ပြည်တွင်းကုန်သွယ်မှုသတင်း

     ပဲခူးတိုင်းဒေသကြီး၊ နတ်တလင်းခရိုင်၊ နတ်တလင်းမြို့နယ်တွင် အိမ်ရှင်မများ ချက်ပြုတ်ရာ မီးဖိုချောင် အသုံးပြုသည့် လောင်စာများဖြစ်သည့် ထင်း၊ မီးသွေး ၊ လွှစာများကို  စိုစွတ် သည့်မိုးရာသီတွင်  အသုံးပြုလုပ်ရန် အတွက် ယခုလိုခြောက်သွေ့ရာသီတွင်   ဝယ်ယူ စုဆောင်း  ကြောင်းသိရပါသည်။

     ယခု မတ်လစတုတ္တပတ်တွင် နတ်တလင်းမြို့နယ် လောင်စာဈေးကွက်အတွင်း မကျည်းသား   မီးသွေး တစ်တင်းခွဲဝင် တစ်အိတ် (၁၆၀၀၀)ကျပ်၊ မကျည်သား နံပြား တစ်တင်းခွဲဝင် တစ်အိတ် (၈၀၀၀) ကျပ်၊ အင်သားထင်း ၇ချောင်းခန့်ပါ တစ်စီးလျှင် (၈၀၀)ကျပ်၊ လွှစာ တစ်တင်းခွဲဝင် တစ်အိတ် (၁၀၀၀) ကျပ်၊ မကျည်းသား ခွဲခြမ်း တစ်ချောင်း (၂၀၀)ကျပ် နှုန်း၊ ဂတ်စ် တစ်ပိဿာ (၁၀၀၀၀)ကျပ်ဖြင့် ရောင်းချလျက်ရှိကြောင်း သိရပါသည်။

DOCA(ပဲခူး)

    ကြက်သွန်ဖြူ တစ်ပိဿာလျှင် ယခင်နှစ်က (၁၈၀၀၀ - ၂၀၀၀၀) ကျပ်ဈေးဖြင့် အရောင်း အဝယ်ဖြစ်ခဲ့ပြီး ယခုနှစ်တွင် တစ်ပိဿာလျှင် (၁၅၀၀၀ -၁၆၀၀၀ -၁၈၀၀၀) ကျပ်ဈေးဖြင့် အရောင်းအဝယ် ဖြစ်လျက်ရှိပါသည်။ ပြည်ဈေးကွက်သို့ ရှမ်းပြည်နယ် တောင်ကြီး၊အောင်ပန်းမှ ပုံမှန်အဝင်ရှိနေပြီး ဒေသတွင်းအရောင်းအဝယ်မှာလည်း ပုံမှန်ဖြစ်သည့်အတွက် ဈေးငြိမ်နေလျက် ရှိပါသည်။

     အာလူးအနေဖြင့် အရွယ်အစားပေါ်မူတည်၍ ယခင်နှစ်က တစ်ပိဿာလျှင် (၂၅၀၀ -၂၆၀၀- ၂၇၀၀ -၂၈၀၀) ကျပ်ဈေးရှိပြီး ယခုနှစ်မှာတော့ တစ်ပိဿာလျှင် (၄၅၀၀-၅၀၀၀-၅၅၀၀) ကျပ်ဈေးရှိပြီး အဝင်ပါးကာ ဒေသတွင်း ဝယ်လိုအားကောင်းနေသည့်အတွက် ဈေးကောင်းလျက် ရှိပါသည်။

    ငရုတ်သီးခြောက်အနေဖြင့် ယခင်နှစ်က တစ်ပိဿာလျှင် (၁၆၀၀၀-၁၈၀၀၀) ကျပ်ဈေးရှိခဲ့ပြီး ယခုနှစ်တွင် ငရုတ်သီးခြောက်(အရှည်)တစ်ပိဿာလျှင် (၁၃၀၀၀-၁၅၀၀၀-၁၆၀၀၀ ကျပ်၊ (အပု) တစ်ပိဿာလျှင် ၁၈၅၀၀-၁၉၀၀၀-၂၀၀၀၀ ကျပ်ဈေးရှိပါသည်။ တောင်သူများအနေဖြင့် စိုက်ပျိုးစရိတ်များကြီးမြင့်လာသည့်အတွက် စိုက်ပျိုးသူ တောင်သူများလျော့နည်းလာပြီး အထွက်နှုန်း လည်းနည်းလာသောကြောင့် ဈေးကောင်းအနည်းငယ်ရနေကြောင်း သိရှိရပါသည်။

DOCA(ပဲခူး)

    ရွှေတောင်မြို့နယ်၊ ဆည်ကြီးကုန်းအုပ်စု၊ နေကျော်တန်းရှိ တောင်သူ ဦးကုလား၏ ပြောင်းဖူးစိုက်ခင်းသို့ (၃.၄.၂၀၂၅)ရက်နေ့၊ နံနက်(၁၀:၀၀)နာရီတွင် သွားရောက်ကွင်းဆင်း လေ့လာခဲ့ပါသည်။ စိုက်ပျိုးသော ပြောင်းဖူးမျိုးမှာ (၇၀၂)တံဆိပ် ၁ထုပ်ကို (၄၈၀၀၀)ကျပ် ပေး၍ဝယ်ယူ စိုက်ပျိုးရပါသည်။ ပြောင်းဖူးပင်စိုက်ပျိုးပြီး (၂)လအကြာတွင် ပြောင်းဖူးများ ခုတ်ယူရောင်းချ၍ရပါသည်။ ပြောင်းခင်းတစ်ခင်း၏ ကုန်ကျစရိတ်မှာ (၅၀၀၀၀၀)ကျပ်ကုန်ကျပြီး၊ ပြောင်းဖူးများထွက်ပေါ်ချိန်တွင်  အခင်းသို့လာရောက်ပြီး အကြီး/အသေး (၁)ဖူးကို (၅၀၀)ကျပ်ဖြင့် လာရောက်သိမ်းယူပါသည်။ ပြောင်းဖူး ထွက်ပေါ်ချိန်မှ တုန်းချိန်အထိ အဖူးရေ ၁၈၀၀ခန့် ခူးဆွက်ရောင်းချရပြီး ဝင်ငွေအနေဖြင့် (၉)သိန်းကျပ်ရရှိပြီး၊ တောင်သူအကျိုးအမြတ်အနေဖြင့် (၄)သိန်းကျပ်ခန့် ရရှိသည်ဟု သိရပါသည်။ ဈေးများတွင်ရောင်းချသော လက်လီဈေးမှာ (၁)ဖူးကို (၇၀၀)ကျပ်ဖြင့် ရောင်းရပြီး တစ်ဖူးလျှင် သယ်ယူခနှင့်အထွေထွေကုန်ကျစရိတ်နှုတ်လိုက်လျှင် တစ်ဖူးလျှင် လက်လီရောင်းချသူ၏ အကျိုးအမြတ်မှာ (၁၀၀-၁၅၀)ခန့် ရရှိနိုင်သည်ဟု ခန့်မှန်း သိရှိရပါသည်။ ဈေးကွက်အနေဖြင့် ပြောင်းဖူးများကို ရန်ကုန်မြို့နှင့် နယ်မြို့များသို့ တင်ပို့ ရောင်းချကြောင်း သိရပါသည်။ ပြောင်းဖူးများဈေးကောင်း ရရှိသောကြောင့် အမြတ်များ များရရှိသည်ဟု သိရပါသည်။

DOCA(ပဲခူး)

     ပဲခူးတိုင်းဒေသကြီး၊ ပြည်ခရိုင်၊ ရွှေတောင်မြို့နယ်၊ မီးလောင်အုပ်စု၊ အင်္ဂလှိုင်ဝန်ကျေးရွာရှိ တောင်သူ ဦးတိုးဌေး ပိုင်ဆိုင်သော တို့သခွားသီးစိုက်ခင်းသို့ (၃.၄.၂၀၂၅)ရက်နေ့၊ နံနက်(၁၀:၀၀) နာရီအချိန်တွင် သွားရောက်ကွင်းဆင်းလေ့လာခဲ့ပါသည်။ သခွားစိုက်ဧကမှာ (၂)ယောက်စိုက် (ဧကဝက်)ရှိပြီး ပြာသိုလတွင် စတင်၍ အစေ့ချစိုက်ပျိုးပြီး (၂)လခွဲကြာ တပေါင်းလတွင် စတင်ခူးဆွတ်ရောင်းချရပါသည်။ စတင်ခူးဆွတ်ချိန်တွင် တစ်နေ့လျှင် အလုံးပေါင်း (၁၀၀၀)ကျော် ခူးဆွတ်ရရှိပြီး နောက်ပိုင်းအသီးများတိုးလာချိန်တွင် တစ်နေ့အလုံးပေါင်း (၅၀၀၀-၆၀၀၀)ထိ ခူးဆွတ် ရနိုင်ကြောင်း သိရှိရပါသည်။ အသီးပေါ်မူတည်ပြီး တစ်ရက်ခြား နှစ်ရက်ခြား၍ ခူးဆွတ် ရပါသည်။ သခွားသီးများကို တစ်လကြာခူးဆွတ်ရောင်းချရပါသည်။ သခွားသီးရောင်းဈေးမှာ တစ်လုံးလျှင် (၁၀၀)ကျပ်ဖြင့် ပွဲစားများမှ လာရောက်သိမ်းယူကြပြီး ရန်ကုန်မြို့သို့ တင်ပို့ရောင်း ချကြပါသည်။ စုစုပေါင်းကုန်ကျစရိတ် မှာ(၅)သိန်းကျော်ကုန်ကျပြီး အကျိုးအမြတ်မှာ (၁၅)သိန်းဝန်း ကျင်လောက် ခန့်မှန်းရရှိနိုင်ကြောင်း သိရှိခဲ့ရပါသည်။

DOCA(ပဲခူး)

    ပြည်မြို့ပေါ်ရှိ ဈေးများတွင် ဖေဖော်ဝါရီလနောက်ဆုံးပတ်မှစ၍ ဟင်းချိုချက်၍ စားသောက် ရသော ပုတက်စာများ အရောင်းအဝယ်ဖြစ်လျက်ရှိပါသည်။ နွေရာသီပုတက်စာများပေါများချိန် ဖြစ်သည့်အတွက် ပြည်အနီးတဝိုက်နှင့်‌ ရွှေတောင်ဘက်မှဝင်ရောက်မှုရှိပါသည်။ ပြည်မြို့မှတစ်ဆင့် ရန်ကုန်မြို့သို့လည်း တင်ပို့ရောင်းချကြောင်းသိရပါသည်။ ရာသီစာဟင်းသီးဟင်းရွက်ဖြစ်၍ အဝင်ရှိ သလောက်‌ ရောင်းချမှုလည်း ရှိပါသည်။ ဈေးနှုန်းမှာ ပုတက်စာ(၂)ပင်၊ (၃)ပင်စည်း တစ်စည်းလျှင် (၂၀၀-၃၀၀)ကျပ်ခန့်ရှိပြီး တစ်ခါချက်လျှင် (၃)စည်းခန့် ချက်ပြုတ်၍ ဘူးသီး၊ ပုဇွန်ခြောက်တို့ဖြင့် ရောနှောကာ ချက်ပြုတ်စား သောက်ရကြောင်း သိရပါသည်။

DOCA(ပဲခူး)