ပြည်တွင်းကုန်သွယ်မှုသတင်း

     ကန့်ဘလူခရိုင်၊ ကန့်ဘလူမြို့နယ်အတွင်း စိုက်ပျိုးရေးကို အဓိကလုပ်ကိုင်လျက်ရှိရာ မိမိတို့ အိမ်ခြံ ဝင်းအတွင်းနှင့် တောင်ယာမြေများတွင် တစ်နိုင်တစ်ပိုင်အနေဖြင့် စားဖိုဆောင်သီးနှံများကို  စိုက်ပျိုးထားကြသည့်အနက် ဆူးပုတ်ရွက်သည်လည်း တစ်မျိုးပါဝင်ပါသည်။ ဆူပုတ်ရွက်ကို ကန့်ဘလူမြို့နယ်၊ နတ်ပေးကျေးရွာ၊ တောက္ကရှပ်ကျေးရွာ၊ ဆူးပုတ်ကုန်းကျေးရွာနှင့် ကန့်ဘလူ မြို့ပေါ်ရပ်ကွက်အသီးသီးတို့မှ   လာရောက်ရောင်းချခြင်းဖြစ်ပါသည်။ ဆူးပုတ်ရွက်ကို မိမိတို့ဒေသ တွင်သာမက ဒေသတိုင်းတွင် လူကြိုက်များပြီး အစားများသော အရွက်တစ်မျိုးဖြစ်ပါသည်။

     ယခင် ၂၀၂၅ ခုနှစ်၊ မေလ ပထမပတ်အတွင်း ကန့်ဘလူမြို့၊ မိုးမလင်းဈေးတွင် ရောင်းချ လျက်ရှိသော ဆူးပုတ်ရွက် ဈေးနှုန်းအနေဖြင့် ဆူးပုတ်အစည်း (၁)စည်းလျှင် (၁၀၀)ကျပ်၊ (၁၀)စည်း ပါ တစ်ထုံးလျှင်(၁၀၀၀)ကျပ်ဈေးနှုန်းဖြင့် ရောင်းချလျက်ရှိခဲ့ပြီး ယခု မေလ ဒုတိယပတ်တွင် ကန့်ဘလူမြို့ မိုးမလင်းဈေး၌ ဆူးပုတ်ရွက် တစ်စည်းလျှင်(၂၀၀)ကျပ် (၃)စည်းလျှင်(၅၀၀)ကျပ်နှင့် (၁၀)စည်း တစ်ထုံးလျှင်(၁၈၀၀)ကျပ်ဈေးနှုန်းတို့ဖြင့် အရောင်းအဝယ်ဖြစ်နေသောကြောင့် ယခင် အပတ်နှင့်နှိုင်းယှဉ်ကြည့်မည်ဆိုပါက ဆူးပုတ်ရွက်ဈေးအနည်းငယ်မြင့်တက်လျက်ရှိပြီး အရောင်း အဝယ်ဖြစ်လျက်ရှိကြောင်း  ကုန်စိမ်း ရောင်းချ သည့် လုပ်ငန်းရှင် တစ်ဦးထံမှ သိရပါသည်။

DOCA(စစ်ကိုင်း)

          စစ်ကိုင်းတိုင်းဒေသကြီး၊ ကန့်ဘလူခရိုင်၊ ကန့်ဘလူမြို့ မြို့မစည်ပင်သာယာဈေးတွင် ဘုရားပန်း အမျိုးမျိုးဖြစ်သော ဂန္ဓာမာပန်း၊ သစ္စာပန်း၊ စိန်လည်တုံ၊ နှင်းဆီ၊ ခရေပန်း၊ စကားဝါပန်း၊ မေမြို့ပန်း (အက်စတာ)၊ ကျောက်စိမ်းပန်း မြေမြို့ပန်း (ကြက်လည်ဆံ) သပြေပန်း(အောင်သပြေ)အငုတ်၊ အောင်သပြေ အခက်များနှင့် အာစီယံသပြေ တို့ကို မိမိတို့ ဒေသထွက်နှင့် မန္တလေးမြို့၊ ပြင်ဦးလွင်မြို့တို့မှ မှာယူရောင်းချကြောင်းသိရှိရပါသည်။ မိမိတို့ ဗုဒ္ဓဘာသာ လူမျိုးများအတွက် ဘုရားပန်းသည်လည်း မိမိတို့ ကိုးကွယ်ယုံကြည်အားထားရာဖြစ်သည့် ဘုရားစင်ပေါ်တွင် ကုသိုလ်ယူရန် နေ့စဉ်ကပ်လှူ ပူဇော်ရသည့်အတွက် မရှိမဖြစ်သော အရာတစ်မျိုး လည်းဖြစ်ပါသည်။

          စကားဝါပန်းသည် ဧပြီလကုန်တွင် စတင်ပွင့်ဖူးကာ စကားဝါပန်းသည် ရွှေဝါရောင်ရှိပြီး အခြား ပန်းများနှင့်မတူသော ပွင့်ဖတ်များလည်းရှိသည်ကို တွေ့ရှိရပြီး စကားဝါပန်း အဓိကပေါများ ပေါက် ရောက်သည်မှာ မြန်မာနိုင်ငံ၏ ထင်ရှားသော နေရာဒေသတစ်ခုဖြစ်သည့် ပုပ္ပါးတောင်တွင်ဖြစ်ပါသည်။ ထို့ကြောင့် လူအများက စကားဝါပန်းဟုဆိုလိုက်တာနဲ့ ပုပ္ပါးတောင်ကိုပြေးမြင်ကြသည် စကားဝါပန်း ပေါများလှသည့် ပုပ္ပါးတောင်သည် စကားဝါပန်းနှင့် ပုပ္ပါးတောင်ခွဲခြား၍မရနိုင်ဖြစ်ကြပါသည်။

          ယခု ၂၀၂၅ ခုနှစ်၊ မေလ(ဒုတိယပတ်)တွင် ကန့်ဘလူမြို့၌ ဖြစ်ပေါ်နေသော စကားဝါ ဈေးနှုန်းဖြင့် စကားဝါပန်း(၅)ပွင့်ပါ တစ်ကုံးလျှင်(၃၅၀)ကျပ်၊ စကားဝါပန်း(၃)ကုံးလျှင်လျှင်(၁၀၀၀)ကျပ် ဈေးနှုန်း တို့ဖြင့် ရောင်းချလျက် ရှိကြောင်း ကန့်ဘလူမြို့ မြို့မစည်ပင်သာယာ ဈေးတွင် ဘုရားပန်းမျိုးစုံ ရောင်းချ နေသော ပန်းသည် ထံမှ သိရှိရပါသည်။         

DOCA(စစ်ကိုင်း)

     စစ်ကိုင်းတိုင်းဒေသကြီး၊ ကန့်ဘလူခရိုင်၊ ကန့်ဘလူမြို့နယ်အတွင်း လမ်းပန်း ဆက်သွယ်ရေး အခက်ခဲများကြောင့်  ကုန်ဈေးနှုန်းများ အနည်းငယ်မြင့်တက်လျက်ရှိရာမှ အသားငါး ဈေးနှုန်းများထဲမှ ငါးဈေးနှုန်းသည်လည်း မြင့်တက်လျက်ရှိပါသည်။

ငါးပတ်ကို ကန့်ဘလူခရိုင်၊ ကန့်ဘလူမြို့နယ်အတွင်းရှိ သိန်ရင်ဆည်၊ လင်ဗန်းဆည် နှင့် ကျွန်းလှ မြို့နယ် သဖန်းဆိပ်ဆည်အတွင်းမှ ထွက်ရှိသည့် ဒေသထွက်ရေချိုငါးများကို   ဝယ်ယူရောင်းချကာ  ဈေးကောင်း ရရှိပြီး အရောင်းအဝယ် ဖြစ်လျက်ရှိကြောင်း သိရသည်။

     ယခု ၂၀၂၅ ခုနှစ်၊ မေလ ဒုတိယအပတ်တွင် ကန့်ဘလူမြို့၏ ငါးပတ် ဈေးနှုန်းများ အနေဖြင့် ငါးပတ် ရှယ်ဆိုက်ဝင်(အကြီး) တစ်ပိဿာလျှင်(၂၅၀၀၀)ကျပ် နှင့် ငါးပတ် အကောင်သေး တစ်ပိဿာ လျှင်(၁၅၀၀၀)ကျပ်၊ ဈေးနှုန်းတို့ဖြင့် အရောင်းအဝယ်ဖြစ်လျက်ရှိကြောင်း ငါးအရောင်းအဝယ်လုပ်ကိုင်သူ ထံမှ သိရ ပါသည်။

DOCA(စစ်ကိုင်း)

     စစ်ကိုင်းတိုင်းဒေသကြီး၊ ကန့်ဘလူခရိုင်၊ ကန့်ဘလူမြို့ မဈေးတွင် ဈေးသည်များ၊ ဈေးတယ်သူများနှင့် စည်ကားသိုက်မြိုက်လျက်ရှိပြီး မိသားစုစားဝတ်နေရေးအတွက် သီးနှံမျိုးစုံကို ရောင်းချသည့်အလုပ်ဖြင့် အသက်မွေးဝမ်းကြောင်းပြုရာမှ ဂေါ်ရခါးသီးကိုလည်း မန္တလေးမြို့မှ မှာယူရောင်းချပြီး အရောင်းအဝယ် ဖြစ်လျက် ရှိကြောင်းသိရသည်။

     ယခု ၂၀၂၅ ခုနှစ်၊ မေလ ဒုတိယပတ်အတွင်း ဖြစ်ပေါ်နေသော ကန့်ဘလူမြို့၏ ဂေါ်ရခါးသီး ဈေးနှုန်းများမှာ ဂေါ်ရခါးသီး  အလုံးကြီး တစ်လုံးလျှင်(၇၀၀)ကျပ်၊  ဂေါ်ရခါးသီး အလုံးသေး တစ်လုံးလျှင် (၅၀၀)ကျပ် ဈေးနှုန်းတို့ဖြင့် ‌အရောင်းအဝယ်ဖြစ်လျက်ရှိကြောင်း ကန့်ဘလူမြို့ မြို့မဈေး၌ ကုန်စိမ်း သီးနှံမျိုးစုံ  ရောင်းချနေသော ဈေးသည် တစ်ဦးထံမှ သိရသည်။

DOCA(စစ်ကိုင်း)

          တနင်္သာရီတိုင်းဒေသကြီး၊ ထားဝယ်မြို့တွင် ၂၀၂၅ ခုနှစ်၊ မေလ ပထမအပတ်အတွင်း အခြေခံစားကုန်စျေးနှုန်းအများစုမှာ စျေးနှုန်းတည်ငြိမ်လျက်ရှိပါသည်။ ယခင် ၂၀၂၅ ခုနှစ်၊ ဧပြီလ အတွင်း အခြေခံစားကုန်စျေးနှုန်းများနှင့်နှိုင်းယှဥ်ပါက စားအုန်းဆီတစ်ပိဿာလျှင် (၈၀၀၀)ကျပ်မှ (၇၈၈၅) ကျပ်၊ ငရုတ်ခြောက် တစ်ပိဿာလျှင် (၁၆၀၀၀)ကျပ်မှ (၁၅၀၀၀)ကျပ် ၊ သကြားတစ်ပိဿာ လျှင် (၅၇၀၀)ကျပ်မှ (၅၆၀၀)ကျပ်အထိ စျေးနှုန်းအနည်းငယ်ကျလျက်ရှိပြီး ကြက်သွန်နီ တစ်ပိဿာ လျှင် (၃၀၀၀) ကျပ်မှ (၂၈၀၀)ကျပ်၊ ကြက်သား(cp)တစ်ပိဿာလျှင် (၂၃၀၀၀)ကျပ်မှ (၂၂၀၀၀)ကျပ်သို့ စျေးနှုန်းအနည်းငယ်ခန့်ကျဆင်းနေပြီး အခြားသော အခြေခံစားကုန်စျေးနှုန်းများ မှာ တည်ငြိမ် လျက်ရှိပါသည်။

DOCA(တနင်္သာရီ)