ပြည်တွင်းကုန်သွယ်မှုသတင်း

     မြန်မာနိုင်ငံအလယ်ပိုင်း၊ စစ်ကိုင်းမြို့နှင့် မန္တလေးမြို့အနီးဗဟိုပြု၍ လှုပ်ခတ်ခဲ့သော အင်အားပြင်းငလျင်ကြောင့် တစ်ချို့မြို့ရွာများပျက်စီခြင်း၊ လမ်းပန်းသွယ်ရေးအခက်အခဲများရှိသော် လည်း အောင်ပန်းဈေးကွက်ရှိ အာလူးသိးနှံများ ရောင်းဝယ်မှုနည်းပါသွားခြင်းမရှိဘဲ ပုံမှန်အတိုင်း အရောင်းအဝယ်ဖြစ်လျက်ရှိကြောင်း လေ့လာသိရှိရပါသည်။ ရှမ်းတောင်ဒေသထွက်အာလူးသီးနှံများကို ရန်ကုန်၊ မုံရွာ၊ပဲခူး၊ မော်လမြိုင်နှင့် ဘာအံမြို့တို့မှ အဓိက တင်ပို့ရောင်းချလျက်ရှိပါသည်။ ဧပြီလ ပထမပတ် အားလူးဈေးနှုန်းများအနေဖြင့်   S1-၅၅၀၀ကျပ်၊ S1-OK-၄၅၀၀ကျပ်၊ Ok-၄၀၀၀ကျပ်၊ A1-၃၅၀၀ကျပ်နှင့် ဆွဲသီး-၃၃၀၀ကျပ်ဖြင့် အရောင်းအဝယ်ဖြစ်လျက်ရှိကြောင်း လေ့လာသိရှိရပါသည်။

DOCA(ရှမ်း) 

     မကွေးတိုင်းဒေသကြီး၊ ပခုက္ကူခရိုင်တွင် ဆီထွက်သီးနှံမျိုးစုံ အဓိကထား စိုက်ပျိုးလျက်ရှိပြီး ပခုက္ကူမြို့ ပဲမျိုးစုံနှင့် ဆီထွက်သီးနှံမျိုးစုံရောင်းဝယ်ရေး ဈေးကွက်သို့ ဆီထွက်သီးနှံ မြေပဲများ နေ့စဉ် အရောင်းအဝယ်ဖြစ်လျက်ရှိရာ စိုက်ပျိုးမှုများသော ပခုက္ကူ၊ မြိုင်၊ ပေါက်၊ ရေစကြို၊ ဆိပ်ဖြူ၊ ယောနယ်ဒေသများနှင့် စစ်ကိုင်းတိုင်း၊ မန္တလေးတိုင်းဒေသကြီးအတွင်းရှိ ကျေးရွာများမှထွက်ရှိသော မြေပဲအသစ်များ ဝင်ရောက်ကြောင်း၊ ဈေးကွက်သို့ဝင်ရောက်လာသည့် မြေပဲဆံနှင့်မြေပဲအတောင့် များ ဝယ်လိုအား ကောင်းပြီး အရောင်းအဝယ်သွက်နေကြောင်း၊ ဈေးကွက်သို့ ဝင်ရောက်လာသော မြေပဲ အတောင့်နှင့် အဆံများကို မြို့ပေါ်ရှိ လှောင်လက်သမားများ၊ ဆီစက်လုပ်ငန်းရှင်များ အဝယ်လိုက်ခြင်းအပြင် ပြည်ပတရုတ်နိုင်ငံမှလည်း အဝယ်လိုက်ပြီး မြေပဲတောင့်/အဆံ အရည် အသွေးနှင့် ဝယ်လိုအားပေါ် မူတည်၍ ဈေး အနိမ့်၊ အမြင့်ရှိကြောင်း သိရှိရသည်။ ပြည်တွင်း စားသုံးဆီဈေးကွက်တွင် ကျန်းမာရေးနှင့်ညီညွှတ်သည့် မြေပဲဆီသန့် သုံးစွဲမှုမြင့်မားလျက်ရှိ၍ ဒေသတွင်း ဆုံ/ ဆီစက်များ တွင်ကျယ်စွာ ထုတ်လုပ်လျက်ရှိ၍ မြေပဲဆံဝယ်လိုအား ကောင်းပြီး ဈေးကွက် သိသိသာသာ ကျဆင်းခြင်းမရှိ အရောင်းအဝယ်သွက်လျက်ရှိပြီး ပဲဖတ်ဈေးမှာလည်း ပြည်တွင်းမွေးမြူရေးအစားအစာ ဈေးကွက်တွင် ပဲဖတ်ဝယ်လိုအားကောင်းခြင်းအပြင် စားသုံးမှု အနေဖြင့် ပခုက္ကူမြို့တွင် မြေပဲဆီ ထုတ်လုပ်မှုမှ ရရှိသောမြေပဲဖတ်ကို ကုန်ကြမ်းမှတစ်ဆင့် တန်ဖိုးမြင့်ထုတ်ကုန် နှမ်းဖတ်ချဉ်အဖြစ် ထုတ်လုပ်ရောင်းချရမှာလည်း စားသုံးသူဈေးကွက် ကောင်းမွန်ခြင်းကြောင့် ပဲဖတ်အဝယ်လိုက်ပြီး အရောင်းအဝယ်သွက်ခြင်းအပြင် ပြည်တွင်းဆီစက် လုပ်ငန်းရှင်များမှလည်း မြေပဲဆုံပဲဖတ်များကို ပြန်လည်ကြိတ်ပြီး ဆီထုတ်လုပ်ခြင်းအတွက် ပြန်လည်ဝယ်ယူမှုများ၍ ပဲဖတ်ဈေးကွက်မှာလည်း အရောင်းအဝယ်သွက်ပြီး ဈေးတန်းအမြင့်ဖြင့် အရောင်းအဝယ်ဖြစ်လျက်ရှိကြောင်း သိရှိရသည်။

          ပခုက္ကူပွဲရုံဈေးကွက်တွင် ဖြစ်ပေါ်နေသော မြေပဲဈေးနှုန်းများမှာ ၂၀၂၅ခုနှစ်၊ မတ်လ (စတုတ္ထပတ်)တွင် မြေပဲအတောင့် (အခြောက်) တစ်ပိဿာလျှင် ကျပ်(၅၀၀၀ - ၄၅၀၀ - ၃၀၀၀)၊ မြေပဲလုံးဆံနီ တစ်ပိဿာလျှင် ကျပ်(၉၂၀၀-၉၁၅၀-၉၀၀၀)၊ မြေပဲလုံးဆံဖြူ တစ်ပိဿာလျှင် ကျပ်(၉၁၅၀-၉၀၀၀)၊ ဆီဆံတစ်ပိဿာလျှင် ကျပ်(၈၆၀၀-၇၀၀၀)၊ ဆုံမြေပဲဖတ်တစ်ပိဿာလျှင် ကျပ်(၅၂၀၀-၅၁၀၀-၅၀၀၀)၊ စက်ပဲဖတ်တစ်ပိဿာလျှင်ကျပ်(၅၅၀၀-၅၄၀၀)ဈေးဖြင့် အရောင်း အဝယ်ဖြစ်ပြီး ယခင်မတ်(ပထမပတ်)နှင့် ဈေးနှုန်းနှိုင်းယှဉ်ပါက မြေပဲဆံဈေးငြိမ်၍ ပဲဖတ်ဈေး အနည်းငယ်ကျဆင်းကြောင်း၊ ပခုက္ကူမြေပဲဈေးကွက်သို့ ဆောင်း မြေပဲ(အသစ်)များ ပခုက္ကူ၊ မြိုင် မြို့နယ်အတွင်းရှိ ကျေးရွာများနှင့် ယောနယ်(ထီးလင်း၊ ဂန့်ဂေါ)ဒေသများမှ ဝင်ရောက်လျက်ရှိပြီး ကုန်ဝင်သလောက် အရောင်းအဝယ်ဖြစ်ကြောင်း၊ မြို့ပေါ်ရှိ ဆီစက်လုပ်ငန်းရှင်များမှ ဝယ်ယူမှု များခြင်းအပြင် မန္တလေး ဈေးကွက်သို့ တင်ပို့လျက်ရှိပြီး ထိုမှတစ်ဆင့် ပြည်ပနိုင်ငံများသို့ တင်ပို့လျက်ရှိ၍ မြေပဲဈေးနှုန်း သိသိသာသာကျဆင်းခြင်းမရှိ အရောင်းအဝယ်ဖြစ် လျက်ရှိကြောင်း ပွဲရုံဈေးကွက်မှ သိရှိရသည်။

DOCA(မကွေး)

     မကွေးတိုင်းဒေသကြီး၊ ပခုက္ကူခရိုင်၊ ဆိပ်ဖြူမြို့နယ်အတွင်းရှိ ဒေသခံပြည်သူများသည် ကြက်သွန်နီသီးနှံကို ဒေသစီးပွားဖြစ် နှစ်စဉ်မပြတ်စိုက်ဧက အများဆုံး စိုက်ပျိုးလျက်ရှိသည်။ ဆိပ်ဖြူမြို့ ကြက်သွန်နီဈေးကွက်သို့ ဒေသတွင်း ကြက်သွန်နီစိုက်ပျိုးထွက်ရှိသော ကျေးရွာများ အပြင် အခြားမြို့နယ်များဖြစ်‌သော ပွင့်ဖြူ၊ စလင်း၊ ချောက်၊ ပခုက္ကူ ဒေသထွက် ကြက်သွန်နီ များလည်း ဝင်ရောက် အရောင်းအဝယ်ဖြစ်လျက်ရှိသည်။ ကြက်သွန်နီဈေးကွက်သို့ ဖေဖော်ဝါရီ လဆန်းပိုင်းမှစ၍ နွေပင်စိုက်များလည်း ဝင်ရောက်အရောင်းအဝယ် ဖြစ်လျက်ရှိသည်။ မတ်လ အတွင်း တစ်ရက်လျှင် ကုန်ချိန်ပိဿာ(၅)သောင်းမှ(၇)သောင်း၊ တစ်လအတွင်း ကုန်ချိန်ပိဿာ (၁၂)သိန်းခန့် ဝင်ရောက်ခဲ့ကြောင်း ဈေးကွက်မှ သိရှိရသည်။

      ဈေးနှုန်းအနေဖြင့် ၂၀၂၅ခုနှစ်၊ မတ်လ(ပထမပတ်)တွင် ကြက်သွန်နီ တစ်ပိဿာလျှင် ကျပ်(၁၉၀၀-၁၇၀၀-၁၅၀၀)၊ မတ်လ(ဒုတိယ)ပတ်တွင် ကျပ်(၁၇၀၀-၁၆၅၀-၁၃၀၀)၊ မတ်လ (တတိယပတ်)တွင် ကျပ်(၁၆၅၀-၁၄၀၀-၁၂၀၀)၊ မတ်လ(စတုတ္ထပတ်)တွင် ကျပ်(၁၄၅၀-၁၃၀၀-၁၂၀၀)ဈေးဖြင့် အရောင်းအဝယ်ဖြစ်ခဲ့ပြီး ယခင်ဖေဖော်ဝါရီလနှင့် ဈေးနှုန်းနှိုင်းယှဉ်ပါက တစ်လ အတွင်း ကြက်သွန်နီတစ်ပိဿာလျှင် ကျပ်(၁၀၀၀)ခန့် ဈေးကျပြီး အရောင်းအဝယ်ဖြစ်ကြောင်း၊ ဈေးကွက်သို့ကုန်ချိန် ဝင်ရောက်မှုများခြင်းနှင့် ပြည်ပနိုင်ငံများမှ ဝယ်ယူမှုနည်း၍ ဈေးနှုန်း ကျဆင်းကြောင်း သိရှိရသည်။

       ကုန်စည်စီးဆင်းမှုအနေဖြင့် မတ်လအတွင်း ကုန်ချိန်ပိဿာ (၁၂)သိန်းခန့် တန်ချိန်အားဖြင့် (၁၉၅၉)တန်ခန့် စီးဆင်းခဲ့ကြောင်း၊ ရန်ကုန်ဘုရင့်နောင်ပွဲရုံသို့ ကုန်ချိန်အများဆုံး တင်ပို့ပြီး မြဝတီ၊ မော်လမြိုင်မြို့ ဝယ်လက်များမှတစ်ဆင့် ပြည်ပနိုင်ငံသို့ တင်ပို့လျက်ရှိကြောင်း ဈေးကွက်မှ သိရှိရသည်။

DOCA(မကွေး)

   ခရမ်းချဥ်သီးကို အပူပိုင်းနှင့် သမနွေးပိုင်းဒေသတို့တွင် ကောင်းမွန်စွာစိုက်ပျိုးကြသည်။ မြန်မာနိုင်ငံအနေဖြင့် မန္တလေးတိုင်း၊ မကွေးတိုင်း၊ စစ်ကိုင်းတိုင်းနှင့် ရှမ်းပြည်နယ်တို့တွင်အများဆုံးစိုက်ပျိုး ကြပါသည်။ ထားဝယ်စျေးကွက်တွင် ခရမ်းချဥ်သီးစျေးနှုန်းများမှာ စျေးကောင်းရရှိကာ အရောင်းသွက် လျက်ရှိပါသည်။ ရှမ်းသီးနှင့်ကိုင်းသီးဟူ၍ (၂)မျိုးရှိရာ ယခုအချိန်တွင် ရှမ်းသီးများသာ စျေးကွက် အတွင်း၌ အရောင်းအဝယ်ဖြစ်လျက်ရှိပါသည်။ ထားဝယ်ခရိုင်အတွင်း မြို့နယ်များသို့ ရန်ကုန်မှကား များဖြင့် လာရောက်‌ရောင်းချကြပါသည်။ ထားဝယ်စျေးကြီးထဲတွင် ခရမ်းချဥ်သီး တစ်ပိဿာလျှင် (၄၅၀၀-၅၀၀၀)ကျပ်ဖြင့်ရောင်းချလျက်ရှိကြောင်း သိရှိရပါသည်။

DOCA(တနင်္သာရီ)

    ထားဝယ်မြို့နယ်ရှိ ဥယျာဥ်ခြံများတွင် ရာသီစာသီးနှံတစ်မျိုးဖြစ်သည့် ရေငန်းသီးများ အရောင်းအဝယ်သွက်လျက်ရှိကြောင်း သိရှိရပါသည်။ ရေငန်းသီးများကို ထားဝယ်မြို့နယ်ရှိ စည်ပင် သာယာစျေး နှင့် ညောင်ပင်ကြီးစျေး သီးနှံစျေးဆိုင်တန်းများ၌ စျေးကွက်တစ်ခုအနေဖြင့် ရောင်းချလျက်ရှိကြောင်း သိရှိရပါသည်။

          ယခုလက်ရှိ ဧပြီလအတွင်း ရေငန်းသီးအလုံးရေ (၃၀-၃၅)လုံးပါဝင်သည့် အခိုင်တစ်ခိုင် လျင် ငွေကျပ် (၆၀၀၀)ထိ စျေးနှုန်းရရှိပြီး အဆိုပါရေငန်းသီးများမှာ ခရီးသွားအများစုဝယ်ယူအား ပေးသည့် ဒေသထွက်ကုန်သီးနှံတစ်မျိုးဖြစ်ကြောင်း သိရှိရပါသည်။

DOCA(တနင်္သာရီ)