ပြည်တွင်းကုန်သွယ်မှုသတင်း

    စစ်ကိုင်းတိုင်းဒေသကြီး၊ ကန့်ဘလူခရိုင်၌ ဆီထွက်သီးနှံဖြစ်သည့် နေကြာသီးနှံများလည်း စိုက်ပျိုးကြကြောင်း၊ မိုးစိုက်နေကြာနှင့် ဆောင်းစိုက်နေကြာဟူ၍(၂)မျိုးရှိကြောင်း ဆောင်းနေကြာ ကိုရာသီဥတုပေါ်မူတည်၍ အောက်တိုဘာလတွင် စတင်စိုက်ပျိုးကြပြီး ဖေဖော်ဝါရီလတွင် ရိတ်သိမ်း ရကြောင်း၊ ဈေးကွက်အနေဖြင့် နေကြာသီးနှံများကို ကန့်ဘလူမြို့နှင့်ဇီးကုန်းမြို့တို့ရှိ ပွဲရုံများမှ ရွှေဘိုမြို့၊ မန္တလေးမြို့များရှိပွဲရုံများနှင့် ကုန်စည်ဒိုင်များသို့ တင်ပို့ရောင်းချကြောင်း သိရသည်။

    နေကြာသီးနှံစိုက်ပျိုးရာတွင် မျိုးအနေဖြင့် ဆင်းရွှေကြာ-၂ မျိုးကို အများဆုံးစိုက်ပျိုးကြပြီး၊ မြေအနေအထားနှင့် အပင်ပြုစုခြင်းအပေါ်မူတည်၍ အထွက်နှုန်းကွာခြားမှုရှိကြောင်း၊ ဈေးနှုန်းအနေဖြင့် ဧပြီလ ပထမပတ်အတွင်း နေကြာ(၁)တင်းလျှင် (၅၈၀၀၀)ကျပ်ဖြင့် အရောင်းအဝယ်ဖြစ်ခဲ့ပြီး ဧပြီလ ဒုတိယပတ်တွင်နေကြာ(၁)တင်းလျှင် (၅၇၀၀၀)ကျပ်ဖြင့် ရောင်းဝယ်လျက်ရှိသောကြောင့် နေကြာ(၁)တင်းလျှင် (၁၀၀၀)ကျပ် ကျဆင်းသွားကြောင်း ဒေသတွင်းပွဲရုံလုပ်ငန်းရှင်များထံမှ သိရ သည်။

DOCA(စစ်ကိုင်း)

    စစ်ကိုင်းတိုင်းဒေသကြီး၊ ကန့်ဘလူခရိုင်၊ ကန့်ဘလူမြို့နယ်တွင် စပါးနှင့်ဆီထွက်သီးနှံများအပြင် ကြက်ဆူစေ့သီးနှံများလည်း စိုက်ပျိုးကြောင်း၊ ကြက်ဆူစေ့ကို ယာကွက်လွတ်များ၌လည်းကောင်း၊ ယာခင်းဘေးပတ်လည်၌လည်းကောင်း၊ ကြဲပက်စနစ်နှင့် တန်းစိုက်စနစ်တို့ဖြင့် စိုက်ပျိုးကြကြောင်း၊ ကြက်ဆူစေ့သီးနှံများသည် ကန့်ဘလူမြို့နယ် ကံကြီးကုန်းကျေးရွာ၊ တောက္ကရှပ်ကျေးရွာနှင့် အခြားသောကျေးရွာများမှ ဝင်ရောက်လျက်ရှိပြီး ကြက်ဆူစေ့သည် စိုက်ပျိုးရလွယ်ကူပြီး ဈေးကောင်းရသဖြင့် စိုက်ပျိုးသူများအနေဖြင့် အပိုဝင်ငွေရရှိကာ မိသားစုအဆင်ပြေလျက်ရှိကြောင်း သိရသည်။

   ၂၀၂၅ ခုနှစ်၊ ဧပြီလဒုတိယပတ်အတွင်း ဈေးနှုန်းမှာ ကြက်ဆူစေ့တစ်တင်းလျှင် (၃၄၀၀၀) ကျပ်၊ ကြက်ဆူစေ့ညံ့လျှင်(၃၃၀၀၀)ကျပ်ဖြင့် အရောင်းအဝယ်ဖြစ်လျက်ရှိကြောင်း၊ ဈေးကွက်အနေ ဖြင့်ကန့်ဘလူမြို့နယ်မှထွက်ရှိသော ကြက်ဆူစေ့များကို ရွှေဘိုမြို့နှင့်မန္တလေးမြို့ရှိ ပွဲရုံများ၊ ကုန်စည်ဒိုင်များသို့ တင်ပို့လျက်ရှိကြောင်း သီးနှံရောင်းဝယ်ရေး လုပ်ငန်းရှင်များထံမှ သတင်းရရှိသည်။

DOCA(စစ်ကိုင်း)

    နတ်တလင်းခရိုင်၊ ပေါင်းတည်မြို့နယ် နွယ်ချို(၁) ရပ်ကွက်၊ လမ်း(၂၀)တွင် တပိုင်တနိုင် ငါးမုန့်ခြောက်လုပ်ငန်း  လုပ်ကိုင် ဆောင်ရွက်နေသော ဒေါ်မျိုးမျိုး မုန့်ခြောက်လုပ်ငန်းအား စားသုံးသူရေးရာဦးစီးဌာန၊ ပေါင်းတည်မြို့နယ်တာဝန်ခံရုံး ၊ ဝန်ထမ်းများက မုန့်ခြောက်ထုတ်လုပ် နေမှု အားသွားရောက်မေးမြန်းခဲ့ပါသည်။

     ငါးမုန့် ခြောက်ပြုလုပ်ရာတွင် ပါဝင် ပစ္စည်းများအနေဖြင့် ကော်မှုန့်၊ ဂျင်း၊ ကြက်သွန်ဖြူ၊ ပဲမှုန့်၊ ဆားတို့ပါဝင်ကြောင်းသိရပါသည်။ ထိုနောက် ပါဝင်ပစ္စည်းများကို အချိုးကျပေါင်းစပ်ပြီး သမအောင် မွှေပေးရပါသည်။ ရရှိလာသောမုန့်နှစ်များအား မီးဖြင့်ပေါင်း၍  အပြားချပ်လေးများပြု  လုပ်ကာ နေလှမ်းပေးရကြောင်းသိရပါသည်။  ကော်မှုန့်တစ်အိတ်ပြုလုပ်လျင် ငါးမုန့် (၂၅)ပိဿာခန့်  ရရှိပြီး၊ ကုန်ကျစရိတ်အနေဖြင့် အလုပ်အသမားခအပါအဝင် (၁၄၄၀၀၀)ကျပ်ကုန်ကျပြီး၊ တစ်ပိဿာလျင် (၈၀၀၀)ကျပ်နှုန်း ဒေသတွင်းမြို့နယ်များသို့ ဖြန့်ဖြူးရောင်းချရပါကြောင်း၊ အကျိုး အမြတ်အားဖြင့် (၅၆၀၀၀)ကျပ် ရရှိကြောင်း လုပ်ငန်းရှင်ထံမှ သိရပါသည်။

DOCA(ပဲခူး)

   ပေါင်းတည်မြို့ရှိ ရွေတည်ဈေးနှင့် မြို့မဈေးတွင် ယခု ဧပြီလ ပထမအပတ်အတွင်း ရောင်းချနေသော သား၊ ငါးဈေးနှုန်းနှင့် အခြေခံကုန်းဈေးနှုန်းများမှာ CPကြက် တစ်ပိဿာ (၂၃၀၀၀)ကျပ်၊ ဗမာ   ကြက်တစ်ပိဿာ (၂၆၀၀၀)ကျပ်၊ အမဲသား တစ်ပိဿာ (၂၃၀၀၀) ကျပ်၊ ဝက်သား တစ်ပိဿာ (၃၀၀၀၀)ကျပ်၊ ပုဇွန်ထုတ်ကြီး တစ်ပိဿာ (၆၀၀၀၀)ကျပ်၊ ငါးခူတစ်ပိဿာ (၂၃၀၀၀)ကျပ်၊ အခြေခံစားကုန်များဖြစ်သော ကြက်သွန်နီ ထိပ်စ တစ်ပိဿာ (၃၀၀၀)ကျပ်၊ အသေးတစ်ပိဿာ   (၂၅၀၀)ကျပ်၊ ကြက်သွန်ဖြူ ကြူကုတ် တစ်ပိဿာ (၂၅၀၀၀)ကျပ်၊ ကြက်သွန်ဖြူဥ တစ်လုံး တစ်ပိဿာ (၃၅၀၀၀)ကျပ်၊ အာလူးအကြီး တစ်ပိဿာ (၈၀၀၀)ကျပ်၊ အာလူးအသေး တစ်ပိဿာ (၅၀၀၀)ကျပ်နှုန်းဖြင့် ရောင်းချနေကြောင်း စုံစမ်းသိရပါသည်။

DOCA(ပဲခူး)

   နတ်တလင်းခရိုင် ၊ နတ်တလင်းမြို့ ၊ မြို့မဈေး၊ အာရုံဈေးနှင့် ညဈေးတို့တွင် ငါးကြင်း ၊ ငါးခူ၊ ငါးရံ့ ၊ ငါးဇရိုင်းစသည့် ငါးများကိုရောင်းချလျက်ရှိပါသည်။

   ၂၀၂၅ ခုနှစ်  ဧပြီလ ပထမအပတ်တွင် ရောင်းချနေသော ငါးဈေးနှုန်းများမှာ ရန်ကုန် ငါးကြင်း တစ်ပိဿာ (၂၂၀၀၀)ကျပ် ၊ ငါးကြင်းဖြူ တစ်ပိဿာ (၂၄၀၀၀)ကျပ် ၊ အင်းမငါးကြင်း တစ်ပိဿာ (၁၅၀၀၀) ကျပ် ၊ ငါးခူ တစ်ပိဿာ (၂၀၀၀၀)ကျပ် ၊ငါးရံ့ တစ်ပိဿာ (၁၅၀၀၀)ကျပ် ၊ ငါးဇရိုင်းတစ်ပိဿာ (၁၀၀၀၀)ကျပ်၊  ၊ ငါးကြင်းခြစ် တစ်ပိဿာ (၂၂၀၀၀)ကျပ် ၊ ငါးဖယ်ခြစ် တစ်ပိဿာ (၃၀၀၀)ကျပ် ၊ ငါးကျည်းတစ်ပိဿာ (၂၀၀၀၀)ကျပ်နှုန်းများဖြင့် ရောင်းချလျှက်ရှိပြီး ငါးသလောက် တစ်ပိဿာ (၃၀၀၀၀)ကျပ်နှင့် ငါးဘတ် တစ်ပိဿာ ဈေးနှုန်းမှာ (၁၅၀၀၀)ကျပ်နှုန်းဖြစ်ပြီး ယခင်ဖေဖေါ်ဝါရီလ နောက်ဆုံးပတ်တွင် ရောင်းချနေသော ငါးဈေးနှုန်းများနှင့် နှိုင်းယှဉ်ပါက တချို့ငါးဈေးနှုန်းများက ပြောင်းလဲမှုမရှိဘဲ ငါးကြင်း ခြစ်နှင့်ငါးဖယ်ခြစ် ဈေးနှုန်းများကတော့ အနည်းငယ် မြင့်တက်နေကြောင်း သိရှိရပါသည်။

DOCA(ပဲခူး)