ပြည်တွင်းကုန်သွယ်မှုသတင်း

    မိုးရာသီတွင် ပန်းဝင်ရောက်မှုနည်းလာ၍ ပန်းဈေးများအနည်းငယ်မြင့်တက်လာသော်လည်း တောင်ကြီး ဂန္ဓာမာပန်းများမှာ ဈေးကွက်အတွင်း ဝယ်သူကြိုက်၍ အရောင်းသွက်လျက်ရှိကြောင်း သိရသည်။

          မိုးရာသီတွင် မေမြို့ပန်းများဝင်ရောက်မှုမရှိကြောင်း၊တောင်ကြီးဂန္ဓာမာပန်းများသာ ဝင်ရောက်ကြောင်း၊ ယခင်က ဂန္ဓာပန်း ၁၀ ပွင့်လျှင် ၂၀၀၀ ကျပ်မှ ၂၅၀၀ ကျပ်ထိသာ ရှိသော်လည်း ယခုအခါ ဂန္ဓာမာပန်း ၁၀ ပွင့်ဈေးမှာ ၃၀၀၀ကျပ်မှ ၄၀၀၀ ကျပ်ထိရှိကြောင်းနှင့် ဂန္ဓာပန်းတွင် ဒေသစိုက်ပျိုးသည့် ဂန္ဓာမာပန်းနှင့် တောင်ကြီး၊ မေမြို့ စသည်တို့မှ ဝင်ရောက်သော ဂန္ဓာပန်း များရှိကြောင်း ၊ အရည်အသွေးနှင့်တာရှည်ခံမှုအပေါ် မူတည်၍ ဈေးနှုန်းအနေဖြင့် ဒေသဂန္ဓာမာ ပန်းများ မှာ ၁၀ပွင့်ကို ၂၀၀၀ မှ ၂၅၀၀ကျပ်ဖြစ်ပြီး တာရှည်ခံသောတောင်ကြီး/မေမြို့ဂန္ဓာမာပန်းများမှာ ၃၀၀၀ ကျပ် မှ ၅၀၀၀ ကျပ်ထိ ဈေးနှုန်းအသီးသီးရှိကြောင်း သိရသည်။

          ဘားအံမြို့တွင် ပန်းများဝင်ရောက်မှုနှင့်ပတ်သက်၍ ရေပေါ်ဈေးတွင် ဘုရားပန်းရောင်းချနေ သော မသူဇာက “ခုချိန်က မေမြို့ဂန္ဓာမာ မဝင်တော့ဘူး၊ တောင်ကြီးဂန္ဓာမာပဲ ဝင်တော့တယ်၊ တောင်ကြီး ဂန္ဓာမာပန်းကလည်း ၁၀ ရက်လောက်အထားခံတော့ ဘုရားပန်းအတွက် ဝယ်သူ ကြိုက်ကြပြီး အရောင်းပိုသွက်တယ်၊ သမီးတို့က ၁၀ ပွင့်မှာ ၅၀၀ လောက်အမြတ်ရတယ်၊ Express ကားတွေနဲ့ နေ့စဉ်ဝင်ပါတယ်၊ ကိုယ်တိုင်လည်း ရောင်းသလို ဖောက်သည်လည်း ပေးပါတယ်” ဟု ပြောကြားပါသည်။

          ရေပေါ်ဈေးတွင်ရောင်းချလျက်ရှိသော ဘုရားပန်းများ၏ ၁၀ပွင့် ဈေးနှုန်းများမှာ ဒေလီယာ ၃၀၀၀ ကျပ်မှ ၃၅၀၀ ကျပ်၊ တောင်ကြီးဂန္ဓာမာ ၄၀၀၀ ကျပ်မှ ၅၀၀၀ ကျပ်၊ နှင်းဆီ ၂၀၀၀ ကျပ်မှ ၂၅၀၀ ကျပ်၊ ပန်းထိမ်ငို ၂၀၀၀ ကျပ်မှ ၂၅၀၀ ကျပ်၊ ပွင့်ရိုက် ရောင်စုံ ၂၅၀၀ ကျပ်မှ ၃၀၀၀ ကျပ်၊ ဇော်စိမ်း ၁ စည်း ၁၀၀၀ ကျပ်၊ အာဆီယံသပြေ ၁၀၀၀ ကျပ်၊ သပြေ ၅၀၀ ကျပ်တို့ဖြင့် အရောင်းအဝယ် ဖြစ်လျက်ရှိကြောင်း သိရသည်။

DOCA(ကရင်)

  မြန်မာနိုင်ငံစက်သုံးဆီတင်သွင်း/သိုလှောင်ဖြန့်ဖြူးခြင်းလုပ်ငန်းကြီးကြပ်ရေးကော်မတီအနေဖြင့် တိုင်းဒေသကြီး/ ပြည်နယ်အလိုက် မြို့ကြီးများ၏ စက်သုံးဆီရည်ညွှန်းလက်ကားဈေးနှုန်းများကို နေ့စဉ် ထုတ်ပြန်ပေးလျက်ရှိပါသည်။

 ဘားအံမြို့၌ စက်သုံးဆီဆိုင် (၇)ဆိုင်ပုံမှန်ဖွင့်လှစ်ရောင်းချလျက်ရှိပြီး စက်တင်ဘာလ ပထမအပတ်တွင်ဖြစ်ပေါ်နေသော စက်သုံးဆီဈေးနှုန်းများမှာ ဓာတ်ဆီ(92) တစ်လီတာလျှင် (၂၃၂၀)ကျပ်၊ ဓာတ်ဆီ(95)တစ်လီတာလျှင် (၂၄၃၀) ကျပ်၊ ဒီဇယ်(ရိုးရိုး) တစ်လီတာလျှင် (၂၄၉၀)ကျပ်၊ ဒီဇယ်(ပရီမီယမ်)တစ်လီတာလျှင် (၂၅၇၀)ကျပ်ဖြင့် ရောင်းချလျက်ရှိကြောင်းသိရသည်။

 ဩဂုတ်လ (နောက်ဆုံးပတ်)တွင် ဖြစ်ပေါ်ခဲ့သော စက်သုံးဆီဈေးနှုန်းများမှာ ဓာတ်ဆီ(92) တစ်လီတာလျှင် (၂၃၀၀)ကျပ်၊ ဓာတ်ဆီ(95)တစ်လီတာလျှင် (၂၄၁၀)ကျပ်၊ ဒီဇယ်(ရိုးရိုး) တစ်လီတာလျှင်(၂၄၅၀)ကျပ်၊ ဒီဇယ် (ပရီမီယမ်)တစ်လီတာလျှင် (၂၅၃၀)ကျပ်ဖြစ်ပြီး ယခုအပတ်နှင့် နှိုင်းယှဉ်ပါက ဓာတ်ဆီ(92) တစ်လီတာလျှင် (၂၀)ကျပ်၊ ဓာတ်ဆီ(95) တစ်လီတာလျှင် (၂၀)ကျပ်၊ ဒီဇယ်(ရိုးရိုး) တစ်လီတာလျှင် (၅၀)ကျပ်၊ ဒီဇယ်(ပရီမီယမ်) တစ်လီတာ လျှင်(၄၀)ကျပ်ဖြင့် ဈေးနှုန်းအသီးသီးအနည်းငယ်မြင့်တက်လျက်ရှိကြောင်း ဘားအံမြို့ရှိ စက်သုံးဆီဆိုင်များမှ သတင်းရရှိပါသည်။

DOCA (ကရင်)

    မြင်းခြံခရိုင်၊ မြင်းခြံမြို့နယ်ရှိ စံပြဈေးအတွင်း၌ ၂၀၂၃ခုနှစ်၊ ဩဂုတ်လ (တတိယပတ်) တွင် မြို့နယ်စည်ပင်သာယာရေးအဖွဲ့၊ ခရိုင်စားသုံးသူရေးရာဦးစီးဌာနနှင့် မြင်းခြံကုန်စည်ဒိုင်တို့ပူးပေါင်း၍ စားသုံးသူပြည်သူများ အခြေခံစားသောက်ကုန်များအား ဈေးနှုန်းချိုးသာစွာဝယ်ယူနိုင်စေရန် ပြည်သူသက်သာဈေးအရောင်းဆိုင်ဖြင့် ရောင်းချပေးခဲ့ပါသည်။

    အဆိုပါအရောင်းဆိုင်တွင် ဆန်တစ်ပြည်လျှင် (၃၀၀၀)ကျပ်၊ ကြက်ဥတစ်လုံးလျှင် (၂၈၀)ကျပ်၊ ဆိတ်သား(အသားသန့်) တစ်ပိဿာလျှင် (၁၈၀၀၀)ကျပ်၊ အရိုးနှင့်အသားပါ တစ်ပိဿာလျှင် (၁၅၀၀၀)ကျပ်၊ ကလီစာတစ်ပိဿာလျှင် (၁၂၀၀၀)ကျပ်၊ အရိုးအကြမ်းတစ်ပိဿာလျှင် (၅၀၀၀)ကျပ်၊ ဝက်သား(သုံးထပ်သား)တစ်ပိဿာလျှင် (၁၇၀၀၀)ကျပ်၊ အရိုးနှင့်အသားတွဲလျက် တစ်ပိဿာလျှင် (၁၅၀၀၀)ကျပ်၊ ကလီစာတစ်ပိဿာလျှင် (၁၀၀၀၀)ကျပ်၊ အရိုးကြမ်းတစ်ပိဿာလျှင် (၄၀၀၀)ကျပ်၊ အမဲသား(အသားသန့်)တစ်ပိဿာလျှင် (၁၂၀၀၀)ကျပ်၊ အရိုးနှင့်အသားတွဲလျက် တစ်ပိဿာလျှင် (၁၀၀၀၀)ကျပ်၊ ကလီစာတစ်ပိဿာလျှင် (၈၀၀၀)ကျပ်၊ အရိုးတစ်ပိဿာလျှင် (၄၀၀၀)ကျပ်နှုန်းများဖြင့် ရောင်းချပေးခဲ့ပါသည်။ ဆီကုန်သည်နှင့်ဆီလုပ်ငန်းရှင်ကြီးများအသင်း(မြင်းခြံ)မှလည်း စားသုံးသူပြည်သူများ သက်သာသောဈေးနှုန်းဖြင့်ဝယ်ယူနိုင်စေရေးအတွက် စားအုန်းဆီတစ်ပိဿာလျှင် (၄၅၅၀)ကျပ်ဖြင့် ရောင်းချပေးခဲ့ကြောင်းသိရှိရပါသည်။

DOCA(မန္တလေး)

    ယခု၂၀၂၃နှစ်တွင် ကြောင်ပန်းစေ့များ ဈေးကောင်းရပြီး တစ်နိုင်တစ်ပိုင်စိုက်ပျိုးမှုများရှိလာကြောင်းသိရှိရပါသည်။ ယခင်နှစ်တွင် ကြောင်ပန်းစေ့အခြောက်တစ်ပိဿာလျှင် (၁၅၀၀၀)ကျပ်ခန့်သာဈေးရရှိခဲ့ပြီး ယခုနှစ်တွင် အခြောက်တစ်ပိဿာလျှင် (၄၀၀၀၀)ကျပ်ခန့်ထိရှိလာကြောင်းသိရှိရပါသည်။ မန္တလေးတိုင်းဒေသကြီး၊ ငါန်းဇွန်မြို့နယ်၊ သရက္ကန်အုပ်စု၊ အောင်ချမ်းသာကျေးရွာရှိ တောင်သူတစ်ဦးမှာ အလေ့ကျကြောင်ပန်းပင်များကို လွန်ခဲ့သည့်(၈)နှစ်ဝန်းကျင်လောက်မှစ၍ ချောင်းကမ်းပါးဘေးရှိ သူမ၏ယာမြေများကို ချောင်းရေတိုက်စားမှုနည်းပါးအောင် ရေတားအဖြစ် စိုက်ပျိုးခဲ့ပြီး ယခုကဲ့သို့ ဈေးကွက်ဝင်လာမည်ကိုလည်းမသိရှိဘဲ သာမန်သာစိုက်ပျိုးခဲ့ခြင်းဖြစ်ကြောင်း၊ ချောင်းရိုးတစ်လျှောက် မိမိ၏ယာမြေပေါ်တွင် စိုက်ပျိုးထားရှိမှုမှာ ဧကဝက်ခန့်ရှိပြီး ယခင်နှစ်များတွင် အခင်းပြတ်လာရောက်ဝယ်ယူသူများရှိသော်လည်း (၅၀၀၀၀)ကျပ်မှ (၁၀၀၀၀၀)ကျပ်ခန့်သာရရှိခဲ့ပါကြောင်း၊ ယခုနှစ်မှ မိမိကိုယ်တိုင်ခူးဆွတ်၍ရောင်းချကြောင်း သိရှိရပါသည်။ ယခုနှစ်တွင် အခြောက်တစ်ပိဿာလျှင် (၃၅၀၀၀)ကျပ်ခန့်ဖြင့် ဈေးစတင်၍ရရှိခဲ့ပြီး ဇွန်လနှင့် ဇူလိုင်လများအတွင်း တစ်ပိဿာလျှင် (၄၀၀၀၀)ကျပ်ခန့်ထိရှိလာကြောင်း၊ မိမိ၏စိုက်ပင်များကို (၁၀)ရက် လျှင်တစ်ကြိမ်နှုန်းဖြင့် ခူးဆွတ်ရပြီး၊ တစ်ကြိမ်ခူးဆွတ်လျှင် အခြောက် (၂၀၊၂၅) ပိဿာခန့်ရရှိကြောင်း၊ ဇွန်လနှင့် ဇူလိုင်လများတွင် အထွက်နှုန်းပိုကြောင်းသိရှိရပါသည်။ မိမိ၏ဧကဝက်ခန့်ရှိ စိုက်ခင်းကို လူငှား (၄၊ ၅)ယောက်ဖြင့် ခူးဆွတ်ရကြောင်း၊ ခူးဆွတ်ပြီး ကြောင်ပန်းသီးများကို နေပူတွင်(၂)နေခန့်လှန်းရပြီး ပြန်လည်သန့်စင်ရကြောင်း၊ အစေ့အပြင် ခူးဆွတ်ရာတွင်ရောနှောပါဝင်ခဲ့သောအရွက်များမှာလည်း (အခြောက်)တစ်ပိဿာလျှင် ၁၀၀၀ကျပ်ဖြင့် ရောင်းချရကြောင်း၊ ရောင်းချမှုဈေးကွက်အနေဖြင့် မန္တလေးမြို့သို့ တင်ပို့ရောင်းချကြကြောင်းနှင့် ကြောင်းပန်းပင်စိုက်ပျိုးသူများ၊ အခင်းပြတ်ဝယ်ယူသူများအနေဖြင့် ကိုယ်တိုင်သွားရောက်ရောင်းချကြသည့်အပြင် ကားပေါ် တင်ပေး၍လည်း တင်ပို့ရောင်းချကြကြောင်း၊ ရွာဘက်ဒေသဈေးနှင့် မန္တလေးဈေးမှာ တစ်ပိဿာလျှင် (၂၀၀၀)ကျပ်ခန့်ကွာဟမှုရှိပြီး ကားတင်ခဈေးအနေဖြင့် တစ်တင်းခွဲဝင်တစ်အိတ်လျှင် (၁၅၀၀၊ ၂၀၀၀)ကျပ်ခန့်ရှိကြောင်းသိရှိရပါသည်။ ယခုအခါ မိမိတို့ကျေးရွာနှင့် အနီးဝန်းကျင်ရှိ ကျေးရွာများတွင် ရေနှင့်နီးသည့်နေရာများနှင့် မိမိတို့၏အိမ်ခြံဝိုင်းများ၌ တစ်နိုင်တစ်ပိုင်စိုက်ပျိုးမှုများရှိလာကြောင်း၊ အပင်ကို ကိုင်းဖြတ်၍အပင်ပျိုးပြီး ရောင်းချမှုများလည်းရှိလာသောကြောင့် မိမိစိုက်ခင်းကိုလည်း လူစောင့်ငှားရမ်းထားရကြောင်း၊ ပျိုးပင်ဈေးများအနေဖြင့် (၁)ပေအရှည်ရှိ ပျိုးပင်ကိုင်းတစ်ခုလျှင် (၁၀၀၀၊၁၅၀၀)ကျပ်ခန့်ဖြင့် ရွာဘက်တွင် အရောင်းအဝယ်ဖြစ်လျက်ရှိကြောင်းသိရှိရပါသည်။ ကြောင်ပန်စေ့ကို တရုတ်နိုင်ငံသို့  တင်ပို့ရောင်းချပြီး ဆေးဝါးနှင့်အလှကုန်ပစ္စည်းများ ထုတ်လုပ်ကြောင်းနှင့် ဒေသအသီးသီး၌လည်း ဆေးဘက်ဝင်သည့်အတွက် အမျိုးမျိုးအသုံးပြုလျက်ရှိကြောင်းသိရှိရပါသည်။ ယခုဩဂုတ်လအတွင်းတွင် ကြောင်ပန်းစေ့အခြောက်တစ်ပိဿာလျှင် (၄၂၀၀၀)ကျပ်ခန့်ထိဈေးရှိလာပြီး ဈေးကွက်ဝင်သီးနှံဖြစ်သည့်အတွက် တစ်နိုင်တစ်ပိုင်မှ စီးပွားဖြစ်စိုက်ပျိုးသင့်ပါကြောင်း ရေးသားတင်ပြလိုက်ရပါသည်။

DOCA(မန္တလေး)

   မုံရွာမြို့နယ်အတွင်း ခရမ်းချဉ်သီးကို မိုးဦးနှင့် မိုးနှောင်းကာလများတွင် ဒေသအတွင်း တစ်နိုင်တစ်ပိုင်စိုက်ပျိုးကြပါသည်။ ခရမ်းချဉ်သီးသည် အပူပိုင်းဒေသနှင့် သမနွေပိုင်းဒေသတို့တွင် ကောင်းမွန်စွာစိုက်ပျိုးဖြစ်ထွန်းသည်။

  ယခုအချိန်တွင် ဒေသတွင်းထွက်ကုန်မရှိသောကြောင့် ဒေသတွင်းခရမ်းချဉ်သီးများဝင်ရောက်မှုနည်းပါးပြီး ဈေးကွက်တွင် ရှမ်းပြည်နယ်၊ အင်းလေး၊ အောင်ပန်းတို့ဘက်မှ ခရမ်းချဉ်သီးများကို ဝယ်ယူရောင်းချလျက်ရှိကြောင်းသိရသည်။ မုံရွာမြို့နယ်အတွင်း ဖြစ်ပေါ်နေသောခရမ်းချဉ်သီးဈေးနှုန်းများမှာ ဩဂုတ်လ ပထမအပတ်တွင် ခရမ်းချဉ်သီးတစ်ပိဿာလျှင် ကျပ် ၂၄၀၀-၂၆၀၀ မှ ယခုစက်တင်ဘာ ပထမအပတ်တွင် ကျပ် ၂၈၀၀-၃၀၀၀ အထိ ဈေးနှုန်းမြှင့်တက်လျက်ရှိကြောင်းနှင့် ဈေနှုန်းမြှင့်တက်ရခြင်းမှာ ဒေသတွင်းထွက်ကုန်မရှိခြင်း၊ ဈေးကွက်အတွင်းသို့ အခြားဒေသများမှ ခရမ်းချဉ်သီးများဝယ်ယူရောင်းချရာတွင် စက်သုံးဆီဈေးနှုန်းများကြီးမြင့်မှုကြောင့် သယ်ယူစရိတ်မြှင့်မားခြင်းကြောင့်ဖြစ်ကြောင်း ခရမ်းချဉ်သီးပွဲရုံများထံမှသိရပါသည်။

DOCA(စစ်ကိုင်း)