ပြည်တွင်းကုန်သွယ်မှုသတင်း

     ကရင်ပြည်နယ်၊ ဘားအံမြို့၏ ဈေးကွက်တွင် နွေရာသီပေါ်သံပုရာသီးများဈေးကောင်းရလျက်ရှိကြောင်း သိရပါသည်။ သံပုရာသီးကို ဘားအံမြို့အနီးတဝိုက်ကျေးရွာများတွင် တစ်နိုင်တစ်ပိုင် စိုက်ပျိုးကြသည့်အပြင် စီးပွားဖြစ်လည်း စိုက်ပျိုးကြပါသည်။ ဘားအံမြို့ ဈေးကွက်အတွင်းသို့ ဝင်ရောက်လာသော သံပုရာသီးများမှာ ဘားအံမြို့အနီးရှိ ကျေးရွာများနှင့် ကြာအင်းဆိပ်ကြီး၊ မော်လမြိုင် ရေးမြို့တို့ဘက်မှဖြစ်သည်။ မြန်မာသံပုရာသီးအိတ်ကြီး တစ်အိတ်လျှင် (၄၅၀၀၀၀၊၅၀၀၀၀၀) ကျပ်ဖြစ်ပြီး တစ်အိတ်တွင်အလုံးရေ ၁၆၀၀ မှ ၁၇၀၀ ထိပါရှိသည်။ သံပုရာသီးအလုံးချော (အကြီး)တစ်လုံးလျှင် (၆၀၀၊၇၀၀) ကျပ်၊ အနေတော်တစ်လုံးလျှင် (၅၀၀)ကျပ်နှင့် ယိုးဒယားမျိုးစပ်သံပုရာသီး သံပုရာသီးအလုံး ချော(အကြီး)တစ်လုံးလျှင် (၅၀၀) ကျပ်၊ အနေတော်တစ်လုံးလျှင် (၄၀၀)ကျပ်၊ သံပုရာသီးအလုံး ချော(ငယ်)တစ်လုံးလျှင် (၃၀၀ကျပ် နှင့် ၃လုံး ၁၀၀၀ကျပ်) တို့ဖြင့် အရောင်းအဝယ် ဖြစ်နေကြောင်း၊ စိုက်တောင်သူများအနေဖြင့် ယခုနှစ်တွင် ဈေးကောင်းရ၍ တွက်ချေကိုက်လျက်ရှိကြောင်း ၊ သံပုရာသီး၊ရှောက်သီးကို ကရင်ပြည်နယ် ကြာအင်းဆိပ်ကြီးမြို့နယ်တွင် အများဆုံး စိုက်ပျိုးကြောင်း သိရှိရပါသည်။

DOCA(ကရင်)

      မွန်ပြည်နယ်၊ မုဒုံမြို့နယ်ရှိ ကျေးရွာများနှင့် မြို့အနီးအနားဝန်းကျင်တွင် တစ်နိုင်တစ်ပိုင် နွေစံပယ်များကိုစိုက်ပျိုးကြရာ အောင်မြင်ဖြစ်ထွန်းပြီး တောင်သူများအဆင်ပြေလျက်ရှိကြောင်းသိရသည်။

   စံပယ်ပင်များကို ပျိုးပင်များနှင့် ကိုင်းဖြတ်ကိုင်းကူးနည်းစနစ်များဖြင့် မိုးဦးကျကာလ ဇွန်လနှင့်ဇူလိုင်လတို့၌ အများဆုံးစိုက်ပျိုးကြပြီး မိုးနှောင်းကာလ စက်တင်ဘာနှင့် အောက်တိုဘာလမှစ၍ ပန်းအငုံများစတင်ထွက်ရှိသည်။ သဘာဝမြေသြဇာကျွေးခြင်းနှင့် ပေါင်းသင်မြေဆွပေးခြင်းတို့ကို စနစ်တကျဆောင်ရွက်ပါက အပွင့်များလှိုင်လှိုင်ထွက်ရှိကြောင်း၊ စံပယ်ပင်(၁၀၀)ပင်စိုက်ပျိုးလျှင် ကုန်ကျစရိတ်မှာ (၁၅၀၀၀၀) ကျပ်ခန့်ရှိ၍ တစ်နှစ်လျှင် ဝင်ငွေ ကျပ်(၃၀၀၀၀၀)ကျော်ရရှိသဖြင့် တွက်ချေကိုက်ကြောင်း စံပယ်ပန်းစိုက်ပျိုးတောင်သူတစ်ဦးက ပြောကြားခဲ့သည်။

        စံပယ်ပန်းစိုက်ပျိုးရေးလုပ်ငန်းကို မိသားစုတစ်နိုင်တစ်ပိုင်အပိုဝင်ငွေရရှိရေးအတွက် ဒေသခံပြည်သူများက အိမ်ခြံဝင်းများ၊ မြေကွက်လပ်နေရာများတွင် စိုက်ပျိုးကြပြီး ဥယျာဉ်ခြံများဖြင့်လည်း စနစ်တကျတွင်ကျယ်စွာစိုက်ပျိုးရောင်းချသူများလည်းရှိကြောင်းသိရှိရပါသည်။

DOCA(မွန်)

     မကွေးတိုင်းဒေသကြီး၊ ပခုက္ကူခရိုင်၊ ဆိပ်ဖြူမြို့နယ်သည် ဆန်လိုဒေသဖြစ်သောကြောင့် ဆန်စပါးအများဆုံးစိုက်ပျိုးထွက်ရှိရာ ဒေသများဖြစ်သော အခြားတိုင်းဒေသကြီးများနှင့် မြို့နယ်များမှ ဆန်များဝယ်ယူတင်သွင်းလျက်ရှိသော မြို့ဖြစ်ပါသည်။ မကွေးတိုင်းဒေသကြီး၊ ဆင်ဖြူကျွန်း၊ စလင်း၊ ရှောက်တော၊ တောင်တွင်းကြီးမြို့များနှင့် ဧရာဝတီတိုင်းဒေသကြီး၊ ပုသိမ်၊ မြောင်းမြမြို့များ၊ စစ်ကိုင်းတိုင်းဒေသကြီး၊ ရွှေဘိုဒေသများမှလည်း ကုန်းလမ်းမှ မော်တော်ယာဉ်များဖြင့် ဝင်ရောက်လျက်ရှိသည်။ ဧပြီလ(ပထမပတ်)တွင် ဆန်(အသစ်နှင့်အဟောင်း)များ ဝင်ရောက်လျက်ရှိကြောင်းသိရှိရသည်။

       ဧပြီလ(ပထမပတ်)တွင် ဆန်ဈေးနှုန်းများမှာ ဆင်ဖြူကျွန်း ဧရာပဒေသာဆန်တစ်အိတ်လျှင် ကျပ်(၁၇၀၀၀၀)၊ စလင်းဆန် ဒို့ရွှေအိုး(အဟောင်း) တစ်အိတ်လျှင် ကျပ်(၁၆၅၀၀၀)၊ စလင်းဆန် ဒို့ရွှေအိုး(အသစ်)တစ်အိတ်လျှင် ကျပ်(၁၅၅၀၀၀)၊ ဆင်ဖြူကျွန်း မနောသုခဆန် (အဟောင်း) တစ်အိတ်လျှင် ကျပ်(၁၃၃၀၀၀)၊ ဆင်ဖြူကျွန်း မနောသုခဆန်(အသစ်)  တစ်အိတ်လျှင် ကျပ် (၁၁၀၀၀၀)၊ ဆင်းသုခ ဆင်ဖြူကျွန်း(အဟောင်း)တစ်အိတ်လျှင် ကျပ်(၁၃၅၀၀၀)၊ မနောသုခ ဆင်ဖြူကျွန်းဆန်(အဟောင်း) တစ်အိတ်လျှင် ကျပ်(၁၃၅၀၀၀)၊ မနောသုခ ဆင်ဖြူကျွန်းဆန် (အသစ်) တစ်အိတ်လျှင် ကျပ်(၁၂၀၀၀၀)၊ မြန်မာပြည်အောက်ပိုင်းရှိ မြောင်းမြဧရာပဒေသာဆန် (အဟောင်း) တစ်အိတ်လျှင် ကျပ်(၁၃၃၀၀၀)၊ မြောင်းမြရာပြည့် ဖန်သီးဆန်(အဟောင်း) တစ်အိတ်လျှင် ကျပ်(၁၀၀၀၀၀)၊ မြောင်းမြဆန် စိန်ပုလဲသု(အဟောင်း) တစ်အိတ်လျှင် ကျပ်(၁၀၀၀၀၀)၊ ဖန်သီး အောင်တံခွန်ဆန်(အဟောင်း) တစ်အိတ်လျှင် ကျပ်(၁၀၀၀၀၀)ဖြင့် အရောင်းအဝယ်ဖြစ်လျက်ရှိပြီး ရွှေဘိုပေါ်ဆန်းမွှေး(အဟောင်း)တစ်အိတ်လျှင် ကျပ်(၁၈၀၀၀၀)၊ ရွှေဘိုပေါ်ဆန်းမွှေး(အသစ်) တစ်အိတ်လျှင် ကျပ်(၁၆၈၀၀၀)၊ မြောင်းမြပေါ်ဆန်း(အဟောင်း)တစ်အိတ်လျှင် ကျပ်(၁၈၀၀၀၀)၊ မြောင်းမြပေါ်ဆန်း(အသစ်) တစ်အိတ်လျှင် ကျပ်(၁၅၀၀၀၀)၊ ကောက်ညှင်းဆန်(အသစ်) တစ်ပြည်လျှင် ကျပ်(၆၀၀၀)၊ ကောက်ညှင်းဆန်(အသစ်) တစ်အိတ်လျှင် ကျပ်(၁၄၀၀၀၀)၊ ငချိတ်ဆန်တစ်ပြည်လျှင် ကျပ်(၇၅၀၀)ဈေးနှုန်းဖြင့် အရောင်းအဝယ်ဖြစ်‌နေကြောင်းသိရှိရပါသည်။

       ယခင်မတ်လ(ပထမပတ်)နှင့် ယခုဧပြီလ(ပထမပတ်) ဈေးနှုန်းတို့နှိုင်းယှဉ်ကြည့်လျှင် ဈေးအတက်အကျမရှိဘဲ ဈေးငြိမ်၍ အရောင်းအဝယ်ဖြစ်လျက်ရှိကြောင်း ဆန်ရောင်းဝယ်ရေးလုပ်ငန်းရှင်ထံမှသိရှိရပါသည်။

DOCA(မကွေး)         

    မကွေးတိုင်းဒေသကြီး၊ ပခုက္ကူခရိုင် ပဲစင်းငုံနီစိုက်ပျိုးရာဒေသများဖြစ်သော ပခုက္ကူမြို့နယ်ရှိ ကျေးရွာများဖြစ်သည့် ချေက်ကန်အုပ်စု၊ အရှေ့ချောက်ကန်၊ အနောက်‌ချောက်ကန်၊ လက်ပံကန်၊ မန်ကျည်းကိုးပင်နှင့် အင်ပင်၊ ကိုင်းအုပ်စုကျေးရွာများ၊ ကန်တော်၊ ကံလှကျေးရွာများတွင် ပဲစင်းငုံနီများကို သီးညှပ်သီးထပ်အဖြစ်စိုက်ပျိုးကြပြီး ယခုအချိန်တွင် ပဲစင်းငုံနီများကို ရိတ်သိမ်းပြီးစီးကြောင်း တောင်သူများထံမှသိရှိရပါသည်။ ပခုက္ကူကုန်စည်ဒိုင်တွင် ပခုက္ကူဒေသထွက် ပဲစင်းငုံနီများသာမက မြိုင်နှင့်အခြားနယ်များဖြစ်သော မန္တလေးတိုင်းဒေသကြီးအတွင်းရှိ ကျောက်ပန်းတောင်း၊ ညောင်ဦးမြို့နယ်အတွင်းရှိ နယ်များဖြစ်သော ငါးသရောက်၊ လက်ပံခြေပေါ်၊ ပုလင်း၊ အောက်ညဉ့်နယ်နှင့် သူကောင်းတည်ရွာများမှထွက်ရှိသော ပဲစင်းငုံနီများလည်း ဝင်ရောက်အရောင်းအဝယ်ဖြစ်လျက်ရှိကြောင်း ကုန်စည်ဒိုင်မှသိရှိရပါသည်။

  ၂၀၂၄ခုနှစ်၊ ဧပြီလ(ပထမပတ်)တွင် ပခုက္ကူကုန်စည်ဒိုင်၌ အရောင်းအဝယ်ဖြစ်လျက်ရှိသော ပဲစင်းငုံနီဈေးနှုန်းမှာ (၂၀)ပိဿာပါ (၁)တင်းလျှင် ကျပ်(၁၂၃၄၀၀)ဖြစ်ပြီး၊ မတ်လ(စတုတ္ထပတ်)တွင် အရောင်းအဝယ်ဖြစ်ပေါ်ခဲ့သော ဈေးနှုန်းများမှာ ပဲစင်းငုံနီ(၁)တင်းလျှင်  ကျပ်(၁၁၈၀၀၀-၁၁၉၄၀၀) ဖြစ်ခဲ့၍ ယခုအပတ်နှင့်နှိုင်းယှဉ်ပါက (၁)တင်းလျှင် ကျပ်(၄၀၀၀)ခန့်ဈေးနှုန်းမြင့်တက်နေကြောင်း၊ အရောင်းအဝယ်ဖြစ်မှုအိတ်ရေမှာ နေ့စဉ်(၂၀၀မှ ၄၀၀)အထိဖြစ်နေပြီး တင်ပို့မှုအနေဖြင့် ကုန်းလမ်းသာမက ရေလမ်းခရီးဖြင့်လည်း  ရန်ကုန်မြို့သို့တင်ပို့နေကြောင်း ကုန်စည်ဒိုင်မှ သတင်းရရှိပါသည်။

DOCA(မကွေး)

    မွန်ပြည်နယ်သည် စိုက်ပျိုးရေးလုပ်ငန်းများ အောင်မြင်ဖြစ်ထွန်းသော ပြည်နယ်ဖြစ်ရာ  မုဒုံမြို့နယ်ရှိ ကျေးလက်ဒေသများနှင့် မြို့အနီးအနားဝန်းကျင် တစ်ဝိုက်တွင် ယိုးဒယားပိန္နဲသီးမျိုးများ စိုက်ပျိုးမှုဖြစ်ထွန်း၍ ယခုနှစ်တွင် ပိန္နဲသီးများလှိုင်လှိုင်ထွက်ရှိပြီး ဈေးကောင်းရရှိနေကြောင်း သိရသည်။

    ပိန္နဲပင်များကို ပျိုးပင်များနှင့် ကိုင်းဆက်ကိုင်းကူးနည်းဖြင့် စိုက်ပျိုးကြရာ ရိုးရိုးအရိုင်းသီးမျိုးများထက် ယိုးဒယားမျိုးကို အများဆုံးစိုက်ပျိုးကြသည်။ ပိန္နဲပင်သည် နှစ်ရှည်သီးနှံတစ်မျိုးဖြစ်သောကြောင့် စိုက်ပျိုးနည်းစနစ်များ စနစ်တကျမှန်ကန်အောင် ပြုစုရကြောင်း၊ ယိုးဒယားပိန္နဲမျိုးကို စိုက်ပျိုးပြီး (၃)နှစ်ခန့်အကြာတွင် အသီးစတင် ထွက်ရှိကြောင်း၊ ယိုးဒယားမျိုး ပိန္နဲသီးအပင်(၂၀)ကို စိုက်ပျိုးလျှင် တစ်နှစ်ဝင်ငွေ သိန်း(၄၀)ခန့်ရရှိနိုင်ကြောင်း ဘဲရမ်း ကျေးရွာနေ ပိန္နဲသီးစိုက် တောင်သူတစ်ဦးကပြောသည်။

     မုဒုံမြို့နယ်တွင် ဒေသထွက် ပိန္နဲသီးများကို တစ်ကီလိုလျှင် ငွေကျပ် (၁၅၀၀) မှ (၂၀၀၀) ကျပ်အထိ ဈေးရရှိပြီး ပိန္နဲသီးတစ်လုံးလျှင် ဒေသပေါက်ဈေး အသီးအရွယ်အစား အလိုက် ငွေကျပ် (၁၂၀၀၀) မှ (၃၀၀၀၀) ကျပ်အထိရရှိကာ မြို့ပေါ်ဈေးများအပြင် မော်လမြိုင်၊ ရန်ကုန်နှင့် အခြားဒေသများသို့ တင်ပို့ရောင်းချလျက်ရှိကြောင်း သိရသည်။

DOCA(မွန်)