ပြည်တွင်းကုန်သွယ်မှုသတင်း

   ပဲခူးတိုင်းဒေသကြီး၊ သာယာဝတီခရိုင်၊ ကြို့ပင်ကောက်မြို့၊ ထွေအုပ်ရုံး၌ (၂၈-၈-၂၀၂၃) ရက်နေ့တွင် မြန်မာနိုင်ငံဆန်စက်လုပ်ငန်းရှင်များအသင်း၏ ဦးဆောင်မှုဖြင့် မြို့နယ်ဆန်စက်လုပ်ငန်းရှင်များအသင်းက ဆန်အိတ် (၅၀၀)ကို မိုးစပါးအသစ်မပေါ်မီအချိန်ကာလအထိ ဧည့်မထဆန်တစ်ပြည်လျှင် (၂၅၀၀) ကျပ်နှုန်းဖြင့် နေ့စဉ် ဆန်စက်လုပ်ငန်းရှင်များ၏ ဆန်အရောင်းဆိုင်များဖြစ်သော နွယ်ခွေရပ်ကွက်၊  နွယ်ခွေလမ်း၊ ဟံသာစိုးဆန်ဆိုင်တွင်လည်းကောင်း၊ ရွာမမြောက်ရပ်ကွက်၊ မြောက်ရွာမလမ်းရှိ ညိမ်းသုခဆန်စက်များတွင်လည်းကောင်း နှစ်နေရာခွဲ၍ အခြေခံစားသုံးသူမည်သူမဆို ရောင်းချပေးမည်ဖြစ်ကြောင်းကို မြို့နေသူ၊ တောနေသူများပါ သိရှိနိုင်ရန်အတွက် ကြိုတင်၍ မြို့နယ်စီမံအုပ်ချုပ်ရေးအဖွဲ့အနေဖြင့် လိုက်လံကြော်ငြာပေးရန်ဖြစ်ကြောင်း၊ အဆိုပါဆောင်ရွက်မှုတွင် မြို့နယ်အုပ်ချုပ်ရေးမှူး၊ စားသုံးသူရေးရာဌာနမှ ဦးစီးမှူးနှင့် ဆန်စက်လုပ်ငန်းရှင်များတက်ရောက်ခဲ့ကြကြောင်းသိရှိရပါသည်။

DOCA(ပဲခူး)

    စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ ဝန်ကြီးရုံး၏ ရည်ညွှန်းပါစာလမ်းညွှန်ချက်အရ ဆန်စပါးဆိုင်ရာ အပတ်စဉ်လေ့လာသုံးသပ်ချက်(အကျဉ်းချုပ်) ၃၂/၂၀၂၃ အား သိရှိလမ်းညွှန်မှုပြုနိုင်ပါရန် တင်ပြအပ်ပါသည်။

    ၁၂.၉.၂၀၂၃ ရက်နေ့တွင်  တိုင်းဒေသကြီး/ပြည်နယ်များရှိ ကုန်စည်ဒိုင်များတွင် ဖြစ်ပေါ်နေသော မတ်ပဲ၊ ပဲတီစိမ်း နှင့် ပဲစဉ်းငုံ တစ်တန် ဈေးနှုန်းများအား ယခင်နှစ်၊ ယခင်လ၊ ယခင်အပတ်၊ ယခင်နေ့၊ ကာလတူ ဈေးနှုန်းစာရင်းအား နှိုင်းယှဉ်ပြုစု တင်ပြအပ်ပါသည်။

     မွန်ပြည်နယ်၊ စားသုံးသူရေးရာဦးစီးဌာနမှ ဝန်ထမ်းများသည် မြို့နယ်အထွေထွေအုပ်ချုပ်ရေးဦးစီးဌာန၊ မြို့နယ်စည်ပင်သာယာရေးဦးစီးဌာနတို့နှင့်ပူးပေါင်း၍ (၇-၉-၂၀၂၃) ရက်နေ့တွင် မုဒုံမြို့နယ်၌ စိုက်ပျိုး၊ မွေးမြူ၊ ထုတ်လုပ်၊ ဖြန့်ဖြူးသူများက စားသောက်ကုန်ပစ္စည်းများကို မုဒုံမြို့နယ်၊ မြို့မဈေးအနောက်တွင် ဒေသခံပြည်သူများအား ဈေးနှုန်းသက်သာစွာရောင်းချပေးခဲ့ကြောင်းသိရှိရပါသည်။

    ထိုသို့ရောင်းချပေးရာတွင် မုဒုံမြို့နယ်ဆန်စက်လုပ်ငန်းရှင်များအသင်းနှင့် ဆန်စပါးကုန်သည်များအသင်းတို့ပူးပေါင်း၍ ဧည့်မထဆန်တစ်ပြည်လျှင် (၂၅၀၀) ကျပ်၊ မွန်ပြည်နယ်ဆီကုန်သည်နှင့်ဆီလုပ်ငန်းရှင်များအသင်းက စားသုံးဆီတစ်ပိဿာလျှင် (၄၈၀၀) ကျပ်၊ ဝက်သားတစ်ပိဿာလျှင် (၁၃၅၀၀) ကျပ်၊ အမဲသားတစ်ပိဿာလျှင် (၁၃၀၀၀) ကျပ်၊ ကြက်သားတစ်ပိဿာလျှင် (၁၀၀၀၀) ကျပ်၊ ဆိတ်သားတစ်ပိဿာလျှင် (၂၁၀၀၀) ကျပ်၊ ကြက်ဥတစ်လုံးလျှင် (၂၅၀) ကျပ်၊ ငါးတန်တစ်ပိဿာလျှင် (၄၅၀၀) ကျပ်၊ ငါးမြစ်ချင်းတစ်ပိဿာလျှင် (၇၄၀၀) ကျပ်၊ ပလာတူးနှင့်ငါးဖမ်းမတစ်ပိဿာလျှင် (၄၀၀၀) ကျပ်နှင့် ဟင်းသီးဟင်းရွက်အမျိုးမျိုးတို့ကိုရောင်းချပေးခဲ့ကြောင်း သတင်းရရှိပါသည်။

     မုဒုံမြို့နယ်အတွင်းရှိ ဒေသခံပြည်သူများအနေဖြင့် သန့်ရှင်းလတ်ဆတ်ပြီး ကျန်းမာရေးနှင့်ညီညွတ်သော စားသောက်ကုန်ပစ္စည်းများကို ပြင်ပဈေးနှုန်းထက် သက်သာစွာဝယ်ယူနိုင်ရန် ရောင်းချပေးခြင်းဖြစ်ကြောင်းသိရှိရပါသည်။

DOCA(မွန်)

    တောင်ငူမြို့နယ်၊ ဒိုးသောင်ကျေးရွာအုပ်စုရှိ ကျေးရွာများတွင် ရုံးပတီသီးများကို တွင်ကျယ်စွာ စိုက်ပျိုးကြပါသည်။ ရုံးပတီသီးများ စိုက်ပျိုးရာတွင် စိုက်ပျိုးမည့်မြေနေရာကို ပထမဦးဆုံး ထွန်ယက်ရပါသည်။ ပြီးလျှင် နည်းလမ်းနှစ်သွယ်ဖြင့် စိုက်ပျိုးနိုင်ပါသည်။

     ထွန်ယက်ပြီးသားမြေကို ပေါက်တူးဖြင့် တစ်ကျင်းစီပေါက်ဆွ၍ဖြစ်စေ ၊ ထယ်သွားဖြင့် မြောင်းဖော်၍ဖြစ်စေ ရုံးပတီသီးမျိုးစေ့အား တစ်ကျင်းလျှင် ၄ စေ့၊ ၅ စေ့နှုန်းဖြင့် စိုက်ပျိုးနိုင်ပါသည်။ တစ်ကျင်းနှင့်တစ်ကျင်းကြား တစ်ပေခန့်ခွာ၍ စိုက်ပျိုးကြပါသည်။ တစ်တန်းနှင့် တစ်တန်းကြား အကွာအဝေးမှာ နှစ်ပေခန့်ထားရှိပါသည်။

      ရုံးပတီကို ရာသီမရွေး စိုက်ပျိုးနိုင်ပါသည်။ စတင်စိုက်ပျိုးသည့်အချိန်မှ ၁၅ ရက်ပြည့်လျှင် အပင်အား မြေဩဇာကျွေးပြီး ဘောင်ဆွဲရပါသည်။ မိမိနှစ်သက်ရာ အပင်အားဆေးကို တစ်ပတ်လျှင် တစ်ကြိမ် ကျွေးနိုင်ပါသည်။

   စတင်စိုက်ပျိုးချိန်မှ ရက် ၆၀ ပြည့်လျှင် ဆွတ်ခူးနိုင်ပါသည်။ နှစ်ရက်ခြားတစ်ကြိမ် ဆွတ်ခူးနိုင်ပါသည်။ ရုံးပတီသီး ၁၀ တောင့်ပါ တစ်စည်းလျှင် ၃၀၀ ကျပ်ဖြင့် တောင်ငူမြို့ ညောင်ပင်ဈေးသို့ လက်ကားရောင်းချလျက်ရှိပါသည်။ လက်လီမှာ တစ်စည်းလျှင် ၄၀၀ ကျပ်ရောင်းရကြောင်း သိရှိရပါသည်။

DOCA(ပဲခူး)