ပြည်တွင်းကုန်သွယ်မှုသတင်း

   ကွမ်းသီးဟုဆိုပါလျှင်   ယခင်နှစ်များစွာက အရောင်းအဝယ်ပြုလုပ်ရာတွင် ကွမ်းသီးအမှည့်ရင့်ရင့်ကိုသာ  ရောင်းဝယ်ဖောက်ကားလာခဲ့ကြပြီး ယခုနှစ်များတွင် ကွမ်းသီး(အနု)များပိုမို အရောင်းအဝယ်သွက်နေခဲ့ပါသည်။ သာယာဝတီခရိုင်အတွင်း၌ စိုက်ပျိုးထားသော ကွမ်းသီးပင် များမှာ စီးပွားဖြစ် စိုက်ပျိုးခြင်းမရှိသော်လည်း အိမ်ခြံဝန်းအတွင်း၊ ဘုန်းကြီးကျောင်းဝန်းခြံများ၊ ခြံစည်းရိုးများအဖြစ်  စိုက်ပျိုးထားရှိသော တစ်နိုင်တစ်ပိုင်အပင်များမှ ကွမ်းသီးစိမ်းနုလေးများကို  တစ်လုံးလျှင် ၂၀ ကျပ်မှ ၃၀ကျပ်အထိပေး၍ ဝယ်ယူလျက်ရှိရာ ဝယ်ယူသူများဘက်မှ ကိုယ်တိုင်ခူး စနစ်ဖြင့် ဝယ်ယူလျက်ရှိပါသည်။ ကွမ်းသီးအမှည့်ချိန်ထိ ထားရှိပြီးရောင်းချလျှင် အမှည့်မညီညာ၍ ကြွေကျခြင်းများရှိ၍ ရောင်းချမှုဘက်၌ အလေအလွင့်ရှိ၍ ကွမ်းသီးမှည့်ချိန်ရောင်းချမှုနှင့်လည်း ဈေးနှုန်းကွာဟမှု  မရှိသဖြင့် ကွမ်းသီးစိမ်းအနုများကိုသာ ရောင်းဝယ်မှု သွက်နေပါကြောင်း သိရှိရပါ သည်။

DOCA(ပဲခူး)

    ပဲခူးတိုင်းဒေသကြီး ၊ ညောင်လေးပင်ခရိုင်၊ ညောင်လေးပင် မြို့မဈေးကြီးတွင် စားသောက်ကုန်ပစ္စည်းများ၊ လူသုံးကုန်ပစ္စည်းများ၊ အလှကုန်လူသုံးကုန်ပစ္စည်းများ စသည်ဖြင့် စည်ကားသိုက်မြိုက်စွာ ရောင်းချလျက်ရှိပါသည်။

‌    ညောင်လေးပင်မြို့မဈေးတွင်   ရောင်းချလျက်ရှိသော ကြက်သွန်ဖြူ/နီ ဈေးနှုန်းများ၏ လက်ရှိဈေးကွက်အတွင်းဖြစ်ပေါ်နေသော ဈေးနှုန်းများမှာ ဩဂုတ်လ ဒုတိယအပတ်တွင် ကြက်သွန်နီ တစ်ပိဿာလျှင် ၂၅၀၀ကျပ် ၊  တတိယအပတ်တွင်  တစ်ပိဿာလျှင် ၃၃၀၀ ကျပ်၊ ဒုတိယအပတ်တွင် ကြက်သွန်ဖြူ (ရှမ်း) တစ်ပိဿာလျှင် ၈၆၀၀ ကျပ်၊ ကြက်သွန်ဖြူ (ကြူကုတ်) တစ်ပိဿာလျှင် ၇၅၀၀ ကျပ်ရှိပြီး တတိယအပတ်တွင် ကြက်သွန်ဖြူ (ရှမ်း) တစ်ပိဿာလျှင် ၉၄၀၀ ကျပ်၊ ကြက်သွန်ဖြူ (ကြူကုတ်) တစ်ပိဿာလျှင် ၈၅၀၀ ကျပ်ဖြင့်  ရောင်းချလျက်ရှိပြီး  ဒုတိယအပတ်နှင့် တတိယအပတ် နှိုင်းယှဉ်မည်ဆိုလျှင်  ကြက်သွန်နီတစ်ပိဿာလျှင် (၈၀၀)ကျပ်၊ ကြက်သွန်ဖြူ(ရှမ်း) တစ်ပိဿာလျှင် (၈၀၀) ကျပ်၊ ကြက်သွန်ဖြူ(ကြူကုတ်) တစ်ပိဿာလျှင် (၁၀၀၀)ကျပ် ဈေးနှုန်းမြင့်တက်လျက်ရှိကြောင်း သိရှိရပါသည်။

DOCA(ပဲခူး)

       တောင်ငူမြို့တွင်  ရွှေဘိုပေါ်ဆန်းမှာ ယခင်အပတ်က တစ်အိတ်လျှင် ၁၃၀၀၀၀ ကျပ် ရှိရာမှ ယခုအပတ်တွင် တစ်အိတ်လျှင် ၁၄၀၀၀၀ ကျပ်၊ ဖျာပုံပေါ်ဆန်းမှာ ယခင်အပတ်က တစ်အိတ် လျှင် ၁၂၀၀၀၀ ကျပ်ရှိရာမှ ယခုအပတ်တွင် တစ်အိတ်လျှင် ၁၃၀၀၀၀ ကျပ်၊ ဒေသပေါ်ဆန်းမှာ ယခင်အပတ်က တစ်အိတ်လျှင် ၁၁၃၀၀၀ ကျပ်ရှိရာမှ ယခုအပတ်တွင် တစ်အိတ်လျှင် ၁၂၀၀၀၀ ကျပ်၊ ဧည့်မထ(မိုးဆန်)မှာ ယခင်အပတ်က တစ်အိတ်လျှင် ၈၅၀၀၀ ကျပ်ရှိရာမှ ယခုအပတ်တွင် ၈၇၀၀၀ ကျပ်၊ ဧည့်မထ(နွေဆန်)မှာ ယခင်အပတ်က တစ်အိတ်လျှင် ၆၅၀၀၀ ကျပ်ရှိရာမှ ယခု အပတ်တွင် တစ်အိတ်လျှင် ၆၇၀၀၀ ကျပ်ဖြင့် ဈေးနှုန်း မြင့်တက်ပါသည်။     

      မိုးစပါးမှာ ယခင်အပတ်က တင်း ၁၀၀ လျှင် ၂၄၀၀၀၀၀ ကျပ်မှ ယခုအပတ်တွင် တင်း ၁၀၀ လျှင် ၂၄၅၀၀၀၀ ကျပ်ရှိပြီး နွေစပါးမှာ တင်း ၁၀၀ လျှင် ၂၀၀၀၀၀၀ ကျပ်ဖြင့် ဈေးနှုန်း တည်ငြိမ်နေပါသည်။ ဆန်ကွဲကြီးမှာ တစ်အိတ်လျှင် ၆၀၀၀၀ ကျပ်၊ ဆန်ကွဲသေးမှာ တစ်အိတ်လျှင် ၄၉၀၀၀ ကျပ်နှင့် ဖွဲနုမှာ တစ်အိတ်လျှင် ၃၁၀၀၀ ရှိပါသည်။

       မတ်ပဲ(၃၀ ပိဿာအိတ်) ယခင်အပတ်က တစ်အိတ်လျှင် ၁၁၄၅၀၀ ကျပ်ရှိရာမှ ယခုအပတ်တွင် ၁၁၈၀၀၀ ကျပ်ဖြင့် ဈေးအနည်းငယ်တက်ပြီး ပဲလွန်းဖြူမှာ ယခုအပတ်တွင် အရောင်းအဝယ် မဖြစ်ကြောင်း၊ ပဲတီစိမ်းမှာလည်း လက်ကျန်မရှိတော့၍ အရောင်းအဝယ်မရှိကြောင်း သိရပါသည်။

DOCA(ပဲခူး)

        တောင်ငူဒေသတွင် ယခင်အပတ်က မိုးရွာသွန်းမှုများသောကြောင့် ရေကြီးနစ်မြှုပ်မှုများ ဖြစ်ခဲ့၍ တပိုင်တနိုင်စိုက်ပျိုးကြသော သခွာသီးနှင့် ရုံးပတီသီးများပျက်စီးမှုများ ရှိခဲ့သဖြင့် ယခုအပတ်တွင် ဈေးနှုန်းမြင့်တက်လာပါသည်။

     ယခင်က သခွားသီးမှာ စိုက်ခင်းဈေး တစ်ပိဿာ ၂၅၀ ကျပ်မှ ၃၀၀ ကျပ်အထိရှိပြီး မြို့ပေါ် ရှိ ဈေးများတွင် တစ်ပိဿာလျှင် ၅၀၀ ကျပ်မှ ၆၀၀ ကျပ်အထိသာ ရှိခဲ့သော်လည်း ယခုသြဂုတ်လ နောက်ဆုံးပတ်တွင် စိုက်ခင်းဈေး တစ်ပိဿာ ၁၀၀၀ ကျပ်မှ ၁၁၀၀ ကျပ်အထိရှိသဖြင့် မြို့ပေါ်ဈေး များတွင် တစ်ပိဿာလျှင် ၁၅၀၀ ကျပ်မှ ၁၆၀၀ ကျပ်အထိ ရောင်းချပါသည်။

    ရုံးပတီသီးမှာ ယခင်က စိုက်ခင်းတွင် ၁၀ စည်းကတ် တစ်ကတ်လျှင် ၉၀ ကျပ်မှ ၁၁၀ ကျပ် အထိရှိပြီး မြို့ပေါ်ဈေးတွင် ၁၀ စည်း တစ်ကတ်လျှင် ၁၅၀ ကျပ်မှ ၂၀၀ ကျပ်အထိသာ ရှိသော် လည်း ယခုသြဂုတ်လ နောက်ဆုံးပတ်တွင် စိုက်ခင်းဈေး ၁၀ စည်း တစ်ကတ်လျှင် ၂၅၀ ကျပ်မှ ၃၀၀ ကျပ်အထိရှိပြီး မြို့ပေါ်ဈေးများတွင် ၁၀ စည်း တစ်ကတ်လျှင် ၄၅၀ ကျပ်မှ ၅၀၀ ကျပ်အထိ ရောင်းချ ကြောင်း သိရှိရပါသည်။

DOCA(ပဲခူး)

     မြန်မာလူမျိုးတို့သည် မြန်မာ့ရိုးရာ အစားအစာများကို အများဆုံးနှစ်သက်ကြပါသည်။ မနက်ခင်းတမျိုး၊ နေ့လယ်ခင်းတဖုံ၊ ညနေခင်းတမယ်ဖြင့် အဆာပြေစားလေ့ရှိရာ မြန်မာ့ရိုးရာ ခေါက်မုန့်ကိုလည်း ရေနွေးကြမ်း၊ လက်ဖက်ရည်၊ ကော်ဖီတို့ဖြင့် တွဲဖက်စားသုံးကြပါသည်။

     ခေါက်မုန့်ကို ကြက်ဥထည့်၍လည်းကောင်း၊ စားတော်ပဲ ထည့်၍လည်းကောင်း၊ အရွက် များထည့်၍လည်းကောင်း ကြိုက်နှစ်သက်သလို ပြုလုပ်သုံးဆောင်နိုင်ပါသည်။ ခေါက်မုန့်ပြုလုပ်ရန် အတွက် ဆန်၊ ထန်းလျက်၊ အုန်းသီး၊ စားတော်ပဲ၊ ဆား၊ မဆလာ၊ အချိုမှုန့်နှင့် ဆီအနည်းငယ် လိုအပ်ပါသည်။

     ခေါက်မုန့်ပြုလုပ်ရာတွင် ရှေးဦးစွာ ဆန်ကို မုန့်နှစ်ဖြစ်အောင်ကြိတ်ပြီး ရေအေးအနေ တော်ထည့်ကာ မီးဖိုပေါ်တင်ထားသည့် မုန့်ပြုလုပ်မည့်အိုးထဲသို့ ဖြန့်ထည့်ရပါသည်။ ခေါက်မုန့်အိုး ကို ကပ်မနေစေရန် ဆီအနည်းငယ် သုတ်ပေးရပါသည်။ ပြီးမှ မုန့်ပေါ်သို့ ထန်းလျက်၊ အုန်းသီး (သို့ မဟုတ်) စားတော်ပဲ (သို့မဟုတ်) ကြက်ဥ (သို့မဟုတ်) အရွက်များ ကြိုက်နှစ်သက်ရာကို ထည့်ရပါ သည်။ (၃)မိနစ်ကြာလျှင် ပူပူနွေးနွေးခေါက်မုန့်ကို ရရှိပါသည်။

    ခေါက်မုန့်တစ်နေ့ရောင်းရန်အတွက် ဆန် ၇ ဘူး၊ ထန်းလျက် ၅၀ ကျပ်သား၊ စားတော်ပဲ ၂၅ ကျပ်သာ၊ အုန်းသီး ၃ လုံး အသုံးပြုရကြောင်း သိရပါသည်။ ခေါက်မုန့် တစ်ခုလျှင် ရိုးရိုး ၃၀၀ ကျပ်၊ အသီးအရွက်ဖြင့် တစ်ခု ၅၀၀ ကျပ်၊ ကြက်ဥဖြင့် တစ်ခု ၇၀၀ ကျပ်ဖြင့် ရောင်းရကြောင်း၊ အရင်းအနှီးများများမလို လက်မဝင်ဘဲ လွယ်ကူစွာပြုလုပ်နိုင်သော မုန့်တစ်မျိုးဖြစ်ကြောင်း သိရှိရပါသည်။

DOCA(ပဲခူး)