်ပေါင်စာ(၁)ပိဿာလျှင် ကျပ်(၂၀၀၀၀)ဈေးနှုူန်းများဖြင့် အရောင်းအဝယ်ဖြစ် လျက်ရှိပြီး ယခင်(တတိယပတ်)နှင့်နှိုင်းယှဉ်ပါက ယခုအပတ်တွင် မြစ်ငါးသလောက်(၁)ပိဿာလျှင် ကျပ်(၅၀၀၀)ဈေးမြင့်တက်လာပြီး ကျန်ငါးဈေးနှုန်းများမှာ တည်ငြိမ်လျက်ရှိကြောင်း သိရပါသည်။  ယခုအချိန်တွင် မိုးတွင်းကာလနီးလာပြီဖြစ်သောကြောင့် မြစ်ငါးများရှားပါးလာပြီဖြစ်၍  ငါးသလောက်ဈေးနှုန်းမှာ မြင့်တက်လာခြင်းဖြစ်ကြောင်း ဇေယျာသီရိဈေးအတွင်း ငါးရောင်းချနေသော ဈေးသည်တစ်ဦးထံမှ သိရှိရပါသည်။

DOCA(မကွေး)